ၽွင်းလူင်ၾၢႆႇႁူင်းႁႅမ်းလႄႈတွင်ႈတႅဝ်းပိုၼ်ၽၢဝ်ႇဝႃႈလၢႆလၢႆဝဵင်းၼႂ်းမိူင်းမၢၼ်ႈတေႁၢမ်ႈၵေႃႇသၢင်ႈႁူင်းႁႅမ်းမႂ်ႇထႅင်ႈ ယွၼ်ႉႁူင်းႁႅမ်းဢၼ်မီးယူႇမိူဝ်ႈလဵဝ်ၼႆႉ မီးၼမ်ယဝ်ႉသေၵူၼ်းဢၼ်မႃးလိုဝ်ႈသဝ်း ၵေႃႈဢမ်ႇပေႃးမီး ဝႃႈၼႆ ။

ဝဵင်းတူၼ်ႈတီး ဝဵင်းလူင်မိူင်းတႆး

ဢူးဢူင်းမွင်ႇ ၵေႃႉဢၼ်ပဵၼ်ၽွင်းလူင်ၾၢႆႇႁူင်းႁႅမ်းလႄႈတွင်ႈတႅဝ်းလၢတ်ႈမိူဝ်ႈဝၼ်းတီႈ 20 လိူၼ်သႅပ်ႊထႅမ်ႊပိူဝ်ႊပူၼ်ႉမႃးဝႃႈမိူဝ်ႈလဵဝ်ၼႆႉႁူင်းႁႅမ်ႈဢၼ်မီးယူႇၵေႃႈမီးၼမ်ယဝ်ႉ၊ ထႅင်ႈလွင်ႈၼိုင်ႈၵေႃႈယၢမ်းလဵဝ်ၵူၼ်းမႃးဢႅဝ်ႇမႃးတွင်ႈတႅဝ်ႈၵေႃႈယင်းဢေႇလိူဝ် ဢၼ်ႁူင်းႁႅမ်းမီးဝႆႉ။ ၵွပ်ႈၼၼ်တႃႇတေၵေႃႈသၢင်ႈႁူင်းႁႅမ်းဢၼ်မႂ်ႇၼၼ်ႉတေလႆႈထတ်းသၢင်တူၺ်းလီလီ ၵွၼ်ႇတေပၼ်ၵေႃႈသၢင်ႈလႆႈ ၼႆယဝ်ႉ။


ဝဵင်း 3 ဝဵင်းၼႂ်းမိူင်းတႆးဢၼ်တေဢမ်ႇပၼ်ၵေႃႇသၢင်ႈႁူင်းႁႅမ်းဢၼ်မႂ်ႇထႅင်ႈၼၼ်ႉပဵၼ် (1) ဝဵင်းတူၼ်ႈတီး ဢၼ်ပဵၼ်ဝဵင်းလူင်မိူင်းတႆး၊ (2) ဝဵင်းယွင်ႁူၺ်ႈ ဢၼ်ပဵၼ်ဝဵင်းဢၼ်မီးၼွင်ႁၢႆးယႃႈ (ႁိုဝ်ၼွင်ဢိၼ်းလေး) လႄႈ (3) ဝဵင်းၵလေႃး  ။


လိူဝ်သေဝဵင်းၼႂ်းမိူင်းတႆးယဝ်ႉ ဝဵင်းတၢင်ႇတီႈမိူၼ်ၼင်ႇဝဵင်းတႃႈၵုင်ႈလႄႈမၢၼ်းတႃးလေးၵေႃႈယင်းၺႃးႁၢမ်ႈဢမ်ႇပၼ်ၵေႃႇသၢင်ႈႁူင်းႁႅမ်းမႂ်ႇထႅင်ႈ ။


ယွၼ်ႉပိူဝ်ႈမိူဝ်ႈလဵဝ်ၼႆႉ ၼႂ်းမိူင်းမၢၼ်ႈပတ်းပိုၼ်ႉႁူင်းႁႅမ်းဢၼ်လူင်းသဵၼ်ႈမၢႆပဵၼ်တၢင်းၵၢၼ်မီးယူႇ 1373 ဢၼ် လႄႈမီးႁွင်ႈၼွၼ်း 53783 ႁွင်ႈ။ တီႈဝဵင်းတႃႈၵုင်ႈမီးႁူင်းႁႅမ်း 346 ဢၼ်၊ မီးႁွင်ႈၼွၼ်း 16783 ႁွင်ႈ။ ဝဵင်းမၢၼ်းတႃးလေးမီးႁူင်းႁႅမ်း 184 ဢၼ်၊ မီးႁွင်ႈၼွၼ်း 7416 ႁွင်ႈ။ တီႈၼွင်ႈႁၢႆးယႃႈမီးႁူင်းႁႅမ် 88 ဢၼ် မီးႁွင်ႈၼွၼ်း 2729 ႁွင်ႈၼွၼ်း။ ဝဵင်းလူင်ႈတူၼ်ႈတီးမီးႁူင်းႁႅမ်း 32 ဢၼ် မီးႁွင်ႈၼွၼ်း 888 ႁွင်ႈၼွၼ်း လႄႈဝဵင်းၵလေႃးသမ်းမီးႁူင်းႁႅမ်း 38 ဢၼ် မီးႁွင်ႈၼွၼ်း 814 ႁွင်ႈၼွၼ်း ၼႆယဝ်ႉ။