ပၢင်တိုၵ်းၼႂ်းၵႄႈ တပ်ႉသိုၵ်းၸိုင်ႈတႆး SSPP/SSA လႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်လႆႈပဵၼ်ၵႂႃႇ  တင်ႈတႄႇဝၼ်းတီႈ 6/10/2015 ၼၼ်ႉ ယွၼ်ႉပိူဝ်ႈ ၾၢႆႇတပ်ႉသိုၵ်းၸိုင်ႈတႆး SSPP/SSA တိုဝ်းၵမ် မူႇပိူင်ပေႃႇလသီႇ ဝႃႈ ၵူႈမူႇၵူႈၸုမ်းတၵ်းလႆႈလူင်းလၢႆးမိုဝ်း NCA ႁူမ်ႈၵၼ် ၼႆလႄႈ ၸင်ႇလႆႈပဵၼ်ပၢင်တိုၵ်း ၽူႈၶၢၼ်ပၢၵ်ႇ SSPP/SSA လၢတ်ႈ ။

ၸဝ်ႈႁၢၼ် ၸၢႆးလႃႉ ၽူႈၶၢၼ်ပၢၵ်ႇပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးလၢတ်ႈဝႃႈ - ပေႃးဝႃႈႁဝ်းၶႃႈမႃးတူၺ်းၶိုၼ်းၼႆႉ သင်ဝႃႈပၢင်ဢုပ်ႇဢူဝ်းၵၼ်ဢမ်ႇၶႅမ်ႉလႅပ်ႈၼႆၵေႃႈ ပဵၼ်ပၼ်ႁႃပၢင်တိုၵ်းတႃႇသေႇယဝ်ႉ ၊ မိူၼ်ၼင်ႇတေႃႇလဵဝ်ၼႆႉၵေႃႈ ယွၼ်ႉပိူဝ်ႈႁဝ်းၶႃႈ မွၵ်ႇလၢတ်ႈၼႂ်းပၢင်ၵုမ်ဝႃႈ ႁဝ်းၶႃႈ (SSPP/SSA) တိုဝ်းၵမ် ပေႃႇလသီႇ ဢၼ်ႁႂ်ႈလႆႈပႃးၵူႈၵေႃႉ (All Inclusive) ဢၼ်ၼႆႉလႄႈ သိုၵ်ႈမၢၼ်ႈၵေႃႈၸင်ႇႁၢင်ႈသိုၵ်းသေ လေႃႇတိုၵ်းႁဝ်းၶႃႈ ။


ၽူႈၵွၼ်းသၢႆသိုၵ်း ဢၼ်မီးၼႂ်းပၢင်တိုၵ်းၵေႃႉၼိုင်ႈတႄႉ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ - ပၢင်တိုၵ်းၼႆႉ ပဵၼ်မိူဝ်ႈဝၼ်းတီႈ 6/10/2015 ယၢမ်းၵၢင်ၼႂ် ႁိမ်းတႃႈၶၢမ်ႈၽင်ႇၼမ်ႉပၢင် ။


“ တီႈၼႂ်းပၢင်တိုၵ်းၼႆႉ မီးလွင်ႈမၢတ်ႇၸဵပ်းလုတၢႆယူႇ ထိုင်မႃးၵၢင်ၶမ်ႈၵေႃႈၶဝ်ဢမ်ႇယိုတ်းလႆႈ ပၢင်သဝ်းႁဝ်း။ ၶဝ်ယင်းဢဝ်ၵွင်ႈလူင်သေ ယိုဝ်းၶဝ်ႈယိုဝ်းၶဝ်ႈယူႇ ။ တီႈငဝ်ႈငုၼ်းဝၢၼ်ႈႁၢႆးႁဝ်းၶႃႈၼၼ်ႉၵေႃႈ လုၵ်ႉတၢင်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ ယလၶ ၶူဝ်လမ်သေ ထႅမ်ႁႅင်းသိုၵ်းၶဝ်ႈမႃးထႅင်ႈႁၢဝ်ႉႁၢဝ်ႉႁႅင်းႁႅင်း သိုၵ်ႈမၢၼ်ႈလုၵ်ႉတီႈၼိူဝ်လွႆသေ ဢဝ်ၵွင်ႈလူင်ယိုဝ်းသႂ်ႇတီႈတပ်ႉပၢင်သဝ်းႁဝ်းၶႃႈ ဢမ်ႇယွမ်းမွၵ်ႈ 10-20 လုၵ်ႈယဝ်ႉ ၼႆႉ ။


ၼႂ်းဝၼ်းတီႈ 6 ၼႆႉ ဢၼ်လႆႈပဵၼ်ပၢင်တိုၵ်းတၢင်းၼွင်ႉၶဵတ်ႇတႃႈသၢမ်ပူး ပၢင်တိုၵ်းၼႆႉပဵၼ်သွင်ၸုပ်ႈ ၾၢႆႇတပ်ႉသိုၵ်းမၢၼ်ႈ တၢႆ 7 ၵေႃႉ မၢတ်ႇၸဵပ်း 10 ပၢႆ ။


