ၸဝ်ႈၼႃႈတီႈပလိၵ်ႈလႄႈသိုၵ်းထႆးႁူမ်ႈၵၼ်ၶဝ်ႈၵူတ်ႇထတ်း ဝၢၼ်ႈလဝ်ႉတႃ ထူပ်းၵူၼ်းၵဵဝ်ႇၶွင်ႈလႄႈ ယိုတ်းလႆႈယႃႈမဝ်းၵမ်တင်းၼမ် ။

ဝၼ်းတီႈ 16/11/2016 ၶၢဝ်းယၢမ်းၵၢင်ၼႂ် ၸဝ်ႈၼႃႈတီႈၾၢႆႇၽဵဝ်ႈမူၺ်ႉ ယႃႈမဝ်းၵမ်လႅၼ်လိၼ် ပွတ်းၼိူဝ်(မၢႆ1)ႁူမ်ႈၵၼ်တင်း ၸဝ်ႈၼႃႈတီႈပလိၵ်ႈၸႄႈဝဵင်းမႄႈဢၢႆး မွၵ်ႈဢဵၼ်ႁႅင်း30ၵေႃႉ ၵႂႃႇၵူတ်ႇထတ်း တီႈႁိူၼ်းဢႃဝူးမိုဝ်းၼိူဝ်ႊ သႅၼ်ၸၼ် ဢႃယု 64 ပီ ယူႇတီႈဝၢၼ်ႈႁူၺ်ႉသၢၼ်ႉ (ဝၢၼ်ႈလဝ်ႉတႃ) ဢိူင်ႇတႃႈတွၼ်း  ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆးပွတ်းႁွင်ႇ ။


ဝၢၼ်ႈလဝ်ႉတႃၼႆႉ ပဵၼ်ဝၢၼ်ႈဢၼ်ပေႃႈလဵင်ႉၵူၼ်းၵႃႉဢၼ်ၸိုဝ်ႈဝႃႈ လဝ်ႉတႃ သႅၼ်လိ ၼၼ်ႉယူႇသေ မိူဝ်ႈဝၼ်းတီႈ 11/10/2016 ၸဝ်ႈၼႃႈတီႈၾၢႆႇၽဵဝ်ႈမူၺ်ႉ ယႃႈမဝ်းၵမ် လႆႈၶဝ်ႈတီႉၺွပ်းမၼ်းၸၢႆးလႄႈ ၸုမ်းၸိူဝ်းႁဵတ်းၵၢၼ်ၸွမ်းမၼ်းထႅင်ႈ 14 ၵေႃႉ။ ၸဝ်ႈၼႃႈတီႈၶဝ်ယိုတ်းလႆႈ ရူတ်ႉၵႃး၊ ၵွင်ႈၵၢင်ႇ၊ ယႃႈမဝ်းၵမ် ၼပ်ႉပဵၼ်ငိုၼ်းမွၵ်ႈ 1,000 လၢၼ်ႉၿၢတ်ႇ ။


သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ -  တီႈႁိူၼ်းဢႃဝူးမိုဝ်းၼိူဝ်ႊ သႅၼ်ၸၼ် ထူပ်းႁၼ်ယႃမႃႉ 114မဵတ်ႉ လႄႈထုင်ေၸႈ ဢၼ်သႂ်ႁေႊရူဝ်ႊဢိၼ်ႊ ၸိူဝ်းၼႆႉ။ ၽွင်းၼၼ်ႉမီးၽူႈၸၢႆး 3 ၵေႃႉပႆၶဝ်ႈမႃးတီႈ ႁိူၼ်းလင်ၼၼ်ႉ ၸဝ်ႈၼႃႈတီႈၶၢတ်ႈဝႃႈ တေမႃးသိုဝ်ႉယႃႈ ၸဝ်ႈၼႃႈတီႈယွၼ်းၵူတ်ႇထတ်း ၶဝ်တၢင်း3ၵေႃႉၼႆႉၵေႃႈယွမ်းႁပ်ႉဝႃႈ ၵဵဝ်ႇၶွင်ႈယႃႈမဝ်းၵမ် ၵိၼ်ယႃႈမႃႉတႄႉ၊ ၼႂ်းၼၼ်ႉမီးလုၵ်ႈ ဢွၼ်ႇဢႃယု 13 ပီ ပဵၼ်ၵူၼ်းၸၢဝ်းၶိူဝ်းသၼ်လွႆႁပ်ႉတေႃႉသူင်ႇယႃႈမဝ်းၵမ်လၢႆးယွႆႈ 2,000 – 5,000 မဵတ်ႉ လႆႈၵႃႈၸၢင်ႈ 1 မဵတ်ႉလႂ်1ဝၢတ်ႇ ဝႃႈၼႆ ။


ၸဝ်ႈၼႃႈတီႈ ယိုတ်းဢဝ်ယႃႈမဝ်းၵမ်လႄႈၽူႈၵဵဝ်ႇၶွင်ႈ ပၼ်တူတ်ႇတၢမ်ႇၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းသိုပ်ႇၵႂႃႇ ။