ဢိင်ၼိူဝ် တပ်ႉသိုၵ်းမၢၼ်ႈ ၽိုတ်ႉၶဝ်ႈဢိူမ်ႈၸမ် ငဝ်ႈငုၼ်းဝၢၼ်ႈႁႆး ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) သေ 2-3 ဝၼ်းမႃးၼႆႉ သွင်ပဵၼ်ပဵၼ်ပၢင်တိုၵ်းၵၼ် ႁၢဝ်ႈႁႅင်းလၢႆလၢႆတီႈ ။

ၼႂ်းဝၼ်းတီႈ 17/10/2015 (မိူဝ်ႈဝႃး) တပ်ႉသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်တင်းဝၼ်း ၊ ပဵၼ်ပၢင်တိုၵ်းၵၼ် 3 တီႈ ၊ ပဵၼ်ႁိမ်းဝၢၼ်ႈလူၺ် ၊ တၢင်းမိူင်းဢၢၵ်ႇ လႄႈတၢင်းၵုင်းမႆႉသီႇသႅၼ် ႁိမ်းလွႆလႃႇၵၢၼ်ႉ ။ ၼွၵ်ႈသေၼၼ်ႉ တၢင်းပွတ်းတၢင်ႉယၢၼ်းၵေႃႈ ပဵၼ်ပၢင်တိုၵ်းၵၼ် - ၼႆယဝ်ႉ ။


ပၢင်တိုၵ်း တီႈႁိမ်းဝၢၼ်ႈလူၺ်ၼႆႉ ပဵၼ်မႃးတင်ႈတႄႇမိူဝ်ႈဝၼ်းတီႈ 16/10/2015 (မိူဝ်ႈသိုၼ်း) တၢမ်းၶမ်ႈ ၊ တေႃႇထိုင်မိူဝ်ႈၼႆႉၵေႃႈ တိုၵ်ႉယိုဝ်းၵၼ်ယူႇ ၊ တီႈၼႆႈ လႆႈငိၼ်းဝႃႈၾၢႆႇသိုၵ်းမၢၼ်ႈ မီးလွင်ႈလူႉတၢႆဝၢတ်ႇတင်းၼမ် - ၼႆယဝ်ႉ ။


ဢိင်ၼိူဝ် တပ်ႉသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်သေ မိူဝ်ႈလဵဝ် မီးၵူၼ်းဝၢၼ်ႈၵူၼ်းမိူင်း ပၢႆႈၽေးသိုၵ်းၵႂႃႇပိုင်ႈႁူမ်ႈယူႇသဝ်းဝႆႉတီႈ ဝၢၼ်ႈသေႃႉမွၵ်ႈ 1,000 ၵေႃႉပၢႆ - ၼႆယဝ်ႉ ။


ပိူဝ်ႈတႃႇၵႄႈလိတ်ႈပၼ်ႁႃပၢင်တိုၵ်းၼႆႉ မိူဝ်ႈဝၼ်းတီႈ 16/10/2015 ၽူႈမီးပုၼ်ႈၽွၼ်း ၼႂ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၸဝ်ႈၼေႃႇလဵၵ်း တင်းၾၢႆႇလူင်ပွင်ၸိုင်ႈမၢၼ်ႈ ဢူးတဵင်းၸေႃႇ ႁူပ်ႉထူပ်းဢုပ်ႇဢူဝ်းၵၼ်ယူႇ - ၼႆယဝ်ႉ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ တင်းလူင်ပွင်ၸိုင်ႈမၢၼ်ႈ ၵေႃႇသၢင်ႈလွင်ႈငမ်းယဵၼ်ၵၼ်ဝႆႉ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ၵၼ်ဝႆႉလႆႈမႃးႁိမ်း 4 ပီ ။ ဢၼ်လႆႈပဵၼ်ပၢင်တိုၵ်းၵၼ်ပွၵ်ႈၵမ်းၼႆႉ ယွၼ်ႉၾၢႆႇ SSPP/SSA ဝႃႈ ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်းၼႆႉ ထုၵ်ႇလႆႈၶဝ်ႈပႃးၵူႈမူႇၵူႈၸုမ်း ။ ယွၼ်ႉဢမ်ႇပႃးၵူႈမူႇၵူႈၸုမ်းလႄႈ SSPP/SSA ဢမ်ႇယွမ်းလူင်းလၢႆးမိုဝ်း ။