ႁွင်ႈၵၢၼ်ၾၢႆႇႁၵ်ႉသႃသိင်ႇဝႅတ်ႉလွမ်ႉ ၸိုင်ႈတႆး ႁဵတ်းၽိုၼ်လိၵ်ႈႁၢႆးငၢၼ်းသေ သူင်ႇယိုၼ်ႈထိုင်လူင်ပွင်ၸိုင်ႈ မိူင်းတႆး ၵဵဝ်ႇၵပ်းလွင်ႈၶွမ်ႊပၼီႊၶုတ်းႁိၼ်ႁႄႈ GSM ၶႂ်ႈမႃးၶုတ်းႁိၼ်ႁႄႈမိူင်းတႆး။ ၵဵဝ်ႇၵပ်းလွင်ႈၽိုၼ်လိၵ်ႈ ႁၢႆးငၢၼ်းၼႆႉ ၵူၼ်းမိူင်းလႄႈၸဝ်ႈႁႆႈၸဝ်ႈၼႃးၶဝ်ဝႃႈ တၢင်းၼွၵ်ႈလႄႈ တၢင်းၼႂ်းဢမ်ႇမိူၼ်ၵၼ်၊ ယူႇတီႈၵူၼ်းမိူင်း တိုၼ်းတေႁႃလၢႆးတၢင်းသၢၼ်ၶတ်းၵႂႃႇ ။

ၽိုၼ်လိၵ်ႈႁၢႆးငၢၼ်း ႁွင်ႈၵၢၼ်ၾၢႆႇႁၵ်ႉသႃသိင်ႇဝႅတ်ႉလွမ်ႉ  ၸိုင်ႈတႆး ဢၼ်တႅမ်ႈၸူးထိုင်လူင်ပွင်ၸိုင်ႈ မိူင်းတႆး တၢင်းၽႃသႃမၢၼ်ႈ

ၵဵဝ်ႇၵပ်းလွင်ႈၽိုၼ်လိၵ်ႈႁၢႆးငၢၼ်းၼႆႉ မိူဝ်ႈဝၼ်းတီႈ 02/11/2016 ႁွင်ႈၵၢၼ်ၾၢႆႇႁၵ်ႉသႃသိင်ႇဝႅတ်ႉလွမ်ႉ ၸိုင်ႈတႆး၊ ဢၼ်ပဵၼ်ၾၢႆႇၸီႉသင်ႇ ၸဵင်ႇမမ ပဵၼ်ၵေႃႉတႅမ်ႈၽိုၼ်ႁၢႆးငၢၼ်းသေ သူင်ႇပၼ်ၸူးတီႈလူင်ပွင်ၸိုင်ႈ မိူင်းတႆး။ ပိူဝ်ႈတႃႇယွၼ်းဢၼုၺၢတ်ႈ ၶုတ်းႁိၼ်ႁႄႈၼႆႉ  လႆႈတႅမ်ႈၽိုၼ်ႁၢႆးငၢၼ်းသေ တၢင်ႇထိုင်လူင်ပွင်ၸိုင်ႈ မိူင်းတႆး- ၸၢႆးပႃႉဢူး ဢၼ်ပဵၼ်တူဝ်တႅၼ်းၸဝ်ႈႁႆႈၸဝ်ႈၼႃး ၼမ်ႉၶမ်းလၢတ်ႈ ။


ၽိုၼ်မိူၼ်ၽိုၼ်လိၵ်ႈႁၢႆးငၢၼ်းၼႆႉ ထိုင်မႃးတီႈၸၢႆးတိၼ်ႇဢူး ဢၼ်ၽွင်းတႅၼ်းသၽႃးၵဝ်ႇ ပႃႇတီႇသိူဝ်ၽိူၵ်ႇ တီႈၼမ်ႉၶမ်း မိူဝ်ႈဝၼ်းတီႈ 16/11/2016 ။ ပေႃးဝႃႈလိၵ်ႈထိုင်ၼႂ်းမိုဝ်းၸၢႆးတိၼ်ႇဢူးယဝ်ႉၵေႃႈ ႁွင်ႉဢဝ်ၸဝ်ႈႁႆႈၸဝ်ႈၼႃးသေ ႁူပ်ႉထူပ်းဢုပ်ႇၵုမ်ၵၼ် ။


