ၸၢႆးၼုမ်ႇတႆးသႅၼ်းႁုၼ်ႈတႆး ႁေႃႈရူတ်ႉၶိူင်ႈဝႆးႁႅင်း ၼႂ်းၵဵင်းမႆႇ ၊ ၽႃႇၺႃးၵၼ်တင်းရူတ်ႉၵဵင် ၵူၼ်းထႆး ၊ ၵေႃႉၼိုင်ႈဝၢတ်ႇၸဵပ်းလိူဝ်ႁႅင်း လႆႈၶဝ်ႈႁူင်းယႃဝႆႉ ။ ၸိူဝ်းၵႂႃႇၸွမ်းၵၼ်တင်းမူႇၸုမ်းၵေႃႈ ထုၵ်ႇၸဝ်ႈၼႃႈတီႈထႆး ႁွင်ႉၵုမ်းတူဝ်ဝႆႉတင်းၵူၼ်း တင်းရူတ်ႉၶိူင်ႈ တင်းမူတ်း ။

ၵဵဝ်ႇၵပ်းလွင်ႈၼႆႉ ၶိုၼ်းဝၼ်းတီႈ 16/06/2016 (ၶမ်ႈဝႃး) မွၵ်ႈယၢမ်း 23:30 မူင်း ၊ မီးၸုမ်းၵူၼ်းၼုမ်ႇ သႅၼ်းႁုၼ်ႈတႆးၸုမ်းၼိုင်ႈ ၼႂ်းၵဵင်းမႆႇ ၊ ၵႂႃႇဢႅဝ်ႇလၢဝ်းၵၢင်ၶမ်ႈၵၢင်ၶိုၼ်းၸွမ်းၵၼ်သေ ၵေႃႉၼိုင်ႈႁေႃႈရူတ်ႉ ၽႃႇတမ်ၺႃးၵၼ်တင်း ရူတ်ႉၵဵင် ၵူၼ်းထႆး ၊ တီႈသီႇယႅၵ်ႈ ၸဵင်ႇၵၢတ်ႇမိူင်းမႂ်ႇ ဢိူင်ႇၸၢင်ႉမွႆႈ မိူင်းၵဵင်းမႆႇ ။ ႁဵတ်းႁႂ်ႈၵူၼ်းၼုမ်ႇသႅၼ်းႁုၼ်ႈတႆး ၵေႃႉႁေႃႈရူတ်ႉၶိူင်ႈၼၼ်ႉ လႆႈတိူဝ်ႉဝၢတ်ႇၸဵပ်းလိူဝ်ႁႅင်းသေ လႆႈဢဝ်ၵႂႃႇၶဝ်ႈယူတ်းယႃတူဝ်ဝႆႉ တီႈႁူင်းယႃ မႅၵ်ႊၶေႃႊမိၵ်ႊ (McCormick) - ၼႆယဝ်ႉ ။


ၸၢႆးလိူၼ် ၽူႈတူင်ႉၼိုင်ၵၢၼ်တူင်ႇဝူင်းတႆး လၢတ်ႈၼႄဝႃႈ - ဝၢႆးသေၶဝ်ၽႃႇတမ်ၵၼ်ယဝ်ႉ မိူဝ်ႈဢွၵ်ႇၵႂႃႇ တူၺ်းၼၼ်ႉ ရူတ်ႉၵဵင်လမ်းၼၼ်ႉ လႅပ်ႈလုၵ်ႉတင်းပမ်ႊၼမ်ႉမၼ်း (Esso) ၶိုၼ်ႈမႃးတၢင်းၵၢတ်ႇမိူင်းမႂ်ႇ ၊ တေၵႂႃႇတၢင်းပမ်ႊပေႃႊတေႃႊထေႃႊ ။ လုၵ်ႈဢွၼ်ႇသႅၼ်းႁုၼ်ႈၶဝ်သမ်ႉ လႅပ်ႈလုၵ်ႉတၢင်းၶူးမိူင်း (မႃးတၢင်းႁူင်းႁႅမ်း ၵျွၼ်ႊၼီႊဝွၵ်ႊၶိူဝ်ႊ ၵူႈပွၵ်ႈၼၼ်ႉ) ၶိုၼ်ႈမႃးသေ မႃးၽႃႇသႂ်ႇၵၼ်တီႈၼၼ်ႈ ။


