ဢိင်ၼိူဝ် ၸဝ်ႈမုၼ်ယႂ်ႇၶုၼ်ႁေႃၶမ်း ဝၢၼ်ႈမိူင်းၸိုင်ႈထႆး ၼွၼ်းၽႄးၵႂႃႇသေ ၸုမ်းပွင်ၵၢၼ်လူင် ၸွမ်ၽွင်းလူင်မိူင်းထႆး ပိုၼ်ၽၢဝ်ႇ လူတ်းတုင်းၸၢတ်ႈၶိုင်ႈသဝ် 30 ဝၼ်း၊ ႁႂ်ႈၶႃႈႁၢပ်ႇၵၢၼ်ၶုၼ် ၼပ်ႉယမ်ၼႄလွင်ႈမွင်ၸႂ်ၶၢဝ်းတၢင်း 1 ပီ။ လိူဝ်သေၼၼ်ႉ ဢွၵ်ႇၶေႃႈႁၢမ်ႈ ဢၼ်ႁၼ်ဝႃႈၵိုင်ႇလီႁၢမ်ႈ လၢႆပိူင် ။

ၵဵဝ်ႇၵပ်းလွင်ႈၼႆႉ ဝၢႆးသေတၢင်းလူင်ပွင်ၸိုင်ႈထႆး လႆႈႁပ်ႉႁူႉ ၸွမ်းၼင်ႇၸုမ်းပွင်ၵၢၼ်လူင်ၼႂ်းႁၢင်ႈၼႂ်းႁေႃ လႆႈပိုၼ်ၽၢဝ်ႇၵႂႃႇ လွင်ႈၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းယၻဵတ်ႇ ၼွၼ်းၽႄးသဵင်ႈမုၼ် ၵႂႃႇၼၼ်ႉယဝ်ႉၵေႃႈ ယူႇတီႈလူင်ပွင်ၸိုင်ႈထႆး ယိၼ်းမွင်ၸႂ်ၸွမ်းလူင်လၢင်သေ လႆႈပိုၼ်ၽၢဝ်ႇဢွၵ်ႇမႃး မိူဝ်ႈဝၼ်းတီႈ 13/10/2016 ပိူင်လူင်မၼ်းမီး 8 ၶေႃႈ ။


ၼႂ်းၶေႃႈပိုၼ်ၽၢဝ်ႇၼၼ်ႉလၢတ်ႈဝႃႈ တင်ႈတႄႇဝၼ်းတီႈ 14/10/2016 ၼႆႉၵႂႃႇၼႃႈ ၸဝ်ႈၼႃႈတီႈ ဝၢၼ်ႈမိူင်း၊ ၶႃႈႁၢပ်ႇၵၢၼ်ၶုၼ်တင်းသဵင်ႈ၊ မူႇၸုမ်းႁဵတ်းၵၢၼ် ၸိူဝ်းၵဵဝ်ႇၶွင်ႈဝၢၼ်ႈမိူင်းတင်းသဵင်ႈ ဢိၵ်ႇ ႁႂ်ႈပေႃႈမႄႈပီႈၼွင်ႉ ၵူၼ်းမိူင်းတင်းသဵင်ႈ ႁႂ်ႈတိုဝ်းၵမ်ႁဵတ်းၸွမ်း ၸိူင်ႉၼင်ႇၼႆ ။


1.ႁႂ်ႈၸိူဝ်းပဵၼ်ဢွင်ႈတီႈၶႃႈႁၢပ်ႇၵၢၼ်ၶုၼ် (လုမ်း၊ ႁွင်ႈၵၢၼ်၊ ႁွင်ႈၵၢၼ်လူင်) ဢွင်ႈတီႈၸိူဝ်းၵဵဝ်ႇၶွင်ႈဝၢၼ်ႈ မိူင်းလႄႈ ၸွမ်းႁူင်းႁဵၼ်း ၸွမ်းၸၼ်ႉၸွမ်ၵူႈတီႈ လူတ်းတုင်းၸၢတ်ႈလူင်းၶိုင်ႈသဝ် တႃႇၶၢဝ်းတၢင်း 30 ဝၼ်း၊ ၼပ်ႉတင်ႈတႄႇဝၼ်းတီႈ 14/10/2016 ၼႆႉၵႂႃႇ ။


2.ႁႂ်ႈၶႃႈႁၢပ်ႇၵၢၼ်ၶုၼ်၊ ၵူၼ်းႁဵတ်းၵၢၼ်ၼႂ်းမူႇၸုမ်း ၸိူဝ်းၵဵဝ်ႇၶွင်ႈဝၢၼ်ႈမိူင်း၊ ၸဝ်ႈၼႃႈတီႈဝၢၼ်ႈမိူင်း ၼပ်ႉယမ်ၼႄလွင်ႈမွင်ၸႂ် တႃႇၶၢဝ်းတၢင်း 1 ပီ၊ တင်ႈတႄႇဝၼ်းတီႈ 14/10/2016 ၼႆႉၵႂႃႇ။ ပုၼ်ႈတႃႇၵူၼ်းဝၢၼ်ႈၵူၼ်းမိူင်းတင်းလၢႆၼၼ်ႉ ႁႂ်ႈတူၺ်းမိူဝ်ႈသၢင်ႇထုၵ်ႇၵိုင်ႇဢၢပ်ႈသေႁဵတ်းသၢင်ႈၵႂႃႇ ။


