ပႃႊတီႊႁူဝ်သိူဝ် SNLD ၵပ်းသၢၼ်ႁႂ်ႈ ၸဝ်ႈၼႃႈတီႈ ၾၢႆႇဝႂ်ၵပ်းတူဝ် လဝၵ ၸႄႈဝဵင်းသီႇပေႃႉ ၸတ်းႁဵတ်းပၼ် ဝႂ်ၵပ်းတူဝ် (မၢႆၽၢင်) တႃႇပီႈၼွင်ႉၵူၼ်းပၢႆႈၽေးသိုၵ်း ၸိူဝ်းပႆႇမီး ဝႂ်ၵပ်းတူဝ်သင် သေပွၵ်ႈ တင်းမူတ်း 120 ၵေႃႉ ။


ဝၼ်းတီႈ 08/06/2016 ယၢမ်း ၵၢင်ၼႂ် တေႃႇ ႁူဝ်ၶမ်ႈ ၽူႈတႅၼ်းသၽႃးၸႄႈမိူင်း ပႃႊတီႊႁူဝ်သိူဝ် ၊ ၽူႈၵွၼ်းၸႄႈဝဵင်းလႄႈ ၾၢႆႇၵူတ်ႇထတ်းၵူၼ်းၶဝ်ႈမိူင်း (လဝၵ) ဝဵင်းသီႇပေႃႉ ႁူမ်ႈၵၼ်သေ ၸတ်းႁဵတ်းပၼ်ဝႂ်ၵပ်းတူဝ် (မၢႆၽၢင်) ပၼ်ပီႈၼွင်ႉၵူၼ်းပၢႆႈၽေးသိုၵ်း တီႈဝတ်ႉၽူဝ်းတေႃႇတင်း ဝတ်ႉဝဵင်းၵဝ်ႇ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၼႆယဝ်ႉ ။

ၼၢင်းသၢၼ်းသၢၼ်းဢေး ၽူႈတႅၼ်းသၽႃးၸႄႈမိူင်း သီႇပေႃႉ လၢတ်ႈဝႃႈ “ ၼင်ႇႁိုင် ပီႈၼွင်ႉၵူၼ်းပၢႆႈၽေး ပေႃးတေမီးလွင်ႈႁူမ်ႇလူမ်ႈ တႃႇၶဝ် ၽွင်းၵႂႃႇႁဵတ်းႁႆႈႁဵတ်းသူၼ်ၼၼ်ႉ ႁဝ်းၶႃႈ လႆႈၶပ်ႉၶိုင်ပၼ် တႃႇပီႈၼွင်ႉၵူၼ်းပၢႆႈၽေးသိုၵ်း ၸိူဝ်းပႆႇမီးဝႂ်ၵပ်းတူဝ် ၸိူဝ်းၼၼ်ႉ ႁႂ်ႈၶဝ်လႆႈမီးၵူႈၵေႃႉ ႁႂ်ႈလႆႈပႃး/ႁွႆႈၶေႃးၵႂႃႇႁဵတ်းၵၢၼ် ” ဝႃႈၼႆ ။


ၵဵဝ်ႇၵပ်းလွင်ႈႁဵတ်းဝႂ်ၵပ်းတူဝ် (မၢႆၽၢင်) ၼႆႉ ၼင်ႇႁိုင်ၵူၼ်းပၢႆႈၽေးသိုၵ်း ပွၵ်ႈၶိုၼ်းႁိူၼ်းယေး ၸဝ်ႈၵဝ်ႇ ပေႃးတေမီးလွင်ႈႁူမ်ႇလူမ်ႈ တႃႇၶဝ်ၵႂႃႇႁဵတ်းႁႆႈႁဵတ်းသူၼ် ၽွင်ႈမိူဝ်ႈၵႂႃႇၺႃးသိုၵ်းမၢၼ်ႈ ၊ သင်သိုၵ်းမၢၼ်ႈထၢမ် ဢမ်ႇႁူႉၵႂၢမ်းမၢၼ်ႈ ဢမ်ႇမေႃတွပ်ႇၵႂၢမ်းမၢၼ်ႈၸိုင် ဢဝ်ဝႂ်ၵပ်းတူဝ်ၼႆႉၼႄ ။ ၼင်ႇႁိုဝ် သိုၵ်းမၢၼ်ႈ ပေႃးတေလႆႈႁူႉဝႃႈ ၶဝ်ပဵၼ်ၵူၼ်းဝၢၼ်ႈ ၼႆယဝ်ႉ ။


