ပီႈၼွင်ႉၵူၼ်းမိူင်း ၼႂ်းၸႄႈဝဵင်းမၢၼ်ႈတူင်ႈ ဢွၼ်ၵၼ်ဢွၵ်ႇပၢႆႈၽေးသိုၵ်းမႃးတၢင်း ၼႂ်းၸႄႈ ဝဵင်းၼမ်ႉတူႈ ယွၼ်ႉပၢင်တိုၵ်းသိုၵ်းမၢၼ်ႈတင်းသိုၵ်းတဢၢင်း ။

Photo by SHAN

ဝၼ်းတီႈ 30/11/2016 ယၢမ်းၵၢင်ၼႂ် ပီႈၼွင်ႉၵူၼ်းမိူင်း 170 ၵေႃႉပၢႆ ၼႂ်းၸႄႈဝဵင်းမၢၼ်ႈတူင်ႈ တင်း ဝၢၼ်ႈမိူင်းမေႃႇ ဢွၼ်ၵၼ်ဢွၵ်ႇပၢႆႈ ၽေးသိုၵ်း မႃးတီႈဝတ်ႉသူၺ်ႇယိၼ်ႇတႃႇ၊ ဝတ်ႉၽြႃးလီးသူး၊ ၵျွင်းၽြႃးၶ ရိတ်ႉယၢၼ်ႇၶၢင် ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ၼႆယဝ်ႉ ။


ၼၢင်းၶမ်းဢေး ၽူႈတႅၼ်းသၽႃးၵူၼ်းမိူင်းၸႄႈဝဵင်းၼမ်ႉတူႈ လၢတ်ႈဝႃႈ “ တေႃႈလဵဝ်ဢၼ်ပၢႆႈမႃး ၼႆႉ ဝၢၼ်ႈမိူင်းမေႃႇ၊ တေႃႈလဵဝ် ႁိူၼ်းၶဝ်သမ်ႉၼိုင်ႈႁိူၼ်းလႂ် မီးၵူၼ်းပႂ်ႉႁိူၼ်းၼိုင်ႈၵေႃႉၵူၺ်း လိူဝ်ၼၼ်ႉ ဢွၼ်ၵၼ်ဢွၵ်ႇပၢႆႈမႃးမူတ်းမူတ်း ၸဵမ်လုၵ်ႈဢွၼ်ႇၵူၼ်းလူင်၊ ၵွပ်ႈဝႃႈပၢင်တိုၵ်းၼႆႉ မိူင်းလႅင်းၵေႃႈ တႄႇၵမ်းလဵဝ် ၼႂ်းၵၢတ်ႇဝၢၼ်ႈမိူင်းမေႃႇၸိူဝ်းၼႆႉၵေႃႈ မၢၵ်ႈၵွင်ႈ ၵေႃႈ တိူဝ်ႉသႂ်ႇ၊ တူၵ်းၸွမ်းၼႂ်းၵၢတ်ႇဝႆႉ ပၢင်တိုၵ်းၼႆႉ ပဵၼ်ၼႂ်းဝၢၼ်ႈမိူင်းမေႃႇ ၵမ်းလဵဝ်ယဝ်ႉ” ဝႃႈၼႆ ။


ၵူၼ်းဢၼ်ပၢႆႈမႃးၸိူဝ်းၼႆႉ ပဵၼ်ၵူၼ်း ဝၢၼ်ႈမိူင်းမေႃႇ၊ မေႃႇၼၢႆႈ၊ မေႃႇတႂ်ႈ၊ မေႃႇၼိူဝ်၊ ၼမ်ႉႁႆး၊ ၼွင်သၢင်း၊ မိူင်းယုၵ်ႈ၊ မၢၼ်ႈသၢၼ်ႇလႄႈ မၢၼ်ႈမႂ်ႇ ၸဵမ်ၸိူဝ်းၼႆႉ။
တင်ႈတႄႇပၢင်တိုၵ်းသိုၵ်းမၢၼ်ႈတင်းသိုၵ်းတဢၢင်း ၸဵမ်မိူဝ်ႈဝၼ်းတီႈ 23/11/2016 မႃး တေႃႇထိုင် မိူဝ်ႈၼႆႉ (1/12/2016) ၵူၼ်းဢၼ်လႆႈပၢႆႈၽေးႁွတ်ႈထိုင်ဝဵင်းၼမ်ႉတူႈမီး 755 ယဝ်ႉ ။


မိူဝ်ႈဝၼ်းတီႈ 23/11/2016 ၼၼ်ႉ တီႈၶူဝ်ၼမ်ႉသိင် ထုၵ်ႇၾႆးၽဝ်သေ ထိုင်မႃးဝၼ်းတီႈ 24 ယၢမ်းၵၢင်ၼႂ် 08 မူင်းပၢႆသမ်ႉ ပဵၼ်ပၢင်တိုၵ်းၵၼ် ၵူၼ်းမိူင်းတင်းဝၢၼ်ႈၼႃးလေႃတင်းမိူင်းတၢတ်ႇ တင်းမူတ်း 116 ၵေႃႉ လႆႈပၢႆႈမႃးတင်းၼမ်ႉတူႈ ဝႃႈၼႆ ။


လိူဝ်သေၼၼ်ႉ မိူဝ်ႈဝၼ်းတီႈ 20/11/2016 ၼႂ်းၸိုင်ႈတႆး ပွတ်းႁွင်ႇ တီႈ 105 ၼၼ်ႉ ယူႇတီႈတပ်ႉသိုၵ်းဢူၺ်းလီ ဢၼ်ႁူမ်ႈပႃးသိုၵ်းၶၢင် KIA သိုၵ်းရၶႅင်ႇ AA သိုၵ်းၵူဝ်းၵၢင်ႉ MNDAA လႄႈသိုၵ်းတဢၢင်း TNLA လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းမၢၼ်ႈ။  ၼႂ်းဝၼ်းလဵဝ်ၼၼ်ႉ ၵူၺ်း တီႈၶူဝ်လူင် တင်းၶဝ်ႈႁူဝ်ဝဵင်းသႅၼ်ဝီၼၼ်ႉၵေႃႈ ထုၵ်ႇမၢၵ်ႇ လူင်ယိုဝ်းသႂ်ႇ လူႉၵွႆ ဝႃႈၼႆ ။