SSPP/SSA ႁဵတ်းလိၵ်ႈတုမ်ႉတွပ်ႇၶိုၼ်း တီႈတိူင်းသိုၵ်းၶူဝ်လမ်၊ လွင်ႈတပ်ႉသိုၵ်းမၢၼ်ႈမၢပ်ႇမႂ်ဝႃႈ ဢၼ်ၵူၼ်းမိူင်းသူႈ ယဵပ်ႇၺႃးမၢၵ်ႇမႅင်း တီႈမိူင်းသူႈၼၼ်ႉ ဢမ်ႇၸႂ်ႈၼမ်ႉမိုဝ်း SSPP/SSA ။

ၼႂ်းလိၵ်ႈၼၼ်ႉ မွၵ်ႇလၢတ်ႈသပ်းလႅင်းၼႄဝႃႈ- ၸွမ်းၼင်ႇၽိုၼ်လိၵ်ႈ ၽူႈၵွၼ်းတိူင်းဝၼ်းဢွၵ်ႇၵၢင် (ယလၶ) ႁဵတ်းဢွၵ်ႇဝႆႉ ဢၼ်ဝႃႈလုင်းၵူႇလႄႈလၢၼ်၊ ၵူၼ်းပွၵ်ႉ 4 မိူင်းသူႈ ၵႂႃႇႁႃႁဵပ်းသေ ၵႂႃႇယဵပ်ႇၺႃးမၢၵ်ႇမႅင်း၊ ဝႃႈပဵၼ်မၢၵ်ႇမႅင်းဢၼ် SSPP/SSA ဝၢၼ်ႈႁႆး ႁၢင်ႈၵၢင်ဝႆႉၼႆၼၼ်ႉ လွင်ႈဝႃႈမၼ်းဢမ်ႇၸႂ်ႈၼမ်ႉမိုဝ်း SSPP/SSA ဢၼ်ဝႃႈၼၼ်ႉ ႁဝ်းၶႃႈလႆႈဢွၵ်ႇလိၵ်ႈတုမ်ႉတွပ်ႇပၼ်ၼင်ႇၼႆ- ၼႆယဝ်ႉ ။

ၵဵဝ်ႇၵပ်းလွင်ႈၼႆႉ ၸဝ်ႈပႃႉထုၼ်း ၽူႈၼမ်းၼႂ်း 3 SSPP/SSA တွပ်ႇလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- ႁဝ်းၶႃႈၼႆႉ ဢမ်ႇတွၼ်ႉဝႆႉၵူၼ်းမိူင်းပဵၼ်ပဝ်ႈမၢႆသေ ပိုတ်းယိုဝ်းသေပွၵ်ႈ၊ ႁဝ်းဢမ်ႇႁဵတ်းႁႂ်ႈတုမ်ႉတိူဝ်ႉ ၵူၼ်းမိူင်း။ တပ်ႉသိုၵ်းတပ်ႉမတေႃႇၼႆႉ ပဵၼ်သင်မႃးၵေႃႈယဝ်ႉ၊ မၢၵ်ႇတႅၵ်ႇၼႂ်းဝဵင်းၼွၵ်ႈဝဵင်း တီႈလႂ်ၵေႃႈယဝ်ႉ မႃးၸီႉၼႄးသႂ်ႇတပ်ႉသိုၵ်းၸၢဝ်းၶိူဝ်းတိၵ်းတိၵ်း- ဝႃႈၼႆ ။

တီႈၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉထႅင်ႈဝႃႈ- SSPP/SSA ၼႆႉ ဝႆႉၵႃႈၶၼ်လွင်ႈငမ်းယဵၼ်၊ တိုၼ်းဢမ်ႇ ႁဵတ်းႁႂ်ႈ ၵူၼ်းမိူင်းတူၵ်းၸႂ်လႂ်တိုၼ်ႇ၊ တိုၼ်းဢမ်ႇႁဵတ်း ၵၢၼ်ဢၼ်တေတုမ်ႉတိူဝ်ႉလွင်ႈငမ်းယဵၼ် လႄႈ တိုၼ်းဢမ်ႇဢဝ်ႁႅင်းသိုၵ်းသေတူင်ႉၼိုင် ပူၼ်ႉပႅၼ်ၶဝ်ႈၼႃႈလိၼ် ၸိူဝ်းၼႆႉ ။

ပွတ်းတွၼ်ႈပိုၼ်ႉတီႈၼႃႈလိၼ် ၼႂ်းၸႄႈဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ယူႇၼႂ်းပိုၼ်ႉတီႈ လိူဝ်သေတပ်ႉသိုၵ်းၸိုင်ႈတႆး (SSPP/SSA) ယဝ်ႉ မီးသိုၵ်းမၢၼ်ႈတပ်ႉမတေႃႇ လႄႈတပ်ႉပလိၵ်ႈမၢၼ်ႈ ၸိူဝ်းၼႆႉ ။

ၵဵဝ်ႇၵပ်းလွင်ႈမၢၵ်ႇတႅၵ်ႇၼႆႉ မိူဝ်ႈဝၼ်းတီႈ 07/10/2016 ၼၼ်ႉ မီးၵူၼ်းမိူင်းသူႈ လုင်းၵူႇ ဢႃယု 60 ပီ၊ တင်းလၢၼ်ယိင်းမၼ်းဢွၼ်ႇယိင်း ၼွင်ႉၸိင်ႇ ယူႇပွၵ်ႉ 4 ၊ ၵႂႃႇႁႃႁဵပ်း တီႈတၢင်းၼွၵ်ႈဝဵင်း ႁိမ်းၵွင်းမူးၼၢင်းၵဝ်ႈႁၢၼ်ႉ၊ ၵႂႃႇယဵပ်ႇတိူဝ်ႉၺႃးမၢၵ်ႇတႅၵ်ႇ (ဢၼ်ၾင်လိၼ်ႁၢင်ႈၵၢင်ဝႆႉသေ) လႆႈတိူဝ်ႉဝၢတ်ႇၸဵပ်းလိူဝ်ႁႅင်း၊ မိူဝ်ႈလဵဝ် ၵႂႃႇယူတ်းယႃတူဝ်ဝႆႉတီႈႁူင်းယႃ တီႈဝဵင်းၶူဝ်လမ်- ၼႆယဝ်ႉ ။

ၼႂ်းဝၼ်းလဵဝ်ၵၼ် (07/10/2016)ၼၼ်ႉ ၵူၺ်းၼင်ႇၵဝ်ႇ၊ တပ်ႉသိုၵ်းမၢၼ်ႈတပ်ႉမတေႃႇ ဢဝ်ဢဵၼ်ႁႅင်းသိုၵ်းသေ ၶဝ်ႈလေႃႇတိုၵ်းယိုဝ်းတပ်ႉပၢင်သဝ်း SSPP/SSA ဢၼ်ပၵ်းဝႆႉတီႈၼႂ်း ၸႄႈဝဵင်းမိူင်းသူႈ တီႈၼိုင်ႈလူးၵွၼ်ႇ- လႆႈႁူႉၼင်ႇၼႆ ။