ႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸွမ်သိုၵ်းယွတ်ႈသိုၵ်း လၢတ်ႈဝႃႈ လူင်းလၢႆးမိုဝ်း NCA ပဵၼ်ပိူဝ်ႈတႃႇ ၵႄႈလိတ်ႈပၼ်ႁႃၵၢၼ်မိူင်း ။

မိူဝ်ႈဝၼ်းတီႈ 08/10/2015 ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႆႈၸတ်းႁဵတ်းပၢင်သပ်းၸႅင်ႈၶၢဝ်ႇလႄႈ မီးၽူႈသိုဝ်ႇၶၢဝ်ႇလၢႆၸုမ်း ၶဝ်ႈႁူမ်ႈ ။ တီႈပၢင်သပ်းၸႅင်ႈၶၢဝ်ႇၼၼ်ႉ ၸွမ်သိုၵ်းယွတ်ႈသိုၵ်း လၢတ်ႈဝႃႈ - ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ပဵၼ်ပိူဝ်ႈတႃႇ ၵႄႈလိတ်ႈပၼ်ႁႃၵၢၼ်မိူင်း ။ မိူဝ်ႈလဵဝ် တိုၵ်ႉမီး 8 ၸုမ်းၵူၺ်း ၊ ႁႂ်ႈၵိုင်ႇတင်း ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းၸိုင်ႈမိူင်းႁူမ်ႈတုမ်မၢၼ်ႈ ထုၵ်ႇလႆႈၶဝ်ႈႁူမ်ႈပႃးၵူႈၸုမ်း ။


ႁူဝ်ပဝ်ႈ RCSS/SSA လၢတ်ႈၼႄ တီႈၽူႈသိုဝ်ႇၶၢဝ်ႇၶဝ်ဝႃႈ - ဢၼ်လႆႈၸတ်းပၢင်သပ်းၸႅင်ႈၶၢဝ်ႇၼႆႉ ပဵၼ်ၵွပ်ႈပိူဝ်ႈ ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) တႃႇတေလူင်းလၢႆးမိုဝ်း NCA ဝၼ်းတီႈ 15/10/2015 ၼႆႉ။ ႁဝ်းႁၼ်ဝႃႈ NCA ၼႆႉ မၼ်းပဵၼ်ပိူဝ်ႈတႃႇတေၵႄႈပၼ်ႁႃၵၢၼ်မိူင်း ။ ႁဝ်းတုၵ်းယွၼ်းလူင်ပွင်ၸိုင်ႈၼႆႉ ၽွင်းယၢမ်းႁဝ်းဢုပ်ႇဢူဝ်းယူင်ႉၶၢပ်ႈၵၢၼ်မိူင်းၵၼ် ၊ ၵိုတ်းသိုၵ်းၵၼ်ယဝ်ႉၼၼ်ႉ ဢမ်ႇၶႂ်ႈႁႂ်ႈတပ်ႉသိုၵ်းမၢၼ်ႈ ၵႂႃႇသွၵ်ႈႁႃလမ်းယိုဝ်းၵူၼ်းႁဝ်း ၸိူဝ်းမီးယူႇၼႂ်းထိူၼ်ႇၼႂ်းၶိူဝ်း ၼႂ်းၸႄႈဝဵင်းၼႂ်းမိူင်းတႆးၵူႈတီႈတီႈ ။ မီးပၼ်ႁႃသင်ၵေႃႈ ၶႂ်ႈႁႂ်ႈဢုပ်ႇဢူဝ်းၵၼ် ၊ ယဝ်ႉၵေႃႈလုမ်းၵပ်းသၢၼ်ၼၼ်ႉ ၶႂ်ႈႁႂ်ႈဝႆႉလမ်ႇလွင်ႈသေ ႁႂ်ႈလႆႈပိုတ်ႇၵႂႃႇထႅင်ႈၼမ်ၼမ် ၊ မၼ်းတေၵႄႈပၼ်ႁႃလႆႈ ။