ၸၢႆးပႃႉဢူး ႁူဝ်ၼႃႈၸုမ်းၸဝ်ႈႁႆႈၸဝ်ႈၼႃး လၢတ်ႈဝႃႈ- ႁဝ်းၶႃႈၵေႃႈ ၵႂႃႇႁွတ်ႈၽႅဝ်တီႈၸၢႆးတိၼ်ႇဢူးသေ ၵႂႃႇဢၢၼ်ႇတူၺ်းဢၼ်ပဵၼ်ၽိုၼ်ႁၢႆးငၢၼ်း ၶွင်ၶွမ်ႊပၼီႊၼၼ်ႉ။ ဢုပ်ႇၵုမ်ၵၼ်ၵဵဝ်ႇၵပ်းလွင်ႈ ၽိုၼ်လိၵ်ႈၼၼ်ႉ။ ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ တႅမ်ႈဝႆႉဝႃႈ ၶွမ်ႊပၼီႊ GSM ဢၼ်တေမႃးၶုတ်း ႁိၼ်ႁႄႈၼႆႉ မီးလွင်ႈၶဝ်ႈဢွၵ်ႇလီၵၼ်တင်းၵူၼ်းဝၢၼ်ႈၵူၼ်းမိူင်းတႄႉတႄႉ၊ ၸွႆႈထႅမ်ပၼ်ၵူၼ်းဝၢၼ်ႈ ၵူၼ်းမိူင်းၵူႈၸိူဝ်ႉၵူႈလွင်ႈ၊ လွင်ႈတိတ်းတေႃႇၵပ်းသိုပ်ႇၵၼ်တင်းၵူၼ်းမိူင်းၵေႃႈ ၶႅမ်ႉလႅပ်ႈတႄႉတႄႉ တႅမ်ႈဝႆႉၸိူင်ႉၼင်ႇၼၼ်။ တီႈတႄႉမၼ်း တၢင်းၼွၵ်ႈမၼ်းတႄႉဢမ်ႇလီၵၼ်၊ မၼ်းဢမ်ႇမိူၼ်ၵၼ်တင်း ၼႂ်းၽိုၼ်လိၵ်ႈသေဢိတ်း။ ၵွပ်ႈၼၼ်လႄႈ ၶႂ်ႈႁႂ်ႈလူင်ပွင်ၸိုင်ႈမိူင်းတႆး လူင်းပိုၼ်ႉတီႈသေၵူတ်ႇထတ်း တူၺ်းလီလီၵွၼ်ႇ၊ ထုၵ်ႇပၼ်ဢၼုၺၢတ်ႈၵွၼ်ႇ ၸင်ႇၵွႆႈပၼ်။ မိူၼ်ၸိူင်ႉၼင်ႇၶဝ်ဝႃႈ ၶွမ်ႊပၼီႊၶဝ်ၼႆႉ ပူၵ်းပွင်ပၼ်လွင်ႈၶိုၼ်ႈယႂ်ႇ ႁုၼ်ႈမုၼ်းမႂ်ႇသုင်ၼႂ်းၸႄႈဝဵင်းၼမ်ႉၶမ်း ဢၼ်ဝႃႈၸိူဝ်းၼၼ်ႉၵေႃႈ ယင်းပႆႇလႆႈႁၼ်သင်။ လွင်ႈၼႆႉ ယူႇတီႈၵူၼ်းမိူင်းသေႁူႉလိူဝ်ပိူၼ်ႈ- ဝႃႈၼႆ ။


တေႃႇထိုင်ဝၼ်းမိူဝ်ႈၼႆႉ ၶွမ်ႊပၼီႊ GSM ဢၼ်တေမႃးၶုတ်းႁိၼ်ႁႄႈၼၼ်ႉ ယင်းပႆႇႁူပ်ႉထူပ်းၵူၼ်းမိူင်း သေပွၵ်ႈ။ ၵဵဝ်ႇၵပ်းလွင်ႈၶဝ်တေၶုတ်းႁိၼ်ႁႄႈသေ ၶဝ်ႁၢႆးငၢၼ်းတီႈလူင်ပွင်ၸိုင်ႈမိူင်းတႆးယဝ်ႉ ဢၼ်ၶဝ်ဝႃႈၶဝ်လႆႈႁူပ်ႉထူပ်းၵူၼ်းမိူင်းယဝ်ႉ ၼႆၸိူဝ်းၼၼ်ႉၵေႃႈ မၼ်းဢမ်ႇထုၵ်ႇမႅၼ်ႈသေဢၼ်။ လိူဝ်သေၼၼ်ႉ ဢၼ်ပဵၼ်ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 1 လႄႈမၢႆ 2 ၼမ်ႉၶမ်းၼၼ်ႉၵေႃႈ ဢမ်ႇႁူႉၸွမ်း၊ ဢမ်ႇႁူပ်ႉထူပ်းတွင်ႈထၢမ်ၵူၼ်းမိူင်းသေ သမ်ႉၵႂႃႇလူင်းလၢႆးမိုဝ်းၵမ်ႉထႅမ်ပၼ် ၶွမ်ႊပၼီႊ GSM ဝႃႈလီယူႇ ၸႂ်ႈယူႇသေ ၵႂႃႇလူင်းလၢႆးမိုဝ်းပၼ်။ လွင်ႈၼႆႉ မၼ်းဢမ်ႇထုၵ်ႇလီပဵၼ်- ၽူႈၶဝ်ႈၸုမ်းၸဝ်ႈႁႆႈၸဝ်ႈၼႃးၼမ်ႉၶမ်း ၸၢႆးၶမ်း လၢတ်ႈ ။


