ၾႃႉၸဝ်ႈယူႇႁူဝ် ၸဝ်ႈႁေႃၶမ်းမိူင်းထႆး ၼွၼ်းၽႄး ၶဝ်ႈသူၼ်မၢၵ်ႇႁၢၵ်ႈၶမ်း ၵႂႃႇမိူဝ်ႈၼႆႉယၢမ်းဝၢႆးဝၼ်း။ ႁဵတ်းႁႂ်ႈ ပီႈၼွင်ႉၵူၼ်းမိူင်းထႆးယိၼ်းသေလၢႆ သဝ်ႈမွင်ၸႂ်ၸွမ်း ၼမ်ႉတႃတူၵ်း၊  ပဵၼ်လွင်ႈလူႉယႂ်ႇသုမ်းလူင် တႃႇၵူၼ်းမိူင်းထႆး ။

ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းလယၻဵတ်ႇ၊ ဢၼ်ပဵၼ်ၸိၵ်းၸွမ်တၢင်ႇၼိူဝ်ႁူဝ် ၵူၼ်းမိူင်းၸိုင်ႈထႆးတင်းလၢႆလႄႈ ၽူႈၸိူဝ်းပိုင်ႈဢိင်ယူႇသဝ်း ၼႂ်းမိူင်းထႆးတင်းသဵင်ႈၼႆႉ ၼွၼ်းၽႄး သဵင်ႈမုၼ်ၵႂႃႇ မိူဝ်ႈၼႆႉဝၼ်းတီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃလူင်သီရိရၢတ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ သီရိဢႃယုၸဝ်ႈလႆႈ 89 ပီ၊ ဢႃယုၽိသိၵ်ႈၶိုၼ်ႈႁၢင်ႈၸၢမ်ႇႁေႃ ၽွင်းငမ်းဝၢၼ်ႈမိူင်း လႆႈ 70 ဝႃႇသႃ ။


ၵဵဝ်ႇၵပ်းလွင်ႈၼႆႉ ဢၼ်ပဵၼ်ႁွင်ႈၵၢၼ်လူင်ၼႂ်းဝၢင်းႁေႃၶမ်းၵေႃႈ ပိုၼ်ၽၢဝ်ႇဝႃႈ- ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းလယၻဵတ်ႇၼႆႉ လႆႈၼွၼ်းၽႄးၵႂႃႇယဝ်ႉ။ မၼ်းၸဝ်ႈၼႆႉ ယွၼ်ႉပိူဝ်ႈပၢႆးယူႇလီ ယူပ်ႈယွမ်းႁႅင်းသေ လႆႈယေႃးတူဝ်ၵႂႃႇၶဝ်ႈယူတ်းယႃတူဝ် တီႈႁူင်းယႃလူင်သီရိရၢတ်ႉ တင်ႈတႄႇၸဵမ်မိူဝ်ႈ ဝၼ်းသုၵ်းတီႈ 03/10/2014 (ပီသႃသၼႃ 2557) ၸွမ်းၼင်ႇဢၼ်ငိူၼ်ႈၶိူဝ်းၼႂ်းဝၢင်းႁေႃၶမ်း လႆႈပိုၼ်ၽၢဝ်ႇၵႂႃႇပဵၼ်မိူဝ်ႈပဵၼ်ပွၵ်ႈၼၼ်ႉ ။


ၵူၺ်းၵႃႈ ပဵၵ်ႉသမ်ႉဝႃႈ မေႃယႃလူင်ၶဝ်ၶတ်းၸႂ်ယူတ်းယႃ လူလွမ်လုမ်းလႃးၵႃႈႁိုဝ်ၵေႃႈ တၢင်းပဵၼ်မၼ်းၸဝ်ႈ ဢမ်ႇၸိုၼ်ႈၶႅၼ်းမႃး၊ ယိင်ႈလႃႈယိင်ႈႁႅင်းမႃးတိၵ်းတိၵ်းသေ ထိုင်မႃးဝၼ်းတီႈ 13/10/2016 ၶၢဝ်းယၢမ်း 15:52 မူင်းၼႆႉ လႆႈၼွၼ်းၽႄးၵႂႃႇ တီႈႁူင်းယႃလူင်သီရိရၢတ်ႉ (သီရိရႃၸႃ) လူၺ်ႈလပ်းလိုဝ်ႈၼွၼ်းၽႄးၵႂႃႇ ၼင်ႇၵတ်းၵတ်းယဵၼ်ယဵၼ်၊ ၽွင်းဢႃယုၸဝ်ႈလႆႈ 89 ပီ၊ ၸၢမ်ႇႁၢင်ႈႁေႃလႆႈ 70 ပီ- ၼႆယဝ်ႉ ။


