ၸုမ်းၶၢဝ်ႇၽူႈတွႆႇႁွၵ်ႈ လႆႈႁူပ်ႉထူပ်းတွင်ႈထၢမ် ၼၢင်းမျႃႉဢူး ၼေႃႇၽူႈတႅၼ်း ပႃႊတီႊႁူဝ်သိူဝ် (SNLD) သၽႃးၸႄႈမိူင်း ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။ လႆႈႁပ်ႉၵႂၢမ်းတွပ်ႇ လွင်ႈတူဝ်ထူပ်းမၼ်းၼၢင်း ဢၼ်လႆႈၶဝ်ႈမႃး ၼႂ်းဝူင်းၵၢၼ်မိူင်းလႄႈ လွင်ႈယၢပ်ႇၽိုတ်ႇ လၢႆၸိူဝ်ႉလၢႆပိူင် ၼင်ႇၼႆ ။

ထၢမ် - ၵပ်းသိုပ်ႇပၼ်ဝႃႈ ပီႈၼၢင်းမျႃႉဢူး ႁပ်ႉပုၼ်ႈၽွၼ်းသင် ၼႂ်းပႃႊတီႊၶႃႈ ?။


တွပ်ႇ - ၸိုဝ်ႈႁွင်ႉဝႃႈ ၼၢင်းမျႃႉဢူး ။ မိူဝ်ႈတႄႇမႃးၶဝ်ႈ ႁပ်ႉပုၼ်ႈၽွၼ်းဝႆႉ ပဵၼ်လုၵ်ႈၸုမ်း ။ ထိုင်မႃးပီ 2013  ပဵၼ်ၽူႈဢွၼ်ႁူဝ် ဢွင်ႈတီႈၼၢင်းယိင်း ။ မိူဝ်ႈလဵဝ် မႃးပဵၼ်ၽူႈၼမ်းၼႂ်း ၵေႃႉထီႉ 3 ၼႂ်းလုမ်းၽႄ ၸုမ်းႁူဝ်သိူဝ် ။


ထၢမ် - ၵၢၼ်လိူၵ်ႈတင်ႈပီ 2015 ၼႆႉ တေၶဝ်ႈၶေႉၼႂ်းသၽႃး ဢၼ်လႂ်ၶႃႈ ?။


တွပ်ႇ - တေၶဝ်ႈၶေႉၼႂ်းသၽႃးၸႄႈမိူင်း ဝဵင်းတူၼ်ႈတီး ၊ ၶဵတ်ႇလိူၵ်ႈတင်ႈမၢႆ 1 ။


ထၢမ် - လၢတ်ႈၼႄပၼ်ပိုၼ်းၵႅပ်ႈ ဢိတ်းၼိုင်ႈၶႃႈ ?။


တွပ်ႇ - ၸႃႇတိၵိူတ်ႇတီႈဝၢၼ်ႈပၢင်ငႃႉ ၸႄႈဝဵင်းမိူင်းသူႈ ။ မႃးယူႇၼႂ်းဝဵင်းမိူင်းသူႈသေ ယႂ်ႇတီႈမိူင်းသူႈ ၊ ၶဝ်ႈႁူင်းႁဵၼ်း တီႈမိူင်းသူႈ ၊ ထိုင်ၸၼ်ႉ 9 ။ ဢွင်ႇပူၼ်ႉၸၼ်ႉ 9 ယဝ်ႉ မႃးၶိုၼ်ႈၸၼ်ႉ 10 တီႈဝဵင်းတူၼ်ႈတီး ၊ မႃးလႆႈႁပ်ႉၶူးဝႆႉတီႈ ၸၼ်ႉၸွမ်တူၼ်ႈတီး ၊ မိူဝ်ႈလဵဝ်တႄႉ မီးၼႃႈႁိူၼ်း မီးလုၵ်ႈလၢင်း 3 ၵေႃႉယဝ်ႉ ။


ထၢမ် - မိူဝ်ႈလဵဝ်ၵေႃႈ ယူႇတူၼ်ႈတီးၵူၺ်းၶႃႈႁႃႉ ?။


တွပ်ႇ - ယူႇတူၼ်ႈတီးၵူၺ်း ၊ ၸဵမ်မိူဝ်ႈ 1985-86 ၶၢဝ်းတၢင်းမီး 30 ပီပၢႆယဝ်ႉ ။


ထၢမ် - မိူဝ်ႈပႆႇမႃးၶဝ်ႈၵၢၼ်မိူင်းၼႆႉ ၸွင်ႇယၢမ်ႈႁဵတ်းၵၢၼ်တူင်ႇဝူင်းၵူၼ်း မႃးယူႇၶႃႈႁႃႉ ?။


