ပၢင်ပွႆးႁပ်ႉတွၼ်ႈပီမႂ်ႇတႆး 2111 ၼီႈ တီႈဝဵင်းတူၼ်ႈတီးၼႆႉ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ဢိၵ်ႇတင်းပေႃႈမႄႈပီႈၼွင်ႉၵူၼ်းမိူင်းဝဵင်းတူၼ်ႈတီး တေႁူမ်ႈမိုဝ်းၵၼ် ၸတ်းႁဵတ်းတီႈပၢင်ႇပွႆႇႁူင်းၾႆးမိၼ် ဢဝေႇယႃႇ၊ တေႁဵတ်းပႃးပၢင်ယုၵ်ႉယုင်ႈၵုၼ်းမုၼ် မေႃတႅမ်ႈၵႂၢမ်းၽဵင်းၵႂၢမ်းတႆး ၸၢႆးလၢဝ်သႂ် ဢႃယုၶွပ်ႈထိုင်ပီၵွၼ်းသႅင်၊ တေပဵၼ်ပၢင်ပွႆးၵိုၼ်းယႂ်ႇလူင် တႃႇၶၢဝ်းတၢင်း 5 ဝၼ်း ။

လုင်းၸၢႆးၼုတ်း ၽူႈၼမ်းၼႂ်းလႄႈ ၽူႈၶဝ်ႈၶွမ်ႊမတီႊဢွၼ်ႁူဝ်ၼႂ်းၸုမ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး လၢတ်ႈဝႃႈ- ဝူင်းၸိူင်းလႅဝ်း ၵေႃႈတေမႃးႁႆႇတိုင်ႈပၼ် တီႈပၢင်ပွႆးပီမႂ်ႇတႆး ဝဵင်းတူၼ်ႈတီးပီၼႆႉ၊ ၶဝ်တေဢွၼ်ႁူဝ်သေႁွင်ႉဢဝ်မေႃႁွင်ႉၵႂၢမ်းတႆး ၵူႈတီႈၵူႈလႅၼ် မႃးႁူပ်ႉထူပ်းၵၼ်တီႈဝဵင်းတူၼ်ႈတီးၼႆႉသေ တေၸတ်းႁဵတ်းပႃး ပၢင်ပွႆးယုၵ်ႉယွင်ႈဝၼ်းၵိူတ်ႇ မေႃတႅမ်ႈၽဵင်းၵႂၢမ်းတႆး ၸၢႆးလၢဝ်သႂ်၊ ဢႃယုၶွပ်ႈတဵမ် 75 ပီ- ဝႃႈၼႆ ။


ပၢင်ပွႆးပီမႂ်ႇတႆး 2111 ၼီႈ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼႆႉ တေတႄႇၸတ်းႁဵတ်းဝၼ်းတီႈ 27 လိူၼ်ၼူဝ်ႊဝႅမ်ႊၿိူဝ်ႊ တေႃႇထိုင်ဝၼ်းတီႈ 1 လိူၼ်ၻီႊသႅမ်ႊၿိူဝ်ႊ 2016 ၶၢဝ်းတၢင်း 5 ဝၼ်း၊ တေမီးတၢင်းၵႃႈ တၢင်းဝႅၼ် ၵဵဝ်ႇၵပ်းလွင်ႈၾိင်ႈငႄႈၾိင်ႈထုင်းတႆး၊ တေမီးၵၢၼ်ႁွင်ႉၽဵင်းၵႂၢမ်းတႆးပၢၼ်မႂ်ႇပၢၼ်ၵဝ်ႇ လႄႈၶႄႉၶႅင်ႇႁူင်းၾႆးမိၼ်ၵၼ်ထႅင်ႈ- ၼႆယဝ်ႉ ။


