ၸုမ်းၵဝ်ႉငဝ်ႈ သုၼ်ႇလႆႈၵူၼ်း ၸိုင်ႈတႆး ဢွၵ်ႇလိၵ်ႈၽိုၼ်တၢမ်းငဝ်းလၢႆး သၢၼ်ၶတ်း လွင်ႈသိုၵ်း မၢၼ်ႈ ပိုတ်ႇၼႃႈသိုၵ်း တေႃႇတပ်ႉသိုၵ်းတႆး ပွတ်းဢိူင်ႇတူင်ႇလၢဝ်း ႁဵတ်းႁႂ်ႈၵူၼ်းမိူင်း ပၢႆႈၽေး သိုၵ်းသိူဝ် ႁိမ်း 2000 ၵေႃႉ လႆႈယၢၼ်ၵႆႁိူၼ်းယေးၸဝ်ႈၵဝ်ႇ  ၼႂ်းႁူဝ်လိူၼ်ဢွၵ်ႊထူဝ်ႊၿိူဝ်ႊၼႆႉ ။

ဝၼ်းတီႈ 12/10/2016 ယူႇတီႈၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇလိၵ်ႈ ၽိုၼ်တၢမ်းငဝ်းလၢႆး သၢၼ်ၶတ်း လွင်ႈတပ်ႉသိုၵ်းမၢၼ်ႈ ၶလယ 292 ၼွင်ဝူဝ်း ၸႄႈဝဵင်းလွၵ်ႈၸွၵ်ႇ မွၵ်ႈ 40 ဢမ်ႇပွင်ႇၶၢဝ်ႇ မွၵ်ႇလၢတ်ႈၵူၼ်းဝၢၼ်ႈပၢင်ပွႆး ဢၼ်ယူႇတၢင်းႁွင်ႇ ႁၢင်ႇၵႆဝဵင်းမိူင်းၵိုင် မွၵ်ႈ 25 လၵ်းၼၼ်ႉ၊ ယူႇတီႈတပ်ႉသိုၵ်းမၢၼ်ႈသေ ပွႆႇၵူၼ်း 24 ၵေႃႉ ဢၼ်ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး တိၺွပ်း ၵုမ်းၶင်ဝႆႉ ၸိူဝ်းၵဵဝ်ႇၶွင်ႈ တိတ်းၸပ်းယႃႈမဝ်းၵမ်လႄႈ မူၼ်ႉမႄးတူဝ် ၸႂ်ပၼ်ၸိူဝ်းၼၼ်ႉ၊ သွင်ၾၢႆႇလႆႈပဵၼ်ပၢင်တိုၵ်းၵၼ် တီႈလႅၼ်ၶႅၼ်ႈ မိူင်းတႆးပွတ်းႁွင်လႄႈ ပွတ်းၸၢၼ်း ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း တႄႇဢဝ် ႁူဝ်လိူၼ်ဢွၵ်ႊထူဝ်ႊၿိူဝ်ႊၼႆႉမႃး ။


ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈဝႃႈ “ ယွၼ်ႉပိူဝ်ႈသိုၵ်း မၢၼ်ႈမႃးသူၼ်းမႃးသေႇ ႁႂ်ႈပဵၼ်ပၢင်တိုၵ်း၊ ႁဵတ်းႁႂ်ႈ ၵူၼ်းမိူင်းႁဝ်းၶႃႈ လႆႈပွႆႇပႅတ်ႈႁိူၼ်း ယေးသေလႆႈပၢႆႈသေႃႉႁူမ်ႈၸွမ်းဝတ်ႉ/ၵျွင်း ႁၢၼ်ႉတေႃႇမိူဝ်ႈလဵဝ်ပၢင်တိုၵ်းၵေႃႈပႆႇယဵၼ် တိုၵ်ႉသိုပ်ႇ ပဵၼ်ယူႇ။ ၵွပ်ႈပိူဝ်ႈၼႆ တုၵ်းယွၼ်းထိုင် တီႈလူင်ပွင်ၸိုင်ႈမိူင်းႁူမ်ႈတုမ်မၢၼ်ႈလႄႈ တပ်ႉသိုၵ်း မၢၼ်ႈၶဝ် ႁႂ်ႈထွၼ်ဢွၵ်ႇ သိုၵ်းၼႂ်းပိုၼ်ႉတီႈၼၼ်ႉ။ ၼင်ႇႁိုဝ် ငဝ်းလၢႆးၼ်ႂ်းပိုၼ်ႉတီႈ ပေႃးတေၵတ်း ယဵၼ်ၶိုၼ်းမိူၼ်ၵဝ်ႇလႄႈ ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေးၼၼ်ႉ တေလႆႈပွၵ်ႈမိူဝ်း ၶိုၼ်းႁိူၼ်း ၸဝ်ႈၵဝ်ႇ” ဝႃႈၼႆ ။


