ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် SNLD ၸႄႈဝဵင်းၵုၼ်ႁဵင် တၢင်ႇလိၵ်ႈၼႂ်းပၢင်ၵုမ် သၽႃးၵူၼ်းမိူင်း မိူဝ်ႈဝၼ်းတီႈ 01/08/2016 ၼၼ်ႉဝႃႈ ၵူၼ်းမိူင်းၵႃလိ ၸိုင်ႈတႆး ပွတ်းၸၢၼ်း တုၵ်းယွၼ်းၶႂ်ႈၾႆးၾႃႉ ဝႃႈၼႆ ။

ဝၼ်းတီႈ 18/11/2016 ၵႅမ်ၽွင်းလူင် ၾၢႆႇၾႆးၾႃႉ တွၵ်ႊတိူဝ်ႊ ထုၼ်းၼၢႆႇ တွပ်ႇလၢတ်ႈပၼ် ၼႂ်းပၢင်ၵုမ်သၽႃးၵူၼ်းမိူင်း  တီႈၼေႇပျီႇတေႃႇဝႃႈ ပႂ်ႉႁႂ်ႈငိုၼ်းၸႂ်ႉၸၢႆႇ (Budget) ပီ2017-18 လူင်းမႃးၵွၼ်ႇ ၸင်ႇတေၸၢင်ႈၸတ်းၵၢၼ် ၾႆးၾႃႉပၼ်ၵူၼ်းမိူင်း ၼႂ်းၵိင်ႇၸႄႈဝဵင်းၵႃလိ။ ၼႂ်းပီ 2018-2019 သမ်ႉ တေသိုပ်ႇၸတ်းၵၢၼ်ပၼ်တၢင်း ၸႄႈဝဵင်းတႃႈၵေႃႈ။ မီးၽႅၼ်ၵၢၼ်ဝႆႉၸိူင်ႉၼႆ ဝႃႈၼႆ ။


ၼၢင်းၸၼ်ၶမ်း(ၶ) ၼၢင်းၶိၼ်ႇသေႃး ၽူႈတႅၼ်းသၽႃးၵူၼ်းမိူင်း ပႃႇတီႇႁူဝ်သိူဝ် ၸႄႈဝဵင်းၵုၼ်ႁဵင် လၢတ်ႈဝႃႈ “ ၵဵဝ်ႇၵပ်းလွင်ႈၼႆႉ ဢဝ်ၵၢင်ၸႂ်ပေႃႈမႄႈၵူၼ်းမိူင်း ၼႂ်းၵိင်ႇၸႄႈဝဵင်းၵႃလိ တုၵ်းယွၼ်းတၢင်ႇ လၢတ်ႈမႃး ၶႂ်ႈလႆႈၾႆးၾႃႉ ၼမ်ႉၵဵင်းတွင်းၼႆလႄႈ ၸင်ႇလႆႈတၢင်ႇလိၵ်ႈပၼ် ၼႂ်းသၽႃး မိူဝ်ႈဝၼ်းတီႈ 01/08/2016  ယွၼ်ႉဝႃႈ ၾႆးၾႃႉ ဢၼ်ၵူၼ်းမိူင်းၵႃလိ ၸႂ်ႉယူႇတေႃႈလဵဝ်ၼႆႉ မၼ်းဢမ်ႇၵုမ်ႇတင်းမူတ်း၊ ထႅင်ႈၾၢႆႇၼိုင်ႈၵေႃႈ ပေႃးထိုင်ၶၢဝ်းသႂ်ႇၼမ်ႉၼႃး တႃႇႁဵတ်းၼႃးၸိုင် ၼမ်ႉႁႅင်ႈ ၾႆးဢမ်ႇမႃး ၸဵမ်ၸိူဝ်းၼႆႉ” ဝႃႈၼႆ ။


တွၵ်ႊတိူဝ်ႊ ထုၼ်းၼၢႆႇ ၵႅမ်ၽွင်းလူင် ၾၢႆႇၾႆးၾႃႉလၢတ်ႈဝႃႈ “ ၼႂ်းၵႃႈ ပီ 2017-18 ၼႆႉ တေ ႁၢင်ႈႁႅၼ်းပၼ်ၾႆးၾႃႉတွၼ်ႈ တႃႇၼႂ်းၸႄႈဝဵင်းၵႃလိ၊ ပေႃးဝႃႈ ပီ 2018-2019 သမ်ႉ တေ ႁၢင်ႈႁႅၼ်း ပၼ် တွၼ်ႈတႃႇၼႂ်းဝဵင်းတႃႈၵေႃႈ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ပေႃးဢဝ်ပၵ်းပိူင်ၾႆးၾႃႉဝႃႈၸိုင် ပေႃးၵိင်ႇၽႄႁူင်းၾႆးၾႃႉ တင်ႈတမ်း ဝႆႉၼႂ်းဝဵင်းယဝ်ႉ တၵ်းတေတႆႈၾႆးပၼ်ၼႂ်းၸႄႈဝဵင်းမူတ်းမူတ်း။ လိူဝ်ၼၼ်ႉ ၼိုင်ႈပီလႂ် တေလႆႈ တိူဝ်းၶႂၢၵ်ႈပၼ်ၾႆး သွင်လၵ်း ဝႃႈၼႆ ။


ယၢမ်းလဵဝ် ၵူၼ်းမိူင်းၼႂ်းၵိင်ႇၸႄႈဝဵင်းၵႃလိၼႆႉ လႆႈၸႂ်ႉတိုဝ်းၾႆးၾႃႉ ၼမ်ႉၼွင်ၶမ်း ဢၼ်တပ်ႉသိုၵ်း ၵူၼ်းမိူင်း ႁဵတ်းဝႆႉ။ တႄႇပၼ်ၵူၼ်းမိူင်းၵႃလိမႃး မိူဝ်ႈပီ 2010 ၊ ၼိုင်ႈယူႊ ၼိတ်ႊလၢႆၸၢႆႇ 200 ပျႃး။ ထိုင်မႃး ပီ 2014 သမ်ႉ လူတ်းယွမ်းမႃးပဵၼ် ၼိုင်ႈယူႊၼိတ်ႊလႂ် 150 ပျႃး၊ တင်းမူတ်း သႂ်ႇပၼ် မီႊတိူဝ်ႊပွၵ်ႊ မီး 541 လင်ႁိူၼ်း၊ ၼႂ်းၸႄႈဝဵင်းၵႃလိသမ်ႉ လင်ႁိူၼ်း တင်းမူတ်းမီး 1485 လင်ႁိူၼ်း၊ ယွၼ်ႉၼၼ် ႁႅင်းၾႆးၾႃႉ ဢၼ်ယူႇတီႈတပ်ႉသိုၵ်း ၵူၼ်းမိူင်း ႁဵတ်းဝႆႉၼၼ်ႉ ဢမ်ႇပေႃးၸႂ်ႉ လႄႈ  ၵူၼ်းမိူင်းၸင်ႇဢွၼ်ၵၼ်တုၵ်းယွၼ်းထႅင်ႈ ဝႃႈၼႆ ။