ဝၼ်းႁပ်ႉတွၼ်ႈပီမႂ်ႇတႆး 2111 ၼီႈ ၼႂ်းၵဵင်းမႆႇပီၼႆႉ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ၊ တေဢွၼ်ႁူဝ် ပီႈၼွင်ႉတႆး ၼႂ်းၵဵင်းမႆႇ ၸတ်းပၢင်ႁႅၼ်းတၢၼ်းၶဝ်ႈမႂ်ႇၼမ်ႉမႂ်ႇ၊ တႆးတဵၼ်း၊ ဝၢၼ်းပရိတ်ႈ (သူတ်ႇမူၼ်း) ပိုၼ်ၽႄၵုသူလ်ၼႃးမုၼ်ထိုင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး တူၼ်ၸဝ်ႈဢၼ်ၼွၼ်းၽႄးၵႂႃႇ ။

ပၢင်ပွႆးႁပ်ႉတွၼ်ႈပီမႂ်ႇတႆး 2111 ပီၼႆႉ တီႈၼႂ်းဝဵင်းၵဵင်းမႆႇ ၸိုင်ႈထႆး၊ ၼႂ်းဝၼ်းတီႈ 30/11/2016 (လိူၼ်ၸဵင်မႂ်ႇ 1 ၶမ်ႈ ႁိုဝ် လိူၼ်ၸဵင်မႂ်ႇဝၼ်းၼိုင်ႈ)ၼၼ်ႉ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ တေဢွၼ်ႁူဝ်ၼမ်းၼႃႈ ပီႈၼွင်ႉတႆး ၼႂ်းဝဵင်းၵဵင်းမႆႇသေ ၸတ်းပၢင်ႁႅၼ်းတၢၼ်းၸွမ်းၾိင်ႈထုင်းပုတ်ႉထသႃသၼႃ၊ ႁဵတ်းတၢင်းလီ ပိုၼ်ၽႄၵုသူလ်ၼႃးမုၼ် ယိူင်းၸူးထိုင်  ၸဝ်ႈမုၼ်ယႂ်ႇၶုၼ်ႁေႃၶမ်းထႆး (တူၼ်တီႈ 9) ၽူးမိၽူလ်းဢၻုလ်းယၻဵတ်ႇ ဢၼ်ၼွၼ်းၽႄး ၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ ပူၼ်ႉမႃးမိူဝ်ႈဝၼ်းတီႈ 13/10/2016 - ၼႂ်းပၢင်ႁူပ်ႉထူပ်းဢုပ်ႇဢူဝ်းၵိူဝ်းၵုမ်ၵၼ် ၸုမ်းတႆးလၢႆမူႇၸုမ်း မိူဝ်ႈဝၼ်းဢႃးတိတ်ႉ 19/11/2016 တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ၊ လႆႈၸႂ်ၵၼ်ၼင်ႇၼႆ ။


ၼႂ်းၵဵင်းမႆႇ မိူင်းထႆးၼႆႉ ၾၢႆႇၼိုင်ႈတၢင်းၼိုင်ႈၵေႃႈ ၵၢင်ၶမ်ႈၶိုၼ်းဝၼ်းတီႈ 29/11/2016 (ဝၼ်းလိူၼ်သိပ်းသွင်လပ်း) ဢၼ်ပဵၼ်ဝၼ်းႁပ်ႉတွၼ်ႈပီမႂ်ႇတႆး 2111 ၼီႈၼၼ်ႉ တီႈဝတ်ႉၻွၼ်းၸၼ်ႇ ဢိူင်ႇတႃႈသႃလႃး ၵေႃႈမီးပၢင်ႁႅၼ်းတၢၼ်း ဝၢၼ်းပရိတ်ႈၶၢမ်ႈပီ ပိူဝ်ႈတႃႇပဵၼ်မင်ႇၵလႃႇလီလူင်ႁူင်ႁၢင်း ။


