ပီမႂ်ႇတႆး 2111 မိူင်းႁဝ်ႉ (ပီၵႆႇ) ၼႆႉ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ တေလူႇတၢၼ်းၶဝ်ႈမႂ်ႇ   လဵင်ႉၽဵလ်း (ၵၢပ်ႈသွမ်း)  သင်ၶၸဝ်ႈသေ ယၢတ်ႇၼမ်ႉႁဵတ်းၵုသူလ်ၼႃးမုၼ်ၼႂ်းဝၼ်းႁႅၵ်ႈႁူဝ်ပီ 2111 ၼီႈလိူၼ်ၸဵင်မႂ်ႇ 1 ဝၼ်းတေထိုင်ၼႆႉ ။

ၼႂ်းတိုဝ်ႉတၢင်းဝၼ်းၶိုၼ်ႈပီမႂ်ႇ 2111 ၼီႈ  ၼႆႉၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ တေလူႇတၢၼ်းၶဝ်ႈမႂ်ႇ တၢၼ်းၽဵလ်း(ၵၢပ်ႈသွမ်း) ႁပ်ႉသိလ်ႁပ်ႉပွလ်းၽွၼ်းလီပီမႂ်ႇတီႈသင်ၶၸဝ်ႈသေ ၵၢင်ၶမ်ႈသမ်ႉတေၸတ်းႁဵတ်း ပၢင်ၼွမ်းၶုပ်ႉၶွပ်ႈမုၼ်ငဝ်းၸဝ်ႈမုၼ်ယႂ်ႇႁေႃၶမ်းလႄႈ ၸတ်းႁဵတ်းပၢင်သူတ်ႇမူၼ်း ၼွမ်းၶုပ်ႉတၢၼ်းပၼ် မုၼ်ယႂ်ႇၸဝ်ႈႁေႃၶမ်းၽရႃႉပရမိၼ်းထရမႁႃၽူမိၽူလ်းဢတုလ်းယၻဵၶျ် ဢၼ်လႆႈသဵင်ႈမုၼ်ၼွၼ်းၽႄးၵႂႃႇ မိူဝ်ႈဝၼ်း တီႈ 13/10/2016 ယၢမ်း 17.52 မူင်းၼၼ်ႉ ။


လူၺ်ႈဢၼ်ပီႈၼွင်ႉတႆးႁဝ်းၶႃႈလႆႈမႃးယူႇပိုင်ႈႁူမ်ႈငဝ်း တႂ်ႈၽူၺ်းပႃရမီၸဝ်ႈၽႅၼ်ႇလိၼ်ႁေႃၶမ်း ၸိုင်ႈထႆး ႁိုဝ် မိူင်းသယၢမ် ဢၼ်ပဵၼ်ၸိူဝ်ႉၶိူဝ်းၼိူဝ်ႉလိူတ်ႈသၢႆႁိူဝ်ႇၶႆးလဵဝ် ထႆးၼွႆႉထႆးယႂ်ႇၼၼ်ႉလႄႈသင် ႁူမ်ႈဝႃႈပီႈၼွင်ႉ တႆးႁဝ်းမီးယူႇၼႂ်းလူၵ်ႈ တူဝ်ႈပတ်းပိုၼ်ႉ ဢမ်ႇဝႃႈၼႂ်းမိူင်းဢိၼ်းၻီးယိူဝ်း မိူင်းၶႄႇ မိူင်းလဝ်း မိူင်းဝႅတ်ႉၼၢမ်း မိူင်းၵမ်းၿူးၶျႃး မိူင်းမၢၼ်ႈ လႄႈလၢႆလၢႆမိူင်းၼၼ်ႉ ၼႂ်းၵႃႈသၢႆလိူတ်ႉၸိူဝ်ႉၶိူဝ်းထႆး ႁိုဝ် တႆးတင်းသဵင်ႈၵေႃႈ ဢၼ်တိုၵ်ႉမီးႁေႃၶမ်းယူႇၼၼ်ႉ ၵိုတ်းယူႇၼႂ်းမိူင်းထႆးတီႈလဵဝ်ၵူၺ်း ။


