ၼုမ်ႇၸၢႆးတႆး ႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ၊ ၵူၼ်းမိူင်းၸၢင် ၸႄႈဝဵင်းမိူင်းသူႈ ၶီႇလူတ်ႉၶိူင်ႈထူပ်းၽေး ၵိုင်ႉၵၢင်ႉ လူတ်ႉၵႃးၽႃႇၺႃး ယၢမ်းၵၢင်ၶမ်ႈၵၢင်ၶိုၼ်း ၶမ်ႈၶိုၼ်းၾူၼ်တူၵ်းႁႅင်း၊ တိူဝ်ႉဝၢတ်ႇၸဵပ်းလိူဝ်ႁႅင်း ယူတ်းယႃဢမ်ႇလႆႈ လူႉသဵင်ႈတၢႆၵႂႃႇ တီႈႁူင်းယႃပႃႇငႄႉ (ၼၶွၼ်းၽိင်း) ဝဵင်းၵဵင်းမႆႇ မိူင်းထႆး ။

ပူၼ်ႉမႃးမိူဝ်ႈဝၼ်းတီႈ 10/11/2016 ၼၼ်ႉ ၶၢဝ်းယၢမ်းၵၢင်ၶိုၼ်းမွၵ်ႈ 10 မူင်း၊ ၼုမ်ႇၸၢႆးတႆး ႁႅင်းၵၢၼ်ယၢၼ်မိူင်း ၸိုဝ်ႈၸၢႆးပီး ၶီႇလူတ်ႉၶိူင်ႈၵိူတ်ႇၽေးၵိုင်ႉၵၢင်ႉ၊ ၽေးဢုပၢတ်ႈ ထုၵ်ႇလူတ်ႉၵဵင် ဢၼ်ၸဝ်ႈၶွင်ပဵၼ်ၵူၼ်းမိူင်းထႆး ၽႃႇၺႃးတီႈၶူဝ်လင်ၼိုင်ႈ ႁိမ်းသႃလႃးၵၢင် ၼႂ်းဝဵင်းၵဵင်းမႆႇ။ သူင်ႇၶဝ်ႈယူတ်းယႃတူဝ်ဢမ်ႇလႆႈသေ လႆႈလူႉသဵင်ႈတၢႆၵႂႃႇ တီႈႁူင်းယႃပႃႇငႄႉ (ၼၶွၼ်းၽိင်း)- ၼႆယဝ်ႉ ။


ဝၼ်းတီႈ 15/11/2016 ဢဝ်ၶၢပ်ႈတူဝ်မၼ်းၸၢႆး မႃးဝႆႉတီႈဝတ်ႉပႃႇပဝ်ႈ ဢိူင်ႇသီၽုမ်း ဝဵင်းၵဵင်းမႆႇ။ ၾၢႆႇၸွႆႈထႅမ်တူင်ႇဝူင်းၵူၼ်း ႁႅင်းၵၢၼ်ယၢၼ်မိူင်း ဢိၵ်ႇၾၢႆႇပီႈၼွင်ႉၸိူဝ်ႉၶိူဝ်း လႄႈဢူၺ်းၵေႃႉဢူၺ်းသေႈ ၵူၼ်းႁူႉၸၵ်းၸိူဝ်းၼႆႉ တိုၵ်ႉႁႅၼ်းတၢၼ်းႁဵတ်းတၢင်းလီပၼ်ဝႆႉ ၸွမ်းၾိင်ႈထုင်းပုတ်ႉထသႃသၼႃ တီႈဝတ်ႉပႃႇပဝ်ႈ ၊ တေပူၼ်ႉၶၢပ်ႈတူဝ်-ႁွပ်ႇႁူဝ်ၶဝ်ႈႁဵဝ်ႈ ၼႂ်းဝၼ်းၽတ်းတီႈ 17/11/2016 ၼႆႉ ၽွင်းယၢမ်းဝၢႆးဝၼ်း တီႈပႃႈႁဵဝ်ႈသၼ်တီႇထမ်း ဢိူင်ႇၸၢင်ႉၽိူၵ်ႇ ဝဵင်းၵဵင်းမႆႇ- ၼႆယဝ်ႉ ။


