ၸဝ်ႈၼႃႈတီႈပလိၵ်ႈ၊ ၾၢႆႇၵူတ်ႇထတ်းၵူၼ်း၊ ၾၢႆႇသိုၵ်း၊ ၾၢႆႇၽွင်းငမ်း ႁူမ်ႈၵၼ်ၶဝ်ႈၵူတ်ႇ ထတ်း ပိုၼ်ႉတီႈဢၼ်ႁႅင်းၵၢၼ်ယၢၼ်မိူင်းယူႇသဝ်းလၢႆလၢႆတီႈ ၼႂ်းၸႄႈတွၼ်ႈၵဵင်းမႆႇ ။

ဝၼ်းတီႈ 19/11/2016 ၸဝ်ႈၼႃႈတီႈပလိၵ်ႈ သိုၵ်း ဢဵၼ်ႁႅင်းမွၵ်ႈ130ပၢႆ လူင်းၵူတ်ႇထတ်း ပိုၼ်ႉတီႈ ဢၼ်ပီႈၼွင်ႉႁႅင်းၵၢၼ်ယူႇသဝ်း 3 တီႈၼႂ်းၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ ၸိုင်ႈထႆးပွတ်းႁွင်ႇ ။


ၸဝ်ႈၼႃႈတီႈပလိၵ်ႈလၢတ်ႈဝႃႈ - “ဢၼ်ႁဝ်းၶႃႈလူင်းၵူတ်ႇ ထတ်းလၢႆပိုၼ်ႉတီႈၼႆႉၵေႃႈ ထတ်းထၢမ်လွင်ႈဝတ်းလွင်ႈဝႂ် ပိူင်လူင်မၼ်းတႄႉယိူင်းၸူးၸုမ်းသႃႊမူႊရႆႊၶေႊတမ်ႊ၊ ၵူၼ်းၼုမ်ႇၸၢႆးလႄႈယိင်းၸႅတ်ႈထၢမ်လွင်ႈပိုၼ်းၵႅပ်ႈၶဝ်’’ ။


လိူဝ်သေၼၼ်ႉၸဝ်ႈၼႃႈတီႈၶဝ်ၺွပ်းဢဝ်ရူတ်ႉၶိူင်ႈ 4 လမ်း ဢၼ်ထၢင်ႇ ထိူမ်ဝႃႈၸၢင်ႈ ၽိတ်းမၢႆမီႈ- ဝႃႈၼႆ ။


ၸိူင်ႉၼၼ်ၼင်ႇၵဝ်ႇမိူဝ်ႈဝၼ်းတီႈ 17/11/2016 ၼၼ်ႉၵေႃႈ ၸဝ်ႈၼႃႈတီႈၾၢႆႇၸတ်းႁႃ ၵၢၼ်ငၢၼ်း၊ ပလိၵ်ႈ၊ သိုၵ်းႁူမ်ႈၵၼ်ၶဝ်ႈၵူတ်ႇထတ်း5 တီႈ ၼႂ်းဝဵင်းၵဵင်းမႆႇ ဢၼ်ႁႅင်းၵၢၼ် ယၢၼ်မိူင်းႁဵတ်းၵၢၼ်။ ၵူတ်ႇထတ်းပီႈၼွင်ႉႁႅင်းၵၢၼ်ယၢၼ်မိူင်း 200 ပၢႆ ၼႂ်းၼၼ်ႉမီး ႁႅင်းၵၢၼ်ၽိတ်းပၵ်းပိူင်မၢႆမီႈ 6 ၵေႃႉ - ဝႃႈၼႆ ။


လွင်ႈဢၼ်ၸဝ်ႈၼႃႈတီႈၶဝ် လူင်းၵူတ်ႇထတ်းၼႆႉ ယွၼ်ႉပိူဝ်ႈမိူဝ်ႈႁူဝ်လိူၼ်ပူၼ်ႉမႃးၼႆႉ မီးၶၢဝ်ႇဝႃႈ ၸုမ်းသႃႊမူႊရႆႊ ၶေႊတမ်ႊK Black ဢွၼ်ၵၼ်ႁဵတ်း လွင်ႈဢမ်ႇၼိမ်သဝ်းၼႂ်း ပိုၼ်ႉတီႈ ။