ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းသႅၼ်ဝီ ဢွၼ်ႁူဝ်ၼမ်းၼႃႈသေ လုမ်းလႃး ပတ်းၽဵဝ်ႈၶုမ်ၵုတ်း ၸဝ်ႈၾႃႉလူင် ၶုၼ်သၢင်ႇတူၼ်ႈႁုင်း တီႈဢိူင်ႇၵွင်းႁေႃ ဝဵင်းသႅၼ်ဝီ ၸိုင်ႈတႆးပွတ်းႁွင်ႇ ။

ဝၼ်းတီႈ 06/11/2016 ယၢမ်း ၵၢင်ၼႂ် 08:00-10:00 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းသႅၼ်ဝီ ဢွၼ်ႁူဝ်ၼမ်းၼႃႈ ပီႈၼွင်ႉၵူၼ်းမိူင်း လႄႈ ၵူၼ်းၼုမ်ႇတႆး ၵႂႃႇၽဵဝ်ႈလုမ်းလႃး ၶုမ်ၵုတ်း ၸဝ်ႈၶုၼ်သၢင်ႇတူၼ်ႈႁုင်း တီႈဢိူင်ႇၵွင်းႁေႃ ၸႄႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ။ ၼင်ႇႁိုဝ် ပီႈၼွင်ႉၵူၼ်းမိူင်းလႄႈ ၵူၼ်းၼုမ်ႇၶဝ် ပေႃးတေမေႃဝႆႉ ၵႃႈၶၼ် ၸဝ်ႈၸွမ်တႆး၊ ဢၼ်ၵိုၵ်း ပိုၼ်းတႆး/မိူင်းတႆး- ဝႃႈၼႆ ။


ၼၢင်းသႅင်လၢဝ် ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းသႅၼ်ဝီ လၢတ်ႈဝႃႈ “ ယိူင်းဢၢၼ်း တႄႉၵေႃႈဝႃႈ မၼ်းပဵၼ်တီႈၵိုၵ်းပိုၼ်းႁဝ်းၶႃႈ တီႈထုၵ်ႇလီ ပႅင်းမႅတ်ႇၼႆ လႄႈ ယၢမ်းလဵဝ် ႁဝ်းၶႃႈၸင်ႇ မႃး ႁူမ်ႈၵၼ် ၽႅၼ်ၵၢၼ် ပတ်းပူလူမႄးၵႂႃႇ တီႈဢၼ်ၵိုၵ်းပိုၼ်း လႄႈ ႁႂ်ႈၵူၼ်းၼုမ်ႇႁဝ်းၶႃႈၵူႈၵေႃႉ မေႃႁူႉဝႆႉၵႃႈၶၼ်ၵႂႃႇ” ဝႃႈၼႆ ။


ပၢင်လုမ်းလႃး ၶုမ်ၵုတ်းၸဝ်ႈၶုၼ်သၢင်ႇတူၼ်ႈႁုင်းၼႆႉ မီးၽူႈယႂ်ႇၵူၼ်းလူင်ၼႂ်း ၵေႃလိၵ်ႈလၢႆးလႄႈ ၾိင်ႈငႄႈတႆး၊ မီးၽူႈယႂ်ႇၵူၼ်းလူင် ၼႂ်းဝၢၼ်ႈၼႂ်းသူၼ် လႄႈ ၵူၼ်းၼုမ်ႇတႆး ႁူမ်ႈႁႅင်းၵၼ်။ ၼွၵ်ႈသေၼၼ်ႉ ၸဝ်ႈတူၼ်ၶူးဢိၼ်ႇတၵ ဝတ်ႉထမ်ႇမရူင်ႇ ဝဵင်းသႅၼ်ဝီ ႁပ်ႉပဵၼ်ၸဝ်ႈ တႃႇၼသေ လဵင်ႉလူ ၼမ်ႉသူမ်ႈၼမ်ႉဝၢၼ်ၵႂႃႇ ဝႃႈၼႆ ။


ၸဝ်ႈၾႃႉလူင်ၶုၼ်သၢင်ႇတူၼ်ႈႁုင်းၼႆႉ ၽွင်းငမ်း ဝဵင်းသႅၼ်ဝီမႃး ၶၢဝ်းတၢင်း 18 ပီ၊ ၶိုၼ်ႈၼင်ႈႁေႃ ၽွင်းဢႃယု လႆႈ 37 ပီ။ ထိုင်မႃး ဢႃယု လႆႈ55 ပီ ဝၼ်းတီႈ 04/04/1916 ယွၼ်ႉပဵၼ်တၢင်းပဵၼ် ႁူဝ်ၸႂ်ၵပ်ႉလႄႈ လႆႈၼွၼ်းၽႄးၵႂႃႇ ၼႆယဝ်ႉ ။