သိုပ်ႇလၢတ်ႈထႅင်ႈဝႃႈ ဢၼ်ပဵၼ်ပၼ်ႁႃယူႇတေႃႈလဵဝ်ၼႆႉ ယွၼ်ႉၵူၼ်းဝၢၼ်ႈႁဝ်း ဢမ်ႇမေႃလၢတ်ႈ ၵႂၢမ်းမၢၼ်ႈ ၊ သင်သိုၵ်းမၢၼ်ႈထၢမ် ဢမ်ႇမေႃတွပ်ႇသင်  ယူႇတဵတ်ႇတဵတ်ႇသေ ထုၵ်ႇသိုၵ်းမၢၼ်ႈ တိၺွပ်း ပေႃႉထုပ်ႉ ၶႃႈႁႅမ် ၸဵမ်ၸိူဝ်းၼႆႉ ။ ယွၼ်ႉၼၼ်လႄႈ ၼင်ႇႁိုဝ်ၵူၼ်းဝၢၼ်ႈႁဝ်း  ပေႃးတေမီးလွင်ႈ ႁူမ်ႇလူမ်ႈၼၼ်ႉ တေဢမ်ႇထုၵ်ႇၺႃးပေႃႉထုပ်ႉ ၶႃႈႁႅမ်ၼၼ်ႉ ၸင်ႇလႆႈႁူမ်ႈ ၸဝ်ႈၼႃႈတီႈ ၽူႈမီးပုၼ်ႈၽွၼ်း ၼႂ်းဝဵင်းသီႇပေႃႉသေ ႁဵတ်းဝႂ်ၵပ်းတူဝ်ပၼ် ” ဝႃႈၼႆ ။


ဝၼ်းတီႈ 8 ၼႆႉ ပဵၼ်ဝၼ်းၵဵပ်းသဵၼ်ႈသၢႆမၢႆ ႁဵတ်းဝႂ်ၵပ်းတူဝ် (မၢႆၽၢင်) ပီႈၼွင်ႉၵူၼ်းပၢႆႈၽေးသိုၵ်း သွင်တီႈ တီႈဝတ်ႉၽူဝ်းတေႃႇ 60 ၵေႃႉ ၊ ဝတ်ႉဝဵင်းၵဝ်ႇ 60 ၵေႃႉ ၊ ပဵၼ်ပီႈၼွင်ႉ ဝၢၼ်ႈၼႃးတေႃတင်း ဝၢၼ်ႈတိုင်းႁႆး ။ ဝၼ်းတီႈ 13 သမ်ႉ ပဵၼ်ဝၼ်းဢွၵ်ႇဝႂ်ၵပ်းတူဝ် (မၢႆၽၢင်) ပၼ် ။ ၵူၼ်းပၢႆႈၽေးၸိူဝ်းယူႇ တီႈဝတ်ႉၵျွင်းၶမ်းသမ်ႉ ယွၼ်ႉပဵၼ်ၶၢဝ်းၽုၵ်ႇသွမ်ႈၼႆႉလႄႈ ဢွၼ်ၵၼ်ပွၵ်ႈမႃးၶိုၼ်းႁိူၼ်းယေးၽႂ် မၼ်း  ဢမ်ႇတၼ်းႁဵတ်းယဝ်ႉတူဝ်ႈ ဝႃႈၼႆ ။


ၵူၼ်းဝၢၼ်ႈၸိူဝ်းၼႆႉ ဢိင်ၼိူဝ်သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်းတပ်ႉသိုၵ်းၸိုင်ႈတႆး မိူဝ်ႈၵၢင်လိူၼ်မေႊၼၼ်ႉလႄႈ လႆႈဢွၼ်ၵၼ်ပၢႆႈယၢၼ်ႁိူၼ်းယေးတီႈယူႇ ။