ၸုမ်းတူင်ႉၼိုင်တူင်ႇဝူင်းႁႅင်းၵၢၼ် ၵဵင်းမႆႇ ၸတ်းႁဵတ်းပၢင်ပၼ်ပိုၼ်ႉႁူႉ လွင်ႈဝႂ်ၵပ်းတူဝ်၊ ဝႂ်ႁပ်ႉႁွင်း ပၢႆးယူႇလီလႄႈ ၵွင်တိုၼ်းငိုၼ်းၵႃႈသၢႆႈတႅၼ်း တႃႇပီႈၼွင်ႉႁႅင်းၵၢၼ်ယၢၼ်မိူင်း ၸတ်းႁဵတ်းတီႈ ဝဵင်းၵဵင်းမႆႇ မီးၽူႈၶဝ်ႈႁူမ်ႈ လဵပ်ႈႁဵၼ်း 60 ပၢႆ ။

ဝၼ်းတီႈ 02/10/2016 ယၢမ်းၵၢင်ၼႂ် 09:00-04:00 မူင်း ဝၢႆးဝၼ်း ယူႇတီႈၶူင်းၵၢၼ် ပၢႆးယူႇလီ လႄႈ ပၼ်တၢင်းႁူႉႁႅင်းၵၢၼ်ၸၢဝ်းၶိူဝ်း(မူလၼိထိမႅပ်ႇ) တင်း ၸုမ်းႁႅင်းၵၢၼ်ၽွမ်ႉႁူမ်ႈ ႁူမ်ႈၵၼ် ၸတ်းႁဵတ်းပၢင် ပၼ်ပိုၼ်ႉႁူႉ လွင်ႈဝႂ်ၵပ်းတူဝ် ပီႈၼွင်ႉႁႅင်းၵၢၼ်၊ လွင်ႈဝႂ်ႁပ်ႉႁွင်းပၢႆး ယူႇလီ(ပၵၼ်သင်ၶူမ်း) လႄႈ လွင်ႈၵွင်တိုၼ်းငိုၼ်းၵႃႈသၢႆႈတႅၼ်း ၼႂ်းတီႈႁဵတ်းၵၢၼ် ၸဵမ်ၸိူဝ်းၼႆႉ။ ပၢင်သွၼ်ၼႆႉ ၸတ်းႁဵတ်းတီႈ ႁူင်းသဝ်း ထႃးရိၼ်း ဝဵင်းၵဵင်းမႆႇ ၸိုင်ႈထႆး ဝႃႈၼႆ ။


ၸၢႆးသိူဝ်ၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ၽွမ်ႉႁူမ်ႈလၢတ်ႈဝႃႈ “ တွၼ်ႈတႃႇပီႈၼွင်ႉႁႅင်းၵၢၼ် ပေႃး တေလႆႈႁပ်ႉႁူႉ ၶေႃႈမုလ်း မိူၼ်ၼင်ႇ ၵဵဝ်ႇၵပ်း ဝႂ်ၵပ်းတူဝ် ဢၼ်ႁဝ်းၶႃႈလႆႈၸႂ်ႉၵၼ်ယူႇတေႃႈလဵဝ်၊ တေလႆႈဝႃႈ ဝႂ်ၵပ်းတူဝ် တီႈဢၼ်ဢမ်ႇၸႂ်ႈၵူၼ်းထႆးသေ မိူၼ် ပီႈၼွင်ႉႁႅင်းၵၢၼ်ယၢၼ်မိူင်း မိူင်းမၢၼ်ႈ၊ လၢဝ်း၊ ၵမ်ႇပူးၶျႃး ၸိူဝ်းယိပ်းဝႂ်ၵပ်းတူဝ် လၢႆသႅၼ်းလႄႈသႅၼ်းမၼ်းၵေႃႈ ဢမ်ႇမိူၼ်ၵၼ်။ ၼင်ႇႁိုဝ် ပီႈၼွင်ႉႁႅင်းၵၢၼ်ပေႃးတေလႆႈႁူႉ တေမေႃၸႅၵ်ႇၽႄ လႆႈဝႃႈ ဝႂ်ၵပ်းတူဝ်ႁဝ်း ၸႂ်ႉၵၼ်ယူႇ ၼၼ်ႉ တေလႆႈၸႂ်ႉသုၼ်ႇလႆႈၵႃႈႁိုဝ် တေလႆႈႁဵတ်းၵၢၼ်ၸိူင်ႉႁိုဝ် ၵဵဝ်ႇၵပ်းလွင်ႈၼႆႉ လႆႈ မွၵ်ႇထိုင်ၸဝ်ႈၼႃႈတီႈ မႃးမွၵ်ႇလၢတ်ႈပၼ်ၵမ်းသိုဝ်ႈ” ဝႃႈၼႆ ။


