ယွၼ်ႉပိူဝ်ႈပၢင်တိုၵ်းတီႈလႅၼ်ၶႅၼ်ႈ မိူင်းၶၢင်-မိူင်းတႆးလႄႈ ၶူဝ်ၼမ်ႉမၢဝ်း ဢၼ်လုၵ်ႉဝဵင်းၼမ်ႉၶမ်း (မိူင်းတႆး) ၶၢမ်ႈၵႂႃႇၸူးမၢၼ်ႈဝဵင်း မၢၼ်ႈၸေႈ (ၸႄႈမိူင်းၶၢင်)ၼၼ်ႉ တိုၵ်ႉပိၵ်ႉဢိုတ်းဝႆႉတေႃႇမိူဝ်ႈလဵဝ်၊ ႁဵတ်းႁႂ်ႈၵူၼ်းမိူင်း ၶၢင်ႉၶမ်ၵၢင်တႃႈၵၢင်တၢင်း ႁူပ်ႉထူပ်းတၢင်းယၢပ်ႇၽိုတ်ႇ ။

ယွၼ်ႉပိူဝ်ႈပၢင်တိုၵ်း ၼႂ်းဝူင်ႈၵၢင်တပ်ႉဢူၺ်းလီၸၢဝ်းၶိူဝ်းပွတ်းႁွင်ႇ တင်းတပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်တႄႇပဵၼ်မႃးမိူဝ်ႈဝၼ်းတီႈ 20/11/2016 တီႈႁိမ်းလႅၼ်လိၼ်မိူင်းၶၢင်-မိူင်းတႆးၼၼ်ႉ တေႃႇထိုင် ယၢမ်းလဵဝ်ၼႆႉ ယွၼ်ႉငဝ်းလၢႆးဢမ်ႇပႆႇၵတ်းယဵၼ်လႄႈ ဢၼ်ပဵၼ်ၶူဝ်ၼမ်ႉမၢဝ်း၊ ၶူဝ်ၵၢႆႇၶၢမ်ႈၸူးၵၼ် ၾင်ႇမိူင်းတႆးတင်းမိူင်းၶၢင် မိူင်းၼမ်ႉၶမ်းတင်းမၢၼ်ႈဝဵင်းၼၼ်ႉ ယင်းပႆႇပိုတ်ႇပၼ်ၵူၼ်းဝၢၼ်ႈၵူၼ်းမိူင်း ဢွၵ်ႇၶၢဝ်းတၢင်းၵႂႃႇမႃးၵႃႉၶၢႆ။ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ယင်းတိုၵ်ႉလႆႈၶမ်ဝႆႉတီႈၶူဝ်၊ လွင်ႈၵၢၼ်တိတ်းတေႃႇၵပ်းသိုပ်ႇၵေႃႈၶၢတ်ႇဝႆႉ- ၾၢႆႇပႃႇတီႇႁူဝ်သိူဝ်လၢတ်ႈ ။


ၶူဝ်လင်ၼႆႉ ပဵၼ်ၶူဝ်ဢၼ်ၵၢႆႇၶၢမ်ႈၸူးၵၼ်ဝူင်ႈၵၢင် မၢၼ်ႈဝဵင်းၵျီး ၼႂ်းၸႄႈဝဵင်းမၢၼ်ႈၸေႈ (ၸႄႈမိူင်းၶၢင်) တင်းၸႄႈဝဵင်းၼမ်ႉၶမ်း။ ပိၵ်ႉဢိုတ်းတင်ႈတႄႇဝၼ်းတီႈ 20/11/2016 မႃး၊ တေပိုတ်ႇပၼ်ၶိုၼ်းမိူဝ်ႈလႂ်ၵေႃႈ ယင်းပႆႇမီးလွင်ႈပိုၼ်ၽၢဝ်ႇ။ ၸိူဝ်းပဵၼ်ၵူၼ်းဝၢၼ်ႈၵူၼ်းမိူင်း သွင်ႇၾၢႆႇၵေႃႈထူပ်းတၢင်းယၢပ်ႇၽိုတ်ႇ လွင်ႈဢွၵ်ႇၶၢဝ်းတၢင်း ၵႂႃႇမႃးတိတ်းတေႃႇၵပ်းသိုပ်ႇၵၼ်။ ၵူၼ်းဝၢၼ်ႈၵူၼ်းမိူင်းၸိူဝ်းယူႇၾင်ႇၼႆႉ ၶမ်ဝႆႉယူႇတၢင်းၾၢႆႇမၢၼ်ႈဝဵင်းပုၼ်ႉ ၵေႃႈမီးတင်းၼမ်-ၸၢႆးၸိၼ်ႇမိၼ်းဢေး ၽွင်းတႅၼ်းပႃႇတီႇႁူဝ်သိူဝ် လၢတ်ႈ ။


