ၸုမ်းၵူၼ်းၼုမ်ႇတႆးတင်းတဢၢင်း ၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်း တႃႇၶၢဝ်းတၢင်း 3 ဝၼ်း တီႈၸႄႈဝဵင်းၵျွၵ်ႉမႄး တႃႇႁႃလၢႆးတၢင်းၶိုၼ်းမေးလီၵၼ် ၼႂ်းၸိူဝ်ႉၸၢတ်ႈ လႄႈ ႁႂ်ႈလႆႈ ယူႇႁူမ်ႈၵၼ် ဝႃႈၼႆ ။

ဝၼ်းတီႈ 18-20/11/2016 ယၢမ်းၵၢင်ၼႂ် ထိုင် တၢမ်းၶမ်ႈ ၸုမ်းၵူၼ်းၼုမ်ႇတႆး တင်းၸုမ်းၵူၼ်း ၼုမ်ႇတဢၢင်း ပွတ်းႁွင်ႇ ႁူမ်ႈၵၼ်ၸတ်းႁဵတ်းပၢင်ၵုမ်ဢုပ်ႇဢူဝ်း တႃႇၵႄႈလိတ်ႈပၼ်ႁႃ ၼႂ်းၵႄႈၵၢင် ပီႈၼွင်ႉတႆးတင်း ပီႈၼွင်ႉတဢၢင်း၊ တႃႇႁႃလၢႆးတၢင်းတႃႇမေးလီၵၼ်ၶိုၼ်းလႄႈ ယူႇႁူမ်ႈၸွမ်းၵၼ် ၼင်ႇပၵ်းၵဝ်ႇ ပိူင်ၵဝ်ႇၶိုၼ်း။ ပၢင်ၵုမ်ၼႆႉ ၸတ်းႁဵတ်းတီႈ ႁူင်းယႃႈယႃသိူဝ်ႁႃႈတူဝ် ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၼႆယဝ်ႉ ။


ၸၢႆးယွတ်ႈငိုၼ်း ၽူႈပွင်ၵၢၼ်ပႃႇတီႇႁူဝ်သိူဝ် ၸႄႈဝဵင်းၵျွၵ်ႉမႄး လၢတ်ႈဝႃႈ “ တေႃႈလဵဝ်ၼႆႉ ယူႇတီႈ ၵူၼ်းၼုမ်ႇတႆးတင်းတဢၢင်း ႁူမ်ႈမိုဝ်းၵၼ်သေ လူင်းပိုၼ်ႉတီႈ ၵဵပ်းၶေႃႈမုလ်း၊ တႃႇၵႄႈ ပၼ်ႁႃတႃႇၵႄးလိတ်ႈပၼ်ႁႃျသေ တႃႇယူႇႁူမ်ႈၵၼ် မိုတ်ႈၵိုတ်းၸမ်ၸႂ်ၵၼ်မိူၼ်မိူဝ်ႈၵူႈပွၵ်ႈၶိုၼ်း။ ၵူၺ်းၵႃႈ တင်းပွတ်းၸႄႈဝဵင်းၼမ်ႉၶမ်းတႄႉ ၸုမ်းၵူၼ်းၼုမ်ႇၶဝ် လူင်းပိုၼ်ႉတီႈမႃးယဝ်ႉ။ မိူဝ်ႈၼႆႉ ဝၼ်းတီႈ 21 တႄႇလူင်း တၢင်းပွတ်းၵျွၵ်ႉမႄးၵႂႃႇ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ သင်ဝႃႈ ၵူၼ်းၼုမ်ႇၶဝ် လူင်းပိုၼ်ႉတီႈ 4-5 ဝၼ်းယဝ်ႉ၊ လင် ပီမႂ်ႇတႆးမႃး ၸင်ႇမႃးၵုမ်ၵၼ်ၶိုၼ်း၊ ဢဝ်ၶေႃႈမုလ်းမႃးဢုပ်ႇၼႄၵၼ်သေႁႃၶေႃႈၵႄႈလိတ်ႈ ဢုပ်ႇဢူဝ်း ၽႅၼ်ၵၢၼ်ၵႂႃႇမိူဝ်းၼႃႈ ။


ပၢင်ႁူပ်ႉထူပ်းဢုပ်ႇဢူဝ်းၵူၼ်းၼုမ်ႇတီႈၵျွၵ်ႉမႄးၼႆႉ ယူႇတီႈတူဝ်တႅၼ်း ၵူၼ်းၼုမ်ႇတႆး မႃးၶဝ်ႈႁူမ်ႈ 15 ၵေႃႉ၊ တူဝ်တႅၼ်းၵူၼ်းၼုမ်ႇတဢၢင်း 15 ၵေႃႉ၊ ႁူမ်ႈလူၺ်ႈၵူၼ်းၼုမ်ႇၸႄႈဝဵင်းၵျွၵ်ႉမႄးၵမ်ႈၽွင်ႈ တင်းမူတ်းမီး 50 ပၢႆ မႃးၶဝ်ႈႁူမ်ႈ ဝႃႈၼႆ ။


ၸုမ်းၵူၼ်းၼုမ်ႇတႆးတင်းတဢၢင်း ႁူမ်ႈၵၼ်သေ လူင်းပိုၼ်ႉတီႈ ၼႂ်းၸႄႈဝဵင်းၵျွၵ်ႉမႄးသမ်ႉ ၸႅၵ်ႇႁဵတ်းပဵၼ် 5 ၸုမ်း၊ ၼိုင်ႈၸုမ်းလႂ် 4-5 ၵေႃႉ၊ လူင်းတၢင်းဢိူင်ႇၼမ်ႉတူႈ၊ ဢိူင်ႇမိူင်းၵူင်း၊ ဢိူင်ႇတေႃႉသၢင်ႇ၊ ဢိူင်ႇပၢင်ၸၢမ်/ပၢင်ၵွၼ်လႄႈ ဢိူင်ႇမိူင်းငေႃႉ ၸဵမ်ၸိူဝ်းၼႆႉ ဝႃႈၼႆ ။