ၶုၼ်ဝိၼႆး ထွင်းဢူႇၿူလ်း ၽူႈလူင်ႉလႅၼ်ႇပီႈၼွင်ႉႁႅင်းၵၢၼ်ယၢၼ်မိူင်း ႁွင်ႈၵၢၼ်ၾၢႆႇၸတ်းႁႃ ငၢၼ်း(ၸတ်းႁႃၵၢၼ်) ၸႄႈတွၼ်ႈၵဵင်းမႆႇ သပ်းလႅင်းလၢတ်ႈၼႄ လွင်ႈ ဝႂ်ၵပ်းတူဝ် မိူၼ် ဝႂ်ပိုၼ်ႉတီႈသုင်၊ ဝႂ်ၶဵဝ်ၶွပ်ႇလႅင်လႄႈ ဝႂ်သိပ်းပီ၊ လွင်ႈဝႂ် MOU (International Passport) လႄႈ ဝႂ်သီၶွင်ႇတင်း Passport ၸူဝ်ႈၶၢဝ်း ၸဵမ်ၸိူဝ်းၼႆႉ၊ ၸိူဝ်းယိပ်းဝႂ်ၸိူဝ်းၼႆႉ မိူၼ် ဝႂ်ပိုၼ်ႉတီႈသုင် (ၶဵဝ်ၶွပ်ႇလႅင်) လႄႈ ဝႂ် 10 ပီ မီးသုၼ်ႇႁဵတ်းၵၢၼ်လႆႈ တင်းမူတ်း 27 ဢၼ်၊ ဝႂ်သီၶွင်ႇတင်း Passport ၸူဝ်ႈၶၢဝ်းသမ်ႉ လႆႈၶႂၢင်ႉႁဵတ်းၵၢၼ် 2 ဢၼ်၊ ၸိူဝ်းယိပ်းဝႂ် MOU( International Passport သမ်ႉ ႁႄႉႁၢမ်ႈတႃႇႁဵတ်းၵၢၼ် ၼႂ်းမိူင်းထႆး 39 ဢၼ် ဝႃႈၼႆ ။


ၸိူဝ်းယိပ်းဝႆႉ ဝႂ်ပိုၼ်ႉတီႈသုင်(ၶဵဝ်ၶွပ်ႇလႅင်)လႄႈ ဝႂ် 10 ပီသမ်ႉ လႆႈၶႂၢင်ႉႁဵတ်းၵၢၼ် 27 ၶေႃႈ မိူၼ်

1) ၵၢၼ်မႄးလူတ်ႉထိပ်ႇ၊ 2) ၵၢၼ်မႄးတီႈၼင်ႈလူတ်ႉ၊ 3) ၵၢၼ်မႄးတူဝ်ထၢင်လူတ်ႉ၊ 4) ၵၢၼ်မႄးတေႃႈလွတ်ႇၵႂၼ်းလူတ်ႉ၊ 5) ၵၢၼ်ၸိူမ်ႈလဵၵ်း လူၺ်ႈၸႂ်ႉမိုဝ်းႁဵတ်း၊ 6) ၵၢၼ်ၸၢင်ႈ မႆႉၶိူင်ႈႁိူၼ်း ၊ 7) ၵၢၼ်ၸၢင်ႈမႆႉၵေႃႇသၢင်ႈ၊ 8) ၵၢၼ်လိူဝ်ႈမႆႉ ၼႂ်းႁူင်းငၢၼ်းႁဵတ်းမႆႉ၊ 9) ၵၢၼ်ပုၼ်၊ 10) ၵၢၼ်တႃးသီ၊ 11) ၵၢၼ်မႄးၽၵ်းတူႁူးလႅင်း၊ 12) ၵၢၼ်ၶႅင်းလဵၵ်းႁႄႉၽၵ်း တူ/ႁႄႉႁူးလႅင်း၊ 13) ၵၢၼ်ယွမ်ႉသိူဝ်ႈၽႃႈ၊ 14) ၵၢၼ်ယဵပ်ႉသိူဝ်ႈၶူဝ်း၊ 15) ၵၢၼ်သၵ်ႉ သိူဝ်ႈၽႃႈ၊တၢတ်ႈသိူဝ်ႈၽႃႈ၊ 16) ၵၢၼ်ႁဵတ်းသူၼ်ၽၵ်းယိူဝ်ႈၼၢင်းၶဵဝ်/သူၼ်မၢၵ်ႇမႆႉ၊ 17) ၵၢၼ်လဵင်ႉတူဝ်သတ်း၊ ၵူၺ်းၵႃႈ ႁၢမ်ႈလဵင်ႉတူဝ်မူင်ႈ ဢၼ်ႁဵတ်းဢွၵ်ႇမႆႇ၊ 18) ၵၢၼ်ၵႃႉၶၢႆၵုၼ်ႇသိၼ်ၵႃႉယွႆႈ ၵူႈၸိူဝ်ႉၵူႈပိူင် ၵူၺ်းၵႃႈ တေဢမ်ႇလႆႈပဵၼ်ၶူဝ်းၶွင်ၶိူင်ႈမိုဝ်း ၶိူင်ႈၸႂ်ႉ မိူၼ်ၼင်ႇ သၢၼ်ႊၶေႊမီႊ၊ ၶိူင်ႈၸၢၵ်ႈဢွမ်လူမ်း၊ ၶိူင်ႈၸၢၵ်ႈပွႆႇႁၢင်ႈသဵင် TV၊ ၵွင်ႈထၢႆႇႁုပ်ႈ၊ ၵွင်ႈထၢႆႇငဝ်းတူင်ႉလူင်၊ ႁဵတ်းၶိူင်ႈၵွင်ႈၵၢင်ႇႁိုဝ် မၢၵ်ႇတႅၵ်ႇလႄႈၵဵဝ်ႇ ၵပ်းၶိူင်ႈ ၵမ်ႉထႅမ်၊ 19)  ၵၢၼ်ၶၢႆၶူဝ်းၶွင်ၵိၼ်လႄႈ ၶိူင်ႈလိုမ်ႇ(ၼမ်ႉ)၊ 20) ၵၢၼ်ႁဵတ်းဢွၵ်ႇၶူဝ်းၶွင် ၵိၼ်လႄႈ ၶိူင်ႈလိုမ်ႇ၊ 21) ၵၢၼ်မႄးၶႅပ်းတိၼ်၊သွၵ်းတိၼ်၊ 22) ၵၢၼ်မႄးၼႃႇလီႇ၊ ၵမ်ၸိုမ်း/တႅမ်ႈ၊ မၢၼ်ႇတႃ၊ 23) ၵၢၼ်လပ်ႉမိတ်ႈလႄႈၶွင်မီးၶူမ်း၊ 24) ၵၢၼ်ႁဵတ်းၶွပ်ႇၶႅပ်း ႁၢင်ႈ၊ 25) ၵၢၼ်ၸၢင်ႈၶမ်း၊ ၸၢင်ႈငိုၼ်း၊ 26) ၵၢၼ်တေႃးႁုၵ်ႇ ပၼ်ႇၵုၺ် လူၺ်ႈၸႂ်ႉမိုဝ်းႁဵတ်း၊ 27) ၵၢၼ်ႁပ်ႉၸၢင်ႈ ႁဵတ်းၵၢၼ်ၼၵ်း ၸဵမ်ၸိူဝ်းၼႆႉ ဝႃႈၼႆ ။


