ပီႈၼွင်ႉၵူၼ်းမိူင်း ၸႄႈဝဵင်းတႃႈၶီႈလဵၵ်း ဢဵၼ်းႁႅင်း 2000 ပၢႆ ႁူမ်ႈၵၼ်ဢွၵ်ႇၼႄၵၢင်ၸႂ် တုၵ်းယွၼ်း ႁႂ်ႈလူတ်းယွၼ်ႇပၼ်ၵႃႈၶၢမ်ႈလၢၼ်ႇၵႂႃႇမႃး တီႈလၢၼ်ႇမႄႈႁူၵ်ႈ ဝႃႈၼႆ ။

ဝၼ်းတီႈ 04/11/2016 ယၢမ်း 09:00 မူင်း ပီႈၼွင်ႉၵူၼ်းဝၢၼ်ႈ ဢိူင်ႇမိူင်းၽူင်း ၸႄႈဝဵင်း တႃႈၶီႈလဵၵ်း ဢွၼ်ၵၼ်ၶွၼ်ႈတုမ်ႁႅင်းၵၼ်သေ ဢွၵ်ႇၼႄၵၢင်ၸႂ် တီႈလၢၼ်ႇမႄႈႁူၵ်ႈ (စက်မှုဇုန်လမ်း) တီႈဝၢၼ်ႈႁူၺ်ႈလိၼ်လမ် ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ ႁႂ်ႈလူတ်းယွၼ်ႇၵႃႈၶၢမ်ႈလၢၼ်ႇၵႂႃႇမႃး၊ ထႅင်ႈၾၢႆႇၼိုင်ႈၵေႃႈ ယႃႇႁႂ်ႈလႆႈၵဵပ်း လူတ်ႉႁပ်ႉသူင်ႇ လုၵ်ႈႁဵၼ်း ၸဵမ်ၸိူဝ်းၼႆႉ လႆႈတၢင်ႇလၢတ်ႈၵႂႃႇ တင်းမူတ်း 6 ၶေႃႈ ဝႃႈၼႆ ။


ၸၢႆးသၢမ် ၽူႈၶဝ်ႈႁူမ်ႈဢွၵ်ႇၼႄၵၢင်ၸႂ် လၢတ်ႈဝႃႈ “ ႁဝ်းၶႃႈဢွၼ်ၵၼ်မႃး တုၵ်းယွၼ်းတီႈလၢၼ်ႇ မႄႈႁူၵ်ႈ (စက်မှုဇုန်လမ်း) ဢၼ်ဢူးထုၼ်းမိၼ်ႉ ပဵၼ်ၸဝ်ႈၶွင်မၼ်း” ႁဝ်းၶႃႈတုၵ်းယွၼ်း ႁႂ်ႈလႆႈလူတ်းယွၼ်ႇပၼ် ၵႃႈလူတ်ႉၶိူင်ႈ၊ လူတ်ႉၵႃးလႄႈ လူတ်ႉလူင် ယဝ်ႉၵေႃႈ ယႃႇႁႂ်ႈလႆႈ ၵဵပ်းလူတ်ႉၶိူင်ႈ ၵႃးဢၼ်ႁပ်ႉသူင်ႇလုၵ်ႈႁဵၼ်းလႄႈ လူတ်ႉၵႃး ၸဝ်ႈသင်ၶ ၸဵမ်ၸိူဝ်း ၼႆႉ ဝႃႈၼႆ ။


ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းတႃႈၶီႈလဵၵ်းၶဝ် ႁူမ်ႈၵၼ်တုၵ်းယွၼ်းၵႂႃႇ  6  ၶေႃႈ -

1.     ယႃႇႁႂ်ႈၵဵပ်းၵႃႈလူတ်ႉ လုၵ်ႈဢွၼ်ႇၶပ်းလူတ်ႉၵႂႃႇမႃးႁူင်းႁဵၼ်း(ႁေႃႈႁင်းၵူၺ်း)
2.     ယႃႇႁႂ်ႈၵဵပ်းၵႃႈလူတ်ႉ ဢၼ်ႁပ်ႉသူင်ႇ လုၵ်ႈဢွၼ်ႇၶိုၼ်ႈႁူင်းႁဵၼ်း
3.     ယႃႇႁႂ်ႈၵဵပ်းၵႃႈလူတ်ႉ ၸဝ်ႈႁႆႈၸဝ်ႈၼႃး ၵႂႃႇမႃးၼႂ်းပိုၼ်ႉတီႈ
4.      ႁႂ်ႈလူတ်းယွၼ်ႇပၼ် လူတ်ႉၶိူင်ႈၼိုင်ႈလမ်းလႂ် ႁႂ်ႈၵဵပ်း 5 ဝၢတ်ႇ
5.      ႁႂ်ႈလူတ်းယွၼ်ႇပၼ် လူတ်ႉၵႃးဢွၼ်ႇ ၼိုင်ႈလမ်းလႂ် 20 ဝၢတ်ႇ
6.      ႁႂ်ႈလူတ်းယွၼ်ႇပၼ် လူတ်ႉၵႃးယႂ်ႇ ၼိုင်ႈလမ်းလႂ် 40 ဝၢတ်ႇ ၸဵမ်ၸိူဝ်းၼႆႉ ဝႃႈၼႆ ။


ပီႈၼွင်ႉၵူၼ်းမိူင်း ၸုမ်းတူင်ႇဝူင်းၵူၼ်း ႁူမ်ႈၵၼ်ဢဵၼ်ႁႅင်း သွင်ႁဵင်ပၢႆ ၶွၼ်ႈတုမ်ၵၼ်တီႈ ႁူၺ်ႈ လိၼ်လမ်၊ ၶၢဝ်းယၢမ်း 07:30 မူင်း သမ်ႉလုၵ်ႉတီႈႁူၺ်ႈလိၼ်လမ်  မႃးၶွၼ်ႈတုမ်ၵၼ်ထႅင်ႈတီႈ ႁွင်ႈလိုၵ်ႉသေ ၶၢဝ်းယၢမ်း 09:00 မူင်း တႄႇပႆတၢင်းၼႄၵၢင်ၸႂ်ၵႂႃႇၸူးတီႈလၢၼ်ႇၵဵပ်းငိုၼ်း မႄႈႁူၵ်ႈ ဝႃႈၼႆ ။