ၸုမ်းဢူၺ်းလီပွတ်းႁွင်ႇ ဢၼ်မီးၸုမ်းၶၢင် KIA ၊ ၵဝ်ႈၵၢင်ႉ MNDAA ၊ တဢၢင်း(လွႆ)TNLA တင်း ရၶႅင်ႇ AA ၶဝ်ၸိူဝ်းၼႆႉ ၶွၼ်ႈႁႅင်းၵၼ် လေႃႇတိုၵ်းတပ်ႉပလိၵ်ႈ/ တပ်ႉပၢင်သဝ်းသိုၵ်း လူင်ပွင်ၸိုင်ႈ ၼႂ်းၸႄႈတွၼ်ႈမူႇၸေႊ လၢႆလၢႆတီႈ၊ ၵူၼ်းမိူင်းလူႉတၢႆ မၢတ်ႇၸဵပ်းၸွမ်း၊ ႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင် ပၢႆႈၶဝ်ႈမိူင်းၶႄႇ၊ ၸိူဝ်းပၢႆႈၶဝ်ႈဝဵင်း မူႇၸေႊၵေႃႈမီး ။

ဝၼ်းတီႈ 20/11/2016 ယၢမ်းၵၢင်ၼႂ် 2 မူင်း တေႃႇမိူင်းလႅင်း ၸိူဝ်းပဵၼ်တပ်ႉသိုၵ်း လုၵ်ႈၸုမ်းဢူၺ်းလီ ပွတ်းႁွင်ႇ ၼၼ်ႉ ၸႅၵ်ႇၽႄပဵၼ်လၢႆၸုမ်းသေ ၶဝ်ႈလူမ်ႇတပ်ႉသိုၵ်း/ပလိၵ်ႈ  ၼႂ်းၸႄႈဝဵင်းၵူတ်ႉၶၢႆ ၸႄႈဝဵင်းမူႇၸေႊ၊ ၵိင်ႇၸႄႈဝဵင်းပၢင်ႇသၢႆး၊ မိူင်းၵူဝ်း၊ 105 လၵ်း ၸိူဝ်းၼႆႉ။ တေႃႇထိုင် ဝၼ်းတီႈ 21/11/2016 ၵၢင်ၶမ်ႈ ယင်းၶွၼ်ႈႁႅင်းၵၼ် ၶဝ်ႈယိုဝ်းတပ်ႉပလိၵ်ႈ ၼႂ်းၸႄႈဝဵင်းမူႇၸေႈထႅင်ႈ ။


ၸၢႆးဢၢႆႈမွင်ႇ ၸဝ်ႈၵႃးလႃႈသဵဝ်ႈ လၢတ်ႈဝႃႈ - သိုၵ်းဢၼ်လၢတ်ႈၵႂၢမ်းၶႄႇ ၵႂၢမ်းၶၢင် ၼၼ်ႉ ႁႄႉၵႃးၵိုတ်း ၼႂ်းၵိဝ်ႇလွႆ သျူႉၶိၼ်းတႃႇ၊ ၵဵပ်းၶွၼ်ႇၵႃး လမ်းလႂ် 3 သႅၼ်၊ သမ်ႉၸႂ်ႉၸဝ်ႈၵႃး ႁေႃႈလူတ်ႉၵႃးၶႂၢင်တၢင်းသေ ယွၼ်းဢဝ်သေႃးၵႃးၵႂႃႇပႅတ်ႈ။ ၽိူဝ်ႇသိုၵ်းမၢၼ်ႈ သူင်ႇႁႅင်းသိုၵ်းမႃး တႃႇတေၶၢမ်ႈပူၼ်ႉလႆႈတီႈၼၼ်ႉ ယၢပ်ႇတႄႉဢေႃႈ၊ ဝၼ်းပေႃးၸၢႆႉယဝ်ႉ သိုၵ်းမၢၼ်ႈ ၸင်ႇဢဝ်ႁိူဝ်းမိၼ်မႃးၸွႆႈဢဝ်ၵူၼ်း မၢတ်ႇၸဵပ်း ဢွၵ်ႇ” - ဝႃႈၼႆ ။