ၸိူဝ်းယိပ်းဝႂ် သီၶွင်ႇတင်း PassPort ၸူဝ်ႈၶၢဝ်းသမ်ႉ လႆႈၶႂၢင်ႉႁဵတ်းၵၢၼ် 2 ဢၼ် မိူၼ် မႄႈဝၢၼ်ႈ(ၵူၼ်းႁပ်ႉႁဵတ်းၵၢၼ်ၼႂ်းႁိူၼ်း)၊ ၵၢၼ်ႁပ်ႉၸၢင်ႈ ၸဵမ်ၸိူဝ်းၼႆႉ ဝႃႈၼႆ ။


ထိုင်မႃးတွၼ်ႈဝၢႆးဝၼ်းသမ်ႉ ယူႇတီႈၶုၼ်သုၶျၢတ်ႉ တၵုလ်းႁူထိပ်ႉ ႁူဝ်ၼႃႈလူင် ၾၢႆႇႁဵတ်းၵၢၼ် သုၼ်ႇလႆႈႁႅင်းၵၢၼ်တင်းမူတ်း သပ်းလႅင်း လၢတ်ႈၼႄလွင်ႈဝႂ်ပၢႆးယူႇလီ (ပၵၼ်သင်ၶူမ်း) လႄႈ ၵွင်တိုၼ်းငိုၼ်းၵႃႈသၢႆႈတႅၼ်း ၼႂ်းတီႈႁဵတ်း ၵၢၼ် ၸဵမ်ၸိူဝ်းၼႆႉ ဝႃႈၼႆ ။


ပၢင်ပၼ်ပိုၼ်းႁူႉ လွင်ႈဝႂ်ၵပ်းတူဝ်လႄႈ လွင်ႈဝႂ်ႁပ်ႉႁွင်းပၢႆးယူႇလီ(ပၵၼ်သင်ၶူမ်း)လႄႈ ၵွင်တိုၼ်း ငိုၼ်းၵႃႈသၢႆႈတႅၼ်းတီႈႁဵတ်းၵၢၼ်ၼႆႉ မီးပီႈၼွင်ႉႁႅင်းၵၢၼ် ၼႂ်းၵဵင်းမႆႇ၊ လမ်းပုၼ်း ၸဵမ်ၸိူဝ်းၼႆႉ မႃး ၶဝ်ႈႁူမ်ႈ တင်းၼမ်လၢႆ ၼႆယဝ်ႉ ။