ၸုမ်းၵူၼ်းၼုမ်ႇ “ၼုမ်ႇတႆးၸႅတ်ႈ” ဢွၼ်ႁူဝ်ၵူၼ်းၼႂ်းပိုၼ်ႉတီႈ ၸတ်းႁဵတ်းပၢင်ၾိုၵ်းၽွၼ်ႉ တီႈဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ပိူဝ်ႈႁႂ်ႈၵူၼ်းၼုမ်ႇမီးလွင်ႈၸမ်ၸႂ်ၵၼ်သေ ၵွင်ႉသၢၼ် ပုၼ်ႈတႃႇၸိူဝ်ႉၸၢတ်ႈ၊ ဝၢၼ်ႈမိူင်း၊ ၽႃသႃ၊ သႃသၼႃ ၵႂႃႇၼႃႈၼႆ ၵူၼ်းၼုမ်ႇၼႂ်းပိုၼ်ႉတီႈလၢတ်ႈ ။

Photo By - Facebook Noung Jai

ဝၼ်းတီႈ 09-11/10/2016 ၶၢဝ်းတၢင်း 3 ဝၼ်း ၸုမ်း “ၼုမ်ႇတႆးၸႅတ်ႈ” ဢွၼ်ႁူဝ်ၵူၼ်းၼႂ်းပိုၼ်ႉ တီႈ ၸတ်းႁဵတ်းပၢင်ၽိူမ်ႉထႅမ်တၢင်းၵတ်ႉၵူၼ်းၼုမ်ႇ သႂ်ႇၸိုဝ်ႈဝႃႈ “ပၢင်ၾိုၵ်းၽွၼ်ႉ ယုၵ်ႉမုၼ်းတၢင်း ၵတ်ႉၵူၼ်းၼုမ်ႇ” တီႈ ဝိႁၢရ်မွၵ်ႇမွၼ်းၶမ်း ဝၢၼ်ႈတိုဝ်ႉမွၼ်း ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ၶုၼ်ယုင်းၶဵဝ် ၽူႈထတ်းလိၵ်ႈသႅၼ်ပၢႆး၊ ၸၢႆးၼေႃႇ သႅင် ၽူႈၶၢၼ်ပၢၵ်ႇၵေႃႁူမ်ႈသၢင်ႈၵူၼ်းၼုမ်ႇတႆး၊ ၸၢႆးၸၢႆး ၽူႈၼင်ႈလုမ်းၵပ်းသိုပ်ႇ SSPP/SSA ၸႄႈဝဵင်းမၢႆ 9 ၊ ၸၢႆးႁၢၼ်ၶိူဝ်း ၽူႈၼမ်းၼႂ်းၸုမ်းၵူၼ်းၼုမ်ႇ “ ၼုမ်ႇတႆးၸႅတ်ႈ” သႅင်ၵႅဝ်ႉ ၸိူဝ်းၼႆႉ မႃးပူင်သွၼ်ၽႄမႅင်ႇပိုၼ်ႉႁူႉ ။


ၸဝ်ႈၶူးဢေႃးၸေႇယ ၸဝ်ႈၵွၼ်းဝတ်ႉမွၵ်ႇမွၼ်းၶမ်း လၢတ်ႈဝႃႈ- “ပဵၼ်ပိုၼ်ႉငဝ်ႈတႃႇ ၶဝ်ႈၸူးၵပ်း သိုပ်ႇၵၼ် ဢၼ်မႃးႁဵၼ်းၼႆႉယႃႇႁႂ်ႈမၼ်းသုမ်းၶၢဝ်းယၢမ်းၵႂႃႇလၢႆလၢႆ ႁႂ်ႈဢဝ်မိူဝ်းၸႂ်ႉတိုဝ်းလႆႈ” ဝႃႈၼႆ ။