ၸၢႆးၽူင်း ၵွင်တိုၼ်းၸွႆႈၸၢတ်ႈ လၢတ်ႈဝႃႈ- တီႈဝတ်ႉၻွၼ်းၸၼ်ႇ၊ ၶိုၼ်းဝၼ်းတီႈ 29 ၼၼ်ႉ တေမီးၵၢၼ်ႁေႃးထမ်းဝၢၼ်းပရိတ်ႈ (သူတ်ႇမူၼ်း)ၶၢမ်ႈပီ။ ၵၢင်ၶိုၼ်းတင်ႈတႄႇ 11 မူင်းတေဝၢၼ်းပရိတ်ႈ တေႃႇပေႃးထိုင်ဝၢႆးတဵင်ႈၶိုၼ်း ဢၼ်ယၢင်ႈၶဝ်ႈၵႂႃႇၼႂ်းပီမႂ်ႇတႆး 2111 ၼီႈ။ ပေႃးထိုင်မႃးၵၢင်ၼႂ်ၵေႃႈ တေမီးၵၢၼ်လွင်းသွမ်းပီမႂ်ႇ တီႈဝတ်ႉၻွၼ်းၸၼ်ႇ၊ ၼႂ်းဝၼ်းၼၼ်ႉ ပီႈၼွင်ႉႁဝ်းၶႃႈၽူႈလႂ်ၽႂ်တူဝ်ႈတၼ်းၵေႃႈ ယွၼ်းမွၵ်ႇထိုင်ၵႂႃႇၶဝ်ႈႁူမ်ႈၵၼ်ယႂ်ႇၼမ်သေၵမ်း- ဝႃႈၼႆ ။


ၵဵဝ်ႇၵပ်းပၢင်ႁႅၼ်းတၢၼ်း တီႈဝတ်ႉၵူႇတဝ်ႈ ၼႂ်းဝၼ်းပီမႂ်ႇတႆး 2111 ၼီႈၼၼ်ႉ ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႆႇ ၸၢႆးသႅင်ယ လၢတ်ႈဝႃႈ-လွင်ႈပွႆးပီမႂ်ႇတႆးပီၼႆႉ ဢိင်ၼိူဝ်ငဝ်းလၢႆးသေ ဝၼ်းတီႈ 30 ဝၼ်းပီမႂ်ႇၼၼ်ႉ ႁဝ်းတေၸတ်းပၢင်ႁႅၼ်းတၢၼ်း လူႇတၢၼ်းၶဝ်ႈမႂ်ႇၼမ်ႉမႂ်ႇ ၵၢပ်ႈသွမ်းဝၼ်းသင်ၶၸဝ်ႈ၊ တေမီးၵၢၼ်ၼႄၶႅပ်းႁၢင်ႈ ဢၼ်ၸဝ်ႈႁေႃၶမ်း ၼၢင်းႁေႃၶမ်း ဢိၵ်ႇၸိူဝ်ႉႁိူဝ်ႇငိူၼ်ႈၶိူဝ်း ၶႆႇသႅင်ၽၼ်းၶမ်းၼႂ်းႁေႃ ၵႂႃႇယဵမ်ႈၸႂ်းပီႈၼွင်ႉတႆး တီႈဝၢၼ်ႈတႆးႁဝ်းၶႃႈ ဝၢၼ်ႈမႂ်ႇမွၵ်ႇၸၢမ် ၸိူဝ်းၼႆႉ။  ပေႃးၵၢင်ၶမ်ႈသမ်ႉ တေမီးၵၢၼ်တႆႈတဵၼ်း၊ ဝၢၼ်းပရိတ်ႈ (သူတ်ႇမူၼ်း) ပိုၼ်ၽႄၵုသူလ်ၼႃးမုၼ်ပၼ် ၸဝ်ႈမုၼ်ယႂ်ႇၶုၼ်ႁေႃၶမ်းထႆး။ လွင်ႈၼႆႉ ယွၼ်းႁွင်ႉမွၵ်ႇဝွၵ်ႇၸိူၼ်းထိုင် ပီႈၼွင်ႉတႆးႁဝ်းၶႃႈ၊ ဢမ်ႇဝႃႈတီႈဝတ်ႉၻွၼ်းၸၼ်ႇၵေႃႈလီ၊ တီႈဝတ်ႉၵူႈတဝ်ႈၼႆႉၵေႃႈလီ၊ ၶႅၼ်းတေႃႈမႃးၶဝ်ႈႁူမ်ႈပၢင်ႁႅၼ်းတၢၼ်း ၼႄလွင်ႈယုမ်ႇယမ်ၼပ်ႉထိုဝ်ၸဝ်ႈႁေႃၶမ်း ဢၼ်ႁဝ်းၶႃႈလႆႈမႃးပိုင်ႈဢိင်ႁူမ်ႈငဝ်း တႂ်ႈပႃႇရမီႇၶွင်ၸဝ်ႈၼႆႉ သေၵမ်း- ဝႃႈၼႆ ။


