ပႃႇတီႇႁူဝ်သိူဝ် (SNLD) ပိုတ်ႇလုမ်းၽႄ တီႈၼႂ်းဢိူင်ႇၵၢတ်ႇ ၽႃႉတင်း ဢိူင်ႇမိူင်းလင်း ၸႄႈဝဵင်းၵဵင်းတုင် ထႅင်ႈ 2 တီႈ ။

ဝၼ်းတီႈ 06/11/2016 ယၢမ်းၵၢင်ၼႂ် 09:00-11:00 မူင်း ပႃႇတီႇႁူဝ်သိူဝ်(SNLD) ၸႄႈဝဵင်း ၵဵင်းတုင် ပိုတ်ႇလုမ်းၵိင်ႇၽႄ ထႅင်ႈသွင်တီႈ ဝၢၼ်ႈၼွင်ငိုၼ်း ၼႂ်းဢိူင်ႇၵၢတ်ႇၽႃႉတင်း ဝၢၼ်ႈပႃႇၶႅမ် ၼႂ်းဢိူင်ႇမိူင်းလင်း ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။


ၼၢင်းမူၼ်းတုၺ်ႈ ၽူႈသူၼ်းတုမ်ပႃႇတီႇႁူဝ်သိူဝ် ၼႂ်းၸိုင်ႈတႆး ပွတ်းဢွၵ်ႇၶူင်း လၢတ်ႈဝႃႈ “ ၼႂ်းဝၼ်းလဵဝ် ယူႇတီႇပႃႇတီႇႁူဝ်သိူဝ် လႆႈပိုတ်ႇလုမ်းၵႂႃႇသွင်တီႈ ပဵၼ်လုမ်းၵိင်ႇၽႄၵူၺ်းၶႃႈ မီးပီႈၼွင်ႉတီႈၸမ်ၵႆလႄႈ လုၵ်ႈၸုမ်းပႃႇတီႇႁူဝ်သိူဝ် မႃးၶဝ်ႈႁူမ်ႈ ဝႃႈၼႆ ။


သိုပ်ႇလၢတ်ႈထႅင်ႈဝႃႈ ပၢင်လိူၵ်ႈတင်ႈသွမ်ႈ ဢၼ်တေထိုင်မႃးၼႆႉ ယူႇတီႈပႃႇတီႇႁူဝ်သိူဝ် ဝဵင်းၵဵင်းတုင်ၵေႃႈတေၶဝ်ႈလိူၵ်ႈၸွမ်း။ တေႃႈလဵဝ် တိုၵ်ႉဢုပ်ႇၵၼ်ဝႆႉယူႇ။ ၵူၺ်းၵႃႈ ၼေႃႇၽူႈ တႅၼ်းတႄႉပဵၼ်ၽႂ်ၼႆ ပႆႇလႆႈလိူၵ်ႈတိူဝ်ႈ” ဝႃႈၼႆ ။


ၼႂ်းၸႄႈဝဵင်းၵဵင်းတုင်ၼႆႉ ယူႇတီႈပႃႇတီႇႁူဝ်သိူဝ်  လႆႈပိုတ်ႇလုမ်းၵိင်ႇၽႄတၢင်ႇပၢႆႉ ၵႂႃႇ တင်းမူတ်းမီး 13 တီႈ ဝႃႈၼႆ ။


ဝၼ်းတီႈ 01/04/2017 လူင်ပွင်ၸိုင်ႈတေၸတ်းႁဵတ်း ပၢင်လိူၵ်ႈတင်ႈသွမ်ႈ မိူင်းႁူမ်ႈတုမ် တင်းမူတ်းမီး ႁၢမ်းပဝ်ႇဝႆႉ 19 တီႈၼင်ႈ၊ ၼႂ်းၼၼ်ႉ ၼႂ်းမိူင်းတႆး ပႃး 8 တီႈၼင်ႈ မိူၼ် ၸႄႈဝဵင်း မိူင်းသူႈ 3 တီႈၼင်ႈ၊ ၸႄႈဝဵင်းၵေးသီး 3 တီႈၼင်ႈ၊ ၸႄႈဝဵင်းၵဵင်းတုင် 1 တီႈၼင်ႈလႄႈ ၸႄႈဝဵင်း  ၺွင်ႇသူၺ်ႇ 1 တီႈၼင်ႈ ဝႃႈၼႆ ။