ပီ 2016 ၼႆႉၾၢႆႇပၢႆးပၺ်ၺႃ လူင်ပွင်ၸိုင်ႈမၢၼ်ႈ ပၼ်ၶႂၢင်ႉသွၼ်လိၵ်ႈတႆးထူဝ်ႇငွၵ်ႈ ၼႂ်းႁူင်းႁဵၼ်းလူင်ပွင်ၸိုင်ႈ ပွၵ်ႈၵမ်းႁႅၵ်ႈ ၼႂ်းၸႄႈမိူင်းၶၢင် ။


တႄႇဢဝ် ဝၼ်းတီႈ 01/06/2016 သင်ၶၸဝ်ႈ ၸဝ်ႈတူၼ်ၶူးဝၼ်ႇၼိၵ်ႉသၼ လႄႈၵေႃလိၵ်ႈလၢႆး လႄႈၾိင်ႈငႄႈတႆး ၸႄႈၼႃး (မျိၼ်ႉၵျီးၼႃး) ၊ ဢွၼ်ႁူဝ်ၼမ်းၼႃႈ ပူင်သွၼ်လိၵ်ႈတႆးထူဝ်ႇငွၵ်ႈ (လိၵ်ႈတူဝ်ယၢဝ်း) ၊ ၼႂ်းႁူင်းႁဵၼ်းလူင်ပွင်ၸိုင်ႈမၢၼ်ႈ ၼႂ်းၸႄႈဝဵင်းမႂ်ႇ ၸႄႈတွၼ်ႈမျိၼ်ႉၵျီးၼႃး ၸႄႈမိူင်းၶၢင် ။ ယူႇတီႈၾၢႆႇပၢႆးပၺ်ၺႃ မိူင်းမၢၼ်ႈ ပၼ်ၶႂၢင်ႉ ႁႂ်ႈၸၢဝ်းၶိူဝ်းၽႂ်မၼ်း လႆႈပူင်သွၼ် လိၵ်ႈၸဝ်ႈၵဝ်ႇ ၼႂ်းႁူင်းႁဵၼ်း ၼႆယဝ်ႉ ။

ၸဝ်ႈတူၼ်ၶူးဝၼ်ႇၼိၵ်ႉသၼ ၽူႈဢွၼ်ႁူဝ်ၼမ်းၼႃႈၶပ်းၶိုင် တႃႇပူင်သွၼ်လိၵ်ႈတႆး ၼႂ်းႁူင်းႁဵၼ်းလူင် ပွင်ၸိုင်ႈမၢၼ်ႈ လၢတ်ႈဝႃႈ “ ယိူင်းဢၢၼ်းတႄႉ လိၵ်ႈတႆးယႃႇႁႂ်ႈႁၢႆ၊ ၵႂၢမ်းတႆးယႃႇႁႂ်ႈႁၢႆ၊ ႁဝ်းလႆႈထူပ်း ႁၼ်ယူႇယၢမ်းလဵဝ်ၼႆႉ လုၵ်ႈဢွၼ်ႇတႆးႁဝ်းၼႂ်းမိူင်းၶၢင် ယၢမ်းလဵဝ်ၼႆႉ မေႃၵႂၢမ်းမၢၼ်ႈၼမ်ၼႃႇယဝ်ႉ ။ ပေႃးၶဝ်လၢတ်ႈၵႂၢမ်းတႆးၸိုင် လၢတ်ႈလေႃးၵႂၢမ်းမၢၼ်ႈ 2-3 ၶေႃႈၸွမ်း ။ ယွၼ်ႉၼၼ်လႄႈ ၼင်ႇႁိုဝ် လုၵ်ႈဢွၼ်ႇတႆးႁဝ်း ပေႃးတေဢမ်ႇဢဝ်ၵႂၢမ်းပိူၼ်ႈ ၽႃႇလေႃႇၵႂၢမ်းႁဝ်းၼၼ်ႉ ၊ ႁဝ်းၶႃႈၶဝ် လႆႈတင်ႇလိၵ်ႈယွၼ်းၶႂၢင်ႉ တီႈလူင်ပွင်ၸိုင်ႈ ႁႂ်ႈလႆႈသွၼ် လိၵ်ႈတႆး ၵႂၢမ်းတႆး ၼႂ်းႁူင်းႁဵၼ်းလူင်ပွင်ၸိုင်ႈ ။ ၵမ်ႉၼႆႉ ယူႇတီႈလူင်ပွင်ၸိုင်ႈ ပူင်ပၼ် လူင်းမႃး ယဝ်ႉလႄႈ ႁဝ်းၶႃႈၵေႃႈ တႄႇသွၼ်ပၼ် ၼႂ်းႁူင်းႁဵၼ်းယဝ်ႉ” ဝႃႈၼႆ ။


ႁူင်းႁဵၼ်း ဢၼ်လႆႈပူင်သွၼ်လိၵ်ႈတႆးထူဝ်ႇငွၵ်ႈ (တူဝ်ယၢဝ်း) တင်းမူတ်းမီး 22 ႁူင်းႁဵၼ်း ၊ ၶူးသွၼ်သမ်ႉ မီး 22 ၵေႃႉ ၊ ၼိုင်ႈႁူင်းႁဵၼ်းလႂ် တမ်းဝၢင်းဝႆႉ ၶူးသွၼ်ၼိုင်ႈၵေႃႉ ၊ ၶၢဝ်းယၢမ်းပူင်သွၼ်သမ်ႉ ပဵၼ်ၶၢဝ်းယၢမ်းၼႂ်း ႁူင်းႁဵၼ်းလူင်ပွင်ၸိုင်ႈ ၼိုင်ႈဝၼ်းလႆႈ ပူင်သွၼ် တႃႇ 1 ၸူဝ်ႈမူင်း ၊ တေပူင်သွၼ်ပၼ် ၸၼ်ႉငဝ်ႈ ဢွၼ်တၢင်းၵွၼ်ႇ ဝႃႈၼႆ ။


ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈၼႃး (မျိၼ်ႉၵျီးၼႃး)  ၵမ်ႉၸွႆႈထႅမ်ပၼ် ငိုၼ်းလိူၼ် ၶူးသွၼ် ၼိုင်ႈၵေႃႉလႂ် 40,000 ပျႃး ၊ ၸုမ်းယူႊၼီႊသႅပ်ႊ (UNIC EF) သမ်ႉ ၵမ်ႉၸွႆႈထႅင်ႈ ၶူးသွၼ်ၼိုင်ႈ ၵေႃႉလႂ် 30,000 ပျႃး ႁူမ်ႈၵၼ် 70,000 ပျႃး ၼႆယဝ်ႉ ။


တေႃႈလဵဝ် ပပ်ႉလိၵ်ႈတႆးထူဝ်ႇငွၵ်ႈ တႃႇပူင်သွၼ်ပၼ်ၼႂ်းႁူင်းႁဵၼ်းလူင်ပွင်ၸိုင်ႈၼၼ်ႉ လႆႈတင်ႇ ထိုင်ဝႆႉတီႈလုမ်းပၢႆးပၺ်ၺႃ တီႈၼေႇပျီႇတေႃႇဝႆႉယဝ်ႉ ။