ၵဵဝ်ႇၵပ်းလွင်ႈႁႅင်းၾႆးၾႃႉ ၶူင်းၵၢၼ်တဵင်ၾၢႆၼိူဝ်မႄႈၼမ်ႉၶူင်း၊ တေႁဵတ်းဢွၵ်ႇႁႅင်းၾႆးၾႃႉတင်းမူတ်း ၸမ်ႁိမ်းၼိုင်ႈမိုၼ်ႇ (10,000) မႄႊၵဝတ်ႊၼႆႉ လူင်ပွင်ၸိုင်ႈမိူင်းတႆး မီးသုၼ်ႇလႆႈၸတ်းၵၢၼ်ပၼ် တႃႇၵူၼ်းမိူင်းတႆးလႆႈၸႂ်ႉ 30 မႄႊၵဝတ်ႊၵူၺ်း။ တီႈၼႂ်းပၢင်ၵုမ်သၽႃးၸႄႈမိူင်းတႆးၼၼ်ႉ ဢွၼ်ၵၼ်တွင်ႈထၢမ်တုမ်ႉတွပ်ႇၵၼ်ၼင်ႇၼႆ ။

တီႈပၢင်ၵုမ်သၽႃးၸႄႈမိူင်းတႆး မိူဝ်ႈဝၼ်းတီႈ 20/09/2016 ၼႆႉ ၽွင်းတႅၼ်းၸႄႈမိူင်း ၸႄႈဝဵင်းသႅၼ်ဝီ (ၶဵတ်ႇလိူၵ်ႈတင်ႈမၢႆ 1) ပႃႇတီႇႁူဝ်သိူဝ် (SNLD) ၼၢင်းၶိၼ်ႇထႃးယီႇ လႆႈတွင်ႈထၢမ်ၵဵဝ်ႇၵပ်းလွင်ႈ ၾၢႆၼမ်ႉၶူင်း 6 ဢၼ်။ ၵဵဝ်ႇၵပ်းလွင်ႈၼႆႉ ၽွင်းလူင်ၾၢႆႇၽႅၼ်ၵၢၼ်လႄႈပၢႆးမၢၵ်ႈမီး ဢူးၸူဝ်းၺုၼ်ႉလုၼ်ႇ တွပ်ႇလၢတ်ႈပၼ်ၶိုၼ်း ။


ဢၼ်တေၵေႃႇသၢင်ႈၾၢႆၼိူဝ်မႄႈၼမ်ႉၶူင်း 6 ဢၼ်ၼႆႉ တီႈၼႂ်းမိူင်းတႆးမီး 4 ဢၼ်။ ႁႅင်းၾႆးၾႃႉ ဢၼ်ဢွၵ်ႇတီႈၼႂ်းမိူင်းတႆးၼႆႉ ယူႇတီႈလူင်ပွင်ၸိုင်ႈၸႄႈမိူင်းတႆးတႄႉ မီးသုၼ်ႇတႃႇတေၸတ်းၵၢၼ်ပၼ်တႃႇ 30 မႄႊၵဝတ်ႊၵူၺ်း၊ ပေႃးလိူဝ်သေ 30 မႄႊၵဝတ်ႊၶိုၼ်ႈၼိူဝ်ၼၼ်ႉ လူင်ပွင်ၸိုင်ႈမိူင်းတႆး ဢမ်ႇမီးသုၼ်ႇတႃႇတေၸတ်းၵၢၼ်၊ ပဵၼ်လူင်ပွင်ၸိုင်ႈမိူင်းႁူမ်ႈတုမ်ၵူၺ်း မီးသုၼ်ႇတႃႇတေၸတ်းၵၢၼ်။ ၵွပ်ႈၼၼ် ႁႅင်းၾႆးၾႃႉ ဢၼ်တေဢွၵ်ႇတီႈၼိူဝ်ၼမ်ႉၶူင်း တင်းမူတ်းမီးႁိမ်းမိုၼ်ႇ (10,000) မႄႊၵဝတ်ႊ ၸိူဝ်းၼႆႉ မၼ်းၵဵဝ်ႇၵပ်းတင်း လူင်ပွင်ၸိုင်ႈမိူင်းႁူမ်ႈတုမ်လႄႈ ႁႂ်ႈတွင်ႈထၢမ်တီႈသၽႃးမိူင်းႁူမ်ႈတုမ်- ဢူးၸူဝ်းၺုၼ်ႉလုၼ်ႇ တွပ်ႇလၢတ်ႈပၼ်ၼင်ႇၼႆ ။


ၼိူဝ်မႄႈၼမ်ႉၶူင်းၼႆႉ တင်းမူတ်းတေၵေႃႇသၢင်ႈၾၢႆ 6 တီႈ/လင်၊ တႃႇ 4 တီႈမီးၼႂ်းမိူင်းတႆး။ တီႈၾၢႆမိူင်းတူၼ် တေဢွၵ်ႇႁႅင်းၾႆးၾႃႉ 7,100 မႄႊၵဝတ်ႊ။ ၾၢႆၵုၼ်လူင် 1,400 မႄႊၵဝတ်ႊ။ ၾၢႆၼွင်ၽႃ (ၼွင်ႉၽႃႉ) 1,200 မႄႊၵဝတ်ႊ။ မၢၼ်ႈတူင်ႈ (ၼိူဝ်ၼမ်ႉမႃႉ ဢၼ်လႆလူင်းၶဝ်ႈၼမ်ႉၶူင်း) 200 မႄႊၵဝတ်ႊ။ လိူဝ်သေၼၼ်ႉ ထႅင်ႈသွင်တီႈမီးၼႂ်းၸႄႈမိူင်းယၢင်းလႅင် လႄႈယၢင်းၽိူၵ်ႇ။ တီႈမိူင်းယၢင်းလႅင် ၾၢႆယႂႃႇတိတ်ႉ 4,000 မႄႊၵဝတ်ႊ။ တီႈမိူင်းယၢင်းၽိူၵ်ႇ ၾၢႆႁတ်ႉၵျီး 1,360 မႄႊၵဝတ်ႊ ။