ရူတ်ႉၵဵင်လမ်းၼၼ်ႉ ၵူၼ်းႁေႃႈပဵၼ်ၼၢင်းယိင်း ၊ ဢႃႇယုမွၵ်ႈ 22-23 ၊ ၼႂ်းရူတ်ႉၵဵင်ၼၼ်ႉ မႃးၵၼ်သွင်ၵေႃႉ ၊ ယိင်းၼိုင်ႈၸၢႆးၼိုင်ႈ ။ ၽႂ်ၵေႃႈဝႃႈၾၢႆႇလႂ်ထုၵ်ႇ ၊ ထဵင်ၵၼ်ဢမ်ႇယဝ်ႉ ။ ၵူၺ်းၵႃႈ ပေႃးဝႃႈရူတ်ႉၵဵင်ၼၼ်ႉ ႁေႃႈၽႃႇၾႆးလႅင်ၵေႃႈ ၾၢႆႇရူတ်ႉၵဵင်ၽိတ်း ။ ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈထႆးၶဝ် တေၵႂႃႇၵူတ်ႇထတ်း တူၺ်းၵွင်ႈထၢႆႇၵမ်းသိုဝ်ႈ (CCTV) ၼၼ်ႉ ၊ ၽႂ်ၽိတ်းၵေႃႈ တေပၼ်တူတ်ႈတၢမ်ႇၵႂႃႇ - ၸၢႆးလိူၼ်လၢတ်ႈ ။


သိုပ်ႇလၢတ်ႈဝႃႈ - မိူဝ်ႈၵႂႃႇတူၺ်းၼၼ်ႉ လုၵ်ႈဢွၼ်ႇတႆးမႃးပဵၼ်မူႇ ၊ မီးမွၵ်ႈ 7-8 ၵေႃႉ ၊ ရူတ်ႉၶိူင်ႈမွၵ်ႈ 7 လမ်း ၊ ဢႃယုမွၵ်ႈဝူင်ႈၵၢင် 17-18 လၢႆလၢႆ ၊ ပဵၼ်ၸၢႆးလွၼ်ႉလွၼ်ႉ ၊ ပဵၼ်လုၵ်ႈဢွၼ်ႇတႆးတင်းမူတ်း ။ ၵူၺ်းၵႃႈ ပဵၼ်ၵူၼ်းတၢင်းမိူင်းလႂ်တႄႉ ဢမ်ႇလႆႈႁူႉ ၊ ၵွပ်ႈဝႃႈတီႈၼၼ်ႈၼၼ်ႉ တၢင်းၸဝ်ႈၼႃႈတီႈထႆးၶဝ်ႁႄႉႁၢမ်ႈဝႆႉ ဢမ်ႇပၼ်ၶဝ်ႈၸမ် ။ ဢမ်ႇဝႃႈလုၵ်ႈဢွၼ်ႇသႅၼ်းႁုၼ်ႈတႆး ၊ ဢမ်ႇဝႃႈၵူၼ်းထႆး ဢၼ်မႃးၸွမ်းရူတ်ႉၵဵင်ၼၼ်ႉ လႆႈပဝ်ႇႁႅင်းဢၢႆ Alcohol ၵူႈၵေႃႉ - ဝႃႈၼႆ ။


ရူတ်ႉၵူၼ်းၼုမ်ႇသႅၼ်းႁုၼ်ႈတႆးၼၼ်ႉ ပဵၼ်ရူတ်ႉသႅၼ်း KSR လၢႆလၢႆ ။ ပေႃးၵၢင်ၶိုၼ်းမႃးၶဝ်ႁေႃႈရူတ်ႉ သိင်ႉ / ဝႆးၼႃႇ၊ လၢတ်ႈၶဝ်ၵေႃႈဢမ်ႇလႆႈ ။ ၶမ်ႈဝႃးၼႆႉ ၵွပ်ႈၶဝ်ထဵင်ၵၼ် လိူင်ႈမၼ်းဢမ်ႇယဝ်ႉသေ လုၵ်ႈဢွၼ်ႇၼုမ်ႇသႅၼ်းႁုၼ်ႈၸိူဝ်းၼႆႉ ၸဝ်ႈၼႃႈတီႈထႆးၶဝ် ႁွင်ႉၵႂႃႇၵုမ်းဝႆႉတီႈႁူင်းၽၵ်း / ႁူင်းပလိၵ်ႈၵွင်မိူင်းတင်းမူတ်း ။ ရူတ်ႉၶိူင်ႈၶဝ်ၵေႃႈ ထုၵ်ႇယိုတ်းဝႆႉတင်းမူတ်း - ၸၢႆးလိူၼ် သိုပ်ႇလၢတ်ႈၼႄထႅင်ႈ ၼင်ႇၼႆ ။