ထိုင်ၶၢဝ်းၾူၼ် လူဝ်ႇၽုၵ်ႇလူဝ်ႇသွမ်ႈယဝ်ႉလႄႈ ၵူၼ်းပၢႆႈၽေးသိုၵ်း ၸိူဝ်းယူႇသဝ်းဝႆႉ ၼႂ်းဝဵင်းသီႇပေႃႉ ဢွၼ်ၵၼ်ပွၵ်ႈၶိုၼ်းႁိူၼ်းယေး ၽႂ်မၼ်း ။


ဝၼ်းတီႈ 14/06/2016 ယၢမ်းၵၢင်ၼႂ် ၵူၼ်းပၢႆႈၽေးသိုၵ်း ၸိူဝ်းလႆႈပၢႆႈမႃးယူႇသဝ်း ၸွမ်းတီႈဝတ်ႉ / ၵျွင်း ၼႂ်းၸႄႈဝဵင်းသီႇပေႃႉ မိူၼ် ဝတ်ႉၽူဝ်းတေႃႇ ၊ ဝတ်ႉၵျွင်းၶမ်း ၊ ဝတ်ႉၸႄႈဢႅၼ်ႇ ၊ ဝတ်ႉၶၼ်ႇတိယႃမ လႄႈ ၸိူဝ်းယူႇၸွမ်း ႁိူၼ်းပီႈၼွင်ႉ ၼႂ်းဝဵင်းသီႇပေႃႉ ၸိူဝ်းၼႆႉ ဢွၼ်ၵၼ်ပွၵ်ႈၶိုၼ်းႁိူၼ်း ၽႂ်မၼ်းမူတ်း တေႃႈလဵဝ် ဢမ်ႇၵိုတ်းလိူဝ်သေၵေႃႉ ၼႆယဝ်ႉ ။

ၼၢင်းသၢၼ်းသၢၼ်းဢေး ၽူႈတႅၼ်းသၽႃးၸႄႈမိူင်း ဝဵင်းသီႇပေႃႉ လၢတ်ႈဝႃႈ “ ယွၼ်ႉပိူဝ်ႈသင်လႄႈ ဝၢၼ်ႈၼႃးတေႃတင်း ဝၢၼ်ႈတိုင်းႁႆးၼႆႉ ႁႂ်ႈၶဝ်ပွၵ်ႈၵမ်းလိုၼ်းၼႆ ယွၼ်ႉဝႃႈ ၼႂ်းဝၢၼ်ႈသွင်ဝၢၼ်ႈၼၼ်ႉ မိူဝ်ႈပူၼ်ႉမႃး မၼ်းပဵၼ်တီႈၼႃႈလိၼ် တပ်ႉသိုၵ်းတႆး တူင်ႉၼိုင်ဝႆႉ ။ ဝၢႆးသေ သိုၵ်းတႆး ငိူင်ႉဝႄႈၵႂႃႇယဝ်ႉ သိုၵ်းမၢၼ်ႈမႃးပုတ်ႈပၵ်း ၊ တူင်ႉၼိုင် ပႆႇမီးလွင်းႁူမ်ႇလူမ်ႈတႃႇၶဝ် ။ ၵမ်ႉၼႆႉ တေလႆႈဝႃႈ တမ်းၸႂ်ယဝ်ႉၼႆၵေႃႈ ပႆႇၸႂ်ႈ ၵူၺ်းၵႃႈ မၼ်းထိုင်ၶၢဝ်းၽုၵ်ႇသွမ်ႈ ၵူၼ်းပၢႆႈၽေးၵေႃႈသမ်ႉမႆႈၸႂ် လူဝ်ႇၽုၵ်ႇသွမ်ႈၼႆလႄႈ ၶဝ်ၵေႃႈပွၵ်ႈၶိုၼ်း ” ဝႃႈၼႆ ။