ၼႂ်းဝၼ်းလဵဝ်ၵၼ်ၼၼ်ႉ ၸုမ်းယိပ်းၵွင်ႈၵၢင်ႇၸိူဝ်းၼႆႉ ဝၢင်းၽႅၼ် ၶိုင်ယႃႉၶူဝ်လၢႆတီႈ။ ၶူဝ်ဢၼ် ၶဝ်ပွႆႇမၢၵ်ႇယႃႉ ဢၼ်ၵွႆၼမ်သေပိူၼ်ႈပဵၼ်ၶူဝ်သူၼ်လူင် ၼမ်ႉၽၵ်းၵႃ (ယွၼ်ႉပဵၼ်ၶူဝ်ဢွၼ်ႇ)၊ ၶူဝ်ၼမ်ႉပေႃႈတႄႉ ဢမ်ႇပေႃးၵွႆၵႃႈႁိုဝ်။ ၶူဝ်ၼမ်ႉတူႈ ႁူဝ်ဝဵင်းသႅၼ်ဝီတႄႉ ပွင်ႇပဵၼ်လုၵ်းၵႂႃႇ၊ ယွၼ်ႉမၢၵ်ႇတႅၵ်ႇသေ မီးၵူၼ်းမၢတ်ႇၸဵပ်း 3 ၵေႃႉၼႆ- ၼၢင်းၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၸႄႈဝဵင်းသႅၼ်ဝီ လၢတ်ႈၼႄၼင်ႇၼႆ ။


“ဢၼ်မၢတ်ႇၸဵပ်းသေ ႁွတ်ႈဝႆႉတီႈႁူင်းယႃတႄႉ မီး 3 ၵေႃႉဢေႃႈ။ ၸၢႆးထုၼ်းဢေး၊ ၸၢႆးမၢၼ်ႇဢွင်ႇ ပဵၼ်ၵူၼ်းႁဵတ်းၵၢၼ် တီႈဢေႃးပႃႇသၢႆႉပျူဝ်းယေး၊ ထႅင်ႈၵေႃႉ တႄႉဢမ်ႇႁူႉၸိုဝ်ႈမၼ်း။ မၢၵ်ႇၼၼ်ႉတႄႉပဵၼ်ၽႂ် မႃးပွႆႇၵေႃႈဢမ်ႇႁူႉၶႃႈ။” - ဝႃႈၼႆ ။


ဢၼ်ပွႆႇမၢၵ်ႇၵူႈတီႈၸိူဝ်းၼႆႉ ၵဵဝ်ႇၶွင်ႈၵၼ်တင်း ၽႅၼ်ၵၢၼ်ပၢႆးတိုၵ်း ၶဝ်ႈလူမ်ႇတပ်ႉပၢင်သဝ်း သိုၵ်းမၢၼ်ႈတီႈ 105 လၵ်း၊ မိူင်းၵူဝ်း ပၢင်ႇသၢႆးၸိူဝ်းၼႆႉ ၵူႈတီႈယဝ်ႉၼႆ -ၸဝ်ႈသိုၵ်းလူင် တႃႉၽူင်းၵျေႃႇ ၽူႈၼမ်းၼႂ်းသိုၵ်းတဢၢင်း/ ပလွင်ႈ လၢတ်ႈတီႈသိုဝ်ႇၶၢဝ်ႇမၢၼ်ႈ ၼင်ႇၼႆ ။


ဢိင်ၼိူဝ်လွင်ႈပၢင်တိုၵ်းၸိူဝ်းၼႆႉသေ ၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉ 4 ၸုမ်းၼႆႉ ပိုၼ်ၽၢဝ်ႇထိုင် ပေႃႈမႄႈၵူၼ်းမိူင်းတင်းလၢႆဝႃႈ ယွၼ်ႉသိုၵ်းလူင်ပွင်ၸိုင်ႈမၢၼ်ႈ ႁွၼ်ႈထဝ်ႇသွၵ်ႈတဝ် လမ်းတိုၵ်းၶဝ်ၼႂ်းထိူၼ်ႇ။ ၵွပ်ႈၼၼ် ၸုမ်းၸိူဝ်းၶဝ်ၸင်ႇၶွၼ်ႈႁႅင်းၵၼ်ၶဝ်ႈမင်ၼႂ်းဝဵင်း ၸွမ်းတႃႈၸွမ်းတၢင်း။ ၸူဝ်ႈၸႃႈၼႆႉ ယွၼ်းႁႂ်ႈၵူၼ်းဝၢၼ်ႈၵူၼ်းမိူင်း ယႃႇၽူမ်ႈဢွၵ်ႇၶၢဝ်းတၢင်းၵႂႃႇမႃး၊ ယွၼ်ႉမီးၽႅၼ်ၵၢၼ်တေပိုတ်ႇၼႃႈသိုၵ်းလေႃႇတိုၵ်း သိုၵ်းလူင်ပွင်ၸိုင်ႈ တပ်ႉမတေႃႇ ၵႂႃႇထႅင်ႈ - ဝႃႈၼႆ ။


