ပွႆးပီမႂ်ႇတႆး ႁပ်ႉတွၼ်ႈပီ 2111 ၼႆႉတီႈဝဵင်းပၢင်လူင်၊ ၵေႃႈၽႄပႃႈတႂ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် တေၸတ်းတီႈၽႂ်တီႈမၼ်းလၢႆတီႈ။ တေဢမ်ႇႁူမ်ႈၵၼ်ၸတ်းတီႈလဵဝ်။ ယိူင်းဢၢၼ်း ပိူဝ်ႈတႃႇပူၵ်းပွင်ၼမ်ႉၵတ်ႉၵူၼ်းၼုမ်ႇ၊ ႁႂ်ႈၵူၼ်းၼုမ်ႇမီးတူဝ်ထူပ်း မေႃၵၢၼ်ငၢၼ်း။ ပွႆးပီမႂ်ႇတႆးၼႆႉ ပီႈၼွင်ႉတႆးလၢႆတီႈ လၢႆၸႄႈဝဵင်း ၵေႃႈၸတ်း ။

ပၢင်ပွႆးႁပ်ႉတွၼ်ႈပီမႂ်ႇတႆး 2111 ၼီႈ၊ သူင်ႇသင်ႇပီၵဝ်ႇ 2110 ၼႂ်းၸိုင်ႈတႆး မိူၼ်ၼင်ႇတီႈဝဵင်းပၢင်လူင် ၸိုင်ႈတႆးပွတ်းၸၢၼ်း ၸတ်းဝၼ်းတီႈ 29-30/11/2016 ။ ဝၼ်းတီႈ 29 ၶမ်ႈၶိုၼ်းလိူၼ်သိပ်းသွင်လပ်း ႁပ်ႉတွၼ်ႈပီမႂ်ႇတႆး၊ ဝၼ်းတီႈ 30 လိူၼ်ၸဵင်ႇမႂ်ႇဝၼ်းၼိုင်ႈၵေႃႈ သိုပ်ႇၸတ်းပွႆးပီမႂ်ႇတႆး ႁူမ်ႈတင်းပၢင်ပွႆး ပိုတ်ႇလုမ်း ငဝ်ႈငုၼ်းလူင်သင်ၶၸိုင်ႈတႆး- ၼႆယဝ်ႉ ။


ပၢင်ပွႆးႁပ်ႉတွၼ်ႈပီမႂ်ႇတႆး 2111 ပီၼႆႉ တီႈဝဵင်းပၢင်လူင် ဢမ်ႇႁူမ်ႈၵၼ်ၸတ်းတီႈလဵဝ်။ ယူႇတီႈၵေႃႈၽႄပႃႈတႂ်ႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် ဢၼ်မီး 16 ၵေႃၽႄၼၼ်ႉ တေၸတ်းတီႈလႂ်တီႈၼၼ်ႈ တီႈၽႂ်တီႈမၼ်း။ ပေႃးပဵၼ်ၵေႃၽႄယႂ်ႇ မီးႁႅင်းၵူၼ်းၼမ်ၵေႃႈ တေမီးပႃးတၢင်းၵႃႈတၢင်းဝႅၼ်။ ပေႃးပဵၼ်ၵေႃၽႄလဵၵ်ႉ ဢၼ်မီးႁႅင်းၵူၼ်းဢေႇၵေႃႈ 2-3 ၵေႃၽႄ တေႁူမ်ႈၵၼ်ၸတ်းႁဵတ်း။ ဝၼ်းႁပ်ႉပီမႂ်ႇၼၼ်ႉ တေမီးတၢင်းၵိၼ်ၸွမ်းၾိင်ႈငႄႈၾိင်ႈထုင်းတႆး။ ထႅင်ႈဝၼ်းၼိုင်ႈ လိူၼ်ၸဵင်မႂ်ႇၼိုင်ႈၶမ်ႈ တေမီးၵၢၼ်ၵၢပ်ႈသွမ်းသင်ၶၸဝ်ႈၸိူဝ်းၼႆႉ -ၼႆယဝ်ႉ ။


ၵႅမ်ၽူႈၼမ်းၼႂ်း ၵေႃႈလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် ၸၢႆးသုၼ်ယုၵ်ႉ လၢတ်ႈဝႃႈ-လၢႆးၸတ်း ၸိူင်ႉၼႆၼႆႉ တေၸတ်းတႃႇၶၢဝ်းတၢင်း 2 ပီ၊ ပေႃးဝႆးသွင်ပီယဝ်ႉ ၸင်ႇၵွႆႈႁူမ်ႈၵၼ်ၸတ်းယႂ်ႇၶိုၼ်း။ ၵွပ်ႈဝႃႈမိူဝ်ႈလဵဝ်ၼႆႉ ပေႃးဝႃႈႁူမ်ႈၵၼ်ၸတ်းၼႆၵေႃႈ ယူႇတီႈၵေႃလိၵ်ႈလၢႆးသေ ၸုမ်းပွင်ၵၢၼ်ပွင်ပဵၼ်ပၢင်ပွႆး ပီမႂ်ႇတႆး ဢွၼ်ႁူဝ်ၸတ်းႁဵတ်းၵႂႃႇၵူၺ်း၊ ၵူၼ်းၼုမ်ႇၶဝ်တေဢမ်ႇမေႃၵၢၼ် ။


