ပၢင်ႁူပ်ႉထူပ်းဢုပ်ႇၶႆႈၸီႉၸႅင်ႈလွင်ႈၵၢၼ်တူင်ႉၼိုင်ပူၼ်ႉမႃးလႄႈတေႁဵတ်းသၢင်ႈ ၶွင်တူင်ႇဝူင်းၵူၼ်းတႆး ပိူဝ်ႈတႃႇပီႈၼွင်ႉ ၵူၼ်းမိူင်းတႆးၼႂ်းၵဵင်းမႆႇလၢႆမူႇလၢႆၸုမ်း ၸိူဝ်းႁဵတ်းၵိၼ်ၵၢၼ်ယူႇၼႂ်းမိူင်းထႆး တေလႆႈႁူႉလွင်ႈပူၵ်းပွင် ပိုၼ်ႉထၢၼ်ၵၢၼ် ယူႇသဝ်းၸွမ်းပိူင်ၵူတ်းမၢႆၸိုင်ႈထႆးလႄႈႁႂ်ႈပေႃးလႆႈႁပ်ႉႁူႉ တိတ်းတၢမ်ၶၢဝ်ႇ တီႈၵိူတ်ႇပဵၼ်ႁဝ်းၼႂ်းမိူင်းတႆး ၼႆၼၼ်ႉပႃး လႄႈၸင်ႇလႆႈဝွၵ်ႇၸိူၼ်းဢဝ်ၸဝ်ႈၼႃႈတီႈၶွင်ႇသီႇဢဝ်ၶိုၼ်းၸိုင်ႈတႆး မႃးပိုတ်ႇလၢတ်ႈၼႄ ငဝ်းလၢႆးၵၢၼ် ႁဵတ်းသၢင်ႈလွင်ႈ ငမ်းယဵၼ် ။

ဝၼ်းတီႈ 20 လိူၼ်ၼူဝ်ႊဝႅမ်ႊၿိူဝ်ႊ 2016 (ဝၼ်းဢႃးတိတ်ႉ) ၸုမ်းၸၢဝ်းၶိူဝ်းတႆး တင်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸတ်းပၢင်ဢုပ်ႇၵိူဝ်းၵုမ်ၵၼ် ၵဵဝ်ႇလွင်ႈပိူဝ်ႈတႃႇၸတ်းပၢင်လူႇတၢၼ်းၶဝ်ႈမႂ်ႇ ဢိၵ်ႇတင်း တၢၼ်းၽဵလ်း(ၵၢပ်ႈသွမ်း) သင်ၶၸဝ်ႈ ၼႂ်းဝၼ်းပီမႂ်ႇလႄႈၸတ်းပၢင်သူတ်ႇမူၼ်း ၼွမ်းၵူမ်ႈၶုပ်ႉၵွမ်းဝႆႈသႃ ၵႃရဝလူႇတၢၼ်းပၼ်ၸဝ်ႈႁေႃၶမ်း ၼႂ်းတိုဝ်ႉတၢင်းဝၼ်းပီမႂ်ႇတႆးလႄႈၸီႉၸႅင်ႈၼႄငဝ်းလၢႆးလွင်ႈငမ်းယဵၼ်ၼႂ်းမိူင်းတႆး ပိူဝ်ႈတႃႇပီႈၼွင်ႉတႆးဢၼ်ယူႇႁၢင်ႇၵႆ မိူင်းတႆးၼႆလႄႈလႆႈဝွၵ်ႇၸိူၼ်းဝွၵ်ႇဢဝ် ၶွင်ႇသီႇဢဝ်ၶိုၼ်းၸိုင်ႈတႆး မႃးၸီႉၸႅင်ႈပွင်ႇလႅင်းပၼ်"လွင်ႈၵၢၼ်တူင်ႉၼိုင်တႆး လႄႈငဝ်းလၢႆးၼႂ်းမိူင်းတႆး " တီႈၵေႃ လိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ။


ၽွင်းယၢမ်း 9.45 မူင်းၵၢင်ၼႂ်ဝၼ်းတီႈ 20/11/2016 ၽူႈၵႅဝ်ပၢင် ပိုတ်ႇလၢတ်ႈၼႄ ပၢင်ႁူပ်ႉထူပ်းဢုပ်ႇၶႆႈ လွင်ႈၵၢၼ် တူင်ႉၼိုင်တႆးလႄႈငဝ်းလၢႆးၼႂ်းမိူင်းတႆးၵမ်းၼႆႉ ပဵၼ်လွင်ႈတေၵႂႃႇၼွမ်းၶုပ်ႉၵႃရဝဝႆႈသႃၽရႃႉၵုတ်းၸဝ်ႈႁေႃၶမ်း တီႈၼႂ်း ၽရႃႉတီႈၼင်ႈၻုသိတ်ႇမႁႃပရႃသၢထ် လူၺ်ႈမုၼ်ၵုၼ်းယႂ်ႇလူင်ၸဝ်ႈ ဢၼ်ႁူမ်ႇတူမ်းတူဝ်ႈထိုင်ပႃးတႆးၼႂ်းလႅၼ်သယၢမ် ႁူမ်ႈတင်းငဝ်းလၢႆးၼႂ်းမိူင်းတႆး ။