NCA ၼႆႉ ပေႃးလူင်းလၢႆးမိုဝ်းၵႂႃႇယဝ်ႉ ၶႂ်ႈႁႂ်ႈသၢင်ႈလွင်ႈယုမ်ႇယမ်ၵၼ် ၊ မီးသင်ၵေႃႈဢုပ်ႇၵၼ် ၊ ဢၼ်ၼႆႉလမ်ႇလွင်ႈသေပိူၼ်ႈ ။ NCA ၼႆႉ ႁႂ်ႈမၼ်းၵိုင်ႇ NCA ၊ မိူဝ်ႈလဵဝ်ၼႆႉ တိုၵ်ႉမီး 8 ၸုမ်းၵူၺ်း ၊ ဢၼ်ၵိုတ်းၸိူဝ်းၼၼ်ႉၵေႃႈ ၶႂ်ႈႁႂ်ႈၶဝ်ႈမႃးႁူမ်ႈ ၵူႈၸုမ်းၸုမ်း ၼႂ်းမိူင်းႁူမ်ႈတုမ်မိူင်းမၢၼ်ႈၼႆႉ ၊ ႁႂ်ႈၵိုတ်းသိုၵ်းမိူၼ်ၵၼ်မူတ်း ။ ၵိုတ်းသိုၵ်းၸုမ်းၼိုင်ႈသေ ဢဝ်ဢဵၼ်ႁႅင်းသိုၵ်း ၵႂႃႇတိုၵ်းယိုဝ်းမင်ထႅင်ႈ ၸုမ်းၼိုင်ႈၼၼ်ႉ ႁဝ်းဢမ်ႇၶႂ်ႈႁႂ်ႈပဵၼ် ၊ လွင်ႈၼၼ်ႉ ႁဝ်းဢမ်ႇပၼ်ႁႅင်း ၊ ႁဝ်းဢမ်ႇႁၼ်လီ ၊ ၶႂ်ႈႁႂ်ႈလူင်ပွင်ၸိုင်ႈ ဝႆႉၸႂ်ယၢဝ်းယၢဝ်းသေဢုပ်ႇဢူဝ်းၵႄႈပၼ်ႁႃ လီသေပိူၼ်ႈ ။


ၶေႃႈၸုၵ်းမၼ်ႈႁဝ်း ဢၼ်ႁဝ်းလူင်းလၢႆးမိုဝ်း NCA ၼႆႉ ၶႂ်ႈႁႂ်ႈၵႄႈပၼ်ႁႃၵၢၼ်မိူင်း ၊ ၶႂ်ႈႁႂ်ႈပဵၼ်မႃးၸိုင်ႈမိူင်းႁူမ်ႈတုမ် (ၾႅတ်ႊၻရႄႊလ်) ဢၼ်ထုၵ်ႇမႅၼ်ႈၸိုဝ်ႈၸႂ်ႈ ။ တႃႇႁဝ်းတေလူင်းလၢႆးမိုဝ်း NCA ၼႆႉၵေႃႈ ႁဝ်းဝူၼ်ႉလၢႆၾၢႆႇလၢႆတၢင်း ၊ ၵွပ်ႈဝႃႈ ၵူၼ်းမိူင်းႁဝ်းႁၼ်ဝႃႈ လိၵ်ႈႁူမ်ႈမၢႆပၢင်လူင်ၼၼ်ႉ မၢၼ်ႈယင်းၸၢင်ႈႁၵ်းလင်ႁဝ်း ။ ၵိုတ်းသိုၵ်းၵၼ်မႃး 20 ပီပၢႆယဝ်ႉ ယင်းမီးပၢင်တိုၵ်းၵၼ်ယူႇ ။ လူင်းလၢႆးမိုဝ်းၵမ်းၼႆႉၵေႃႈ ဢမ်ႇယုမ်ႇလႆႈ ဢၼ်ဝႃႈၼၼ်ႉၵေႃႈ မီးၵူၼ်းထတ်းသၢင်တင်းၼမ် ။ ၵွပ်ႈၼႆလႄႈ ႁဝ်းႁၼ်ဝႃႈ ငဝ်းလၢႆးဢၼ်ပူၼ်ႉမႃးလႄႈ ငဝ်းလၢႆးဢၼ်တေပဵၼ်ၵႂႃႇတၢင်းၼႃႈၼႆႉ မၼ်းၸၢင်ႈလႅၵ်ႈလၢႆႈယူႇ ။ ႁဝ်းၵေႃႈမုင်ႈမွင်းဝႃႈ လူင်ပွင်ၸိုင်ႈတဵင်းၸဵင်ႇၼႆႉ လွင်ႈၽွမ်ႉႁူမ်ႈ / လွင်ႈမူၼ်ႉမႄးဝၢၼ်ႈမိူင်းၼႆႉ တေဢဝ်သႂ်ႇၸႂ်ယူႇ ။ ႁဝ်းဢတိတ်ႉထၢၼ် (ယွၼ်းၽွလ်း) ဝႆႉဝႃႈ ၽူႈဢွၼ်ႁူဝ်ၵူႈၵေႃႉၵေႃႉ ၸိူဝ်းမီးဢမ်းၼၢၸ်ႈ (ဢႃႇၼႃႇ) ၼၼ်ႉ ႁဝ်းထုၵ်ႇလႆႈမႃးႁူမ်ႈၵၼ်ၵႄႈလိတ်ႈပၼ်ႁႃ မၼ်းၸင်ႇတေငၢႆႈလီ ။ တႃႇတေၵႄႈပၼ်ႁႃၼႆႉ တေလႆႈသိုဝ်ႈသႂ်တေႃႇၵၼ် - ၸဝ်ႈယွတ်ႈသိုၵ်း သိုပ်ႇလၢတ်ႈၵႂႃႇၼင်ႇၼႆ ။