3.ႁၢမ်ႈ ဢဝ်ၶႅပ်းႁၢင်ႈ ႁုၼ်ႇႁၢင်ႈၸဝ်ႈႁေႃၶမ်း ၵိုၵ်းသႂ်ႇၸႂ်ႉၸွမ်းပၢင်ၵႅဝ်ႈ ပၢင်ပွႆးၵူႈလွင်ႈလွင်ႈ၊ လွင်ႈၼႆႉႁႂ်ႈပႂ်ႉတူၺ်း ၸုမ်းပွင်ၵၢၼ်လူင်ၼႂ်းႁၢင်ႈႁေႃပိုၼ်ၽၢဝ်ႇၵွၼ်ႇ ။


4.ႁၢမ်ႈ ဢဝ်ၶႅပ်းႁၢင်ႈၸဝ်ႈႁေႃၶမ်း မႃးတႅမ်ႈလိၵ်ႈလၢႆးသႂ်ႇ ပေႃးလဵၼ်းလၢႆးလူင်ၵႂႃႇသဵင်ႈသေ ဢဝ်မႃးၾူတ်ႊသ်/တၢင်ႇၶိုၼ်ႈ (ၼိူဝ်ၾဵတ်ႊၿုၵ်ႊ)၊ လွင်ႈၼႆႉ ၵွပ်ႈႁၼ်ဝႃႈပဵၼ်ၵၢၼ်ဢမ်ႇၵိုင်ႇထုၵ်ႇလီႁဵတ်း ။


5.ႁၢမ်ႈ ဢဝ်ႁုၼ်ႇႁၢင်ႈၸဝ်ႈႁေႃၶမ်း မႃးၸႂ်ႉပဵၼ် (Profile) ၶေႃႈမုလ်းသုၼ်ႇတူဝ်-တူဝ်ၵဝ်ႇသေ တဵၵ်းပၼ်တၢင်းႁၼ်ထိုင် (Comment) ၊ ၸႅၵ်ႇမႅင်ႇပၼ်ပိူၼ်ႈ (Share) လႄႈ ႁဵတ်းသေလွင်ႈလွင်ႈ ဢၼ်ဢမ်ႇၵိုင်ႇလီႁဵတ်း။ သင်ၸိူဝ်ႉဝႃႈၽူႈလႂ်ၽႂ်ႁၼ်မႅၼ်ႈၵေႃႈ ၶႅၼ်းတေႃႈႁႂ်ႈၸႅင်ႈလၢတ်ႈပၼ်ၵေႃႉၼၼ်ႉ ႁႂ်ႈႁူႉ ။


6.ႁၢမ်ႈ ဢဝ်ၶႅပ်းႁၢင်ႈၸဝ်ႈႁေႃၶမ်း မႃးတတ်းယႃႉ ႁဵတ်းႁႂ်ႈႁၢင်ႈၵဝ်ႇလူႉသေ တႅမ်ႈသႂ်ႇၸိုဝ်ႈတူဝ်ၵဝ်ႇ ၼိူဝ်ၶႅပ်းႁၢင်ႈ၊ ပေႃးႁၼ်မႅၼ်ႈ ႁႂ်ႈၾၢင်ႉသတိၵေႃႉၼၼ်ႉလႆႈႁူႉ ။


7.ႁၢမ်ႈပိုတ်ႇပၢင်မူၼ်ႈသိူဝ်းၵူႈလွင်ႈလွင်ႈ၊ တေႃႇပေႃးထိုင်မီးၵၢၼ်ပိုၼ်ၽၢဝ်ႇ ပၼ်ပိုတ်ႇ။ (ၵႃႈၸူဝ်ႈပႆႇပိုၼ်ၽၢဝ်ႇဝႃႈ ပၼ်ပိုတ်ႇယဝ်ႉၼၼ်ႉ တေဢမ်ႇလႆႈပိုတ်ႇ) ။


8.ႁၢမ်ႈ ၸတ်းႁဵတ်းပၢင်ပွႆးမူၼ်ႈသိူဝ်း မိူၼ်ၼင်ႇ ပၢင်မူၼ်ႈသိူဝ်းၶွၼ်ႊသိူတ်ႊ (ႁွင်ႉၽဵင်းၵႂၢမ်း)၊ ပၢင်ၵိၼ်လဵင်ႉၶုၵ်းထူပ်းၵူႈလွင်ႈလွင်ႈ တေႃႇပေႃးထိုင်မီးၵၢၼ်ပိုၼ်ၽၢဝ်ႇ ပၼ်ၸတ်းႁဵတ်း ။


ပိုၼ်ၽၢဝ်ႇမိူဝ်ႈဝၼ်းတီႈ 13/10/2016
ၸုမ်းပွင်ၵၢၼ်လူင် ၸွမ်ၽွင်းလူင်