သိုၵ်းမၢၼ်ႈ ပွႆႇမၢၵ်ႇလူင်ၸူး ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈ SSPP/SSA   ႁႅၼ်းသိုၵ်းလေႃႇ တိုၵ်းႁၢဝ်ႇႁႅင်းလႄႈ သွင်ၾၢႆႇပဵၼ်ပၢင်တိုၵ်းၵၼ် ဢမ်ႇထၢတ်ႇ တင်ႈတႄႇ မိူဝ်ႈဝႃး တေႃႇထိုင်မိူဝ်ႈၼႆႉ 17/10/2015 ။

သိုၵ်းမၢၼ်ႈ ႁႅင်းသိုၵ်း မွၵ်ႈ 300 တႂ်ႈငဝ်ႈငုၼ်းၵုမ်းၵမ် ၽႅၼ်ၵၢၼ်ယၼ်ႇသိုၵ်းမၢႆ 2 ဢၼ်လုၵ်ႉတၢင်း မိူင်းၼွင် ၶိုၼ်ႈမႃးၼၼ်ႉ လမ်ထိူၼ်သေ ၽုတ်းဢွၵ်ႇမႃးတၢင်းမိူင်းဢၢၵ်ႇ လေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး လႄႈသွင်ၾၢႆႇ ပဵၼ်ပၢင်တိုၵ်းၵၼ်ႁၢဝ်ႈႁႅင်း ။


“ တင်ႈတႄႇ 5 မူင်းတၢမ်းၶမ်ႈ ၊ တေႃႇတဵင်ႈၶိုၼ်း ၊ ၼႂ်ၼႆႉ ၵၢင်ၼႂ် 7 မူင်းတေႃႇယၢမ်းလဵဝ် တိုၵ်ႉယိုဝ်းၵၼ်ယူႇ ။ ယၢမ်းၵၢင်ၶိုၼ်းၵေႃႈ ယူႇလွႆၵိဝ်ႇမွၵ်ႇၶၢဝ်သေ ယိုဝ်းၸူးဝၢၼ်ႈႁႆး သွင်ၵမ်း ။ ယွၼ်ႉပၢင်တိုၵ်းလႄႈ ၵူၼ်းမိူင်း ႁူဝ်ပၢၵ်ႇၵေႃႈ ပၢႆႈၽေးသိုၵ်း မႃးမီးတီႈဝၢၼ်ႈသေႃႉ ” - ၼႆၽူႈၶၢၼ်ပၢၵ်ႇ တပ်ႉသိုၵ်းၸိုင်ႈတႆး SSPP/SSA ၸဝ်ႈသိုၵ်းလူင် ၸၢႆးလ လၢတ်ႈ ။


ပိူဝ်ႈတႃႇၵႄႈလိတ်ႈပၼ်ႁႃ ပၢင်တိုၵ်းၼႆႉ မိူဝ်ႈဝႃႈ 16/10/2015 ၸဝ်ႈၼေႃႇလဵၵ်း ပႃႇတီႇမႂ်ႇသုင် ၸိုင်ႈတႆး တင်း ၾၢႆႇလူင်ပွင်ၸိုင်ႈမၢၼ်ႈ ဢူးတဵင်းၸေႃႇ ႁူပ်ႉထူပ်းဢုပ်ႇဢူဝ်းၵၼ် ယူႇဝႃႈၼႆ ။


ပႃႇတီႇမႂ်ႇသုင်ၸိုင်ႈတႆးၼႆႉ ၵေႃႇသၢင်ႈလွင်ႈငမ်းယဵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်း ၊ ၸၼ်ႉမိူင်းႁူမ်ႈ တုမ်ဝႆႉ ။ ဢၼ်လႆႈပဵၼ်ပၢင်တိုၵ်းၼႆႉ ၾၢႆႇသိုၵ်းမၢၼ်ႈ မိပ်ႇငႅၼ်းႁႂ်ႈလူင်းလၢႆးမိုဝ်း NCA ၊ ၾၢႆႇ တပ်ႉသိုၵ်း ၸိုင်ႈ တႆး SSPP/SSA သမ်ႉယုမ်ႇယမ်ဝႃႈ ၵၢၼ်ၵိုတ်းတိုၵ်းတူဝ်ႈမိူင်းၼႆႉ တၵ်းလႆႈၶဝ်ႈပႃး ၵူႈမူႇၵူႈၸုမ်း ။ ဝႆႉၸုမ်းၼိုင်ႈ ၵိုတ်းၸုမ်းၼိုင်ႈတႄႉ ဢမ်ႇလႅပ်ႈၸိုဝ်ႈ ၵိုတ်းတိုၵ်းတူဝ်ႈမိူင်း ။ ပၢင်တိုၵ်းၵေႃႈ တေသိုပ်ႇပဵၼ် ယူႇ တိၵ်းတိၵ်းဝႃႈၼႆ ။