တွပ်ႇ - ၵၢၼ်တူင်ႇဝူင်းၵူၼ်းၼႆႉ ယၢမ်ႈႁဵတ်းမႃးၼမ်ယူႇ ၊ ၸဵမ်မိူဝ်ႈပီ 2005-6 ၵေႃႈ လႆႈၸွႆႈထႅမ်တီႈၵေႃလိၵ်ႈလၢႆး ဝဵင်းတူၼ်ႈတီး ။ မိူဝ်ႈတႄႇမၼ်းတႄႉ ပဵၼ်ၽူႈဢွၼ်ႁူဝ်ယိင်းၼုမ်ႇၸၢႆးၼုမ်ႇၶဝ်သေ မႃးပဵၼ်ၵႅမ်ၽူႈၼမ်းၼႂ်း ၊ လႆႈၸွႆႈမႃးၶၢဝ်းတၢင်း 5 ပီ ။ ၵၢၼ်တူင်ႇဝူင်းၵူၼ်းထႅင်ႈဢၼ်ၼိုင်ႈ ၼမ်ႉၶူင်း ။ မိူဝ်ႈၼၼ်ႉတႄႉ ပႆႇပဵၼ်ၼမ်ႉၶူင်းၸိူင်ႉၼႆ ၊ တိုၵ်ႉပဵၼ်ၼမ်ႉၶူင်း လုၵ်ႈဢွၼ်ႇၼုမ်ႇၵူၺ်း ၊ လုၵ်ႈဢွၼ်ႇၵေႃႈမီးဢေႇသေ မႃးၸွႆႈၶဝ်ႁဵတ်းၼမ်ႉၶူင်း ၊ ၼၼ်ႉၵေႃႈလႆႈၸွႆႈမႃး ။ သမ်ႉထႅင်ႈ ၸုမ်းၼၢင်းယိင်း ၼၢင်းသုၸႃႇတႃႇ ၼၢင်းၵလျႃႇ ၊ တေလႆႈဝႃႈၸုမ်းၽႃသႃၵေႃႈၸႂ်ႈ ၊ ၵၢၼ်တူင်ႇဝူင်းၵူၼ်းၵေႃႈ ႁဵတ်းပႃးဢိတ်းဢိတ်း ၊ တီႈၼၼ်ႈၵေႃႈပဵၼ်ၽူႈၼမ်းၼႂ်း ။ သမ်ႉလႆႈၸွႆႈမႃး ၸဵမ်မိူဝ်ႈပၢၼ် (ဢမျူဝ်းတမီးယေးယႃႇ) ၸုမ်းၼၢင်းယိင်း တီႈၸႄႈဝဵင်းတူၼ်ႈတီးၵေႃႈ လႆႈႁဵတ်းမႃး ၊ ပဵၼ်ၵူၼ်းဢွၼ်ႁူဝ် ၼမ်းၼႃႈၾၢႆႇၸၢဝ်းၶိူဝ်း ။ ၵၢၼ်တူင်ႇဝူင်းၵူၼ်းၼႆႉ ၸွႆႈမႃးၼမ် ။ လွင်ႈဝတ်ႉ / ၵျွင်းၵမ်ႇမထၢၼ်းၸိူဝ်းၼႆႉၵေႃႈ လႆႈပဵၼ်ၽူႈၶဝ်ႈၸုမ်းပႃး ၊ မိူဝ်ႈၵေႃႇသၢင်ႈၸိူဝ်းၼၼ်ႉၵေႃႈ လႆႈၸွႆႈမႃးတင်းၼမ် ။