ဢွၼ်တၢင်းသုတ်း ပိုတ်ႇၵၢၼ်ၵပ်းသိုပ်ႇၼႄႉၼမ်းၸိုဝ်ႈသဵင်ပိူဝ်ႈပဵၼ်လွင်ႈႁူႉၸၵ်းမိုတ်ႈၵိုဝ်း ၼႂ်းၽူႈၶဝ်ႈႁူမ်ႈပၢင်ၵုမ်တင်း မူတ်းၸမ်ၸမ်ပၢၵ်ႇၵေႃႉ ။


ဝၢႆးသေၼၼ်ႉ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးဢုပ်ႇလၢတ်ႈၼႄလွင်ႈတေၸတ်းပၢင်လူႇတၢၼ်းၶဝ်ႈမႂ်ႇၼႂ်းဝၼ်းပီမႂ်ႇ 2111 ၼီႈ မိူင်းႁဝ်ႉ(ပီၵႆႇ) လိူၼ်ၸဵင်မႂ်ႇ 1 ဝၼ်းသေ တၢၼ်းၽဵလ်း(ၵၢပ်ႈသွမ်း)ဝၼ်း။ ႁူဝ်ၶမ်ႈၵေႃႈတေမီး ပၢင်လူႇတၢၼ်း ႁူမ်ႈသူတ်ႇမူၼ်းၼွမ်းတၢၼ်းယိုၼ်ႈထိုင်မုၼ်ယႂ်ႇၸဝ်ႈႁေႃၶမ်းၽရႃႉမႁႃၽူမိၽူလ်းဢၻုလ်းယၻဵၶျ် လူၺ်ႈ ၶုၵ်းၶွပ်ႈထိုင် မုၼ်ငဝ်းၸဝ်ႈႁေႃၶမ်းသယၢမ်ၸိုင်ႈထႆး ဢိၵ်ႇတင်း တေၵႂႃႇၼွမ်းၶုပ်ႉၵႃရဝဝႆႈသႃတီႈၽရႃႉၵုတ်းၸဝ်ႈ ၼႂ်းၽရႃႉတီႈၼင်ႈ ၻုသိတ်ႇမႁႃပရႃသၢထ် ၼႂ်းဝၼ်းတီႈ 20/12/2016 ။


သိုပ်ႇသေၼၼ်ႉ ၸဝ်ႈဢွၼ်တိုၼ်း ပိုတ်ႇလၢတ်ႈၼႄ လၵ်းၼမ်းၶွင်ႇသီႇဢဝ်ၶိုၼ်းၸိုင်ႈတႆး 6 ၶေႃႈလႄႈလွင်ႈ ဢဵၼ်းဢၢၼ်းၶွင်ႇသီႇဢဝ်ၶိုၼ်းၸိုင်ႈတႆး ႁူမ်ႈတင်း တုၵ်းယွၼ်းၵူၼ်းမိူင်းႁႂ်ႈမီးသူၼ်ႇႁူမ်ႈပၢႆးဝူၼ်ႉတွၼ်ႈတႃႇဢုပ်ႇဢူဝ်း ၵၢၼ်မိူင်းလႄႈလွင်ႈငမ်းယဵၼ် ၸဝ်ႈၸၢႆးငိုၼ်း ၵၢဝ်ႇလၢတ်ႈၼႄလွင်ႈတၢင်းပဵၼ်မႃးၵၢၼ်ၵိုတ်းတိုၵ်း တင်ႈတႄႇဢုပ်ႇဢူဝ်းၵၼ်ႁူဝ်ႁႅၵ်ႈႁူဝ်တီး တီႈဝဵင်းလူင်း ၵဵင်းႁၢႆး ၸိုင်ႈထႆး မိူဝ်ႈဝၼ်းတီႈ 19/11/2011၊ ၾၢႆႇၶွင်ႇသီႇဢဝ်ၶိုၼ်းၸိုင်ႈတႆး ၸဝ်ႈယွတ်ႈသိုၵ်းဢွၼ်ႁူဝ် ၾၢႆႇမၢၼ်ႈ ဢူးဢွင်ႇမိၼ်း ဢွၼ်ႁူဝ် ၵဵဝ်ႇလွင်ႈငမ်းယဵၼ်ၼၼ်ႉမႃးထိုင် NCA တေႃႇပေႃးထိုင်ပၢင်ၵုမ်လူင် ပၢင်လူင်ႁူဝ်ပၢၵ်ႇ 21 ပီ။ မီးတၢင်းၶိုပ်ႈၼႃႈလႄႈဢမ်ႇၶိုပ်ႈၼႃႈသင်ၸိူင်ႉႁိုဝ်။ လိူဝ်ၼၼ်ႉၵေႃႈလႆႈလူင်းပိုၼ်ႉတီႈႁူပ်ႉထူပ်းၵူၼ်းမိူင်း ပိူဝ်ႈၶွၼ်ႈတုမ် ပၢႆးဝူၼ်ႉတႃႇတွၼ်ႈၵၢၼ်ဢုပ်ႇဢူဝ်းလွင်ႈငမ်းယဵၼ်လႄႈၵၢၼ်သဵတ်ႈၵႃႈသဵတ်ႈႁူဝ်တေႃႇလူင်ပွင်ၸိုင်ႈမၢၼ်ႈ ။