" ၾၢႆႇတၢင်းမၢၼ်ႈဝဵင်းၼႆႉ ပိၵ်ႉဢိုတ်းဝႆႉႁိုင်ယဝ်ႉ၊ ၵူၺ်းၵႃႈမိူဝ်ႈလဵဝ် သမ်ႉပိၵ်ႉပႃးထႅင်ႈသၢႆမၢၼ်ႈဝဵင်း-ၼမ်ႉၶမ်းၼႆလႄႈ ႁဵတ်းႁႂ်ႈၵူၼ်းမိူင်းၵႂႃႇမႃးၵႃႉၶၢႆယၢပ်ႇၽိုတ်ႇလိူဝ်ႁႅင်း၊ သဵင်ၵွင်ႈၵေႃႈလႆႈငိၼ်းၵူႈဝၼ်း၊ မိူၼ်ၼင်ႇတပ်ႉမတေႃႇၵေႃႈ လႆႈတမ်းသိုၵ်းႁူမ်ႇလူမ်ႈၶဝ် ၸွမ်းသၢႆသဵၼ်ႈတၢင်းၵူၺ်းဢမ်ႇၵႃး လႆႈတမ်းသိုၵ်း မႃးထိုင်တီႈလႅၼ်လိၼ်ၸိူင်ႉၼႆလႄႈ တႃႇတေၶၢမ်ႈလႅၼ်လိၼ်သေ ၶဝ်ႈၵႂႃႇတၢင်းမိူင်းၶႄႇၵေႃႈဢမ်ႇၸၢင်ႈ၊ ႁဵတ်းႁႂ်ႈၵူၼ်းမိူင်းၵူဝ်ႁႄ၊ ၵွပ်ႈၼႆ ၼင်ႇႁိုဝ်တေၸဵဝ်းပိုတ်ႇပၼ်ၶိုၼ်းသဵၼ်ႈတၢင်းၼႆႉ ယူႇတီႈၽွင်းတႅၼ်းသၽႃး ၸႄႈမိူင်းသေ လႆႈတၢင်ႇဝႆႉတီႈလူင်ပွင်ၸိုင်ႈယဝ်ႉ"- ၸၢႆးၸိၼ်ႇမိၼ်းဢေး လၢတ်ႈ ။


ဢၼ်ဢမ်ႇၸၢင်ႈၵႂႃႇမႃး၊ ဢၼ်ၶမ်ဝႆႉယူႇတၢင်းမၢၼ်ႈဝဵင်းၼႆႉ ပဵၼ်ၵူၼ်းဝၢၼ်ႈၵူၼ်းမိူင်း ဢၼ်မီးၼႂ်း ၸႄႈဝဵင်းၼမ်ႉၶမ်း 6 ဝၢၼ်ႈ လႄႈၵူၼ်းမိူင်း ၸိူဝ်းမီးၼႂ်းမၢၼ်ႈဝဵင်း 18 ဝၢၼ်ႈ။ ၸိူဝ်းၶဝ်ၼႆႉ တိုၵ်ႉၶမ်ဝႆႉသေ ဢမ်ႇၸၢင်ႈၵႂႃႇမႃးၵႃႉၶၢႆ။ လွင်ႈပၢင်တိုၵ်းၵေႃႈ ယူႇတီႈတၢင်းၼမ်ႉၶမ်းသေ ယင်းလႆႈငိၼ်းသဵင်ၵွင်ႈသဵင်မၢၵ်ႇ ဢၼ်ပဵၼ်ပၢင်တိုၵ်းပွတ်းၼိူဝ်သၼ်လွႆ ၾၢႆႇတၢင်းမၢၼ်ႈဝဵင်းၵျီးၸိူဝ်းၼၼ်ႉယူႇ၊ ပွတ်းၼၼ်ႉ မီးတပ်ႉပၢင်သဝ်းသိုၵ်းၶၢင် (KIA) ။ လႆႈငိၼ်းသဵင်ယိုဝ်းၵၼ်ၵူၺ်းပႆႇပေႃး လႆႈငိၼ်းပႃးသဵင်ႁိူဝ်းဝိၼ် ပွႆႇမၢၵ်ႇလူင်လူင်းမႃးၸိူဝ်းၼႆႉ- ၵူၼ်းၼမ်ႉၶမ်းၶဝ်လၢတ်ႈၼင်ႇၼႆ ။


ဢၼ်ပဵၼ်ပၢင်တိုၵ်းယႂ်ႇလူင်ၼၼ်ႉ ပဵၼ်တီႈၼမ်ႉဝၼ်းပူဝ်ႇ ဢၼ်မီးၾၢႆႇတၢင်းတူၵ်းမၢၼ်ႈဝဵင်း ၸႄႈဝဵင်းမၢၼ်ႈၸေႈ။ မီးၵၢၼ်ပိၵ်ႉဢိုတ်းသဵၼ်ႈတၢင်းဝႆႉ ဢမ်ႇပၼ်ၵူၼ်းဝၢၼ်ႈမႃးဝဵင်း၊ ဢမ်ႇပၼ်ၵူၼ်းဝဵင်းၵႂႃႇၸွမ်းဝၢၼ်ႈ ၸိူဝ်းၼႆႉ ။


ၵူၼ်းၼႂ်းပိုၼ်ႉတီႈၶဝ်လၢတ်ႈဝႃႈ- ၶဝ်တေႃႉၶူဝ်းသိုၵ်းလႄႈတၢင်းၵိၼ်တၢင်းယႅမ်ႉ၊ ပႃးၸဵမ်ဢဝ်ႁိူဝ်းဝိၼ် ၸိူဝ်းၼႆႉတေႃႉသူင်ႇ၊ ပွတ်းတွၼ်ႈၼႆႉ ႁိူဝ်းဝိၼ်သိုၵ်းၵႂႃႇမႃးမီးယူႇၵူႈဝၼ်း- ၼႆယဝ်ႉ ။