ထၢမ် - ပေႃးၸိူင်ႉၼၼ် ၵွပ်ႈသင်လႄႈ လႆႈၶဝ်ႈမႃးၼႂ်းပႃႊတီႊၵၢၼ်မိူင်းၶႃႈ ?။


တွပ်ႇ - ႁဝ်းႁဵတ်းၵၢၼ်တူင်ႇဝူင်းၵူၼ်းၼႆႉ ၶၢဝ်းတၢင်းမၼ်းပေႃးမီး 10 ပီပၢႆယဝ်ႉ ၊ ႁဵတ်းမႃးယဝ်ႉၵေႃႈ မႃးဝူၼ်ႉမႅၼ်ႈဝႃႈ ႁဝ်းပဵၼ်တႆး ။ ႁဝ်းမႃးႁၼ်တွၼ်ႈသွၼ် လဵပ်ႈႁဵၼ်းႁၼ် ပိူၼ်ႈလႆႈပၼ်မိူင်းႁဝ်းၵႂႃႇ တီႈတၢင်ႇၸၢဝ်းၶိူဝ်း ။ ၶေႃႈထီႉ 1 ၼႆႉ မိူင်းလၵ်းမိူင်းႁဝ်း ႁဝ်းလႆႈၸႅၵ်ႇပၼ်ပိူၼ်ႈၵႂႃႇၼႆႉ ယွၼ်ႉပိူဝ်ႈသင်ၼႆ မီးၶေႃႈထၢမ်ၼႂ်းတူဝ်ၸဝ်ႈၵဝ်ႇ ။ ဝၢႆးမႃး လႆႈဢၢၼ်ႇလႆႈလူလိၵ်ႈသေ လႆႈၵႂႃႇႁၼ်ဝႃႈ ပိူင်ငဝ်ႈပိုင်းမိူင်း (လၵ်းမိူင်း) 2008 ၊ မိူဝ်ႈၼၼ်ႉ လူဢၢၼ်ႇယူႇၵေႃႈ ပႆႇပေႃးပွင်ႇၸႂ်လီ ။


မိူဝ်ႈၼၼ်ႉ ႁဝ်းမႃးဝူၼ်ႉမႅၼ်ႈထႅင်ႈၶေႃႈၼိုင်ႈ ၊ မိူၼ်ၼင်ႇၽူႈဢွၼ်ႁူဝ်တႆးႁဝ်း 4-5 ၵေႃႉၼႆႉ လႆႈတူၵ်းၶွၵ်ႈၵႂႃႇ ႁူဝ်ပီမၼ်း ၼိုင်ႈၵေႃႉ 90 ပီပၢႆ၊ 100 ပၢႆၸိူဝ်းၼႆႉ ။ ႁဵတ်းသင်လႄႈ ႁဝ်းလႆႈပဵၼ်ၸိူင်ႉၼၼ် လႆႈမီးၼႂ်းမၢၵ်ႇႁူဝ်ၸႂ်ဝႆႉ ။ ၽိူဝ်ႇမႃးဝူၼ်ႉတူၺ်းထႅင်ႈၾၢႆႇၼိုင်ႈၵေႃႈ ႁဝ်းႁဵတ်းၵၢၼ်တူင်ႇဝူင်းၵူၼ်းၼႆႉ မၼ်းဢမ်ႇပေႃးထိုင်တီႈမၼ်း ၊ ၶိုၼ်းမႃးထတ်းသၢင်တူဝ်ၸဝ်ႈၵဝ်ႇဝႃႈ ပေႃးႁဝ်းႁဵတ်းၵၢၼ်မိူင်းယဝ်ႉ လႆႈမႄးပၵ်းပိူင်လၵ်းမိူင်း 2008 ယဝ်ႉ ၸင်ႇတေထိုင်တီႈမၼ်း ၊ လႄႈႁဝ်းလႆႈပၼ်ၸိုဝ်ႈၵႂႃႇ ။ တူဝ်ၸဝ်ႈၵဝ်ႇလႆႈလဵပ်ႈႁဵၼ်းႁူႉဝႃႈ ပေႃးဢမ်ႇမႄးဢၼ်ၼႆႉ ႁဝ်းတေဢမ်ႇၸၢင်ႈသိုပ်ႇၵႂႃႇတၢင်းၼႃႈ ၊  ဢၼ်ၼႆႉမႃးပဵၼ်ထီႉၼိုင်ႈသေ တူဝ်ၸဝ်ႈၵဝ်ႇထုၵ်ႇလႆႈၶဝ်ႈ ႁဵတ်းၵၢၼ်ပၢႆးမိူင်း ။


