ပႃႊတီႊမႂ်ႇသုင်ၸိုင်ႈတႆး SSPP/SSA ၸဝ်ႈပၢင်ႇၾႃႉဢွၼ်ႁူဝ် ႁူပ်ႉထူပ်းဢုပ်ႇဢူဝ်းၵူၼ်းမိူင်း ၊ ၸွႆႈထႅမ်ငိုၼ်း တႃႇပူၵ်းပွင်ၶိုၼ်း ဝၢၼ်ႈဝူဝ်းလူင် ၼပ်ႉႁူဝ်ပၢၵ်ႇသႅၼ် ၊ ၸွႆႈထႅမ် တႃႇႁဵတ်းသၢင်ႈတီႈယူႇၵူၼ်းပၢႆႈၽေး ဝၢၼ်ႈတေႃႉသၢင်ႇၵေႃႈ ၼပ်ႉႁူဝ်ပၢၵ်ႇသႅၼ်ၼင်ႇၵဝ်ႇ ။

ႁူဝ်ပဝ်ႈလူင် ၸွမ်သိုၵ်းလူင်ပၢင်ႇၾႃႉ ဢွၼ်ႁူဝ်ၶွမ်ႊမတီႊငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး (SSPP/SSA) သေ ႁူပ်ႉထူပ်းသင်ၶၸဝ်ႈလႄႈၵူၼ်းမိူင်း တီႈငဝ်ႈငုၼ်းဝၢၼ်ႈႁႆး ဝၼ်းတီႈ 14/06/2016 ။ တီႈပၢင်ႁူပ်ႉထူပ်းၼႆႉ ယူႇတီႈ SSPP/SSA ၸွႆႈထႅမ် တႃႇပူၵ်းပွင်ၶိုၼ်းဝၢၼ်ႈသူၼ်ၵူၼ်းဝၢၼ်ႈ ၵူၼ်းမိူင်း ဝၢၼ်ႈဝူဝ်းလူင် ဢိူင်ႇႁၢႆးၵုၺ် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တႃႇငိုၼ်း 220 သႅၼ် ။ ၼွၵ်ႈသေၼၼ်ႉ ၸွႆႈထႅမ်တႃႇႁဵတ်းသၢင်ႈတီႈယူႇသဝ်းၵူၼ်းပၢႆႈၽေး ဝၢၼ်ႈတေႃႉသၢင်ႇ တီႈၵျွင်းႁူဝ်ဝဵင်း ဝဵင်းၵျွၵ်ႉမႄး 150 သႅၼ် - ၼႆယဝ်ႉ ။


ၸဝ်ႈပၢင်ႇၾႃႉ ၵၢဝ်ႇလၢတ်ႈဝႃႈ- လွင်ႈဢၼ် SSPP/SSA လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းမၢၼ်ႈ ၼႆႉမၼ်းၵဵဝ်ႇၵၢၼ်မိူင်း ၊ ယွၼ်ႉ SSPP/SSA ပႆႇလူင်းလၢႆးမိုဝ်း NCA ၵေႃႈပႃး ။ ၸွမ်းၼင်ႇၵၢၼ်ပၢႆးမိူင်းၼၼ်ႉ SSPP/SSA လႆႈယိုၼ်ႈယွၼ်း လွင်ႈၶႂ်ႈမီးၶႂ်ႈပဵၼ် တႃႇသုၼ်ႇလႆႈတႅပ်းတတ်းႁင်းၶေႃ၊ လွင်ႈၽဵင်ႇပဵင်း ၊ ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ ။ ၵူၺ်းၵႃႈ ဢၼ် SSPP ၶႂ်ႈလႆႈၶႂ်ႈပဵၼ်လႄႈ ဢၼ်မၢၼ်ႈၶႂ်ႈပၼ် ပႆႇမိူၼ်ၵၼ်ၵေႃႈပႃး- ၼႆယဝ်ႉ ။