ပိူဝ်ႈတႃႇႁဵတ်းသၢင်ႈၾၢႆလူင်ၸိူဝ်းၼႆႉ ၸိူဝ်းႁပ်ႉဝႆႉပုၼ်ႈၽွၼ်းၾၢႆႇၵေႃႇသၢင်ႈ မီးၶွမ်ႊပၼီႊၶႄႇ ၶွမ်ႊပၼီႊသၢမ်ၽႃ (Three Gorges group Corporation-CTGC) ၊ ၶွမ်ႊပၼီႊထႆး ဢီႊၵဵတ်ႊ (Electricity Generating Authority of Thailand-EGAT) ၊ ၶွမ်ႊပၼီႊ ၵူႈၸိုင်ႈမိူင်း (International Group of Entrepreneurs Company-IGOEC) ၸိူဝ်းၼႆႉလႄႈ ႁွင်ႈၵၢၼ်လူင်ၾၢႆႇၾႆးၾႃႉ လူင်ပွင်ၸိုင်ႈမၢၼ်ႈ ႁူမ်ႈၵၼ်။ ၶူင်းၵၢၼ်ၾၢႆမိူင်းတူၼ် ဢၢၼ်းတႄႇၼႂ်းပီ 2017 - ၼႆယဝ်ႉ ။


ၼၢင်းၶိၼ်ႇထႃးယီႇ လၢတ်ႈဝႃႈ- ဢၼ်ဢူးၸူဝ်းၺုၼ်ႉလုၼ်ႇ တွပ်ႇမႃးၼၼ်ႉ ပဵၼ်တီႈဢမ်ႇႁၢၼ်ႉၸႂ်။ မၼ်းၼၢင်းလၢတ်ႈဝႃႈ- ယူႇတီႈလူင်ပွင်ၸိုင်ႈၸႄႈမိူင်းတႆးၼႆႉ မီးသုၼ်ႇတႃႇတေၸတ်းၵၢၼ် ႁႅင်းၾႆးၾႃႉ ဢၼ်ဢွၵ်ႇတင်းမူတ်းၼၼ်ႉ 30 မႄႊၵဝတ်ႊၵူၺ်း၊ ပေႃးလိူဝ်သေၼၼ်ႉ တေလႆႈၵႂႃႇတွင်ႈထၢမ်တီႈ သၽႃးမိူင်းႁူမ်ႈတုမ်၊ ၶဝ်လၢတ်ႈဝႃႈ မၼ်းၵပ်းၵၢႆႇသၽႃးမိူင်းႁူမ်ႈတုမ်ၵူၺ်း။ လွင်ႈၼႆႉ မၼ်းတိုၼ်းဝႃႈ ဢမ်ႇထုၵ်ႇလီပဵၼ်၊ ယူႇတီႈတူဝ်ၶႃႈတိုၼ်းဢမ်ႇႁၢၼ်ႉၸႂ်၊ လူင်ပွင်ၸိုင်ႈမိူင်းတႆးၵၢပ်ႈပၢၼ်မိူဝ်ႈလဵဝ်ၼႆႉ ထၢမ်လွင်ႈလႂ်ၵေႃႈ လၢတ်ႈႁႂ်ႈၵႂႃႇထၢမ်တီႈသၽႃးမိူင်းႁူမ်ႈတုမ်ယူႇတိၵ်းတိၵ်း။ ယွၼ်ႉၼၼ်လႄႈ ၶႃႈႁဝ်းၵေႃႈ တေလႆႈဢဝ်ၶေႃႈထၢမ်ၼႆႉ ၵႂႃႇထၢမ်တီႈသၽႃးမိူင်းႁူမ်ႈတုမ်ၵူၺ်းယဝ်ႉ- ဝႃႈၼႆ ။


ၵဵဝ်ႇၵပ်းလွင်ႈတဵင်ၾၢႆၼိူဝ်မႄႈၼမ်ႉၶူင်းသေ ပူၼ်ႉမႃးမိူဝ်ႈဝၼ်းတီႈ 23 လိူၼ်ဢေႃႊၵတ်ႊသ်ၼၼ်ႉၵေႃႈ ယူႇတီႈၸုမ်းတူင်ႇဝူင်းၵူၼ်းတႆးသေ ဢွၼ်ၵၼ်တႅမ်ႈလိၵ်ႈသၢၼ်ၶတ်း ဢွၵ်ႇၶေႃႈပိုၼ်ၽၢဝ်ႇ၊ တုၵ်းယွၼ်းဝႃႈ ႁႂ်ႈၵိုတ်းယိုတ်းပၼ်ၵၢၼ်သၢင်ႈၾၢႆၼိူဝ်မႄႈၼမ်ႉၶူင်း ။


ၾၢႆႇၼိုင်ႈတၢင်းၼိုင်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၵေႃႈ မိူဝ်ႈဝၼ်းတီႈ 28 လိူၼ်ဢေႃႊၵတ်ႊသ်ၼၼ်ႉ လႆႈဢွၵ်ႇၶေႃႈပိုၼ်ၽၢဝ်ႇ သၢၼ်ၶတ်းၾၢႆၼိူဝ်မႄႈၼမ်ႉၶူင်းၼင်ႇၵဝ်ႇ ။