ၸၢႆးလိူၼ်ၶမ်း ၽူႈတူင်ႉၼိုင်ၼႂ်းတူင်ႇဝူင်းၵူၼ်းတႆး ၸွႆႈထႅမ်ႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ လၢတ်ႈဝႃႈ- ၶိုၼ်းဝၼ်းတီႈ 10 ၼၼ်ႉ ၾူၼ်ၵေႃႈတူၵ်းႁႅင်း။ ၸၢႆးပီးၼႆႉ ၶီႇလူတ်ႉၶိူင်ႈမႃးၵေႃႉလဵဝ်သေ ထုၵ်ႇလူတ်ႉၵဵင်ၵူၼ်းထႆး တမ်ၽႃႇၺႃးတီႈၶူဝ်လင်ၼိုင်ႈ ႁိမ်းသႃလႃးၵၢင်သေ လႆႈတိူဝ်ႉဝၢတ်ႇၸဵပ်းလိူဝ်ႁႅင်း။ ၶႃမၼ်းႁၵ်းဝႆႉတင်းသွင်ၶွၼ်၊ မိုဝ်းၾၢႆႇၶႂႃၵေႃႈႁၵ်း။ ငိုၼ်းၵႃႈႁူင်းယႃၸိူဝ်းၼၼ်ႉၵေႃႈ ၾၢႆႇၸဝ်ႈလူတ်ႉၵဵင် ႁပ်ႉၽိတ်းသေ ဢဝ်ဝႂ် ၵၢၼ်ႁပ်ႉႁွင်းၸွႆႈထႅမ်ၽေႊၵိုင်ႉၵၢင်ႉတၢင်းလူတ်ႉလူင် (พ.ร.บ รถยนต์) ဢွၵ်ႇပၼ်တင်းမူတ်း။ လိူဝ်သေၼၼ်ႉ တႃႇၵႃႈသၢႆႈတႅၼ်း (ၵႃႈႁူဝ်) ၵေႃႈ ၸဝ်ႈၶွင်လူတ်ႉၵဵင် တေသၢႆႈတႅၼ်းပၼ်တီႈပီႈဢၢႆႈမၼ်း ၸၢႆးဝုၼ်း တီႈပၢၵ်ႇၼႃႈလုမ်းတြႃး ဢမ်ႇႁိုင်တၢင်းၼႃႈၼႆႉ ဢမ်ႇပူၼ်ႉမွၵ်ႈသွင်လိူၼ်- ဝႃႈၼႆ ။


