ယိူင်းဢၢၼ်းပိူဝ်ႈတႃႇႁႂ်ႈလုမ်ႈၾႃႉ လႆႈလဵပ်ႈႁဵၼ်းႁူႉလွင်ႈၸၢဝ်းၶိူဝ်းတႆး ၼႆသေ မီးပၢင်ၵႅဝ်ႈပိုတ်ႇ သုၼ်ႁဵၼ်းႁူႉလႄႈၶူၼ်ႉၶႂႃႉလွင်ႈတႆး တီႈႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။

မိူဝ်ႈဝၼ်းတီႈ 26/09/2016 မီးပၢင်ပွႆးပိုတ်ႇ သုၼ်လဵပ်ႈႁဵၼ်းလႄႈၶူၼ်ႉၶႂႃႉလွင်ႈတႆး (Center for Tai Studies) တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။ တီႈပၢင်ၵႅဝ်ႈၼၼ်ႉ မီးၸဝ်ႈသင်ၶ၊ ၽူႈလူၼ်ႉလႅၼ်ႇပိုၼ်းတႆး၊ မိူၼ်ၼင်ႇ ၻွၵ်ႊတိူဝ်ႊၸၢႆးၶမ်းမိူင်း၊ ၻွၵ်ႊတိူဝ်ႊၸၢႆးသၢင်ႇဢၢႆႈ၊ ၽွင်းလူင်ၾၢႆႇသၽႃဝလႄႈၶူဝ်းၶွင်ၼိူဝ်လိၼ်တႂ်ႈလိၼ် လူင်ပွင်ၸိုင်ႈမိူင်းတႆး ၻွၵ်ႊတိူဝ်ႊၺီႇၺီႇဢွင်ႇ၊ ၵေႃလိၵ်ႈလၢႆးလႄႈ ၾိင်ႈငႄႈတႆး တူၼ်ႈတီး၊ ၸုမ်းၼမ်ႉၶူင်းၶႅၵ်ႇလီပၢင်ၸႃႉတႆး၊ ၵူၼ်းၼုမ်ႇလႄႈၵူၼ်းမိူင်းတီႈၸမ်တီႈၵႆ တင်းသဵင်ႈၶဝ်ႈႁူမ်ႈမွၵ်ႈ 200 ပၢႆ ။


သုၼ်လဵပ်ႈႁဵၼ်းလႄႈၶူၼ်ႉၶႂႃႉလွင်ႈတႆးၼႆႉပိူဝ်ႈတႃႇၶူၼ်ႉၶႂႃႉလွင်ႈၾိင်ႈငႄႈၾိင်ႈထုင်းႁိတ်ႈႁွႆးတႆး ပိုၼ်းတႆးၸိူဝ်းၼႆႉ။ လိူဝ်သေၼၼ်ႉ ပိူဝ်ႈတႃႇပဵၼ်သုၼ်လဵပ်ႈႁဵၼ်းပႃး ၾိင်ႈငႄႈၾိင်ႈထုင်းၸၢဝ်းၶိူဝ်း ဢၼ်ယူႇသဝ်းၼႂ်းမိူင်းတႆး၊ ႁႂ်ႈၵူၼ်းၼွၵ်ႈမိူင်း ပေႃးတေလႆႈ လဵပ်ႈႁဵၼ်းလွင်ႈတႆးလႄႈၸၢဝ်းၶိူဝ်းၼႂ်းမိူင်းတႆး- ၸဵမ်ၸိူဝ်းၼႆႉ ။


ၻွၵ်ႊတိူဝ်ႊ/ၶူးၸၢႆးၶမ်းမိူင်း လၢတ်ႈဝႃႈ- ဢမ်ႇဝႃႈၵူၼ်းတႆး ၵူၼ်းၵူႈတီႈၼႂ်းလူၵ်ႈၼႆႉ ႁႂ်ႈႁူႉဝႃႈမိူဝ်ႈလဵဝ်ၼႆႉ ၼႂ်းမိူင်းတႆးႁဝ်း ပိုတ်ႇသုၼ်ႁဵၼ်းႁူႉလွင်ႈတႆးယဝ်ႉ။ တၢင်းယိူင်းဢၢၼ်း ဢၼ်လႆႈႁဵတ်းသုၼ်ႁဵၼ်းႁူႉလႄႈ ၶူၼ်ႉၶႂႃႉလွင်ႈတႆးၼႆႉၵေႃႈ ပိူဝ်ႈတႃႇပိုၼ်ၽႄႈၽိုၼ်ၶၢဝ်ႇ (News letter)ၽႃသႃဢိင်းၵလဵတ်ႈ ၼိုင်ႈပီလႂ် 2 ပွၵ်ႈ၊ တေပိုၼ်ၽႄႈတၢင်းၼွၵ်ႈမိူင်း ၼင်ႇႁိုဝ်ၵူၼ်းၼွၵ်ႈမိူင်းပေႃးတေႁူႉလႄႈသူၼ်ၸႂ် လဵပ်ႈႁဵၼ်းလွင်ႈတႆး လႄႈၸၢဝ်းၶိူဝ်းၼႂ်းမိူင်းတႆး ။