မၼ်းၸဝ်ႈသိုပ်ႇလၢတ်ႈဝႃႈ - ငဝ်းလၢႆးၵၢၼ်မိူင်းယၢမ်းလဵဝ် မၢၼ်ႈၼႆႉ ၾၢႆႇၼိုင်ႈယိပ်းၼမ်ႉ၊ ၾၢႆႇၼိုင်ႈယိပ်း ၵၢၼ်ႈၾႆး၊ ဢမ်ႇပေႉမေႃႈပေႃႉၵၢၵ်ႇ ။ ပွင်ႇဝႃႈမၢၼ်ႈၼႆႉ ဢမ်ႇၶႂ်ႈလႆႈလွင်ႈငမ်းယဵၼ်တႄႉတႄႉ ။ ဢၼ်ပေႃႈမႄႈ ၵူၼ်းမိူင်းႁဝ်း လႆႈလူႉတၢႆၵႂႃႇၼႆၵေႃႈ ဢမ်ႇၸႂ်ႈတၢႆၵႂႃႇလၢႆလၢႆ၊ မၼ်းပဵၼ်ၵၢၼ်လူႇၼိူဝ်ႉလိူတ်ႈၵႂႃႇ တႃႇတႆးႁဝ်း ႁႂ်ႈသိုပ်ႇၶဝ်ႈပၢင်တိုၵ်းၵႂႃႇ။ သင်ဝႃႈ SSPP/SSA ၼႆႉ မီးတီႈယူပ်ႈယွမ်းၼႆၵေႃႈ ႁႂ်ႈပေႃႈမႄႈၵူၼ်းမိူင်းႁဝ်း ၸီႉၸမ်ႈမူၼ်ႉမႄးၵႂႃႇ ။ သင်ဝႃႈ SSPP/SSA ၼႆႉ ပေႃႈမႄႈၵူၼ်းမိူင်းတႆးႁဝ်း ႁၼ်ထိုင်ဝႃႈ ဢမ်ႇထုၵ်ႇလီမီးၵေႃႈ  တူဝ်ၵဝ်ၶႃႈ တေဢွၼ်ႁူဝ်ပူတ်းယႃႉပႅတ်ႈ ၊ သင်ဝႃႈထုၵ်ႇလီမီးယူႇၼႆၵေႃႈ တူဝ်ၵဝ်ၶႃႈ တေၶဝ်ႈႁူမ်ႈပႃးၼႂ်းၶွမ်ႊမတီႊသေ ႁၢပ်ႇၵိုတ်ႉၵၢၼ်ၵႂႃႇ - ဝႃႈၼႆ ။


တီႈပၢင်ႁူပ်ႉထူပ်းၼၼ်ႉ ဢၼ်ပေႃႈမႄႈၵူၼ်းမိူင်းတၢင်ႇထိုင် တင်းမူတ်းမီး 5 ၶေႃႈ - 1. လွင်ႈတႆးတေႃႇတႆး ႁႂ်ႈၽွမ်ႉၵၼ် ။ 2. လွင်ႈၵဵပ်းၶွၼ်ႇၼိူဝ်ၵူၼ်းမိူင်း ယႃႇႁႂ်ႈပဵၼ် 2 မူႇၸုမ်း ၊ ႁႂ်ႈႁူမ်ႈၵၼ်ပဵၼ်ဢၼ်လဵဝ်သေၵဵပ်း ။ 3.လွင်ႈသိုၵ်းတဢၢင်း (လွႆ) TNLA မႃးပေႉၵိၼ်ၵူၼ်းမိူင်း ၶႂ်ႈႁႂ်ႈၵႅတ်ႇၶႄပၼ် ။ 4. လွင်ႈတုၵ်းယွၼ်း ႁႂ်ႈၸွႆႈထႅမ်ပၼ်ၵူၼ်းမိူင်း ဝၢၼ်ႈဝူဝ်းလူင် ဢိူင်ႇႁၢႆးၵုၺ် ၸႄႈဝဵင်းၵျွၵ်ႉမႄး ၊ လွင်ႈၵေႃႇသၢင်ႈတီႈယူႇတၼ်းသဝ်း ။ 5. ႁႂ်ႈၸွႆႈထႅမ် တႃႇၵေႃႇသၢင်ႈတီႈယူႇတၼ်းသဝ်းၵူၼ်းမိူင်းလႄႈ လုၵ်ႈႁဵၼ်း ဢၼ်လုၵ်ႉဝၢၼ်ႈတေႃႉသၢင်ႇ ပၢႆႈမႃးတီႈ ၵျွင်းႁူဝ်ဝဵင်း ၸိူဝ်းၼႆႉ ။