သိုပ်ႇလၢတ်ႈဝႃႈ- ၸၢႆးပီးၼႆႉ တူဝ်မၼ်းၵေႃႈဢမ်ႇမီးဝတ်းဝႂ်သင်၊ လူတ်ႉၶိူင်ႈဢၼ်မၼ်းၶီႇၵေႃႈ ဢမ်ႇမီးဝႂ်ၶွၼ်ႇ ဢမ်ႇမီးဝႂ်ႁပ်ႉႁွင်းလွင်ႈၸွႆႈထႅမ်တၢင်းပိူင်ၵူၼ်း။ မိူဝ်ႈလူတ်ႉၽႃႇၵၼ်ၼၼ်ႉၵေႃႈ ဢမ်ႇမီးၽႂ်ႁၼ်ၸွမ်း၊ တီႈၼၼ်ႈၵွင်ႈထၢႆႇၵမ်းသိုဝ်ႈ (CCTV) ၵေႃႈဢမ်ႇမီး၊ ၵတ်ႉၵႃႈၸဝ်ႈလူတ်ႉၵဵင် ယင်းႁပ်ႉၽိတ်းသေယွမ်းဢဝ် ဝႂ်ႁပ်ႉႁွင်းၸွႆႈထႅမ်ၽေးၵိုင်ႉၵၢင်ႉၾၢႆႇလူတ်ႉၵႃး ဢွၵ်ႇပၼ်တင်းမူတ်း။ မၼ်းၸၢႆးၼႆႉ တိူဝ်ႉဝၢတ်ႇၸဵပ်း လိူဝ်ႁႅင်းသေ သမ်ႉပေႃးၶႂ်ႈလႅပ်ႈၸမ်တၢႆၸဵမ်တီႈ လူတ်ႉၽႃႇၺႃးၼၼ်ႉၵွၼ်ႇယဝ်ႉ ။ မၼ်းၸၢႆးၼႆႉ လႅပ်ႈတၢႆၵႂႃႇမိူဝ်ႈဝၼ်းတီႈ 11/11/2016 ၊ ၵွပ်ႈတၢင်းမေႃယႃၶဝ်လၢတ်ႈဝႃႈ မိူဝ်ႈၵႂႃႇႁပ်ႉမႃးၼၼ်ႉ မၼ်းၸၢႆးပႆႇတၢႆလီ၊ မၼ်းမႃးတၢႆတီႈႁူင်းယႃ။ လႆႈႁူႉၶၢဝ်ႇသေ လႆႈၵႂႃႇႁဵတ်းလိူင်ႈ မိူဝ်ႈဝၼ်းတီႈ 14 ၊ ဢုပ်ႇတၢင်းမေႃယႃ၊ ၸဝ်ႈၼႃႈတီႈထႆး၊ ဢုပ်ႇၵၼ်တင်းၸဝ်ႈၶွင်လူတ်ႉဢၼ်ၽႃႇၺႃးမၼ်းၼၼ်ႉ တေႃႇပေႃးယွမ်းၸၢႆႇပၼ်ငိုၼ်းသေ ဝၼ်းတီႈ 15 ၸင်ႇလႆႈဢဝ်ၶၢပ်ႈတူဝ်မၼ်း ဢွၵ်ႇႁူင်းယႃမႃး- ၸၢႆးလိူၼ်ၶမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ။


ၼၢင်းမူၺ်ၽူး မုၵ်ႉၸုမ်းၸၢဝ်းၶိူဝ်းတႆး ၵေႃႈလၢတ်ႈဝႃႈ-  မၼ်းၸၢႆးဢမ်ႇမီးပီႈၼွင်ႉ၊ ပေႃႈမႄႈဢၼ်မီးယူႇတီႈ မိူင်းၸၢင် မိူင်းသူႈၵေႃႈၵႄႇထဝ်ႈယဝ်ႉ။ ၵွပ်ႈၼႆ တိုၵ်းသူၼ်းထိုင်ပီႈၼွင်ႉႁဝ်းၶႃႈၵူႈမူႇၵူႈၸုမ်း ၸဵမ်သုၼ်ႇတူဝ် ၶဝ်ႈႁူမ်ႈၸွႆႈထႅမ်ပၢင်ၸႃပၼ ဝၼ်းလိုၼ်းသုတ်းၶွင်ၸၢႆးပီးၼႆႉ ယႂ်ႇယႂ်ႇၼမ်ၼမ်- ဝႃႈၼႆ ။


ၸၢႆးပီး ဢႃယု 18 ပီ၊ ၵူၼ်းမိူင်းၸၢင်ၼႆႉ ၸိုဝ်ႈပေႃႈလုင်းမၢတ်ႈ၊ ၸိုဝ်ႈမႄႈပႃႈၼၢင်း။ ၶဝ်ႈႁဵတ်းၵၢၼ်ၼႂ်းမိူင်း လႆႈမွၵ်ႈ 1 ပီ၊ ဝတ်းဝႂ်ဢၼုၺၢတ်ႈႁဵတ်းၵၢၼ် ဢၼ်ထုၵ်ႇမႅၼ်ႈၸွမ်းမၢႆမီႈမိူင်းထႆးၵေႃႈ ဢမ်ႇပႆႇမီးသင်။ လူတ်ႉၶိူင်ႈဢၼ်မၼ်းၸၢႆးၶီႇသေ ၵႂႃႇၵိူတ်ႇၽေးဢုပၢတ်ႈၼႆႉၵေႃႈ ပဵၼ်ၶွင်ပေႃႈလဵင်ႉမၼ်း- ၼႆယဝ်ႉ ။


မိူင်းၸၢင်ၼႆႉ ယူႇၼႂ်းၸႄႈဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။