ၸုမ်းတူင်ႇဝူင်းတႆး ပွတ်းဢွၵ်ႇၶူင်း လၢႆမူႇလၢႆၸုမ်း ႁူမ်ႈၵၼ်သေ ၶွတ်ႇၽွတ်ႈ တႃႇႁႃငိုၼ်းၵွင်ၵၢင် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆး ႁူဝ်ပဝ်ႈ ၸုမ်းပွင်ၵၢၼ် လၢတ်ႈ ။


ဝၼ်းတီႈ 16/06/2016 ယၢမ်း 13:00-16:30 မူင်းၼၼ်ႉ မူႉၸုမ်းၼႂ်းပိုၼ်ႉတီႈ ထုင်ႉၵဵင်းတုင် လၢႆၸုမ်း ႁူပ်ႉၵၼ် တီႈဝတ်ႉဢိၼ်း ပွၵ်ႉ (3) ၸႄႈဝဵင်းၵဵင်းတုင် ၸိုင်ႈတႆး ၊ ပွတ်းဢွၵ်ႇၶူင်းသေ ၶွတ်ႇၽွတ်ႈၶွမ်ႊမတီႊ ၸွႆႈထႅမ်ၵူၼ်းၺႃးၽေးသိုၵ်း / ၽေးသၽႃႇဝႃႉ ဢၼ်ၵူၼ်းမိူင်းတႆး ႁူပ်ႉၺႃး ။ သင်ၶၸဝ်ႈ ၾၢႆႇမိူင်း၊ ၾၢႆႇတႆး (ၵိူင်းတႆး) လႄႈၸုမ်းတူင်ႉၼိုင်တူင်ႇဝူင်းတႆး လၢႆလၢႆၸုမ်း ႁူပ်ႉၵၼ်ဢုပ်ႇဢူဝ်းလႆႈၸႂ် ၶွတ်ႇၽွတ်ႈတင်ႈ ၶွမ်ႊမတီႊ ၸုမ်းပွင်ၵၢၼ် ၸွႆႈထႅမ်ၵူၼ်းထူပ်းၽေးသိုၵ်း ၼႂ်းမိူင်းတႆး ၽူႈၶဝ်ႈႁူမ်ႈ ႁိမ်း 300 ၵေႃႉပၢႆ ၼႆယဝ်ႉ ။

Photo: Woon Tip

ၸၢႆးသၢမ်တိပ်ႉသိူဝ် ႁူဝ်ပဝ်ႈ ၸုမ်းပွင်ၵၢၼ် ၸွႆႈထႅမ်ၵူၼ်းထူပ်းၽေးသိုၵ်း ၼႂ်းမိူင်းတႆး လၢတ်ႈဝႃႈ “ ဢၼ်ႁဝ်းလႆႈၶွတ်ႇၽွတ်ႈတင်ႈၶိုၼ်ႈမႃး ၸုမ်းပွင်ၵၢၼ်ၼႆႉ ဢမ်ႇၸႂ်ႈဝႃႈ တႃႇၼႂ်းၵဵင်းတုင် ဢၼ်လဵဝ် ပဵၼ်တႃႇပီႈၼွင်ႉတႆး တၢင်းပွတ်းဢွၵ်ႇၶူင်း တင်းမူတ်းယဝ်ႉ ။ တေဢၢၼ်းလူင်းႁႃ ငိုၼ်းၵွင်ၵၢင် တႃႇၶၢဝ်းတၢင်း ၼိုင်ႈလိူၼ် လႆႈၼမ် လႆႈဢေႇ ႁႂ်ႈလႆႈၵႂႃႇၵမ်ႉထႅမ်ၵူၼ်းၺႃးၽေး ” ဝႃႈၼႆ ။


ၸၢႆးဝုၼ်းတိပ်ႉ ၽူႈပွင်ၵၢၼ် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆး လၢတ်ႈဝႃႈ “ ႁဝ်းၶႃႈႁၼ်ထိုင်ဝႃႈ ပီႈၼွင်ႉပွတ်းႁွင်ႇ ၊ ပွတ်းၸၢၼ်း ပီႈၼွင်ႉၵူၼ်းပၢႆႈၽေးသိုၵ်း ၵေႃႈၼမ် ၼႃႇဢႃးလႃး ၊ ပီႈၼွင်ႉပွတ်းဢွၵ်ႇၶူင်းႁဝ်းသမ်ႉ ယူႇၼိမ်ၼိမ် တဵတ်ႇတဵတ်ႇယဵၼ်ယဵၼ်ၵၼ်သေ မၼ်းဢမ်ႇထုၵ်ႇလီပဵၼ် လူဝ်ႇဢွၼ်ၵၼ်ၵႂႃႇၸွႆႈထႅမ်ယူႇ” ဝႃႈၼႆ ။


ၸုမ်းပွင်ၵၢၼ် ၸွႆႈထႅမ်ၵူၼ်းပၢႆႈၽေးသိုၵ်း ၼႂ်းမိူင်းတႆးၼႆႉ ယိူင်းဢၢၼ်း ၶွတ်ႇၽွတ်ႈၵေႃႇတင်ႈမႃး တႃႇမိူင်းတႆး ပွတ်းဢွၵ်ႇၶူင်း တင်းမူတ်း ၼင်ႇႁိုဝ် ၽူႈမီးၼမ်ႉၸႂ် ၸေႇတၼႃႇ ၶဝ်ၵူႈၵေႃႉ ပေႃးတေ လႆႈမီးသုၼ်ႇၶဝ်ႈႁူမ်ႈ ၸွႆႈၵမ်ႉထႅမ်မႃး၊ ဢၼ်လႆႈဢွၼ်ႁူဝ်သေၵေႃႇတင်ႈမႃးၼႆႉ သင်ၶၸဝ်ႈ ၾၢႆႇတႆး၊ ၾၢႆႇမိူင်း၊ ၸုမ်းပႃႊတီႊၵၢၼ်မိူင်း၊ ၸုမ်းတူင်ႇၼိုင်တူင်ႇဝူင်းတႆး ႁူမ်ႈပႃးလူၺ်ႈ  ၽူႈၵွၼ်းဢိူင်ႇ/ပွၵ်ႉ ၼႂ်းဝဵင်းၵဵင်းတုင် တင်းမူတ်း ႁူမ်ႈၵၼ်လႆႈၸႂ် လိူၵ်ႈဢဝ် ၸၢႆးသၢမ်တိပ်ႉသိူဝ် ပဵၼ်ႁူဝ်ပဝ်ႈ ၼႆယဝ်ႉ။


တွၼ်ႈတႃႇတေလူင်းၵဵပ်းငိုၼ်းၵွင်ၵၢင်တႃႇၸွႆႈထႅမ် ၵူၼ်းၺႃးၽေးၼၼ်ႉ တေလူင်း ၸွမ်းဝၢၼ်ႈၼွၵ်ႈၼႃးပၢင်ႇ တေမီးဝႂ်ငိုၼ်းသေ သူင်ႇပၼ်ဝႆႉတီႈပူႇၵႄႇဝၢၼ်ႈ / ဢိူင်ႇဝႆႉ တင်းမူတ်းမီး 10 ႁူဝ်ႁွႆႉ(10 ဢိူင်ႇ) ပၢႆ၊ ၼႂ်းဝဵင်းၵဵင်းတုင်သမ်ႉ မီး  5 ပွၵ်ႉ ၸဵမ်ၸိူဝ်းၼႆႉ ဝႃႈၼႆ ။