ၵူၼ်းဝၢၼ်ႈၵူၼ်းမိူင်း မိူင်းၵူဝ်း ၼႂ်းၸိုင်ႈတႆးပွတ်းႁွင်ႇ 60 ၵေႃႉပၢႆ၊ လႆႈထုၵ်ႇၾၢႆႇသိုၵ်းမၢၼ်ႈ တီႉၺွပ်း ၽွင်းသိုၵ်းမၢၼ်ႈတပ်ႉမတေႃႇ တင်း ၸုမ်းဢူၺ်းလီၸၢဝ်းၶိူဝ်း ပဵၼ်ပၢင်တိုၵ်းၵၼ် ပူၼ်ႉမႃးမိူဝ်ႈဝၼ်းတီႈ 20 ၊ တေႃႇထိုင်မိူဝ်ႈလဵဝ် ၵမ်ႈၼမ်တိုၵ်ႉထုၵ်ႇတီႉၺွပ်းဝႆႉ၊ ပႆႇပွႆႇပၼ်ၶိုၼ်း ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 20/11/2016 ၼၼ်ႉ တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉမတေႃႇတင်း တပ်ႉသိုၵ်းဢူၺ်းလီၸၢဝ်းၶိူဝ်းပွတ်းႁွင်ႇ လႆႈပဵၼ်ပၢင်တိုၵ်းၵၼ်။ မိူဝ်ႈၽွင်းၼၼ်ႉ ၵူၼ်းမိူင်းၼႂ်းပိုၼ်ႉတီႈ ၼႂ်းၸႄႈဝဵင်းမိူင်းၵူဝ်း 60 ၵေႃႉပၢႆ ၸိူဝ်းလုၵ်ႉၼႂ်းပိုၼ်ႉတီႈမိူင်းၵူဝ်းသေ ဢွၵ်ႇၶၢဝ်းတၢင်းၵႂႃႇပၢင်ၶႅၵ်ႇ တီႈဝၢၼ်ႈၽေႃႇၵျုၼ်းပႃႇၼၼ်ႉ လႆႈထုၵ်ႇသိုၵ်းမၢၼ်ႈတီႉၺွပ်းၸွမ်းတႃႈၸွမ်းတၢင်း။ ၵမ်ႈၼမ်ၵူၼ်းၸိူဝ်းၼႆႉ တေႃႇထိုင်ဝၼ်းမိူဝ်ႈၼႆႉ ယင်းပႆႇပွႆႇပၼ်ၶိုၼ်း-ၼႆယဝ်ႉ ။


မိူဝ်ႈၽွင်းၸိူဝ်းၶဝ် လႆႈထုၵ်ႇတီႉၺွပ်းၵႂႃႇမိူဝ်ႈဝၼ်းတီႈ 20 ၼၼ်ႉ တင်းမူတ်းမီးၵူၼ်း 70 ပၢႆ။ ၼႂ်းၼၼ်ႉ ပႃးၸၢဝ်းၶိူဝ်းၶၢင် 12 ၵေႃႉ။ ၵူၺ်းၵႃႈ ထိုင်မႃးဝၼ်းတီႈ 21 မႃး ယွၼ်ႉပိူဝ်ႈၵူၼ်းလူင်ၾၢႆႇတူဝ်တႅၼ်းၶႄႇၶဝ် မႃးဢုပ်ႇဢူဝ်းလၢတ်ႈပၼ်သေ ၵူၼ်းၶၢင် 12 ၵေႃႉၼၼ်ႉ သိုၵ်းမၢၼ်ႈပွႆႇပၼ်ၶိုၼ်းဝၼ်းတီႈ 21 ၼၼ်ႉ။ ၽိူဝ်ႇထိုင်မႃးဝၼ်းတီႈ 25 ပွႆႇပၼ်ၸၢဝ်းၶိူဝ်းမၢၼ်ႈထႅင်ႈ 2 ၵေႃႉ။ လိူဝ်ၸိူဝ်းၼၼ်ႉ ယင်းပႆႇပွႆႇပၼ်ၶိုၼ်း- ၾၢႆႇၼႅင်ႈသၢၼ်လွင်ႈငမ်းယဵၼ်ၶၢင် ႁဵတ်းလိၵ်ႈပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 29/11/2016 ၼင်ႇၼႆ ။