လိူဝ်ၼၼ်ႉ တေလႆႈႁၼ်ၵၼ်ယူႇၵမ်ႈၼမ် ၼႂ်းဝီးၻီးဢူဝ်း ၵဵဝ်ႇၵပ်းၵၢၼ်တူင်ႉၼိုင်လႄႈၵၢၼ်ႁဵတ်းသၢင်ႈ မုၼ်ယႂ်ႇၸဝ်ႈႁေႃၶမ်းၽရႃႉပရမိၼ်းထရမႁႃၽူမိၽူလ်းဢတုလ်းယၻဵၶျ် ၼႂ်းၶၢဝ်းတၢင်း 70 ပီပူၼ်ႉမႃးၼၼ်ႉ ဢမ်ႇလိူၵ်ႈၸိူဝ်ႉလိူၵ်ႈၶိူဝ်းၵူၼ်း ဢမ်ႇလိူၵ်ႈၽႃသႃသႃသၼႃၸိူဝ်ႉၸၢတ်ႈ ၽၢၼ်ႁိုဝ်မီး ၸဝ်ႈႁဝ်းဝႆႉဝၢင်းတူဝ် ယေႃႈတႅမ်ႇလူတ်းယွမ်းၸၼ်ႉထၢၼ်သေ ဢဝ်ၸႂ်ၽဵင်ႇပဵင်းၶဝ်ႈၸူးၸီႉၸမ်ႈၼႄသဵၼ်ႈတၢင်း ဝၢင်းၽႅၼ် ၵႄႈလိတ်ႈပၼ် ပၼ်ႁႃၸီးဝိတ်ႉၸူဝ်ႈပၢၼ် ၵၢၼ်ယူႇၵိၼ်သဝ်း ဢမ်ႇၶၢင်းႁိူဝ်ႉၶၢင်းမွႆႈ ၸွႆႈလိူဝ်ၵမ်ႉထႅမ်ပၼ်ႁႅင်း ၸွတ်ႇပိုၼ်ႉတီႈတူဝ်ႈလႅၼ်သယၢမ် ဢမ်ႇဝႃႈပိုၼ်ႉတီႈႁူၺ်ႈလိုၵ်ႉလွႆသုင် သဵၼ်ႈတႃႈသၢႆတၢင်း ယၢပ်ႇယဵၼ်း သုၵ်ႉယုင်ႈ ၸမ်ၽေး။ ထိုင်တီႈၸၢတ်ႈၸိုင်ႈႁူမ်ႈတုမ်လူၵ်ႈ (UN) ပေႃးၵၢဝ်ႇၶၢၼ်ယွင်ႈယေႃး ၼပ်ႉယမ် ႁူမ်ႈတင်းႁူဝ်ပဝ်ႈလူင် 5 ၽၢၵ်ႈၵုၼ် ၼႂ်းလူၵ်ႈ (လုမ်ႈၾႃႉ)လႄႈၼၢင်းသၢဝ်သႃးသႃႊမႅၼ်ႊတႃႊ ၽၢဝ်ႊဝိူဝ်ႊရ် ၽွင်းတၢင်ၸိုင်ႈဢမႄးရိၵႃး ဢၼ်ပဵၼ်ၽွင်းတၢင် ၵိုၵ်းမၼ်ႈၸၢတ်ႈၸိုင်ႈႁူမ်ႈတုမ်လူၵ်ႈ ၵၢဝ်ႇၶၢၼ် ယုၵ်ႉယွင်ႈ ၵုၼ်းငၢမ်းၵႂၢမ်းလီ မုၼ်ယႂ်ႇၸဝ်ႈႁေႃၶမ်း ၽရႃႉပရမိၼ်းထရမႁႃၽူမိၽူလ်းဢတုလ်းယၻဵၶျ် ဢၼ်မီးၸႂ် သိလ်ထမ်းလႄႈႁၵ်ႉႁွမ် ဢီးလူၸွႆႈထႅမ် ၶႃႈဝၢၼ်ႈ ၵူၼ်းမိူင်း ၼႂ်းပၢင်ၵုမ်လူင်ၸၢတ်ႈၸိုင်ႈႁူမ်ႈတုမ်လူၵ်ႈ (UN) ဝၼ်းတီႈ 28/10/2016 တီႈဝဵင်းလူင်ၼိဝ်းယွၵ်ႉၼၼ်ႉ ။