ဝၢႆးသေၼၼ်ႉ ၸဝ်ႈၸၢႆးမိူင်း(သႅင်မိူင်း)ၵေႃႈလႆႈၸီႉၸႅင်ႈၼႄၵၢၼ်ႁူပ်ႉဢုပ်ႇဢူဝ်းတင်းၾၢႆႇလွင်ႈငမ်းယဵၼ်ၶွင်လူင်ပွင်ၸိုင်ႈ လႄႈၵၢၼ်ႁူပ်ႉထူပ်းၵူၼ်းမိူင်း ဢိၵ်ႇတင်းယူင်ႉသၢင်ႈလၵ်းၵၢၼ်သေလိုၼ်းသုတ်းၵေႃႈ ပိုတ်ႇတိုဝ်ႉတၢင်းပၼ် ၽူႈၶဝ်ႈႁူမ်ႈ ပၢင် တွင်ႈထၢမ်တွပ်ႇလၢတ်ႈ ၵဵဝ်ႇလွင်ႈပူၵ်းပွင်ပၼ်ၵူၼ်းမိူင်း လွင်ႈတီႈလိၼ် လွင်ႈၵၢၼ်မၢၵ်ႈမီး လွင်ႈပၢႆးပၺ်ၺႃ လွင်ႈယႃႈမဝ်းၵမ် လွင်ႈမႅတ်ႇပႅင်းပႂ်ႉပႃးသိင်ႇဝႅတ်ႉလွမ်ႉ လႂ်ၸိူဝ်းၼႆႉ ။


ၸိူင်ႉႁိုဝ်ၵေႃႈလီ ၶပ်ႉမၢႆၵၢၼ်ဝၼ်းပီမႂ်ႇတႆးၼၼ်ႉ  ၼႂ်းဝၼ်းလိူၼ် 12 လပ်း (29/12/2016) တေသူတ်ႇမူၼ်းၶၢမ်ႈပီ ယၢမ်း 13.00 မူင်း တေႃႇထိုင် 00.01 မူင်း ဝၼ်းပီမႂ်ႇတႆး(20/12/2016)သေ သႂ်ႇၿၢတ်ႇ(လွင်းသွမ်း) တီႈဝတ်ႉၻွၼ်းၸၼ်ႇ။ 09.00 မူင်း လူႇတၢၼ်းၶဝ်ႈမႂ်ႇ 11.00 မူင်း လူႇတၢၼ်းၽဵလ်း(ၵၢပ်ႈသွမ်း) တီႈဝတ်ႉၵူႇတဝ်ႈလႄႈ 18.00 မူင်း တႆးတဵၼ်း သူတ်ႇမူၼ်းလူႇတၢၼ်းယိူင်းၸူးထိုင်မုၼ်ယႂ်ႇၸဝ်ႈႁေႃၶမ်း ၽရႃႉပရမိၼ်းထရမႁႃၽူမိၽူလ်းဢၻုလ်းယၻၶျ် တီႈဝတ်ႉ ၵူႇတဝ်ႈ။ ၼွၵ်ႈသေၼၼ်ႉၵေႃႈ ၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ တေၸတ်းပၢင်ၼႄၶႅပ်းႁၢင်ႈ ဢၼ်မုၼ်ယႂ်ႇ ၸဝ်ႈႁေႃၶမ်းလႄႈၽရႃႉၼၢင်းၸဝ်ႈႁေႃၶမ်း ဢိၵ်ႇတင်းလုၵ်ႈၸဝ်ႈ ဢႅဝ်ႇယဵမ်ႈသူႇၸႂ်းတၵ်ႉထၢမ်လွင်ႈလီၸႃႉ ပီႈၼွင်ႉတႆး ဝၢၼ်ႈမႂ်ႇမွၵ်ႇၸၢမ် ႁူမ်ႈတင်း ၽွင်းႁွတ်ႈသူႇယဵမ်ႈၸႂ်းပီႈၼွင်ႉတႆးတီႈဝဵင်းမိူင်းႁႅင် ၸႄႈတွၼ်ႈဝဵင်းၵဵင်းမႆႇ။ လိုၼ်းသုတ်း ၸဝ်ႈဢွၼ်တိုၼ်း ၵၢဝ်ႇလၢတ်ႈၶွပ်ႈၸႂ်ၵူႈၾၢႆႇ ဢၼ်လႆႈၶဝ်ႈပႃးမီးသူၼ်ႇ ၸတ်းပဵၼ်ပၢင်ႁူပ်ႉထူပ်းပိၼ်ပၢႆႇလႅၵ်ႈလၢႆႈ ၸီႉၸႅင်ႈပွင်ႇလႅင်းၵၼ်ၸိူင်ႉၼႆသေၶွတ်ႇယွတ်ႈဢိုတ်းႁပ်းပၢင်ယဝ်ႉတူဝ်ႈလီငၢမ်း ။