သမ်ႉထႅင်ႈ မိူဝ်ႈႁဝ်းလဵၵ်ႉၼႆႉ ႁဝ်းလႆႈထူပ်းမႃးၼၼ်ႉ ႁဝ်းယူႇဝၢၼ်ႈၼွၵ်ႈၼႃးပၢင်ႇ ၊ ႁူင်းႁဵၼ်းၵေႃႈႁဝ်းဢမ်ႇမီး ၊ တူဝ်ၸဝ်ႈၵဝ်ႇၵေႃႈ လႆႈမႃးၶိုၼ်ႈႁူင်းႁဵၼ်းတီႈဝဵင်းလူင် တီႈၼႆႈ ။ ၵူၺ်းၵႃႈ ပိူၼ်ႈတႄႉလႆႈသွၼ်ႁဵၼ်းပၺ်ၺႃ ၊ ႁဝ်းသမ်ႉဢမ်ႇလႆႈသွၼ်ႁဵၼ်းလီလီၼႆ ပဵၼ်ဢၼ်ဝူၼ်ႉမႅၼ်ႈလွင်ႈၼိုင်ႈ ။ မိူင်းႁဝ်းၼႆႉ တီႈဝၢၼ်ႈမႄႈႁဝ်းယူႇ ဝၢၼ်ႈႁူၺ်ႈႁိူဝ်းၼႆႉ သိုၵ်းမၢၼ်ႈသမ်ႉပၵ်းဝႆႉယူႇ ၊ ၵူၺ်းၵႃႈ ႁူင်းႁဵၼ်းႁဝ်းသမ်ႉဢမ်ႇမီး ၊ ႁူင်းယႃႁဝ်းၵေႃႈဢမ်ႇမီး ၊ ပေႃးသိုၵ်းမီးလႆႈ ၸိူဝ်းၼႆႉၵေႃႈတေလႆႈမီး ။ ၼႆႉၵေႃႈပဵၼ်တွၼ်ႈသွၼ်မႃးဝႃႈ ႁဝ်းဢမ်ႇလႆႈလွင်ႈၽဵင်ႇပဵင်းၸိူင်ႉပိူၼ်ႈ ။ ၸိူဝ်းၼႆႉပဵၼ်ၶေႃႈထတ်းသၢင်သေ လႆႈၶဝ်ႈမႃး ။


ထၢမ် - ပေႃးၼၼ် ဢၼ်ႁႄႉၵင်ႈၼႆႉ ပဵၼ်ပိူင်ငဝ်ႈပိုင်းမိူင်း 2008 ၶႃႈႁႃႉ ?။


တွပ်ႇ - ၸႂ်ႈယဝ်ႉ ။ ပေႃးဝႃႈမူၼ်ႉမႄးလႆႈ ပဵၼ်ပိူင်ငဝ်ႈပိုင်းမိူင်း 2008 ၼႆႉတႄႉ ၽဝႁဝ်းၵေႃႈတေလီမႃး ။ မိူဝ်ႈတႄႇမၼ်းတႄႉ လူဢၢၼ်ႇယူႇၵေႃႈဢမ်ႇပေႃးပွင်ႇၸႂ် ၊ ၵူၺ်းၵႃႈ လႆႈၵႂႃႇၶိုၼ်ႈႁဵၼ်းမႃးသေ ၼႆႉပဵၼ်ပိူင်လူင်မၼ်းယဝ်ႉၼႆၵေႃႈ လႆႈႁူႉမႃး ။ မိူၼ်ၼင်ႇ ပေႃးႁူင်းႁဵၼ်းႁဝ်းဢမ်ႇမီး ၊ သဵၼ်ႈတၢင်းႁဝ်းဢမ်ႇမီး ၊ ၾႆးၾႃႉႁဝ်းဢမ်ႇလီၸိူဝ်းၼႆႉ ပဵၼ်ဢၼ်ယူပ်ႈယွမ်းလၢႆလၢႆ ၸင်ႇၵွႆႈႁူႉမႃး ။


ထၢမ် - ပေႃးဝႃႈပေႉပၢင်လိူၵ်ႈတင်ႈ ၊ ၶဝ်ႈၼႂ်းသၽႃးယဝ်ႉ ဢွၼ်တၢင်းသုတ်း ၶႂ်ႈႁဵတ်းသင်ၶႃႈ ?။