လိူဝ်ၼၼ်ႉ မုၼ်ယႂ်ႇၸဝ်ႈႁေႃၶမ်းလႄႈၽရႃႉၼၢင်းၸဝ်ႈႁေႃၶမ်း ႁူမ်ႈတင်းၶိူဝ်းၺၢတ်ႈ(ၺႃႇတိ) ၸဝ်ႈႁေႃၶမ်း ယင်းႁွတ်ႈထိုင်ဢႅဝ်ႇယဵမ်ႈသူႇၸႂ်း ပီႈၼွင်ႉတႆး တီႈဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ဝဵင်းမႄႈဢၢႆ လႄႈဝဵင်းမိူင်းႁႅင် ၸႄႈတွၼ်ႈၵဵင်းမႆႇ တၵ်ႉထၢမ် တုၵ်ႉသုၶ်း လွင်ႈပဵၼ်ယူႇသေ ၸွႆႈထႅမ်ယုၵ်ႉမုၼ်းပၼ် ဢွင်ႈတီႈႁဵတ်းၵိၼ်ယူႇသဝ်း တေႃႇပေႃးၶိုၼ်ႈယႂ်ႇမႂ်ႇသုင် မီးၼမ်ႉမီးၾႆးၶဝ်ႈထိုင်ၼႂ်းမူႇဝၢၼ်ႈမႃး ဢိၵ်ႇတင်း သၢင်ႈပၼ်ႁူင်းႁဵၼ်း ပိူဝ်ႈလုၵ်ႈလၢၼ်တႆးလႄႈ ၵူၼ်းတႄးႁူတ်ႈသၼ်လွႆ ၼႂ်းတူင်ႇတၢင်ႇႁိမ်းႁွမ်းၼၼ်ႉ ပေႃးတေလႆႈႁဵၼ်းႁူႉမေႃပၺ်ၺႃၵိုၵ်းၼိူဝ်ႉၵိုၵ်းတူဝ် ၵူၺ်းဢမ်ႇၵႃး ယင်းပၢႆၵၢဝ်ႇလၢတ်ႈဝွၵ်ႇသင်ႇ တၵ်ႉတိူၼ်ဝႃႈ ဢွၼ်ၵၼ် ၶတ်းၸႂ်ယုၵ်ႉယွင်ႈႁဵၼ်းႁူႉပွၼ်ႈသွၼ်ပူင်ပၼ် ၾိင်ႈငႄႈလိၵ်ႈလၢႆးၸဝ်ႈၵဝ်ႇ ယႃႇႁႂ်ႈႁူင်ႈႁႂ်ႈႁၢႆၼႆယူႇ ။