“ ၶွမ်ႊပၼီႊဢၼ်မႃးၶုတ်းႁိၼ်ႁႄႈ ယႃႉပႃႇမႆႉပႃႇတွၵ်ႇၸိူဝ်းၼႆႉ ၵူၼ်းမိူင်းၼမ်ႉၶမ်းဢမ်ႇႁၼ်လီ။ ယွၼ်ႉဢမ်ႇႁၼ်လီသေ ၵူၼ်းမိူင်းၵမ်းၵမ်းၼႄၵၢင်ၸႂ်သၢၼ်ၶတ်းၸိူဝ်းၼႆႉၵေႃႈ ၽွင်းတႅၼ်းသၽႃးၶဝ်ႁူႉယူႇ။ လွင်ႈၶုတ်းႁိၼ်ႁႄႈၼႆႉ မၼ်းတေႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇၶၢၼ်ၸႂ် ဢၼ်ဝႃႈၼၼ်ႉၵေႃႈႁူႉယူႇ၊ ၵူၺ်းၵႃႈႁဵတ်းသင်သမ်ႉၵႂႃႇၵမ်ႉထႅမ် ၶွမ်ႊပၼီႊၶဝ်မႃးၶုတ်းႁိၼ်ႁႄႈထႅင်ႈ၊ လွင်ႈၼႆႉဢမ်ႇၶဝ်ႈၸႂ်သေၶႂ်ႈယွၼ်းထၢမ်တႄႉတႄႉ ”- ဝႃႈၼႆ ။


မိူဝ်ႈၵူႈပွၵ်ႈၼႆႉ ယွၼ်ႉပိူဝ်ႈၶွမ်ႊပၼီႊၶဝ်မႃးၶုတ်းႁိၼ်ႁႄႈ မႃးၶုတ်းၶမ်းၸိူဝ်းၼႆႉသေ ဢၼ်ပဵၼ်တီႈႁူဝ်လွႆ ၾၢႆႇတၢင်းဝၼ်းဢွၵ်ႇဝဵင်းၼမ်ႉၶမ်းၸိူဝ်းၼႆႉ ႁဵတ်းႁႂ်ႈလိၼ်ၵူၼ်ႇ၊ မႄႈၼမ်ႉသီးရီးႁိူတ်ႇႁႅင်ႈသေ သိင်ႇဝႅတ်ႉလွမ်ႉ လူႉၵွႆတေႃႇထိုင်ဝၼ်းမိူဝ်ႈၼႆႉ။ သင်ဝႃႈလူင်ပွင်ၸိုင်ႈ ပၼ်ၶွမ်ႊပၼီႊ GSM မႃးၶုတ်းႁိၼ်ႁႄႈၼႂ်းၸႄႈဝဵင်း ၼမ်ႉၶမ်းထႅင်ႈၼႆ လီမႆႈၸႂ်တႃႇၸဝ်ႈႁႆႈၸဝ်ႈၼႃး ၸိူဝ်းမီးယူႇၸဵင်ႇၸၢၼ်းဝၼ်းတူၵ်းဝဵင်းၼမ်ႉၶမ်း မိူၼ်ၼင်ႇ ၸိူဝ်းယူႇႁၢင်ၼမ်ႉလႄႈသင်၊ ၸိူဝ်းပိုင်ႈဢိင်မႄႈၼမ်ႉမႃႉ ၼမ်ႉသီးရီးၸိူဝ်းၼႆႉ၊ ၵွပ်ႈဝႃႈလိၼ်သူၼ်ႁႆႈၼႃး တေလႆႈၵွႆထႅင်ႈ- ၵူၼ်းၼမ်ႉၶမ်းလၢတ်ႈ ။


ၸိူင်ႉႁိုဝ်ၵေႃႈယဝ်ႉ ၵူၼ်းဝၢၼ်ႈၵူၼ်းမိူင်းၼမ်ႉၶမ်းၶဝ်ၼႆႉ ၼင်ႇႁိုဝ်ၵၢၼ်ၶုတ်းႁႄႈတေဢမ်ႇပဵၼ် ၼႂ်းၸႄႈဝဵင်း ၼမ်ႉၶမ်း ၼၼ်ႉလႄႈသင်။ ၾၢႆႇၼိုင်ႈၵေႃႈ ၼင်ႇႁိုဝ်ၵၢၼ်ၶုတ်းႁိၼ်ႁႄႈယူႇယၢမ်းလဵဝ် ပေႃးတေၵိုတ်းယိုတ်း ၵႂႃႇပႅတ်ႈတင်းမူတ်းၼၼ်ႉၼႆၵေႃႈ တိုၵ်ႉႁႃလၢႆးတၢင်းသေ တေၶတ်းၸႂ်သၢၼ်ၶတ်းၶွမ်ႊပၼီႊၶုတ်းႁိၼ်ႁႄႈ၊ တႅပ်းပႃႇမႆႉလႄႈၶုတ်းၶမ်း ၸိူဝ်းၼႆႉၵႂႃႇၼႆ- ၸုမ်းၸဝ်ႈႁႆႈၸဝ်ႈၼႃး မိူင်းၼမ်ႉၶမ်းလၢတ်ႈၼင်ႇၼႆ ။