ဢိင်ၼိူဝ် တပ်ႉသိုၵ်းၸိုင်ႈတႆး (RCSS/SSA) တင်းသိုၵ်းမၢၼ်ႈတပ်ႉမတေႃႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း ပွတ်းတူင်ႇလၢဝ်း ၸႄႈဝဵင်းမိူင်းၵိုင်သေ သိုၵ်းမၢၼ်ႈၸႂ်ႉပႃးႁိူဝ်းဝိၼ်ပၼ်ႇလဵပ်ႈၼႂ်းပိုၼ်ႉတီႈ၊ ယိုဝ်းၵွင်ႈလူင် ၸိူဝ်းၼႆႉ၊ ႁဵတ်းႁႂ်ႈၵူၼ်းမိူင်းတူၵ်းၸႂ် ပၢႆႈၽေးသိုၵ်းမီးၸမ်ႁိမ်းသွင်ႁဵင် ။

ဝၼ်းတီႈ 1-2/10/2016 ၼႆႉ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တင်းသိုၵ်းလူင်ပွင်ၸိုင်ႈမၢၼ်ႈ တပ်ႉမတေႃႇ သိုပ်ႇပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။ ၵဵဝ်ႇၵပ်းလွင်ႈပၢင်တိုၵ်းၼႆႉ မိူဝ်ႈဝၼ်းတီႈ 1 ၼၼ်ႉ ၾၢႆႇသိုၵ်းမၢၼ်ႈ တပ်ႉမတေႃႇ ၶဝ်ႈၵႂႃႇတီႈဢၼ်မီးႁူင်းတိုတ်းယႃႈမဝ်းၵမ် ပၼ်ၵူၼ်းမိူင်း၊ မူၼ်ႉမႄးတူဝ်ၸႂ်ပၼ်ၵူၼ်းမိူင်းသေ လႆႈပဵၼ်ပၢင်တိုၵ်းၵၼ်တင်း RCSS/SSA - ၼႆယဝ်ႉ ။


ပၢင်တိုၵ်းပွၵ်ႈၵမ်းၼႆႉ ၼႂ်းသိုဝ်ႇတႆးလွတ်ႈလႅဝ်းၵေႃႈ လၢတ်ႈဝႃႈ ၾၢႆႇသိုၵ်းတပ်ႉမတေႃႇမၢၼ်ႈ ၸႂ်ႉပႃးႁိူဝ်းဝိၼ်တိုၵ်းသိုၵ်း ႁိူဝ်းဝိၼ်မႅင်းမီႈ 2 လမ်း မႃးပၼ်ႇလဵပ်ႈၸွမ်းၼႂ်းပိုၼ်ႉတီႈ ဢၼ်ပဵၼ်ပၢင်တိုၵ်း၊ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈတူၵ်းၸႂ်လႂ်တိုၼ်ႇ ဢွၼ်ၵၼ်ပၢႆႈၵႂႃႇယူႇသဝ်းဝႆႉတီႈ ဝတ်ႉမုၼ်ၸဝ်ႈတူင်ႇလၢဝ်း ၼပ်ႉႁူဝ်ပၢၵ်ႇ ။


ဝၼ်းတီႈ 03/10/2016 မိူဝ်ႈၼႆႉၵေႃႈ သွင်ၾၢႆႇသိုပ်ႇပဵၼ်ပၢင်တိုၵ်းၵၼ်ထႅင်ႈ။ မိူဝ်ႈၼႆႉ သိုၵ်းမၢၼ်ႈ ဢဝ်ၵွင်ႈလူင်ယိုဝ်းၵႂႃႇသီႇႁူးႁႃႈတၢင်း ၸွမ်းႁူၺ်ႈၸွမ်းလွႆ ၸွမ်းၵုင်းၸွမ်းၵွင်း ၸွမ်းထိူၼ်ႇၸွမ်းၶိူဝ်း တီႈဢၼ်လၢမ်းထၢင်ႇဝႃႈ မီးသိုၵ်းတႆးယူႇၼၼ်ႉ။ ဢိင်ၼိူဝ်ပဵၼ်ပၢင်တိုၵ်းၸိူဝ်းၼႆႉသေ မိူဝ်ႈၼႆႉ မီးၵူၼ်းပၢႆႈၽေးသိုၵ်း တင်းမူတ်းႁိမ်းသွင်ႁဵင် (2,000) ယဝ်ႉ- ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄ ၼင်ႇၼႆ ။