တီႈပၢင်သွၼ်ၼႆႉ ပူင်သွၼ်ပၼ်ပိုၼ်ႉႁူႉလၢႆလၢႆလွင်ႈ မိူၼ်ၼင်ႇ ၵၢၼ်မိူင်း (ငဝ်းလၢႆးမိူင်းမၢၼ်ႈ၊ မိူင်းတႆး၊ လွင်ႈသိုဝ်ႇၶၢဝ်ႇ၊ ပိုၼ်ႉႁူႉၽေးယႃႈမဝ်းၵမ်၊ ပၢႆးဢွၼ်ႁူဝ်၊ ပၢႆးၸတ်းပွင်၊ လွင်ႈတူင်ႇဝူင်းၵူၼ်း ၸိူဝ်းၼႆႉ။ ၵူၼ်းၼုမ်ႇၼႂ်းဢိူင်ႇ 6 ဢိူင်ႇ ၼႂ်းၸႄႈဝဵင်း သီႇပေႃႉ 5 ဢိူင်ႇ၊ မိူင်းယႆ 1 ဢိူင်ႇ မိူၼ်ၼင်ႇ ဢိူင်ႇႁူဝ်ယႃႉ ဝဵင်းမိူင်းယႆ၊ ဢိူင်ႇသႅင်ၵႅဝ်ႉ၊ .ဢိူင်ႇဝၢၼ်ႈပၢၼ်း၊ ဢိူင်ႇဝၢၼ်ႈမေႃႈ၊ ဢိူင်ႇပႃႇၵၢင်း၊ ဢိူင်ႇႁူဝ်တိုဝ်ႉၸိူဝ်းၼႆႉ၊ မီးလုၵ်ႈႁဵၼ်းၶဝ်ႈႁူမ်ႈလဵပ်ႈႁဵၼ်း 149 ၵေႃႉ ။


ၸၢႆးႁၢၼ်ၶိူဝ်း ၽူႈၼမ်းၼႂ်း ၸုမ်းၼုမ်ႇတႆးၸႅတ်ႈ လၢတ်ႈဝႃႈ- “ၵွပ်ႈဝႃႈၵူၼ်းၼုမ်ႇတႆးႁဝ်းၼႆႉ တူၵ်းလိုၼ်းၵူၼ်းၼုမ်ႇတၢင်ႇၶိူဝ်းၼႃႇလႄႈ ၶႂ်ႈႁႂ်ႈၵူၼ်းၼုမ်ႇတႆးႁဝ်း မေႃႁူမ်ႈမိုဝ်း ႁဵတ်းၵၢၼ် ၸွမ်းၵၼ်ၼမ်ၼမ်၊  ႁႂ်ႈၵူႈၸႄႈဝဵင်း ဢွၼ်ၵၼ်ႁဵတ်းသၢင်ႈ ပၢင်သွၼ်ပိုၼ်ႉႁူႉၵဵဝ်ႇၵပ်းၵၢၼ် မိူင်းတႆး၊ ၵၢၼ်ၶိူဝ်းတႆး ၵၢၼ်ၸိူဝ်ႉၸၢတ်ႈတႆးၵႂႃႇ ၼမ်ၼမ်သေၵမ်း” - ဝႃႈၼႆ ။


ပူၼ်ႉမႃးဝၼ်းတီႈ 12-14/09/2016 ၼၼ်ႉၵေႃႈ ၸုမ်းၵူၼ်းၼုမ်ႇထုင်ႉမိူင်းၶိူဝ်း၊ ၸုမ်းယွတ်ႈၸဵင်တႆး၊ ၸုမ်းသႅၼ်းႁုၼ်ႈမႂ်ႇ (သီႇထွၵ်ႈ) ႁူမ်ႈၵၼ် ၸတ်းႁဵတ်းပၢင်ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ ပွၵ်ႈၵမ်း 2 တီႈ ၵျွင်းသြႃႇၸဝ်ႈၸေႊၶၢၼ် ဢိူင်ႇသီႇထွၵ်ႈ ထုင်ႉမိူင်းၶိူဝ်း ၸႄႈဝဵင်းသီႇပေႃႉ ။ မီးၵူၼ်းၼုမ်ႇ ၼႂ်းပိုၼ်ႉ တီႈ 118ၵေႃႉမႃးၶိုၼ်ႈႁဵၼ်းဢဝ် မေႃသွၼ်မီး 8 ၵေႃႉ – ဝႃႈၼႆ ။