ဝၼ်းလဵဝ်ၵၼ်ၼႆႉ (08/10/2015) ၵေႃၵမ်ၵၢၼ်ပွင်ၵၢၼ်လူင်ငဝ်ႈၸိုင်ႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ဢွၵ်ႇၶေႃႈပိုၼ်ၽၢဝ်ႇ သဵၼ်ႈတၢင်းပွင်သၢင်ႈ လွင်ႈငမ်းယဵၼ်လႄႈ ၶေႃႈၸုၵ်းမၼ်ႈ RCSS ႁူမ်ႈတင်းမူတ်း 8 ၶေႃႈ ။


1. မိူင်းၸိုင်ႈတႆးၼႆႉ မီးပိုၼ်းႁင်းၶေႃ ၊ ၸဝ်ႈၾႃႉၶဝ်ၽွင်းငမ်း (ဢုပ်ႇပိူင်ႇ) မႃး ၊ မိူဝ်ႈ 1886 ဢင်းၵိတ်ႉ ၶဝ်ႈမႃးလႄႈ ၽွင်းငမ်းမိူင်းၵေႃႈ မိူင်းၸိုင်ႈတႆး မီးသုၼ်ႇၽွင်းငမ်းႁင်းၶေႃမႃးယူႇယဝ်ႉ ၊ ထိုင်မႃး 1947 ဢိင်ၼိူဝ်ငဝ်းလၢႆးၵၢၼ်မိူင်းလႅၵ်ႈလၢႆႈမႃးလႄႈ ပုၼ်ႈတႃႇတေဢဝ်ၵွၼ်းၶေႃ တႂ်ႈဢင်းၵိတ်ႉသေ မိူင်းသၼ်လွႆ ၶၢင် ၊ ၶျၢင်း ၊ တႆးလႄႈ ၼႃႈလိၼ်ပဵင်းမိူင်းမၢၼ်ႈလႆႈႁဵတ်း လိၵ်ႈႁူမ်ႈမၢႆပၢင်လူင်လႄႈ ဢဝ်ၵွၼ်းၶေႃ ၵေႃႇတင်ႈမိူင်းႁူမ်ႈတုမ်ၸွမ်းၵၼ် မႃး ။


2. ဝၢႆးလင်ၵေႃႇတင်ႈမႃးမိူင်းႁူမ်ႈတုမ်ယဝ်ႉသေတႃႉ ဢိင်လူၺ်ႈၾၢႆႇမၢၼ်ႈၶဝ်ဢဝ်သိုၵ်းသေ ၶိုၼ်ႈၶိုၼ်ႈယိုတ်းဢမ်းၼၢၸ်ႈၸိုင်ႈမိူင်းလႄႈ ၸဝ်ႈဢမ်းၼၢၸ်ႈသိုၵ်းၵုမ်းၵမ် ဢမ်းၼၢၸ်ႈၸိုင်ႈမိူင်းပႅတ်ႈတင်းပိုၵ်းပၢၼ်သိုပ်ႇ ပၢၼ်လႄႈ ၼႂ်းမိူင်းႁူမ်ႈတုမ်ၸင်ႇမီးမႃး ၸုမ်းလုၵ်ႉၽိုၼ်ႉယိပ်းၵွင်ႈၵၢင်ႇ တေႃႇသူႈပိူဝ်ႈၵၢၼ်မိူင်းမႃးတင်းၼမ်တင်းလၢႆ တေႃႇထိုင်ဝၼ်းမိူဝ်ႈၼႆႉ ။