ၸိူင်ႉႁိုဝ်ၵေႃႈလီ ၼႂ်းတိုဝ်ႉတၢင်းၼႆႉသေလႄႈ ဝၼ်းလိူၼ် 12 လပ်း (29/10/2016) တေမီးပၢင်သူတ်ႇမူၼ်း ၶၢမ်ႈပီ တီႈဝတ်ႉၻွၼ်းၸၼ်ႇ တင်ႈတႄႇၶၢဝ်းယၢမ်း 23.00 - 00.01 မူင်း သေသႂ်ႇၿၢတ်ႇ(လွင်းသွမ်း) ယၢမ်း ၶိုၼ်ႈပီမႂ်ႇသေ ယၢမ်း 9.00 မူင်းၵၢင်ၼႂ်သမ်ႉတေလူႇတၢၼ်းၶဝ်ႈမႂ်ႇ ႁပ်ႉသိလ်ႁပ်ႉပွၼ်းယဝ်ႉ တၢၼ်းၽဵလ်း (ၵၢပ်ႈသွမ်း)သင်ၶၸဝ်ႈ တီႈဝတ်ႉၵူႇတဝ်ႈ။ ပေႃးထိုင် ႁူဝ်ၶမ်ႈမႃး ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ တေႁႅၼ်းၸတ်းပၢင်သူတ်ႇမူၼ်း ပိူဝ်ႈပဵၼ်မုၼ်ၵုသူလ် ၼွမ်းယိုၼ်ႈၼွပ်ႇမွပ်ႈတၢၼ်း မုၼ်ယႂ်ႇၸဝ်ႈႁေႃၶမ်း ၽရႃႉပရမိၼ်းထရမႁႃၽူမိၽူလ်းဢတုလ်းယၻဵၶျ် လႄႈသူင်ႇသူႇသဝၼ်(ၼိပၢၼ်း)။ ၵွပ်ႈၼႆယွၼ်းဝွၵ်ႇၵၢဝ်ႇ ၸိူၼ်းထိုင်ပီႈၼွင်ႉတႆးႁဝ်း မႃးႁူမ်ႈႁဵတ်းၵုသူလ်တၢၼ်းမွပ်ႈလူႇပၼ်မုၼ်ယႂ်ႇၸဝ်ႈႁေႃၶမ်း ၽရႃႉပရမိၼ်းထရ မႁႃၽူမိၽူလ်းဢတုလ်းယၻဵၶျ် ၼႆဢေႃႈ ။


ၶပ်ႉမၢႆၵၢၼ်ၶၢဝ်းယၢမ်း 18.00 မူင်း

ဝၼ်းတီႈ 29/11/2016

ၶၢဝ်းယၢမ်း 23.00-00.01 သူတ်ႇမူၼ်းၶၢမ်ႈပီထိုင်ဝၼ်းတီႈ 30/11/2016
သႂ်ႇၿၢတ်ႇ(လွင်းသွမ်း)
ဢွင်ႈတီႈ ဝတ်ႉၻွၼ်းၸၼ်ႇ

ဝၼ်းတီႈ 30/10/2016

ၶၢဝ်ယၢမ်း 0900 မူင်း လူႇတၢၼ်းၶဝ်ႈမႂ်ႇ

1100 မူင်း တၢၼ်းၽဵလ်း(ၵၢပ်ႈသွမ်း)သင်ၶၸဝ်ႈလႄႈလဵင်ႉလူၽူႈမႃးႁူမ်ႈလူႇတၢၼ်း
1800 မူင်း တႆးတဵၼ်း သူတ်ႇမူၼ်းႁဵတ်းၵုသူလ်မွပ်ႈတၢၼ်းထိုင်မုၼ်ယႂ်ႇၸဝ်ႈႁေႃၶမ်း
        ၽရႃႉပရမိၼ်းထရမႁႃၽူမိၽူလ်းဢၻုလ်းယၻဵၶျ်
ဢွင်ႈတီႈ ဝတ်ႉၵူႇတဝ်ႈ

မၢႆတွင်း ၼႂ်းဝၼ်းပီမႂ်ႇၼႆႉ တေမီးၶႅပ်းႁၢင်ႈဢၼ်မုၼ်ယႂ်ႇၸဝ်ႈႁေႃၶမ်းလႄႈၽရႃႉၼၢင်းၸဝ်ႈႁေႃၶမ်း ဢိၵ်ႇတင်းလုၵ်ႈၸဝ်ႈ ဢႅဝ်ႇယဵမ်ႈၸႂ်းပီႈၼွင်ႉတႆး ဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ဝဵင်းမႄႈဢၢႆ လႄႈဝဵင်းမိူင်းႁႅင် ၸႄႈတွၼ်ႈၵဵင်းမႆႇ