ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇသင်ၶၸဝ်ႈ ၼႂ်းၸိုင်ႈတႆး ၵမ်းထူၼ်ႈ 51 ၼႆႉ လႆႈၸႂ်တႅပ်းတတ်းတေၸတ်းႁဵတ်းတီႈၸႄႈဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ။

ဝၼ်းတီႈ 30/11/2016  သင်ၶၸဝ်ႈတင်းၶွမ်ႇမတီႇပွင်ပဵၼ်ပၢင်ပွႆး ၸတ်းႁဵတ်း ပၢင်ၵုမ်ၶိုၵ်ႉၶၵ်ႉ တီႈဝတ်ႉၵမ်မထၢၼ်း ၸႄႈဝဵင်းလၢင်းၶိူဝ်း  ၸိုင်ႈတႆး ပွတ်းၸၢၼ်း ဢုပ်ႇဢူဝ်းလႆႈ ၸႂ်ႈတႅပ်းတတ်း ၵၼ်ဝႃႈ ပၢင်ပွႆးၺီႇလႃႇၶၢမ်ႇ မူႇလမိၼ်းၵုၼ်းၼႆႉ ယူႇတီႈ ၵျွင်းၵမ်ႇထၢၼ်းဝဵင်းမိူင်းၼၢႆး တေႁပ်ႉ ၸတ်းႁဵတ်းပၢင်ပွႆးၵႂႃႇ၊ ယွၼ်ႉဝႃႈ ပီၼႆႉ တိူၵ်ႈၵမ်မထၢၼ်း ၸႄႈလၢၼ်ႉ တေႁပ်ႉႁဵတ်းၼၼ်ႉ ယွၼ်ႉငဝ်းလၢႆး ပၢင်တိုၵ်းသိုၵ်း ဢမ်ႇၼိမ်သဝ်းလႄႈ တေဢမ်ႇပဵၼ်ၸတ်းႁဵတ်း ၼႆယဝ်ႉ ။


ပၢင်ပွႆးလူင်ပၢင်ၵုမ်ၺီႇလႃႇၶၢမ်ႇ သင်ၶၸဝ်ႈၼႆႉ တေၸတ်းႁဵတ်းတီႈဝတ်ႉၵျွင်း ၵုင်းမူၼ်း၊ တေပဵၼ်ပၢင်ပွႆးၺီႇလႃႇၶၢမ်ႇၵမ်းထူၼ်ႈ 4 တွၼ်ႈတႃႇဝဵင်းမိူင်းၼၢႆး၊ ၵမ်းထူၼ်ႈ 51 ပွၵ်ႈ ၼႂ်းမိူင်းတႆးပတ်းပိုၼ်ႉ ဝႃႈၼႆ ။


ပၢင်ပွႆးတေ တႄႇဝၼ်းတီႈ 04-07/03/2017 ၶၢဝ်းတၢင်း 4 ဝၼ်း၊ ဝၼ်းတီႈ 04 ၼၼ်ႉသင်ၶၸဝ်ႈ ႁွတ်ႈထိုင်ဢွင်ႈတီႈပၢင်ပွႆး ဝၼ်းတီႈ 05-06 သမ်ႉ ပၢင်ၵုမ်သင်ၶၸဝ်ႈ၊ ဝၼ်းတီႈ 07 ထွမ်ႇတြႃး လူႇတၢၼ်းယၢတ်ႇၼမ်ႉ ။


ပၢင်ပၢင်ၵုမ်လူင်ၺီႇလႃႇၶၢမ်ႇမူႇလမိၼ်းၵုၼ်း ၵမ်းထူၼ်ႈ 50 ပီၵွၼ်းၶမ်းတႄႉ လႆႈၸတ်း ႁဵတ်းတီႈ ဝတ်ႉ/ၵျွင်းၵမ်မထၢၼ်း ၸႄႈဝဵင်းလၢင်းၶိူဝ်း ၸႄႈတွၼ်ႈလၢင်းၶိူဝ်း မိူဝ်ႈဝၼ်းတီႈ 16-18/03/2016 ။


တိူၵ်းၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆး ပတ်းပိုၼ်ႉၼႆႉ တင်းမူတ်း မီး 18 တီႈ ၼႆယဝ်ႉ ။