တွပ်ႇ - ႁဝ်းၼႆႉ ပဵၼ်သၽႃးၸႄႈမိူင်း ၊ ဢမ်ႇႁဵတ်းလႆႈမိူၼ် သၽႃးတၢင်ႇဢၼ်သေတႃႉၵေႃႈ ယိူင်းမၢႆႁဝ်းတႄႉ တေၶႂ်ႈမႄး ပိူင်ငဝ်ႈပိုင်းမိူင်း ။ ပေႃးပေႉမႃး ႁဝ်းတူၺ်းၵူၼ်းႁဝ်း ဢၼ်ၵႂႃႇမီးၼႂ်းသၽႃးၸႄႈမိူင်း ၊ သၽႃးၸိူဝ်ႉၸၢတ်ႈၸိူဝ်းၼႆႉသေ ႁူမ်ႈၵၼ်မႄးဢၼ်ၼႆႉ ဢွၼ်တၢင်းပိူၼ်ႈ ။ ဢၼ်ႁဝ်းၶႂ်ႈႁဵတ်းပၼ် ၼႂ်းဝၢၼ်ႈမိူင်းမိူင်းတႆးႁဝ်းၼႆႉ မိူၼ်ၼင်ႇဢၼ်ပဵၼ်ၽေးသိုၵ်းႁိုဝ်ႉ ၊ ပၢႆးပၺ်ၺႃပႆႇတဵမ်ထူၼ်ႈႁိုဝ်ႉ ၊ ဢၼ်တေလႆႈႁဵတ်းပၼ်ၼႆႉ မၼ်းၼမ်ၼႃႇ ။ ၵူၺ်းၵႃႈ ဢၼ်မႃးမတ်ႉတိၼ်မတ်ႉမိုဝ်းႁဝ်း သမ်ႉပဵၼ်ဢၼ်ၼႆႉ (ပိူင်ငဝ်ႈပိုင်းမိူင်း 2008) ၵႃႈႁဝ်းပႆႇၵႄႈလိတ်ႈလႆႈဢၼ်ၼႆႉ ႁဝ်းပႆႇၸၢင်ႈႁဵတ်းသင် တဵမ်တဵမ်ထူၼ်ႈထူၼ်ႈ ။


ထၢမ် - ပႃႊတီႊတႆး မီး 2 ဢၼ် ၊ ၵွပ်ႈသင် သမ်ႉလႆႈမႃးၶဝ်ႈ ၼႂ်းပႃႊတီႊႁူဝ်သိူဝ်ၼႆႉၶႃႈ ?။


တွပ်ႇ - မိူဝ်ႈသိူဝ်ၽိူၵ်ႇတႄႇၶွတ်ႇၽွတ်ႈပႃႊတီႊၼၼ်ႉ ပီႈၶဝ်လႆႈၵႂႃႇယူႇ ။ ၵူၺ်းၵႃႈမိူဝ်ႈၼၼ်ႉ ႁဝ်းသမ်ႉမီးဝႆႉၼႂ်းၵေႃလိၵ်ႈလၢႆး ၊ မိူဝ်ႈၼၼ်ႉ သမ်ႉတိုၵ်ႉႁၵ်ႉၵေႃလိၵ်ႈလၢႆး ၊ လႆႈဢွၼ်ႁူဝ် ၵူၼ်းၼုမ်ႇၼႂ်းၵေႃလိၵ်ႈလၢႆးတူၵ်းသူးၸိူဝ်းၼႆႉ ၊ မိူဝ်ႈၼၼ်ႉ လုၵ်ႈလၢင်းႁဝ်းၵေႃႈတိုၵ်ႉလဵၵ်ႉ ။ လွင်ႈပၢႆးမိူင်းၵေႃႈ ႁဝ်းပႆႇပွင်ႇၸႂ်လီ ၊ တိုၵ်ႉလဵပ်ႈႁဵၼ်းၵူၺ်းလႄႈ ဢမ်ႇပႆႇပဵၼ်ၶဝ်ႈ ။ မိူဝ်ႈၼၼ်ႉ ပဵၼ်ၶၢဝ်းဢၼ် ပေႃးႁဝ်းႁဵတ်းၵၢၼ်မိူင်း ၵႂႃႇႁဵတ်းၵေႃလိၵ်ႈလၢႆးၵေႃႈ ၵူၼ်းတီႈၵေႃလိၵ်ႈလၢႆးၵေႃႈတေၵူဝ် ၊ ၵွပ်ႈၼၼ် ပႆႇပဵၼ်ၶဝ်ႈမႃး ။


