တပ်ႉသိုၵ်းတဢၢင်း (ပလွင်ႈ) တပ်ႉၸုမ်း (2) 717 ယိုဝ်းဝူဝ်းၵူၼ်းဝၢၼ်ႈ ပၢင်မၢၵ်ႇမိုဝ်းတၢႆယဝ်ႉ တဵၵ်းယွၼ်းငိုၼ်းၵူၼ်းဝၢၼ်ႈႁႂ်ႈသၢႆႈတႅၼ်းၵႃႈမၢၵ်ႇၵွင်ႇ 4 လုၵ်ႈ မႅၼ်ႈငိုၼ်းမွၵ်ႈ ၼိုင်ႈသႅၼ်ပၢႆ ။


ဝၼ်းတီႈ 08/06/2016 ယၢမ်း 21:00 မူင်း တပ်ႉသိုၵ်းတဢၢင်း (ပလွင်ႈ) တပ်ႉၸုမ်း (2) 717 ဢၼ်တူင်ႉၼိုင်ႈတၢင်းပွတ်းတွၼ်ႈၼၼ်ႉ ဢဝ်ၵွင်ႈယိုဝ်းဝူဝ်းတၢႆ တူဝ်ၼိုင်ႈ ၸဝ်ႈၶွင်ဝူဝ်းပဵၼ် လုင်းတေႃးပၼ်ႇၼ လႄႈပႃႈသႅင် တီႈဝၢၼ်ႈပၢင်မၢၵ်ႇမိုဝ်း ဢိူင်ႇပၢင်မၢၵ်ႇမိုဝ်း ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ။ ယိုဝ်းဝူဝ်းတၢႆယဝ်ႉ ၸႂ်ႉသၢႆႈ တဵင်းယွၼ်းငိုၼ်း မၢၵ်ႇၵွင်ႈ ၼိုင်ႈလုၵ်ႈလႂ် 3 မိုၼ်ႇပျႃး တင်းမူတ်း 4 လုၵ်ႈ မႅၼ်ႈငိုၼ်း 12,0000 ပျႃး ၼႆယဝ်ႉ ။

ၵူၼ်းၼႂ်းဝၢၼ်ႈပၢင်မၢၵ်ႇမိုဝ်း လႆႈႁၼ်တႂ်ႈတႃတႄႉ လၢတ်ႈဝႃႈ “  သိုၵ်းလွႆၶဝ်ပႂ်ႉ ယၢမ်းၵၢင်ၶိုၼ်း ဝူဝ်းသမ်ႉ သဵင်မၼ်းတေမေႃးၵူၵ်းၵူၵ်း ၵၢၵ်းၵၢၵ်း ႁဵတ်းၼၼ်သေ ၶဝ်သမ်ႉၶၢၼ်ႉငိၼ်းလႄႈ ဢဝ်ၵွင်ႈယိုဝ်းသႂ်ႇတီႈၶွၵ်ႈဝူဝ်းၼၼ်ႉၵမ်းလဵဝ်။ ဝူဝ်းၼၼ်ႉ ထုၵ်ႇၺႃးမၢၵ်ႇၵွင်ႈ 4 လုၵ်ႈသေ တၢႆထၢင်တီႈ ၼႂ်းၶွၵ်ႈဝူဝ်းၼၼ်ႉၵမ်းလဵဝ် ” ဝႃႈၼႆ ။


ၵဵဝ်ႇၵပ်းလူၺ်းလွင်ႈၼႆႉ သိုၵ်းလွႆတဢၢင်း (ပလွင်ႈ) ၶဝ် ႁွင်ႉၽူႈယႂ်ႇၵူၼ်းလူင်ဝၢၼ်ႈမႃးသေ ႁႂ်ႈသၢႆႈတႅၼ်းၶိုၼ်းၵႃႈမၢၵ်ႇၵွင်ႈ ဢၼ်ၶဝ်လႆႈယိုဝ်းဝူဝ်းတၢႆ ၵမ်းလဵဝ် ။


ၽူႈယႂ်ႇၵူၼ်းလူင် ဝၢၼ်ႈပၢင်မၢၵ်ႇမိုဝ်းတႄႉ လၢတ်ႈဝႃႈ “ ဝူဝ်းဢၼ်တၢႆၼႆႉ ၸဝ်ႈၶွင်မၼ်းၵေႃႈ ဢမ်ႇယူႇ ပၢႆႈၽေးသိုၵ်းဝႆးယူႇ ၵႂႃႇမီးတၢင်းလႂ်ၵေႃႈ ဢမ်ႇႁူႉ သင်ဝႃႈ ၶဝ်ပွၵ်ႈမႃးၶိုၼ်း တေ ယွၼ်းငိုၼ်း သၢႆႈတႅၼ်းၶိုၼ်း ၊ ၼိူဝ်ႉဝူဝ်းတႄႉ ၶဝ်ယႃႉသေ ဢဝ်ၵႂႃႇၵိၼ် 2 ပုၼ်ႈ ၊ တႃႇ 1 ပုၼ်ႈ တႄႉပၼ်ၵူၼ်းဝၢၼ်ႈၵိၼ် ” ဝႃႈၼႆ ။


ဝၼ်းတီႈ 12/06/2016 တပ်ႉသိုၵ်းတဢၢင်း (ပလွင်ႈ) ၵဵပ်းသဵၼ်ႈသၢႆမၢႆႁူဝ်ၵူၼ်းၼႂ်းဝၢၼ်ႈ တၢင်းပွတ်း ဝၢၼ်ႈပၢင်မၢၵ်ႇမိုဝ်း၊ မိူင်းၵုင်း၊ တေႃႉသၢင်ႇ ၊ တွင်ႇပူဝ်ႉလူဝ်ႉ ၵဵပ်းသၢႆမၢႆၵူၼ်း ဢမ်ႇႁူႉဝႃႈ တေၵဵပ်းဢဝ်မိူဝ်းႁဵတ်းသင် ဝၢႆးမႃး တေၵဵပ်းၶဝ်ႈႁႃႉ ၊ ၵဵပ်းသိုၵ်းဢၼ်ဝႃႈၼၼ်ႉ ၵူၼ်းမိူင်းယူႇၼႂ်းပိုၼ်ႉတီႈ လွမ်ႉၵူဝ်မႆႈၸႂ်ဝႆႉယူႇ ဝႃႈၼႆ ။