ၵဵဝ်ႇၵပ်းလွင်ႈပၢင်တိုၵ်းၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ- တီႈတၢင်း တူင်ႇလၢဝ်း ၸႄႈဝဵင်းမိူင်းၵိုင်ၼႆႉ ႁဝ်းၶႃႈႁူမ်ႈၵၼ်တင်းၵူၼ်းမိူင်း ၼႂ်းပိုၼ်ႉတီႈသေ ပိုတ်ႇဝႆႉႁူင်းတိုတ်း ယႃႈမဝ်းၵမ် တႃႇၵူၼ်းတိတ်းၸပ်းယႃႈမဝ်းၵမ်၊ ႁဵတ်းၵၢၼ်မူၼ်ႉမႄးတူဝ်ၸႂ်ပၼ်ၶဝ်၊ ႁူင်းတိုတ်းယႃႈၼႆႉ ပိုတ်ႇဝႆႉႁိုင်ယဝ်ႉ။ တီႈၼၼ်ႈ ၵူၼ်းမႃးမူၼ်ႉမႄးတူဝ်ၸႂ်တေမီးမွၵ်ႈ 50 ၸိူဝ်းၼႆႉ။ မိူဝ်ႈပူၼ်ႉမႃး 2 ဝၼ်းၼႆႉ ၾၢႆႇတၢင်းတပ်ႉသိုၵ်းမၢၼ်ႈၶဝ် ၶိုၼ်ႈမႃးတီႈပၢင်သဝ်း ဢၼ်ပဵၼ်တီႈႁူင်းမူၼ်ႉမႄးတၢင်းယၢမ်ႈၸရိတ်ႉတ ၵူၼ်းၼုမ်ႇႁဝ်းၶႃႈသေယဝ်ႉ မႃးၶဝ်ႈယဵပ်ႇယမ်ႈပူၼ်ႉပႅၼ်လႄႈ မႃးယိုဝ်းႁဝ်းၶႃႈ၊ သွင်ၾၢႆႇၸင်ႇလႆႈတႄႇပဵၼ် ပၢင်တိုၵ်းၵၼ်မႃး”- လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၽူႈၶၢၼ်ပၢၵ်ႇ RCSS/SSA လၢတ်ႈပႃးဝႃႈ- ၶေႃႈလႆႈၸႂ် NCA ၸိူဝ်းၼႆႉ ၶေႃႈၵႂၢမ်းမၢင်ၶေႃႈၼႆႉ ယင်းပႆႇၸၢင်ႈဢဝ်တီႈပွင်ႇမၼ်းတႅၵ်ႇလႅင်းလႆႈ ။ မိူၼ်ၼင်ႇဝႃႈ ၼႃႈလိၼ်ၵိုတ်းယိုဝ်းၵၼ်ဢၼ်ဝႃႈၼႆႉ မၼ်းပဵၼ်တီႈလႂ်၊ ပဵၼ်ၸိူင်ႉႁိုဝ် ဢမ်ႇၸၢင်ႈလၢတ်ႈလႆႈ။ လွင်ႈတႅပ်းတတ်းၼႃႈလိၼ်ၵၼ်ၼႆႉၵေႃႈ မၼ်းဢမ်ႇတႅတ်ႈတေႃး။ ၵၢၼ်ငၢၼ်းဢၼ်ႁဝ်းၶႃႈ တေႁူမ်ႈၵၼ်ႁဵတ်းသၢင်ႈ မိူၼ်ၼင်ႇၵၢၼ်ၽဵဝ်ႈမူၺ်ႉ ယႃႈမဝ်းၵမ်လႄႈ ၵႅတ်ႇၶႄၽေးယႃႈမဝ်းၵမ်ၸိူဝ်းၼႆႉ ၾၢႆႇလူင်ပွင်ၸိုင်ႈၵေႃႈ ဢမ်ႇႁူမ်ႈမိုဝ်းၸွမ်း ႁဝ်းၶႃႈတႄႉတႄႉ။ ႁဝ်းၶႃႈ လႆႈႁူမ်ႈမိုဝ်းၸွမ်းၵူၼ်းမိူင်းသေ ႁဵတ်းသၢင်ႈၵူၺ်း ။


သိုပ်ႇလၢတ်ႈဝႃႈ- ပေႃးဝႃႈႁဝ်းၶႃႈ ၵႂႃႇႁဵတ်းသၢင်ႈၵၢၼ်ငၢၼ်း မၢင်ၸိူဝ်ႉမၢင်တွၼ်ႈမႃးယဝ်ႉ မၼ်းၶတ်းၵၼ်ၶိုၼ်း တင်း ၾၢႆႇလူင်ပွင်ၸိုင်ႈ။ လူင်ပွင်ၸိုင်ႈသမ်ႉၸႂ်ႉႁႅင်းသိုၵ်းသေ ၵႄႈလိတ်ႈတိၵ်းတိၵ်း၊ ဢမ်ႇၸႂ်ႉလၢႆးငမ်းယဵၼ် သေၵႄႈလိတ်ႈ။ ႁဝ်းၶႃႈ ဢမ်ႇၶႂ်ႈႁႂ်ႈပဵၼ်ပၢင်တိုၵ်း ၵွပ်ႈဝႃႈပေႃးပဵၼ်ပၢင်တိုၵ်းမႃး မၼ်းတုမ်ႉတိူဝ်ႉၵူၼ်းမိူင်း၊ ၵွပ်ႈၼၼ်ႁဝ်းၶႃႈၶတ်းၸႂ်ငိူင်ႉဝႄႈယူႇ။ ၵူၺ်းၵႃႈ ၾၢႆႇတပ်ႉသိုၵ်းမၢၼ်ႈသမ်ႉ ၸႂ်ႉႁႅင်းသိုၵ်းသေမႃးၵႄႈလိတ်ႈ တိၵ်းတိၵ်းလႄႈ ႁဝ်းၵေႃႈၸမ်ပဵၼ်တၵ်းလႆႈၵႅတ်ႇၶႄတူဝ်ၵဝ်ႇ၊ ပၢင်တိုၵ်းၵေႃႈ ၸင်ႇလႆႈၵိူတ်ႇၶိုၼ်ႈ- ဝႃႈၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး ။