ယိူင်းဢၢၼ်း ပိူဝ်ႈတႃႇၵမ်ႉထႅမ် ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ၼႆသေ ၸုမ်းပၼ်ႇလူတ်ႉထိပ်ႇ တႄႇပၼ်ႇလူတ်ႉထိပ်ႇ လုၵ်ႉဝဵင်းလူင်တူၼ်ႈတီး ထိုင်ဝဵင်းပၢင်လူင ်။

ဝၼ်းတီႈ 26/09/2016 မိူဝ်ႈဝႃး တင်ႈတႄႇၵၢင်ၼႂ် ယၢမ်း 6 မူင်း၊  ၸုမ်းပၼ်ႇလူတ်ႉထိပ်ႇ ဢၼ်ၸုမ်း Tawnggy Freedom Rider ဢွၼ်ႁူဝ် ႁူမ်ႈၵၼ်ဢဵၼ်ႁႅင်းၵူၼ်း 100 ၵေႃႉ ပၼ်ႇလူတ်ႉထိပ်ႇ လုၵ်ႉဢဝ်တီႈဝဵင်းလူင်တူၼ်ႈတီး ၸိုင်ႈတႆးတႆးပွတ်းၸၢၼ်း ဢွၵ်ႇမႃးထိုင်ၽႅဝ်တီႈဝဵင်းပၢင်လူင် ဝၢႆးဝၼ်းယၢမ်း 3 မူင်း။ ယိူင်းဢၢၼ်းဢၼ်လႆႈပၼ်ႇလူတ်ႉထိပ်ႇပွၵ်ႈၼႆႉ ပဵၼ်ပိူဝ်ႈတႃႇၵမ်ႉထႅမ် ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်- ၼႆယဝ်ႉ ။


မူႇၸုမ်းပၼ်ႇလူတ်ႉထိပ်ႇၼႆႉ တီႈဝဵင်းပၢင်လူင်ၼၼ်ႉ မိူဝ်ႈဝႃးၵၢင်ၶမ်ႈ မီးၵၢၼ်ၵိၼ်ၶဝ်ႈႁူမ်ႈမူႇၵၼ်။ မိူဝ်ႈၼႆႉၵၢင်ၼႂ် ႁူမ်ႈၵၼ်ႁဵတ်းတၢင်းလီ ၵၢပ်ႈသွမ်းၼႂ်သင်ၶၸဝ်ႈတီႈဝတ်ႉၼွင်ၵုတ်ႇ၊ ဝၢႆးၼၼ်ႉပွတ်းၼႂ် ၼင်ႇၵဝ်ႇ ႁူမ်ႈၵၼ်ၵႂႃႇတၵ်ႉယမ်တုင်းမိူင်းႁူမ်ႈတုမ် လႄႈ တၵ်ႉယမ်သဝ်ႁိၼ် တီႈမၢႆတွင်းၸိုင်ႈမိူင်း ႁူမ်ႈတုမ်ယဝ်ႉသေ ဢွၼ်ၵၼ်ပွၵ်ႈဝၢႆႇၶိုၼ်းမိူဝ်းဝဵင်းတူၼ်ႈတီး- ၼႆယဝ်ႉ ။


ၵူဝ်ႇၵျေႃႇၵျေႃႇ ၵူၼ်းၶဝ်ႈႁူမ်ႈပၼ်ႇလူတ်ႉထိပ်ႇၵေႃႉၼိုင်ႈ လၢတ်ႈဝႃႈ- ဢၼ်ပၼ်ႇလူတ်ႉထိပ်ႇၵႆၵႆၸိူင်ႉၼႆ ပွၵ်ႈၼႆႉပဵၼ်ပွၵ်ႈတီႈ 2 ၼႂ်းၽဝၸၢတ်ႈပၢၼ်ၶႃႈႁဝ်း။ မိူဝ်ႈဢွၼ်တၢင်းၼႆႉ ယၢမ်ႈပၼ်ႇလူတ်ႉထိပ်ႇတၢင်းၵႆ 30 လၵ်း၊ တူၼ်ႈတီးတင်းပၢင်လူင်ၼႆႉ ယၢၼ်ၵႆၵၼ် 60 လၵ်းပၢႆ။ ၵွပ်ႈၼၼ် ဢၼ်ပၼ်ႇလူတ်ႉထိပ်ႇၵႆၵႆၸိူင်ႉၼႆ ၼႆႉ ပဵၼ်ပွၵ်ႈတီႈ 2 ပိူဝ်ႈတႃႇၶႃႈႁဝ်း။ ပေႃးဝႃႈႁဝ်းၶႃႈပၼ်ႇလူတ်ႉထိပ်ႇၸိူင်ႉၼႆ ႁဝ်းၶႃႈတေလႆႈႁူႉၸၵ်း မိုတ်ႈၵိုဝ်းဢူၺ်းၵေႃႉမႂ်ႇ၊ တႃႇပၢႆးယူႇလီၵေႃႈပဵၼ်၊ သမ်ႉလႆႈလဵပ်ႈႁဵၼ်း သိင်ႇဝႅတ်ႉလွမ်ႉႁိမ်းႁွမ်းႁဝ်း မိူဝ်ႈႁဝ်းၶႃႈပၼ်ႇလူတ်ႉထိပ်ႇမႃးၼၼ်ႉ ။


ဢၼ်ပၼ်ႇလူတ်ႉထိပ်ႇမႃးၼႆႉ ၸွမ်းႁိမ်းႁွမ်းတၢင်းၸိူဝ်းၼႆႉၵေႃႈႁၢင်ႈလီ ၶႅမ်ႉလႅပ်ႈယူႇၵူႈၸိူဝ်ႉၵူႈလွင်ႈ၊ ၾိင်ႈၾႃႉၵေႃႈလီ၊ မုင်ႈတူၺ်းၵေႃႈသႃႇယႃႇလီ၊ ၶဝ်ႈဝၼ်းၸိူဝ်းၼႆႉၵေႃႈ ပိူၼ်ႈႁၢင်ႈႁႅၼ်းပၼ်တင်းသဵင်ႈ- ၵူဝ်ႇၵျေႃႇၵျေႃႇ လၢတ်ႈၼႄၼင်ႇၼႆ ။


ၵူဝ်ႇၵျေႃႇၵျေႃႇၼႆႉ လုၵ်ႉတီႈဝဵင်းတႃႈလိူဝ်ႇ (မၼ်းတလေး)သေ မႃးၶဝ်ႈႁူမ်ႈပၢင်ပၼ်ႇလူတ်ႉထိပ်ႇၼႆႉ။ မၼ်းၼႆႉ ပဵၼ်ၵူၼ်းၵိူတ်ႇတီႈဝဵင်းတူၼ်ႈတီးသေတႃႉ လႆႈၶၢႆႉၵႂႃႇတႃႈလိူဝ်ႇ မီးမွၵ်ႈ 15 ပီၸိူဝ်းၼႆႉယဝ်ႉ- ၼႆယူႇ ။