သိုပ်ႇလၢတ်ႈထႅင်ႈဝႃႈ- ပေႃးဝႃႈၵေႃၽႄၽႂ်မၼ်းၸတ်းႁင်းၵူၺ်းတႄႉ ၸုမ်းၶဝ်ၵေႃႈတေၶွတ်ႇၽွတ်ႈၶွမ်ႊမတီႊ ပွင်ပဵၼ်ပၢင်ပွႆးပီမႂ်ႇတႆးသေ ဢွၼ်ႁူဝ်ၸတ်းႁဵတ်းၵႂႃႇ။ ပေႃးႁဵတ်းၸိူင်ႉၼၼ် ၵူၼ်းၼုမ်ႇၶဝ်ၵေႃႈတေမီး တူဝ်ထူပ်း တေမေႃၵၢၼ်မႃး။ ယိူင်းဢၢၼ်းပိူင်လူင်ႈၵေႃႈ ၶႂ်ႈႁႂ်ႈၵူၼ်းၼုမ်ႇၶဝ်ႈမေႃၵၢၼ်၊ ႁႂ်ႈၵူၼ်းၼုမ်ႇၶဝ် မေႃတိုတ်ႉတၢႆးၵၼ်သေ မေႃဢွၼ်ႁူဝ်ႁဵတ်းသၢင်ႈၵႂႃႇတီႈၽႂ်မၼ်း။ ပွႆးပီမႂ်ႇတႆးၼႆႉ တေၸတ်းသွင်ဝၼ်း၊ ဝၼ်းလိူၼ်သိပ်းသွင်လပ်း ၶိုၼ်းဝၼ်းႁပ်ႉပီမႂ်ႇလႄႈ တင်းဝၼ်းလိူၼ်ၸဵင်မႂ်ႇၼိုင်ႈၶမ်ႈ- ဝႃႈၼႆ ။


တီႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼႆႉ ဝၼ်းလိူၼ်ၸဵင်ႇမႂ်ႇၼိုင်ႈၶမ်ႈ တေမီးၵၢၼ် ပိုတ်ႇလုမ်း ငဝ်ႈငုၼ်းသင်ၶၸိုင်ႈတႆး ဝဵင်းပၢင်လူင် တီႈဝတ်ႉပိတၵၢတ်ႈ။ ၵွပ်ႈၼၼ် ၸုမ်းပွၵ်ႉတုမ်ႇမူဝ် တေၵႂႃႇၸတ်း ပၢင်ပွႆးပီမႂ်ႇတႆး တီႈၼႂ်းဝၢင်းဝတ်ႉပိတၵၢတ်ႈသေ ႁူမ်ႈၸွႆႈပၢင်ပွႆးပိုတ်ႇလုမ်း ငဝ်ႈငုၼ်းသင်ၶၸိုင်ႈတႆး- လႆႈႁူႉၼင်ႇၼႆ ။


ၵူၼ်းပၢင်လူင် ၸၢႆးသူႉ လၢတ်ႈဝႃႈ- ယူႇတီႈၸုမ်းတုမ်ႇမူဝ်ႁဝ်းၶႃႈတႄႉ တေၵႂႃႇႁဵတ်းတီႈၼႂ်းဝတ်ႉပိတၵၢတ်ႈ၊ ယွၼ်ႉဝႃႈလိူၼ်ၸဵင်မႂ်ႇၼိုင်ႈၶမ်ႈၼႆႉ တေမီးပၢင်ပွႆးပိုတ်ႇ လုမ်းငဝ်ႈငုၼ်းသင်ၶၸိုင်ႈတႆး။ ႁဝ်းၶႃႈတေၵႂႃႇၸွႆႈသေ ၸတ်းႁူမ်ႈၵၼ်တင်းပီမႂ်ႇတႆး။ မိူၼ်ၼင်ႇလိူၼ်သိပ်းသွင်လပ်းၵေႃႈ ႁဵတ်းပွႆးႁပ်ႉတွၼ်ႈပီမႂ်ႇတႆး၊ လိူၼ်ၸဵင်မႂ်ႇဝၼ်းၼိုင်ႈၵေႃႈ ၸတ်းႁူမ်ႈၵၼ်တင်း ပၢင်ပွႆးပိုတ်ႇလုမ်းငဝ်ႈငုၼ်းသင်ၶၸိုင်ႈတႆး- ဝႃႈၼႆ ။