ပေႃးဝႃႈပႃႊတီႊသိူဝ်ၽိူၵ်ႇတႄႇတင်ႈၵႂႃႇယဝ်ႉ ႁဝ်းၵေႃႈမႃးတင်ႈၸုမ်းၵူၼ်းၼုမ်ႇ (Shan Youth Organization) ၵေႃႈ မႃးပဵၼ်ႁူဝ်ပဝ်ႈ ။ ၵမ်းၼၼ်ႉမႃးထတ်းသၢင်ထႅင်ႈ ။ ပႃႊတီႊႁူဝ်သိူဝ်ၵေႃႈ မႃးပိုတ်ႇလုမ်းတီႈတူၼ်ႈတီးယဝ်ႉ ၊ ၵမ်းၼႆႉတႄႉ တေပဵၼ်ဢၼ်သၢင်ႇထုၵ်ႇယဝ်ႉ ၼႆသေလႆႈမႃးၶဝ်ႈ ။


ထၢမ် - ၵွပ်ႈသင် ပႃႊတီႊႁူဝ်သိူဝ် သမ်ႉသၢင်ႇထုၵ်ႇၶႃႈ ?။


တွပ်ႇ - မႅၼ်ႈမိူဝ်ႈတူဝ်ႈတၼ်းဝႆႉလႄႈသၢင်ႇထုၵ်ႇ ၊ ပႃႊတီႊႁူဝ်သိူဝ်ၼႆႉ မိူဝ်ႈတႄႇမႃးပိုတ်ႇလုမ်းၵေႃႈ ဢဵၼ်ႁႅင်းၵူၼ်းဢေႇဝႆႉ ။ လုင်းၶုၼ်ၶဝ်လႆႈၵႂႃႇတူၵ်းၶွၵ်ႈမႃးသေ ပီႈၼွင်ႉတႆးႁဝ်းၼႆႉ ဢၼ်ၵႂႃႇမီးၼႂ်းပႃႊတီႊသၢင်ႇသီႈၵေႃႈမီး ၊ မႃးတူၺ်းပႃႊတီႊသိူဝ်ၽိူၵ်ႇၵေႃႈ ဢဵၼ်ႁႅင်းယႂ်ႇဝႆႉ ။ ၵမ်းၼႆႉ ပႃႊတီႊႁူဝ်သိူဝ်တီႈၼႆႈသမ်ႉ ၾၢႆႇၼိုင်ႈၵေႃႈၵူၼ်းၸွႆႈမၼ်း ဢမ်ႇပေႃးမီး ။ လႆႈမႃးလူဢၢၼ်ႇတူၺ်း လၵ်းၵၢၼ် / ပိုၼ်း ႁူဝ်သိူဝ် တင်းသိူဝ်ၽိူၵ်ႇသေ ႁူဝ်သိူဝ်သမ်ႉယိပ်းၵမ်ဝႆႉ ၼမ်ႉၸႂ်ပၢင်လူင်သေ ႁၼ်ထိုင်ဝႃႈဢၼ်ၼႆႉ သၢင်ႇထုၵ်ႇလႄႈလႆႈၶဝ်ႈမႃးႁဵတ်း ။


