ပၢင်ၵုမ်သၽႃး ၵူၼ်းမိူင်းလႄႈသၽႃး ၸိူဝ်ႉၸၢတ်ႈ တႄႇၸတ်းၶိုၼ်းပဵၼ်ပွၵ်ႈၵမ်းသွင် ၵမ်းထူၼ်ႈသၢမ် တီႈၼေႇပျီႇတေႃႇ ။

ဝၼ်းတီႈ 16/11/2016 ယၢမ်း 10:00 မူင်း ပၢင်ၵုမ်သၽႃး ၵူၼ်းမိူင်းလႄႈၸိူဝ်ႉၸၢတ်ႈ တႄႇၸတ်းႁဵတ်း ပဵၼ်ပွၵ်ႈၵမ်းသွင် ၵမ်းထူၼ်ႈသၢမ် တီႈႁွင်ႈပၢင်ၵုမ်လူင် ၼေႇပျီႇတေႃႇ ၼႆယဝ်ႉ ။


ၸၢႆးသႅင်မိူင်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းမိူင်းၵိုင် လၢတ်ႈဝႃႈ “ ပၢင်ၵုမ်သၽႃး ၵူၼ်းမိူင်း လႄႈ ၸိူဝ်ႉၸၢတ်ႈပွၵ်ႈၵမ်းၼႆႉ ပဵၼ်ၵႂႃႇ ၵမ်းထူၼ်ႈသၢမ်ယဝ်ႉ၊ ယွၼ်ႉဝႃႈ ဝၼ်းမိူဝ်ႈၼႆႉ ပဵၼ်ဝၼ်း တႄႇပၢင်ၵုမ်ယဝ်ႉလႄႈ ၽူႈတႅၼ်း ၸိူဝ်းပွၵ်ႈႁိူၼ်းယေးၸဝ်ႈၵဝ်ႇၸိူဝ်းၼၼ်ႉ မၢင်ၵေႃႉၵေႃႈ ပွၵ်ႈၽႅဝ် ၶိုၼ်းတီႈၼေႇပျီႇတေႃႇၵေႃႈမီး၊ မၢင်ၵေႃႉသမ်ႉ ပႆႇႁွတ်ႈၽႅဝ်ၵေႃႈမီး။ ၼႂ်းပၢင်ၵုမ်ပွၵ်ႈၵမ်းၼႆႉ ဢွၼ်တၢင်းသုတ်း တေသိုပ်ႇႁဵတ်းၵၢၼ်ၸိူဝ်းပႆႇယဝ်ႉ မိူဝ်ႈၼႂ်းပၢင်ၵုမ်ၵမ်းထူၼ်ႈသွင် ဢၼ်ၵိုတ်း ၶၢင်ႉဝႆႉၸိူဝ်းၼၼ်ႉ ယင်းၵိုတ်းၶၢင်ႉဝႆႉထႅင်ႈသွင်သၢမ်ဢၼ်” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ပၢင်ၵုမ်ၼိုင်ႈပွၵ်ႈၼႆႉ တေႁဵတ်းမွၵ်ႈလၢႆလိူၼ်ၼႆ မၼ်းယူႇတီႈ ႁူဝ်ပဝ်ႈသ ၽႃးတႅပ်းတတ်းပၼ်ၼၼ်ႉၵူၺ်း၊ မိူဝ်ႈၵမ်းထူၼ်ႈၼိုင်ႈၼၼ်ႉႁိုင် 4 လိူၼ်ပၢႆ၊ ၵမ်း ထူၼ်ႈသွင်သမ်ႉ ႁိုင်မွၵ်ႈ သၢမ်လိူၼ်ပၢႆ၊ ၵမ်းၼႆႉတႄႉ တေၸတ်းႁဵတ်း မွၵ်ႈလၢႆလိူၼ်တႄႉ ပႆႇႁူႉ၊ လွင်ႈယင်ႉလိုဝ်ႈသမ်ႉ ၼိုင်ႈလိူၼ်တေႃႇ လိူၼ်ၶိုင်ႈ ဝႃႈၼႆ ။


ၽူႈတႅၼ်းသၽႃးၵူၼ်းမိူင်းလႄႈ ၽူႈတႅၼ်းသၽႃးၸိူဝ်ႉၸၢတ်ႈ ၼႂ်းမိူင်းႁူမ်ႈတုမ်ပတ်းပိုၼ်ႉ တင်းမူတ်းမီး 600 ပၢႆ၊ ၽူႈတႅၼ်းၵူၼ်းမိူင်းမီး 400 ပၢႆလႄႈ ၽူႈတႅၼ်းၸိူဝ်ႉၸၢတ်ႈမီး 160 ပၢႆ။ ၼႂ်းၽူႈတႅၼ်းၵူၼ်းမိူင်းပႃႇတီႇႁူဝ်သိူဝ် တင်းမူတ်း 12 ၵေႃႉ၊ ၽူႈတႅၼ်းသၽႃး ၸႄႈမိူင်းတႆး ပႃႇတီႇႁူဝ်သိူဝ် 24 ၵေႃႉလႄႈ ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ် 3 ၵေႃႉ တင်းမူတ်းမီး 39 ၵေႃႉ ဝႃႈၼႆ ။


ပၢင်ၵုမ်သၽႃးၸႄႈမိူင်းတႆးတႄႉ တေတႄႇမိူဝ်ႈလႂ်ပႆႇႁူႉ တိုၵ်ႉယင်ႉလိုဝ်ႈၵႂႃႇမိူဝ်ႈ ၼႂ်းလိူၼ်ဢွၵ်ႊ ထူဝ်ႊၿိူဝ်ႊၼႆၵူၺ်း။ ၽူႈတႅၼ်းသၽႃးၸႄႈမိူင်းတႆးတင်းမူတ်းမီး 137 ၵေႃႉ ။