ႁူဝ်ပဝ်ႈၵေႃလိၵ်ႈလၢႆး သိုပ်ႇလၢတ်ႈဝႃႈ- ပေႃးထိုင်မႃး ဝၼ်းတီႈ 19 လိူၼ်ၼႃႈၼႆႉ ႁဝ်းၶႃႈတေၵႂႃႇၵႃရဝ ၼပ်ႉယမ် ၶၢပ်ႈတူဝ်ၸဝ်ႈမုၼ်ယႂ်ႇႁေႃၶမ်း တီႈၵုင်းထဵပ်ႈ။ ဝၼ်းတီႈ 19 ဢွၵ်ႇတီႈၵဵင်းမႆႇ၊ ဝၼ်းတီႈ 20 ၶဝ်ႈၼပ်ႉယမ်၊ ဝၼ်းတီႈ 21 ပွၵ်ႈၶိုၼ်းလႄႈဝႄႉဢႅဝ်ႇယဵမ်ႈတူၺ်းဢွင်ႈတီႈၵိုၵ်းပိုၼ်း ၸွမ်းတၢင်းဢၼ်ၽၢၼ်ႇမႃး မိူၼ်ၼင်ႇဢယုတ်ႉထယႃးၸိူဝ်းၼႆႉ။ ၵွပ်ႈၼႆ ပီႈၼွင်ႉတႆးႁဝ်းၶႃႈၽႂ်သေဢမ်ႇဝႃႈ သင်ၸိူဝ်ႉဝႃႈၶႂ်ႈၵႂႃႇႁူမ်ႈၸွမ်းၸိုင် ၼႂ်းဝၼ်းတီႈ 30 ဢၼ်ပဵၼ်ဝၼ်းပီမႂ်ႇတႆး လူႇတၢၼ်းၶဝ်ႈမႂ်ႇၼမ်ႉမႂ်ႇၼၼ်ႉ မႃးပၼ်သၢႆမၢႆၸိုဝ်ႈသဵင် တီႈဝတ်ႉၵူႇတဝ်ႈ ၵဵင်းမႆႇ ။


ၽူႈၸိူဝ်းတေၵႂႃႇၵေႃႈ ႁႂ်ႈႁၢင်ႈႁႅၼ်းဝႆႉၶူဝ်းတႆးသီလမ်ဝႆႉၸုမ်ႇၼိုင်ႈ၊ ပေႃးပဵၼ်ၸၢႆးၶဵၼ်းႁူဝ်သီၶၢဝ်၊ သၢႆႁတ်ႉဢႅဝ်သီၶၢဝ်။ ၼၢင်းယိင်း ၶူဝ်းတႆးသီလမ်၊ ၶဵၼ်းႁူဝ်သီလမ် လေႃးလႄးတၢင်ႇသီၵေႃႈလႆႈယူႇ။ ပိူင်လူင်မၼ်း ၼင်ႇႁိုဝ်ႁဝ်းၶႃႈပီႈၼွင်ႉတႆး ၸိူဝ်းမႃးမီးယူႇၼႂ်းမိူင်းထႆးလႄႈသင်၊ ၸိူဝ်းမႃးပၵ်းတီႈယူႇ တၼ်းသဝ်းၼႂ်းမိူင်းထႆး ၼပ်ႉႁူဝ်သိပ်းပီၸိူဝ်းၼႆႉလႄႈသင်၊ ၸိူဝ်းမႃးၵိူတ်ႇၼႂ်းမိူင်းထႆးလႄႈသင် ပေႃးလႆႈၼႄၵၢၼ်ၼပ်ႉယမ် ဢၼ်ႁဝ်းၶႃႈမီးတေႃႇၸဝ်ႈႁေႃၶမ်း၊ ၶိူဝ်းထႆးတင်းတႆးၼႆႉ ႁဝ်းၵေႃႈပဵၼ်ၶိူဝ်းသယၢမ်ၼင်ႇၵၼ်- ႁူဝ်ပဝ်ႈၵေႃလိၵ်ႈလၢႆးၵဵင်းမႆႇ ၸၢႆးသႅင်ယ လၢတ်ႈ ။


ၼွၵ်ႈသေသိူဝ်ႈၶူဝ်းတႆးသီလမ်ယဝ်ႉ ၽူႈၸိူဝ်းတေၵႂႃႇၶဝ်ႈႁူမ်ႈၼပ်ႉယမ်ၵူႈၵေႃႉ တေလႆႈႁၢင်ႈႁႅၼ်းဝႆႉ သွၵ်းတိၼ်သီလမ်ၵူႈၼိုင်ႈ၊ သွၵ်းတိၼ်သီလမ်ၼႆႉ တေလႆႈပဵၼ်သႅၼ်းဢၼ်လႆႈသုပ်းဢဝ်၊ မီးသူၼ်ႈ၊ ဢၼ်ဢမ်ႇမီးသၢႆႁုတ်ႉၼၼ်ႉ-ၼႆယဝ်ႉ ။