ဢူးၵွင်ႇသျႃႇဢွင်ႇ ၼႅင်ႈသၢၼ်ၾၢႆႇလွင်ႈငမ်းယဵၼ်ၶၢင် လၢတ်ႈဝႃႈ- တီႈမိူင်းၵူဝ်းၵေႃႈ ယင်းတိုၵ်ႉပဵၼ်ပၢင်တိုၵ်း ၵၼ်ယူႇတိၵ်းတိၵ်း၊ ၵူၼ်းမိူင်းၸိူဝ်းထုၵ်ႇ ၾၢႆႇတပ်ႉမတေႃႇၶဝ်တီႉၺွပ်းဝႆႉၵေႃႈ ယင်းပႆႇပွႆႇပၼ်ၶိုၼ်း တေႃႇထိုင်ဝၼ်းမိူဝ်ႈၼႆႉ။ ၶဝ်ပဵၼ်ၵူၼ်းမိူင်းထမ်းမၻႃးၵူၺ်း ဢမ်ႇၸႂ်ႈၵူၼ်းသိုၵ်း ၸုမ်းယိပ်းၵွင်ႈၵၢင်ႇ။ ၵူၼ်းမိူင်းၵူဝ်းတႄႉပၢႆႈၶဝ်ႈမိူင်းၶႄႇမူတ်းယဝ်ႉ၊ ၼင်ႇႁိုဝ်ၶဝ်တေၸဵဝ်းပွႆႇပၼ်ၵူၼ်းမိူင်း ၸိူဝ်းဢၼ်ၺႃး တီႉၺွပ်းၼၼ်ႉ ႁဝ်းၶႃႈၸင်ႇလႆႈမႃး ဢွၵ်ႇၶေႃႈပိုၼ်ၽၢဝ်ႇ- ဝႃႈၼႆ ။


ၼႂ်းၶေႃႈပိုၼ်ၽၢဝ်ႇၸုမ်းၶၢင် ဢၼ်ဢွၵ်ႇမိူဝ်ႈဝၼ်းတီႈ 29/11/2016 ၼၼ်ႉ ပႃးဝႆႉဝႃႈ ၵၢၼ်တီႉၺွပ်းၵူၼ်းမိူင်း ၼႂ်းၼႃႈလိၼ်ပၢင်တိုၵ်းသိုၵ်းသိူဝ်ၼႆႉ မၼ်းပဵၼ်ၵၢၼ်ပူၼ်ႉပႅၼ်ၶေႃႈလႆႈၸႂ် ၶေႃႈၵိၼ်ၵႅၼ်ႇ ၵျႅၼ်ႊၼီႊဝိူဝ်ႊ ဢၼ်ပဵၼ်မၢႆမီႈတႃႇႁႄႉၵင်ႈၵူၼ်းမိူင်း၊ ၵွပ်ႈၼၼ်လႄႈ ႁႂ်ႈပွႆႇပၼ်ၵူၼ်းမိူင်းၶိုၼ်းဝႆးဝႆး- ၼႆယူႇ ။


တီႈမိူင်းၵူဝ်းၼႆႉ ၸႄႈတွၼ်ႈမူႇၸေႈ ၼႂ်းၸိုင်ႈတႆးပွတ်းႁွင်ႇၼႆႉ တင်ႈတႄႇဝၼ်းတီႈ 20/11/2016 မႃး လႆႈပဵၼ်ပၢင်တိုၵ်းဝူင်ႈၵၢင် တပ်ႉသိုၵ်းမၢၼ်ႈလႄႈ ၸုမ်းဢူၺ်းလီပွတ်းႁွင်ႇ မႃးႁၢဝ်ႈႁႅင်း၊ ၾၢႆႇတပ်ႉသိုၵ်းမၢၼ်ႈ လႆႈၸႂ်ႉတပ်ႉၵၢင်ႁၢဝ် ၸႂ်ႉႁိူဝ်းဝိၼ်တိုၵ်းသိုၵ်းမႃးပွႆႇမၢၵ်ႇလူင်ၸွႆႈ ၼႂ်းၵၢၼ်သိုၵ်း ။