ၼၢင်းၼူၼ်းမူဝ် ၽူႈၶဝ်ႈၶွမ်ႊမတီႊ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ၵေႃႈလၢတ်ႈဝႃႈ- ဢၼ်လၢၵ်ႇလၢႆးမၼ်းတႄႉ ပဵၼ်ဝူင်းၸိူင်းလႅဝ်း တေမႃးႁွင်ႉၽဵင်းၵႂၢမ်းတီႈပၢင်ပွႆး ႁပ်ႉတွၼ်ႈပီမႂ်ႇတႆး 2111 ၼီႈ။ လိူဝ်သေၼၼ်ႉ တေပဵၼ်မေႃႁွင်ႉၵႂၢမ်းတႆး ၸဝ်ႈပၢႆးမွၼ်း ဢၼ်မီးတၢင်းဝဵင်းၵဵင်းမႆႇ၊ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵဵင်းမႆႇ ၸိူဝ်းၼႆႉၵေႃႈတေမႃးၶဝ်ႈႁူမ်ႈ- ဝႃႈၼႆ ။


ၸၢႆးလၢဝ်သႂ် မေႃတႅမ်ႈၽဵင်းၵႂၢမ်းတႆး (ၵဝိတႆး)ၼႆႉ ပေႃးထိုင်မႃးဝၼ်းတီႈ 30/11/2016 ၼႆႉ တူၵ်းမႅၼ်ႈဝၼ်းၶွပ်ႈၶူပ်ႇဝၼ်းၵိူတ်ႇ 75 ပီ။ ၶႂ်ႈႁႂ်ႈပၢင်ပွႆးပွၵ်ႈၼႆႉ ၵိုၵ်းပိုၼ်းၼႂ်းမိူင်းတႆး၊ ၵိုၵ်းပိုၼ်းၸဝ်ႈပၢႆးမွၼ်းတႆး၊ ၶႂ်ႈႁႂ်ႈမေႃႁွင်ႉၽဵင်းၵႂၢမ်းတႆးလႄႈ မေႃတႅမ်ႈၽဵင်းၵႂၢမ်းတႆးတင်းမူတ်းတင်းသဵင်ႈ ဢိၵ်ႇ ပီႈပီႈၼွင်ႉၼွင်ႉၶဝ်ၸိူဝ်းၼႆႉ လႆႈမႃးႁူပ်ႉထူပ်းၵၼ်တီႈဝဵင်းတူၼ်ႈတီးသေ ႁွင်ႉၽဵင်းၵႂၢမ်းယုၵ်ႉယွင်ႈ ၵုၼ်းမုၼ်ပၼ် မေႃတႅမ်ႈၽဵင်းၵႂၢမ်းတႆး ၸၢႆးလၢဝ်သႂ်- ၼႆယဝ်ႉ ။


ပၢင်ပွႆးႁပ်ႉတွၼ်ႈပီမႂ်ႇတႆးၼႆႉ လႆႈၸတ်းမႃးၵူႈပီပီ၊ ပဵၼ်ပၢင်ပွႆးၵိုၵ်းပိုၼ်းၾိင်ႈငႄႈၾိင်ႈထုင်းတႆးဢၼ်ၼိုင်ႈ။ ၼင်ႇႁိုဝ်တေလႆႈလွင်ႈၸမ်ၸႂ်ၵၼ်တင်း ပီႈၼွင်ႉတႆးတီႈၸမ်တီႈၵႆ ၵူႈတီႈတီႈၼႆသေ ၵူႈပီဢၼ်လႆႈၸတ်းႁဵတ်း ၵႂႃႇၸိူဝ်းၼႆႉၵေႃႈ လႆႈၸတ်းႁဵတ်းပႃးပၢင်လႅၵ်ႈလၢႆႈပိုၼ်ႉႁူႉ၊ ပၢင်တၢၼ်ႈၶႆႈၵဵဝ်ႇၵပ်း လွင်ႈၾိင်ႈငႄႈၾိင်ႈထုင်းလႄႈလိၵ်ႈလၢႆးတႆးၸိူဝ်းၼႆႉၵေႃႈ လႆႈၸတ်းႁဵတ်းမႃး ။