ၵဵဝ်ႇၵပ်းလွင်ႈၼႆႉ မိူဝ်ႈၼႆႉၵၢင်ၶမ်ႈ ၸွမ်ၽွင်းလူင်မိူင်းထႆး ၸွမ်သိုၵ်းလူင်ပရႃႇယုတ်ႉ ၵျၼ်ႊဢူဝ်းၶျႃး ပိုၼ်ၽၢဝ်ႇတၢင်းငဝ်းႁၢင်ႈသဵင် (TV) မိူင်းထႆးဝႃႈ- ပီႈၼွင်ႉၵူၼ်းထႆးၼႂ်းၸိုင်ႈမိူင်းထႆးတင်းသဵင်ႈလႄႈ ၸိူဝ်းယူႇသဝ်းၼွၵ်ႈမိူင်းတူဝ်ႈလူၵ်ႈၵူႈၵေႃႉၵူႈၸဝ်ႈတင်းသဵင်ႈ၊ ဝၼ်းဢၼ်ႁဝ်းၸၢဝ်းထႆးဢမ်ႇမုင်ႈမွင်း ဢမ်ႇၶႂ်ႈငိၼ်းၼၼ်ႉၵေႃႈ မႃးႁွတ်ႈထိုင်၊ မိူဝ်ႈႁွင်ႈၵၢၼ်လူင်ၼႂ်းဝၢင်းႁေႃ လႆႈပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၸဝ်ႈႁေႃၶမ်းလႆႈၼွၼ်းၽႄးၵႂႃႇယဝ်ႉ။ ထိုဝ်ဝႃႈပဵၼ်လွင်ႈလူႉသုမ်းယႂ်ႇလူင် ပိူဝ်ႈတႃႇၵူၼ်းမိူင်းၸိုင်ႈထႆးတႄႉတႄႉ- ဝႃႈၼႆ ။


ယူႇတီႈလူင်ပွင်ၸိုင်ႈထႆးသေ တုၵ်းယွၼ်းထိုင်တီႈမိူင်းထႆးတင်းသဵင်ႈဝႃႈ- ပေႃႈမႄႈပီႈၼွင်ႉၵူၼ်းမိူင်းထႆး တီႈႁၵ်ႉတင်းသဵင်ႈ၊ ႁႂ်ႈတႅင်ႇတူဝ်ၼုင်ႈၶူဝ်းလဵင်း ၼႄလွင်ႈမွင်ၸႂ်ၸွမ်း တႃႇၶၢဝ်းတၢင်းၼိုင်ႈပီ၊ တႃႇၶၢဝ်းတၢင်း 30 ဝၼ်းၼႆႉ ဢၼ်ပဵၼ်လုမ်းႁွင်ႈၵၢၼ် တီႈႁဵတ်းၵၢၼ်ၶႃႈႁၢပ်ႇၵၢၼ်ၶုၼ်ၸိူဝ်းၼႆႉ ႁႂ်ႈလူတ်းတုင်း ၸၢတ်ႈလူင်းၶိုင်ႈသဝ်။ ၼႂ်းၶၢဝ်းတၢင်း 30 ဝၼ်းၼႆႉၵေႃႈ ႁႂ်ႈငိူင်ႉဝႄႈပၼ် လွင်ႈၸတ်းႁဵတ်းပၢင်မူၼ်ႈသိူဝ်း ပွႆးလၢမ်းၸိူဝ်းၼႆႉ- ဝႃႈၼႆ ။