ၵဵဝ်ႇလူၺ်ႈလွင်ႈသိုၵ်းတဢၢင်း (ပလွင်ႈ) TNLA  မၢၼ်ႈမႃးပေႉၵိၼ်ၵူၼ်းမိူင်းၼႆႉ ယူႇတီႈ SSPP/SSA တေဢဝ်ပုၼ်ႈၽွၼ်းတေႃႇသူႈ ဢုပ်ႇဢူဝ်းၵႄႈလိတ်ႈပၼ်ၵႂႃႇ ။ သိုၵ်းတဢၢင်းၼႆႉ သိုၵ်းမၢၼ်ႈလႄႈၶဝ်ၵေႃႈ တေဢုပ်ႇဢူဝ်းတူၵ်းလူင်းၵၼ်ယဝ်ႉ။ တဢၢင်းတင်း RCSS ၵေႃႈ ၶဝ်ဢမ်ႇလွတ်ႈဢုပ်ႇဢူဝ်းၵၼ် ။ မၢၼ်ႈတင်းႁဝ်းၼႆႉ တိုၵ်းၵၼ်မႃးၶၢဝ်းတၢင်း 50-60 ပီယဝ်ႉ ၊ ႁဝ်းတင်းႁႃတၢင်းဢုပ်ႇဢူဝ်းၵၼ်လႆႈ ။ ၵွပ်ႈၼႆ တဢၢင်းတင်းတႆးၼႆၵေႃႈ ပဵၼ်ၵူၼ်းမိူင်းလဵဝ်ၵၼ ၊ ႁဝ်းတိုၼ်းတေလႆႈဢုပ်ႇဢူဝ်းၵၼ်လႆႈယူႇ ။ ၵူၼ်းမိူင်းလဵဝ်ၵၼ်တိုၵ်းတေႃးၵၼ်ၼႆႉ ႁဵတ်းႁႂ်ႈၽူႈၶဵၼ်ႁဝ်းၸူမ်းၵူၺ်း ၊ ပၼ်ႁႃဢၼ်ပဵၼ်ယူႇယၢမ်းလဵဝ်ၼႆႉ ႁဝ်းယႃႇပေတူၺ်းဢဝ်ၽိဝ်မၼ်းၵူၺ်း ၊ ႁဝ်းလီဝူၼ်ႉတီႈပဵၼ်မႃး ပဵၼ်ၽႂ်ၵေႃႉႁဵတ်းပဵၼ်- ၸဝ်ႈပၢင်ႇၾႃႉ သိုပ်ႇလၢတ်ႈထႅင်ႈၼင်ႇၼႆ ။


ၵဵဝ်ႇၵပ်းလွင်ႈၽွမ်ႉႁူမ်ႈၼၼ်ႉ ၸဝ်ႈပၢင်ႇၾႃႉ ၸႅင်ႈလၢတ်ႈၼႄလႄႈတိုၵ်းသူၼ်း ဝႃႈ - လွင်ႈၽွမ်ႉႁူမ်ႈတႆး တေႃႇတႆးၼႆႉ ဢဝ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်သေ ႁဝ်းႁူမ်ႈၵၼ်ၵႂႃႇတီႈၼၼ်ႉယဝ်ႉ ။ ၼင်ႇႁိုဝ် CSSU တေဢွၼ်ႁူဝ်လႆႈလႄႈ ႁဵတ်းသၢင်ႈၼႃႈၵၢၼ်တႃငၢၼ်းလႆႈၼၼ်ႉ သင်ၶၸဝ်ႈလႄႈ ပေႃႈမႄႈၵူၼ်းမိူင်းႁဝ်း ႁႂ်ႈဢွၼ်ၵၼ်ပၼ်ႁႅင်းၵမ်ႉၸွႆႈသေၵမ်း- ၼႆယဝ်ႉ ။