ယွၼ်းတိုၵ်းသူၼ်း ႁႂ်ႈၵူၼ်းတႆးႁဝ်းၵူႈၵေႃႉၵူႈၵူၼ်း ဢၼ်မီးယူႇၼႂ်းလူၵ်ႈၼႆႉ မႃးႁူမ်ႈၵၼ်ၸွႆႈထႅမ်သုၼ်ၼႆႉသေ ႁူမ်ႈၵၼ်ႁဵတ်းသၢင်ႈၵၢၼ်ငၢၼ်းၵႂႃႇ။ ႁႂ်ႈၵူၼ်းၶိူဝ်းတႆးႁဝ်းၵူႈတီႈၵူႈတၢင်း ပၼ်တၢင်းႁၼ်ထိုင်မႃးလႄႈ ၸီႉၸမ်ႈမႃး၊ ယဝ်ႉၵေႃႈမႃးၸွႆႈၵၼ်ပူၵ်းပွင် ၼင်ႇႁိုဝ်သုၼ်ႁဵၼ်းႁူႉလႄႈၶူၼ်ႉၶႂႃႉလွင်ႈတႆးၼႆႉ ပေႃးတေၶိုၼ်ႈယႂ်ႇမႂ်ႇသုင်ၵႂႃႇ- ၶူးၸၢႆးၶမ်းမိူင်း ယင်းလၢတ်ႈပႃးၼင်ႇၼႆ ။


သုၼ်လဵပ်ႈႁဵၼ်းလႄႈၶူၼ်ႉၶႂႃႉလွင်ႈတႆး New Center for Tai Studies) ၼႆႉ ၸဝ်ႈတူၼ်ၶူးလူင် ၻွၵ်ႊတိူဝ်ႊၶမ်းမၢႆ ထမ်မသႃမိ ဢွၼ်ႁူဝ်ၵေႃႇတင်ႈမႃး မိူဝ်ႈလိူၼ်မၢတ်ႊၶျ် ဝၼ်းတီႈ 27 ပီ 2016 ၼႆႉ။ တူဝ်ၸဝ်ႈၶူးထမ်မသႃမိ ႁပ်ႉဝႆႉတၼ်းႁဵၼ်းႁူဝ်ပဝ်ႈ၊ ၻွၵ်ႊတိူဝ်ႊပၺ်ႇၺႃႇၼၼ်ႇတ ထၢတ်ႈတေႃႇလွႆလႅမ်၊ ၻွၵ်ႊတိူဝ်ႊၸၢႆးဢွင်ႇထုၼ်း၊ လုင်းတၢင်းၵေး လႄႈၻွၵ်ႊတိူဝ်ႊၸၢႆးလူင်းၵႅဝ်ႈသၢမ် ၵဵင်းတုင် ၶဝ်ၸိူဝ်းၼႆႉ ႁပ်ႉတၼ်းႁဵင်းပဵၼ်ၽူႈၼမ်းၼႃႈ ။


ၸုမ်းၽူႈၸတ်းၵၢၼ် ပဵၼ်ၶူးၸၢႆးၶမ်းမိူင်း၊ ၻွၵ်ႊတိူဝ်ႊၸၢႆးဢွင်ႇသၢၼ်း၊ ၸဝ်ႈတူၼ်ၶူးဝိၸိတ်ႉတ ဝတ်ႉ/ၵျွင်းတွင်ႇပွၵ်ႉ။ ၼႂ်းၶွမ်ႊမတီႊဢွၼ်ႁူဝ် ငဝ်ႈငုၼ်းသုၼ်လဵပ်ႈႁဵၼ်းလႄႈၶူၼ်ႉၶႂႃႉလွင်ႈတႆးၼႆႉ မီး 15 ၸဝ်ႈ၊ ၼႂ်းၼၼ်ႉပႃးဝႆႉၸဝ်ႈတူၼ်ၶူးသုၶမ်း၊ ၻွၵ်ႊတိူဝ်ႊၸၢႆးသၢင်ႇဢၢႆႈ၊ ၻွၵ်ႊတိူဝ်ႊၸၢႆးၼေႃႇၶိူဝ်း၊ ၶူးႁိုၼ်း ၵႃယၢင်းလႄႈ ၽူႈလူင်ႉလႅၼ်ႇလၢႆၵေႃႉလၢႆၸဝ်ႈ ။