မိူဝ်ႈဝၼ်းတီႈ 7/10/2015 ၼၼ်ႉပဵၼ်ပၢင်တိုၵ်းထႅင်ႈ သွင်ၵမ်း ၊ ၶၢဝ်းယၢမ်းၵၢင်ၼႂ် 06:10-08:20 မူင်း ၵမ်းၼိုင်ႈ ၊ 12:30-13:30 မူင်း ထႅင်ႈၵမ်းၼိုင်ႈ ၊ ပၢင်တိုၵ်းလႆႈပဵၼ်တီႈၼႂ်းမိူင်းၸၢင် ၼႂ်းၸႄႈဝဵင်းမိူင်းသူႈ ယွၼ်ႉပိူဝ်ႈပဵၼ်ပၢင်တို်ၵ်းႁၢဝ်ႉႁႅင်းလႄႈ ၽူႈၵွၼ်းတပ်ႉၶလယ 295 လႄႈတင်းၽူႈၵွၼ်းတပ်ႉမူႉတပ်ႉၽေ ဝၢတ်ႇၸဵပ်းႁၢဝ်းႁႅင်းသွင်ၵေႃႉ တေႃႈလဵဝ်ၶဝ်သွင်ၵေႃႉၼႆႉ ဢဝ်တူဝ်ၵႂႃႇယူတ်းယႃဝႆႉတီႈႁူင်းယႃ တီႈၼႂ်းမိူင်းၸၢင် ဢၼ်မၢတ်ႇၸဵပ်းလႄႈလုတၢႆၵေႃႈမီးယူႇ ၵူၼ်းၼႂ်းပိုၼ်ႉတီႈလၢတ်ႈ ။


လိူဝ်သေၼၼ်ႉၵေႃႈ သိုၵ်းမၢၼ်ႈထႅမ်ႁႅင်းသိုၵ်းၶဝ်ႈမႃးဢဝ်တီႈယူႇ တၢင်းမိူင်းၸၢင် တပ်ႉၶမယ 520 ၊ ၶမယ 524 ၊ ၶရယ 117  မီးဝႆႉသီႇတပ်ႉၵွင် ႁႅင်းသိုၵ်း 300 ပၢႆ ၼႆယဝ်ႉ ။


ၽူႈလဵပ်ႈႁဵၼ်းၵၢၼ်သိုၵ်း / ၵၢၼ်မိူင်း ၵမ်ႈၽွင်ႈတႄႉလၢတ်ႈဝႃႈ တႃႇတေလူင်းလၢႆးမိုဝ်းၵိုတ်းတိုၵ်းပတ်ႉပိုၼ်ႉ တူဝ်ႈမိူင်းယင်းပႆႇတူဝ်ႈတၼ်းယဝ်ႉတူဝ်ႈလီလႄႈ ၶဝ်တေဢမ်ႇလဵပ်ႈၶႂ်ႈႁဵတ်း ပၢင်လိူၵ်ႈတင်ႈ ၸိူင်ႉၼင်ႇၶဝ်ပိုၼ်ၽၢဝ်ႇဝႆႉ ၊  ယွၼ်ႉပိူဝ်ႈၼၼ်လႄႈ ၶဝ်ၶႂ်ႈႁဵတ်းႁၢင်ႈၽၢင်ပဵၼ်ပၢင်တိုၵ်းသေ ၼင်ႇႁိုဝ်ပေႃးတေလႆႈၶၢႆႉ သုတ်ႉပၢင်လိူၵ်ႈတင်ႈ ။ ထႅင်ႈလွင်ႈၼိုင်ႈၵေႃႈ ၼႂ်းမိူင်းတႆးၼႆႉ ၼႃႈလိၼ်တွတ်ႈၶႅပ်းၵၢင်ၸႂ်ၵမ်ႈၼမ်ၼႆႉ ပႃႊတီႊတႆးလဵပ်ႈ တေပေႉ ယွၼ်ႉပိူဝ်ႈၼၼ်လႄႈ ၶဝ်တေဢမ်ႇပေႉယဝ်ႉၼႆ ၶဝ်ၵေႃႈႁဵတ်းႁၢင်ႈပၢင်တိုၵ်းသေ ၶႂ်ႈပိၵ်ႉပၢင်လိူၵ်ႈတင်ႈၵေႃႈၸင်ႈပဵၼ်လႆႈ ။


SSPP/SSA ၼႆႉ ပဵၼ်ၸုမ်းဢၼ်လႆႈပိုၼ်ၽၢဝ်ႇဝႆႉဝႃႈ ပေႃးပၢင်လူင်းလၢႆးမိုဝ်း ၵိုတ်းတိုၵ်းပတ်ႉပိုၼ်ႉတူဝ်ႈမိူင်းမႃး သင်ၸိူဝ်ႉဝႃႈ ၸုမ်း KIA ၊ ၸုမ်း KNPP ၊ ၸုမ်းပႃႊတီႊမွၼ်း လႄႈတၢင်ႇၸုမ်းတင်းမူတ်းလူင်းလၢႆးမိုဝ်း ၸင်ႇတေလူင်းလၢႆးမိုဝ်း ။ ၸုမ်း SSPP/SSA ၼႆႉ ယင်းပဵၼ်ၸုမ်းဢၼ်လႆႈႁဵတ်းၶေႃႈမၼ်ႈၵႅၼ်ႇၵၼ်တင်းလူင်ပွင်ၸိုင်ႈ တႃႇၵေႃႇသၢင်ႈလွင်ႈငမ်းယဵၼ် ၸၼ်ႉမိူင်းႁူမ်ႈတုမ် ၼႆယဝ်ႉ ။