ထၢမ် - လၢတ်ႈၼႄတူဝ်ထူပ်း မိူဝ်ႈၵႂႃႇလူင်းသူၼ်းတုမ် ၸိူဝ်းၼၼ်ႉ ဢိတ်းၼိုင်ႈၶႃႈ ?။


တွပ်ႇ - ဝဵင်းတူၼ်ႈတီးၼႆႉ ႁူဝ်ၵူၼ်းတႆးႁဝ်းဢမ်ႇမီးၼမ် ၊ သမ်ႉမႃးၸႅၵ်ႇ ၶဵတ်ႇလိူၵ်ႈတင်ႈမၢႆ 1-2 ။ မႃးထတ်းသၢင်တူၺ်း ဝဵင်းတူၼ်ႈတီးၼႆႉ ထီႉၼိုင်ႈ ၸၢဝ်းၶိူဝ်းမၢၼ်ႈၼမ် ၊ ထီႉသွင် ပီႈၼွင်ႉပဢူဝ်း ၊ ထီႉသၢမ် ၸင်ႇပဵၼ်ပီႈၼွင်ႉတႆးႁဝ်း ။ ပီႈၼွင်ႉတႆးၵမ်ႈၽွင်ႈၼႆႉ ၸိုဝ်ႈတူဝ်ၵဝ်ႇပႃးဢမ်ႇပႃး ၼႂ်းၽူႈမီးသုၼ်ႇတွတ်ႈၶႅပ်းၵၢင်ၸႂ်ၼၼ်ႉ ယင်းဢမ်ႇႁူႉ ၊ ပေႃးဢမ်ႇပႃးၸိုဝ်ႈ ဢမ်ႇမီးသုၼ်ႇလႆႈတွတ်ႈၶႅပ်းၸိူဝ်းၼႆႉ ယင်းဢမ်ႇႁူႉ ။ ၵွပ်ႈၼႆ ဢၼ်ႁဝ်းတေလႆႈပၼ်တၢင်းႁူႉၼႆႉ မီးထႅင်ႈတင်းၼမ် ၊ ၸိူဝ်းၼႆႉ လႆႈမီးတူဝ်ထူပ်းမႃး ၊ ပဵၼ်ၶၢဝ်းယၢမ်းလူင်းၵဵပ်းၶေႃႈမုလ်းမၼ်းၵူၺ်း ၊ ယင်းပႆႇၸႂ်ႈၶၢဝ်းယၢမ်းလူင်းသူၼ်းတုမ် ။ ယႃႇပေဝႃႈ သူၶႂ်ႈလႆႈသင် ၶႂ်ႈပဵၼ်သင် ၊ တေႃႈၸိုဝ်ႈသဵင်ၶဝ်ၼႆႉ ပေႃးဝၼ်းတီႈ 27 ၵူၺ်း ပိူၼ်ႈပေႃးတေပိၵ်ႉဢိုတ်းယဝ်ႉၼႆ တႃႇတေၵႂႃႇတူၺ်းၵူၺ်းၵေႃႈ ၶဝ်ယင်းပႆႇႁူႉတီႈပွင်ႇမၼ်း ။


ထၢမ် - မိူဝ်ႈလဵဝ် ၵူၼ်းမိူင်းသမ်ႉၶႂ်ႈလႆႈတၢင်းၸွႆႈထႅမ်သင်လၢႆလၢႆ ၊ သမ်ႉၶႂ်ႈပဵၼ်သင်ၶႃႈ ။


တွပ်ႇ - ယႃႇပေႁႂ်ႈပဵၼ်သိုၵ်း ၊ ယႃႇႁႂ်ႈပိူၼ်ႈမႃးၵဵပ်းသိုၵ်း ၊ ၶႂ်ႈယူႇငၢႆႈလူမ်ၸႂ် ။ တၢင်ႇၸၢဝ်းၶိူဝ်းၵေႃႈ ယႃႇပေႁႂ်ႈလႆႈမႃးပေႉၵိၼ်ၶဝ် ၸိူဝ်းၼႆႉပဵၼ်ပိူင်လူင် ။ ႁၢၼ်ႉတေႃႇမိူဝ်ႈလဵဝ် မၢင်တီႈၵေႃႈဢမ်ႇမီးဝႂ်ၵပ်းတူဝ် (မၢႆၾၢင်) ၊ ၵမ်ႈၼမ်ၵေႃႈ သမ်ႉလႆႈၵႂႃႇႁဵတ်းၵၢၼ်မိူင်းထႆး ၊ ၵူၼ်းၸိူဝ်းၵႂႃႇႁဵတ်းၵၢၼ်မိူင်းထႆးၼႆႉ ပေႃးပွၵ်ႈမႃး ၶဝ်တေယူႇတီႈလႂ် ။ မိူဝ်ႈလဵဝ်ၼႆႉ တႃႇတေပွၵ်ႈမႃး တွတ်ႈၶႅပ်းၵၢင်ၸႂ်ၼႆႉၵူၺ်းၵေႃႈ ထူပ်းတၢင်းယၢပ်ႇၽိုတ်ႇ၊ ၵမ်ႈၽွင်ႈ ဢမ်ႇလႆႈဝႂ်ၽၢတ်ႊသပွတ်ႊသေၵႂႃႇၵေႃႈမီး ။ မိူဝ်ႈလဵဝ် ဢၼ်လႆႈၵႂႃႇႁၼ်တူဝ်ထူပ်းၼၼ်ႉ မၢင်တီႈၾႆးၾႃႉၵေႃႈပႆႇမီး ၊ လွင်ႈၼမ်ႉၵေႃႈၵပ်ႉၵိၼ်းၶၢၼ်ၸႂ် ။


(ပႂ်ႉသိုပ်ႇဢၢၼ်ႇထႅင်ႈတွၼ်ႈ 2 ၶႃႈ)