ထႅင်ႈၼိုင်ႈသမ်ႉ တေႃႈလဵဝ် ပဵၼ်ၶၢဝ်းၵူၼ်းဝၢၼ်ႈ ၵူၼ်းမိူင်း ဢဝ်ၶဝ်ႈဢဝ်ၼမ်ႉ ဢၼ်တီႈ လႆႈၽုၵ်ႇလႆႈသွမ်းမႃး ၶၢဝ်းတၢင်းလၢႆလၢႆလိူၼ်ၼၼ်ႉ ၵွပ်ႈပိူဝ်ႈၼႆ ႁဝ်းၵေႃႈမႆႈၸႂ်ပႃး လွင်ႈၼႆႉ  ၶူဝ်းၶွင်ၶဝ်ႈၼမ်ႉတၢင်းၵိၼ် ၵူၼ်းဝၢၼ်ႈၵူၼ်းမိူင်းႁဝ်းၶႃႈ ၵူဝ်လႆႈႁၢမ်းပႅတ်ႈ” ဝႃႈၼႆ ။


ၵူၼ်းပၢႆႈၽေးၸိူဝ်းမႃးယူႇတီႈဝတ်ႉမုၼ်ၸဝ်ႈတူင်ႇလၢဝ်း ၼႂ်းဢိူင်ႇတူင်ႇလၢဝ်းဝႆႉ မီး ဝၢၼ်ႈပၢင်ပွႆး 768 ၵေႃႉ၊ ၵူၼ်း ဝၢၼ်ႈၵုင်းသႃႇ 273 ၵေႃႉ ႁူမ်ႈၵၼ် တင်းမူတ်း 1041 ၵေႃႉ၊ ႁူမ်ႈလူၺ်ႈ ပီႈၼွင်ႉ ၼႂ်းဢိူင်ႇ တူင်ႇလၢဝ်းထႅင်ႈ တင်းမူတ်းမီးႁိမ်း 2000 ၵေႃႉ၊ ၼႂ်းၼၼ်ႉပႃးၼၢင်းယိင်း ၸပ်းတွင်ႉ (ပႃးတွင်ႉ) 15 ၵေႃႉ ဝႃႈၼႆ ။


ဝၢႆးသေ လႆႈပဵၼ်ပၢင်တိုၵ်းယဝ်ႉ ယူႇတီႈတပ်ႉသိုၵ်းမၢၼ်ႈ တီႉၺွပ်းဢဝ် ၵူၼ်းတူၵ်းၶွၵ်ႈ ဢၼ်တိုတ်းယႃႈမဝ်းၵမ် 24 ၵေႃႉၵႂႃႇၸွမ်း ထိုင်တီႈဢိူင်ႇၼမ်ႉလၼ်ႈ။ ထိုင်မႃး ဝၼ်းတီႈ 7 ပွႆႇပၼ်ၶိုၼ်းၵူၼ်းတိုတ်းယႃႈၵမ်ႈ ၵမ်ႈၼမ်ယဝ်ႉသေတႃႇ တႃႇထႅင်ႈသွင်ၵေႃႈ ယင်ႉတိုၵ်ႉၵိုတ်းဝႆႉ ၼႂ်း တပ်ႉသိုၵ်းမၢၼ်ႈယူႇ။ ၵဵဝ်ႇၵပ်းလွင်ႈၼႆႉ ထဝ်ႈဝၢၼ်ႈထဝ်ႈၼႃးတူင်ႇလၢဝ်း၊ ၽူႈတႅၼ်းပႃႇတီႇ ႁူဝ်သိူဝ် သီႇပေႃႉ ဢိၵ်ႇတင်း ၽူႈၵွၼ်းဢိူင်ႇၼမ်ႉလၼ်ႈ ၸိူဝ်းၼႆႉ ၵႂႃႇယွၼ်းႁႂ်ႈပွႆႇပၼ် သွင်ၵေႃႉ တီႈတပ်ႉ ၶလယ 243 ၼမ်ႉလၼ်ႈယူႇ။ ၵူၺ်းၵႃႈ ယူႇတီႈၾၢႆႇသိုၵ်းမၢၼ်ႈ ပႆႇပွႆႇပၼ် သင်ဢမ်ႇ လႆႈၵႂၢမ်း သင်ႇတိူင်းသိုၵ်း ဝႃႈၼႆ။