ဝၼ်းတီႈ 20/11/2016 ၼႂ်ၼႆႉ ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ ၶဝ်ႈလူမ်ႇ တပ်ႉပၢင်သဝ်းတပ်ႉသိုၵ်း လူင်ပွင်ၸိုင်ႈမၢၼ်ႈ တီႈ 105 လၵ်း ၼိူဝ်သဵၼ်ႈတၢင်းလူင် လႃႈသဵဝ်ႈ - မူႇၸေႈ ၊ တင်းတပ်ႉပၢင်သဝ်းသိုၵ်းလူင်ပွင်ၸိုင်ႈတီႈ ဝဵင်းပၢင်ႇသၢႆး ။

ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉ တပ်ႉၽွမ်ႉႁူမ်ႈ ဢၼ်မီးလၢႆမူႇလၢႆၸုမ်းႁူမ်ႈၵၼ်ၼၼ်ႉ မိူဝ်ႈၼႆႉ ၵၢင်ၼႂ် 6 မူင်းထိုင် 9 မူင်း ၶဝ်ႈလူမ်ႇတပ်ႉပၢင်သဝ်းသိုၵ်းမၢၼ်ႈ တပ်ႉႁူမ်ႇလူမ်ႈသုၼ်ၵႃႉၶၢႆ 105 လၵ်း ဢၼ်မီး ၼိူဝ် သဵၼ်ႈတၢင်းလူင် ဝဵင်းလိူဝ်ႇ - လႃႈသဵဝ်ႈ - မူႇၸေႊ၊ ၾၢႆႇၼိုင်ႈၵေႃႈ လူမ်ႇတိုၵ်းပႃးတပ်ႉ ပၢင်သဝ်းသိုၵ်းမၢၼ်ႈ တီႈ ဝဵင်းပၢင်ႇသၢႆး။ ၵူၼ်းမိူင်း ၼပ်ႉႁဵင် ပၢႆႈၵႂႃႇတၢင်းမူႇၸေႊ ၊ ပၢႆႈၵႂႃႇတၢင်းမိူင်းၶႄႇ ။


ၵူၼ်းယူႇ 105 လၵ်း ၸမ်ၸႂ် ၾၢႆႇၽွင်းငမ်း ၵေႃႉၼိုင်ႈလၢတ်ႈဝႃႈ - “ပၢင်တိုၵ်းတႄႇၸဵမ်ၸဝ်ႉ၊ မွၵ်ႈ 9 မူင်းၼၼ်ႉ သိုၵ်းလုၵ်ႉၽိုၼ်ႉ ၶဝ်ႈလူမ်ႇယိုတ်းတပ်ႉမၢၼ်ႈဝၢႆးသေၼၼ်ႉသိုပ်ႇယိုတ်းတပ်ႉပလိၵ်ႈထႅင်ႈ။ ၾၢႆႇပလိၵ်ႈတၢႆ ထင်တီႈ 4 ၵေႃႉ၊ ၾၢႆႇသိုၵ်းတႄႉ တၢႆၵႃႈႁိုဝ် ဢမ်ႇလႆႈႁူႉ။  လႅပ်ႈတေတၢႆၼမ်ယူႇ” - ဝႃႈၼႆ ။


တပ်ႉပလိၵ်ႈမၢၼ်ႈဢၼ်ဢဝ်ႁူမ်ႇလူမ်ႈ ၶူဝ်ၼမ်ႉပေႃႈ ၼၼ်ႉၵေႃႈၺႃးလူမ်ႇ၊ ၺႃးၽဝ်ပႅတ်ႈ၊ ၶူဝ်ၵေႃႈ ၺႃးပွႆႇမၢၵ်ႇ၊ ၾၢႆႇသိုၵ်းၸၢဝ်းၶိူဝ်းလုၵ်ႉၽိုၼ်ႉ ယိုတ်းပၢင်သဝ်းတွၼ်ႈၼႂ်ၼၼ်ႉသေ မွၵ်ႈၶၢဝ်းၵၢင်ဝၼ်းတဵင်ႈတႄႉ ထွၼ်ဢွၵ်ႇၶိုၼ်းယဝ်ႉ - ဝႃႈၼႆ ။


ၸၢႆးၶမ်းသႂ် ၵူၼ်းယူႇ 105  လၵ်းလၢတ်ႈဝႃႈ “ ၵူၼ်းတီႈ 105  လၵ်း တႄႉ ပၢႆႈၸူးမူႇၸေႈ  ။ ၵူၼ်းတၢင်းပၢင်ႇသၢႆးတႄႉ ပၢႆႈၵႂႃႇတၢင်းမိူင်းၶႄႇ  ။ သိုၵ်းဢၼ်မႃးလေႃႇတိုၵ်းၼၼ်ႉ  ပဵၼ်သိုၵ်းၸၢဝ်းၶိူဝ်း ဝႃႈၼႆသေတႃႉ ၶဝ်လၢတ်ႈၵႂၢမ်းၶႄႇၵူၺ်း” - ၼႆ ။


တင်ႈတႄႇ ၵၢင်ၼႂ် 10 မူင်း ႁိူဝ်းမိၼ်မႅင်းမီႈ 3 လမ်း၊ ၵႃးၵၢပ်ႇလဵၵ်း၊ ၵႃႈတႅင်ႉ  သိုၵ်းလူင်ပွင်ၸိုင်ႈမၢၼ်ႈ သူင်ႇၶိုၼ်ႈသႅၼ်ဝီ ၵူတ်ႉၶၢႆ မူင်ႈၸူး 105 လၵ်း။
ၶၢဝ်ႇဢမ်ႇယိုၼ်ယၼ်တႄႉလၢတ်ႈဝႃႈ “ၸုမ်းသိုၵ်းဢူၺ်းလီၽွမ်ႉႁူမ်ႈၶဝ် မီးၽႅၼ်ၵၢၼ် ယိုတ်းဢဝ် ၵိဝ်ႇၶူၵ်ႉပၢင်ႇသၢႆး၊ 105 လၵ်း တင်းမိူင်းၵူဝ်း” - ဝႃႈၼႆ ။


ၸုမ်းၸိူဝ်းၶဝ်ႈလူမ်ႇ 105 လၵ်း ၼႂ် ၼႆႉ တႄႉထွၼ်ဢွၵ်ႇၶိုၼ်းယဝ်ႉဝႃႈၼႆသေတႃႉ ၵူၼ်းဝၢၼ်ႈ ၵူၼ်းမိူင်းတႄႉ ယင်းပႆႇႁတ်းပွၵ်ႈယူႇ ။ ယင်းတိုၵ်ႉမႆႈၸႂ် ၵူဝ်ပဵၼ် ပၢင်တိုၵ်း သိုၵ်းသိူဝ် ၶိုၼ်းယူႇဝႃႈၼႆ ။