3. ပီႊ 2008 ၸုမ်းလူင်ပွင်ၸိုင်ႈသိုၵ်း ပိုၼ်ၽၢဝ်ႇမၵ်းမၼ်ႈၸႂ်ႉတိုဝ်း မၢႆမီႈပိူင်ပိုင်းၸိုင်ႈမိူင်း ဢၼ်ၵူၼ်းမိူင်း ၊ ပႃႊတီႊၵၢၼ်မိူင်းလႄႈ ၸုမ်းလုၵ်ႉၽိုၼ်ႉယိပ်းၵွင်ႈၵၢင်ႇ ဢမ်ႇႁၼ်လီ ဢမ်ႇၵမ်ႉထႅမ်ၸွမ်းၼၼ်ႉ ပဵၼ်ပိူင်တင်းၵၢၼ်မႃး ။ ပီ 2010 ၸတ်းႁဵတ်းၵၢၼ်လိူၵ်ႈတင်ႈ ၼႂ်းမိူင်းႁူမ်ႈတုမ်သေ ၶွတ်ႇၽွတ်ႈလူင်ပွင်ၸိုင်ႈဢၼ် ၸွမ်ၸိုင်ႈဢူးတဵင်းၸဵင်ႇ ဢွၼ်ႁူဝ် ၼၼ်ႉသေ ပိုၼ်ၽၢဝ်ႇ ယိုၼ်းမိုဝ်းၵိုတ်းယိုဝ်း ပိူဝ်ႈတႃႇၵႄႈၶႆၵၼ်တင်းၵၢၼ်မိူင်း ၵၼ်တင်း ၸုမ်းလုၵ်ႉၽိုၼ်ႉ ယိပ်းၵွင်ႈၵၢင်ႇၵူႈမူႇၵူႈၸုမ်းၼင်ႇ ပဵၼ်တၢင်းၵၢၼ်မႃး မိူဝ်ႈဝၼ်းထီႉ 18. August.2011 ။


4. ၶွင်ႊသီႊဢဝ်ၶိုၼ်းၸိုင်ႈတႆး လႆႈဢုပ်ႇဢူဝ်း တင်း ၸုမ်းပွင်သၢင်ႈ လွင်ႈငမ်းယဵၼ် လူင်ပွင်ၸိုင်ႈမၢၼ်ႈသေ တႄႇလူင်းလၢႆးမိုဝ်း ၵိုတ်းယိုဝ်းၵၼ်မႃး မိူဝ်ႈ 02. December. 2011 တေႃႇထိုင် ယၢမ်းလဵဝ်လႆႈမႃးၶၢဝ်းတၢင်း (3) ပီပၢႆယဝ်ႉသေတႃႉ ၾၢႆႇတပ်ႉသိုၵ်းမၢၼ်ႈ ဢမ်ႇႁဵတ်းသၢင်ႈၸွမ်း ၶေႃႈတူၵ်းလူင်း ၵၢၼ်ၵိုတ်းယိုဝ်း တေႃႇၵၼ်လႄႈ လႆႈပဵၼ်ပၢင်တိုၵ်း ၵၼ်ၶိုၼ်း တင်းၼမ် ။


5. မူႇပိူင်ၵိုတ်းယိုဝ်းၸိုင်ႈမိူင်းပတ်းပိုၼ်ႉ (Nationwide Ceasefire Agreement-NCA) ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လုၵ်ႉၽိုၼ်ႉလႄႈ လူင်ပွင်ၸိုင်ႈၶဝ်ဢုပ်ႇဢူဝ်းၵုမ်ၵၼ် သေ ႁူမ်ႈၵၼ်ၶဵၼ်ႇတႅမ်ႈမႃး တႃႇတေၵိုတ်းယိုဝ်းၵၼ်ယဝ်ႉ ဢုပ်ႇဢူဝ်းၵႄႈၶႆပၼ်ႁႃ ၵၢၼ်မိူင်း ၵၼ်ၼၼ်ႉ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA)  ၵမ်ႉထႅမ် ႁပ်ႉတွၼ်ႈၸွမ်းယူႇ ။


6. ၽွင်းယၢမ်းၵိုတ်းယိုဝ်းၵၼ်သေ ၶတ်းၸႂ်ၵႄႈလိတ်ႈဢုပ်ႇဢူဝ်း ၵၢၼ်မိူင်းၵၼ်ယူႇၼၼ်ႉ တပ်ႉသိုၵ်းလူင်ပွင်ၸိုင်ႈ ယႃႇႁႂ်ႈလႆႈ ဢၢင်ႈလွင်ႈတၢင်းသေၸိူဝ်ႉသေပိူင်သေ ၵႂႃႇၶူၼ်ႉႁႃ တိုၵ်းယိုဝ်း ၵူၼ်းသိုၵ်း တပ်ႉသိုၵ်းၸိုင်ႈတႆး (RCSS/SSA) ဢၼ်ပၵ်းသဝ်း တူင်ႉၼိုင်သိုၵ်းမႃးယူႇ ၼႂ်းပိုၼ်ႉတီႈ ၸႄႈဝဵင်း မိူင်းပၼ်ႇ ၊ မိူင်းၼၢႆး ၊ လၢင်းၶိူဝ်း ၊ မွၵ်ႇမႆႇ ၊ ၼမ်ႉၸၢင် ၊ ပၢင်လူင် ၊ လွႆလႅမ် ၊ မိူင်းပဵင်း ