ပီႈၼွင်ႉတႆး ႁႅင်းၵၢၼ်ယၢၼ်မိူင်းႁွတ်ႈၵဵင်းမႆႇ ၵႂႃႇလၵ်ႉလူတ်ႉထိပ်ႇပိူၼ်ႈ တၢင်းၵၢတ်ႇမိူင်းမႂ်ႇ ၵၢင်ဝဵင်းၵဵင်းမႆႇ ပၢႆႈဢမ်ႇတၢၼ်းပူၼ်ႉလႄႈ ၺႃးၵူၼ်းပႂ်ႉယၢမ်းတိသူင်ႇတပ်ႉပလိၵ်ႈ ။


ဝၼ်းတီႈ 16/06/2016 ယၢမ်း 07:05 မူင်း ပီႈၼွင်ႉႁႅင်းၵၢၼ်တႆး လၵ်ႉရူတ်ႉထိပ်ႇ ၼႃႈလုမ်းၽွင်းတၢင် မိူင်းဢမေႊရိၵၢၼ်ႊ ဢၼ်မီးႁိမ်းၵၢတ်ႇမိူင်းမႂ်ႇ ဝဵင်းၵဵင်းမႆႇ ၸိုင်ႈထႆး ၊ မၼ်းၸၢႆးလၵ်ႉရူတ်ႉထိပ်ႇပိူၼ်ႈသေပၢႆႈ ၊ သမ်ႉပၢႆႈဢမ်ႇပူၼ်ႉလႄႈၺႃး ၸဝ်ႈၼႃႈတီႈ ၵူၼ်းပႂ်ႉယၢမ်း တိၺွပ်းသူင်ႇတူဝ်တီႈႁူင်းပလိၵ်ႈ ၸၢင်ႉၽိူၵ်ႇ ၼႆယဝ်ႉ ။

ၸၢႆးလိူၼ် ၵေႃႉႁူပ်ႉႁၼ်တႂ်ႈၼႃႈတႂ်ႈတႃ လၢတ်ႈဝႃႈ “ ပီႈၼွင်ႉႁႅင်းၵၢၼ်တႆး ႁဵတ်းၵဵင်ႈၶႃႈၸဵပ်းသေ ပႂ်ႉလၵ်ႉရူတ်ႉထိပ်ႇ တီႈၼႃႈလုမ်းၽွင်းတၢင် ဢမေႊရိၵၢၼ်ႊ ႁိမ်းၵၢတ်ႇမိူင်းမႂ်ႇၼၼ်ႉ တၼ်းလႆႈရူတ်ႉထဵပ်ႇ ဢွၵ်ႇမႃးယူႇ ၵူၺ်းၵႃႈသမ်ႉဢမ်ႇ ပူၼ်ႉလွတ်ႈ ၽိူဝ်ႇၸဝ်ႈၼႃႈတီႈ ၵူၼ်းပႂ်ႉယၢမ်းၶဝ်ႁၼ် လမ်းတိၺွပ်းၵမ်းလဵဝ် မၼ်းပွႆႇပႅတ်ႈရူတ်ႉထိပ်ႇၼၼ်ႉသေ လႅၼ်ႈပၢႆႈဝႆးၼႃႇ သမ်ႉပၢႆႈဢမ်ႇပူၼ်ႉသေၺႃး ၸဝ်ႈၼႃႈတီႈၶဝ် တိၺွပ်းလႆႈယူႇ” ဝႃႈၼႆ ။


ၵူၼ်းလၵ်ႉရူတ်ႉထိပ်ႇၼႆႉ ပဵၼ်ပီႈၼွင်ႉႁႅင်းၵၢၼ်တႆး မႃးႁဵတ်းၵၢၼ်ႁႃၵိၼ်လဵင်ႉတွင်ႉ ၼႂ်းၵဵင်းမႆႇ ပဵၼ်ၽူႈၸၢႆး ဢႃယု 32 ပီ ။ တေႃႈလဵဝ် ၸဝ်ႈၼႃႈတီႈပလိၵ်ႈထႆး ၵုမ်းၶင်တူဝ်ဝႆႉ တီႈႁူင်းပလိၵ်ႈ ၸၢင်ႉၽိူၵ်ႉ ၵဵင်းမႆႇဝႆႉ ။ ပူၼ်ႉမႃး ဢမ်ႇပႆႇႁိုင်ၼၼ်ႉ ယွၼ်ႉဝႃႈ တီႈလုမ်းၽွင်းတၢင် မိူင်းဢမေႊရိၵၢၼ်ႊ ဢၼ်ပၵ်းဝႆႉတီႈ ၵဵင်းမႆႇၼႆႉ ရူတ်ႉၶိူင်ႈလႆႈႁၢႆၵႂႃႇ 2 လမ်းလႄႈ ရူတ်ႉထိပ်ႇ 3 လမ်း ။ ယွၼ်ႉၼၼ်ႉလႄႈ ၸဝ်ႈၼႃႈတီႈ ၵူၼ်းပႂ်ႉယၢမ်းၶဝ် လႆႈသႂ်ႇၸႂ် ပၵ်းတႃပႂ်ႉတူၺ်း ၽူႈလၵ်ႉရူတ်ႉမႃး ၼႆယဝ်ႉ ။


ပူၼ်ႉမႃး ဝၼ်းတီႈ 13/06/2016 ၼၼ်ႉၵေႃႈ ပႃႈၼၢင်းသူၺ်ႇ ဢႃယု 48 ပီ ပဵၼ်ၵူၼ်းၸႃႇတိ ဝၢၼ်ႈၼႃးလေႃး ၸႄႈဝဵင်းမိူင်းပၼ်ႇ ယွၵ်ႇလႅၼ်/ပႅတ်ႉၵိၼ် ပီႈၼွင်ႉႁႅင်းၵၢၼ်တႆးၶိုၼ်း ၸဝ်ႈၼႃႈတီႈပလိၵ်ႈထႆး လႆႈၶဝ်ႈတိၺွပ်းတူဝ် တီႈၵၢတ်ႇလူင်/ၵၢတ်ႇၶျဵင်းလွႆး ဝဵင်းၵဵင်းမႆႇ ၸိုင်ႈထႆး ၼႆယဝ်ႉ ။