ပေႃးတူၺ်း ငဝ်းလၢႆးဢၼ်ပဵၼ်ယူႇတေႃႇလဵဝ်ၼႆၸိုင် တပ်ႉသိုၵ်းမၢၼ်ႈတႄႉ မီးယူႇၼႂ်းဝၢၼ်ႈ ၵူၺ်းၼႃႇၶဝ် ၶၢႆႉပၵ်းတပ်ႉၶဝ် ၼိုင်ႈဝၼ်းလႂ် ၶၢႆႉၼိုင်ႈဝၢၼ်ႈ ႁဵတ်းၼၼ် ၼင်ႇႁိုဝ် ၵူၼ်းဝၢၼ်ႈတေဢမ်ႇမီးၽေးတုမ်ႉတိူဝ်ႉၵူၼ်းဝၢၼ်ႈၼၼ်ႉ ယူႇတီႈၽူႈတႅၼ်းသၽႃးၸႄႈမိူင်း သီႇပေႃႉလႄႈ တပ်ႉသိုၵ်းမၢၼ်ႈ သင်ဝႃႈၼႂ်းပိုၼ်ႉတီႈ ၵူၼ်းဝၢၼ်ႈမီးသင်ၵေႃႈ ႁႂ်ႈလႆႈၵပ်းသိုပ်ႇၵၼ် ၵမ်းလဵဝ် ဝႃႈၼႆ ။


ယဝ်ႉၵေႃႈ ၼင်ႇႁိုဝ် ၵူၼ်းမိူင်းပေႃးတေမီးလွင်ႈႁူမ်ႇလူမ်ႈၼၼ်ႉ ႁႂ်ႈၽူႈမီးပုၼ်ႈၽွၼ်းၶဝ် ႁဵတ်းပၼ်မၢႆၾၢင် (ဝႂ်ၵပ်းတူဝ်) ၵူၼ်းပၢႆႈၽေး ၵူႈၵေႃႉ ။


တႄႇဢဝ်ႁူဝ်လိူၼ် ၵျူၼ်ႊၼႆႉမႃး ၵူၼ်းပၢႆႈၽေး ပွၵ်ႈၶိုၼ်းႁိူၼ်း မီးသီႇၸုပ်ႈ မိူဝ်ႈဝၼ်းတီႈ 1 ပွၵ်ႈၼိုင်ႈ ၊ ဝၼ်းတီႈ 6 ပွၵ်ႈၼိုင်ႈ ၊ ဝၼ်းတီႈ 13 ပွၵ်ႈၼိုင်ႈ ႁူဝ်ၵူၼ်းမီး 108 ၵေႃႉ ပဵၼ်ဝၢၼ်ႈၼႃးတေႃ ၊ ဝၼ်းတီႈ 14 သမ်ႉ ႁူဝ်ၵူၼ်း 185 ၵေႃႉ ပဵၼ်ၵူၼ်းဝၢၼ်ႈတိုင်းႁႆး ဢိူင်ႇႁူးမီ ၼႆယဝ်ႉ ။


ဝၢႆးသေ ပၢင်တိုၵ်းယဵၼ်ၵႂႃႇၵေႃႈ ႁိူၼ်းယေးၵူၼ်းဝၢၼ်ႈ ဝၢၼ်ႈၼႃးတေႃတင်းဝၢၼ်ႈတိုင်းႁႆး ဢိူင်ႇႁူးမီ ၺႃးတပ်ႉသိုၵ်းမၢၼ်ႈ ၶဝ်ႈသွၵ်ႈတဝ်ယႃႉ ႁိူၼ်းယေးယွင်ၶဝ်ႈ ၽၢဝ်ႇရူတ်ႉၶိူင်ႈ ၊ ထွၵ်ႇၶဝ်ႈသၢၼ် ၶဝ်ႈပိူၵ်ႈၵူၼ်းဝၢၼ်ႈ ၼင်ႇႁိုဝ်တေဢမ်ႇၸင်ႈၵိၼ်လႆႈ ၽႃႁိူၼ်းၵေႃႈ ထုပ်ႉလႅဝ်၊ ယႃႉလႅဝ် တင်းၼမ် ၼႆယဝ်ႉ ။