သိုဝ်ႇၶၢဝ်ႇလူင်ပွင်ၸိုင်ႈၵေႃႈ ပိုၼ်ၽၢဝ်ႇဝႃႈ - ၸုမ်းယိပ်းၵွင်ႈ ၶၢင်၊ ၵူဝ်းၵၢင်ႉ၊ တဢၢင်း/လွႆ လႄႈ သိုၵ်းရၶႅင်ႇ ၶဝ်ၸိူဝ်းၼႆႉ ဝၢင်းၽႅၼ်လီလီသေ ၶဝ်ႈတိုၵ်းၵူၼ်းမိူင်း၊ တပ်ႉပလိၵ်ႈ၊ တပ်ႉသိုၵ်း - ဢဝ်ၵူၼ်းမိူင်းပဵၼ်ပဝ်ႉမၢႆသေ မႃးတိုၵ်း။ လွင်ႈၼႆႉဢမ်ႇထုၵ်ႇလီပဵၼ် မၼ်းၸၢင်ႈတုမ်ႉတိူဝ်ႉ ပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင် (ဢၼ်ဢၢၼ်းၸတ်းႁဵတ်းထႅင်ႈၵမ်းထူၼ်ႈသွင်) လူးၵွၼ်ႇ - ဝႃႈၼႆ ။


ယွၼ်ႉပၢင်တိုၵ်းဝၼ်းတီႈ 20/11/2016 သေ ပလိၵ်ႈ၊ သိုၵ်း၊ ၵူၼ်းမိူင်း လႆႈတၢႆၵႂႃႇ 9 ၵေႃႉ၊ မၢတ်ႇၸဵပ်း 20 ပၢႆ - ဝႃႈၼႆ ။


ၸုမ်းဢူၺ်းလီပွတ်းႁွင်ႇ ဢၼ်မီးသိုၵ်းၶၢင် KIA ၊ ၵဝ်ႈၵၢင်ႉ MNDAA ၊ တဢၢင်း(လွႆ) TNLA တင်း ရၶႅင်ႇ AA ၶဝ် ၸိူဝ်းႁူမ်ႈၵၼ်လေႃႇတိုၵ်း တပ်ႉသိုၵ်းလူင်ပွင်ၸိုင်ႈ၊ တပ်ႉပလိၵ်ႈ ၼႂ်းၸႄႈတွၼ်ႈမူႇၸေႊ ၼၼ်ႉ သိုၵ်းတဢၢင်း ယင်းၵႂႃႇလေႃႇတိုၵ်းပႃး တပ်ႉပၢင်သဝ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ဢၼ်မီးၼႂ်း ၸႄႈဝဵင်းၼမ်ႉတူႈ ပွတ်းမိူင်းတၢတ်ႇ၊ မိူင်းမွၵ်ႇ၊ ၵျွၵ်ႉမႄး ၸိူဝ်းၼႆႉလၢႆတီႈ- ဝႃႈၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်း လိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း (NCA) ဝႆႉ ။


ၼႂ်းၸုမ်းဢူၺ်းလီပွတ်းႁွင်ႇ 4 ၸုမ်းတႄႉ - မိူၼ်ၼင်ႇ သိုၵ်းၶၢင် KIA ၺႃးသိုၵ်းမၢၼ်ႈလေႃႇတိုၵ်းမႃး ႁၢဝ်ႈႁႅင်း၊ ဢမ်ႇပႆႇပဵၼ်လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း (NCA )။ မိူၼ်ၼင်ႇ သိုၵ်းၵဝ်ႈၵၢင်ႉ MNDAA ၊ တဢၢင်း TNLA တင်းရၶႅင်ႇ AA ၶဝ် 3 ၸုမ်းၼႆႉသမ်ႉ ၾၢႆႇလူင်ပွင်ၸိုင်ႈမၢၼ်ႈ တပ်ႉသိုၵ်းမၢၼ်ႈ ပိုၼ်ႇၽၢဝ်ႇတႅၵ်ႇလႅင်းဝႆႉဝႃႈ သင်ၶႂ်ႈၶဝ်ႈႁူမ်ႈဢုပ်ႇဢူဝ်းၵၢၼ်မိူင်း တၵ်းတေလႆႈဝၢင်းၶိူင်ႈပိူင်လဵဝ် - ဝႃႈၼႆဝႆႉလႄႈ ႁဵတ်းႁႂ်ႈၸိူဝ်းၶဝ် ဢမ်ႇႁၢၼ်ႉၸႂ်။ ၾၢႆႇသိုၵ်းလူင်ပွင်ၸိုင်ႈမၢၼ်ႈၵေႃႈ သမ်ႉႁႅၼ်းသိုၵ်းလေႃႇတိုၵ်းၸိူဝ်းၶဝ်မႃးတႃႇသေႇလႄႈ ၶဝ်ၸင်ႇၶွၼ်ႈႁႅင်းၵၼ် ႁူမ်ႈၵၼ်လေႃႇတိုၵ်းသိုၵ်းလူင်ပွင်ၸိုင်ႈၶိုၼ်း ၸိူင်ႉၼႆ - ၵမ်ႈၼမ်ထတ်းသၢင်ၼင်ႇၼႆ ။