ၵႃႈပူၼ်ႉမႃး လွင်ႈၸတ်းပၢင်ပွႆးပီမႂ်ႇတႆး တီႈဝဵင်းပၢင်လူင်ၼႆႉ ဢမ်ႇႁူမ်ႈၵၼ်ၸတ်းႁဵတ်းတီႈလဵဝ်သေ ၸတ်းၽႂ်ၸတ်းမၼ်းၵေႃႈ ယၢမ်ႈမီးမႃးယူႇ၊ ဢၼ်ၸတ်းတီႈၽႂ်တီႈမၼ်းၼႆႉ ဢမ်ႇၵွမ်ႉၵႃႈပွၵ်ႉၼႆႉၵူၺ်း- မႄႈႁိူၼ်းၼုမ်ႇ ၵူၼ်းပၢင်လူင်ၵေႃႉၼိုင်ႈလၢတ်ႈ ။


ဢၼ်လၢၵ်ႇလၢႆးမၼ်းၸမ်ႉ ပွႆးပီမႂ်ႇတႆး 2111 ပီၼႆႉ တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇသမ်ႉ ပီႈၼွင်ႉတႆးၶိုၼ်၊ တႆးလိုဝ်ႉ တႆးၸိူဝ်းၼႆႉ တေႁူမ်ႈၵၼ်ၸတ်းတီႈလဵဝ်ၵၼ်။ ပၢင်ပွႆးပီမႂ်ႇတႆးတီႈၵဵင်းတုင်ၼႆႉ ၵႃႈပူၼ်ႉမႃး ပီႈၼွင်ႉတႆးၶိုၼ် တႆးလိုဝ်ႉလႄႈတႆးၼႆႉ ပႆႇယၢမ်ႈႁူမ်ႈၵၼ်ၸတ်းမႃးသေပွၵ်ႈ၊ ပီၼႆႉပဵၼ်ပီႁႅၵ်ႈသုတ်း-ၼႆယဝ်ႉ ။


ၾၢႆႇၼိုင်ႈတၢင်းၼိုင်ႈ တီႈမိူင်းၶိူဝ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ ၵူၼ်းၼုမ်ႇၶဝ်ဢွၼ်ၵၼ် တူၵ်းသူး တေႃႇပေႃးထိုင်ၶမ်ႈၶိုၼ်းႁပ်ႉပီမႂ်ႇ။ တူၵ်းသူးၵႂႃႇပဵၼ်ပွၵ်ႉပဵၼ်ႁိူၼ်းတိၵ်းတိၵ်းသေ ၶမ်ႈၶိုၼ်းႁပ်ႉပီမႂ်ႇ လိူၼ်သိပ်းသွင်လပ်းၼၼ်ႉ ၵႂႃႇၺႃးပွၵ်ႉလႂ်ႁိူၼ်းၽႂ်ၵေႃႈ ႁပ်ႉပီမႂ်ႇတီႈပွၵ်ႉၼၼ်ႉႁိူၼ်းၼၼ်ႉ။ ငိုၼ်းတွင်း ၸိူဝ်းဢၼ်လႆႈမႃးတီႈၵၢၼ်တူၵ်းသူးၵေႃႈ ဢဝ်ၵႂႃႇၸႂ်ႉၶိုၼ်းၼႂ်းႁူင်းႁဵၼ်း- ၼႆယဝ်ႉ ။


ၸိုင်ႈတႆးပွတ်းႁွင်ႇ ၸႄႈဝဵင်းမူႇၸေႈသမ်ႉ ပၢင်ပွႆးႁပ်ႉတွၼ်ႈပီမႂ်ႇတႆး 2111 ၼီႈၼႆႉ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းမူႇၸေႈ ဢွၼ်ႁူဝ်ၼမ်းၼႃႈၸတ်းႁဵတ်း။ တေမီးၵၢၼ်ၶႄႉၶႅင်ႇၼၢင်းငၢမ်း/ ၼၢင်းလဝ်း (Miss Tai Muse 2111) ။ ၼၢင်းသၢဝ်တႆး ၸိူဝ်းဢႃယု 17 ပီၶိုၼ်ႈၼိူဝ်တေႃႇထိုင် 25 ပီၼႆႉ ၽူႈလႂ်သူၼ်ၸႂ်ၵေႃႈ ပၼ်ၸိုဝ်ႈသဵင်သၢႆမၢႆသေၶဝ်ႈၶႄႉၶႅင်ႇလႆႈ။ ဝၼ်းပၼ်သဵၼ်ႈၸိုဝ်ႈဝၼ်းလိုၼ်းသုတ်း ယဝ်ႉၵႂႃႇမိူဝ်ႈဝၼ်းတီႈ 12/11/2016- ၼႆယဝ်ႉ ။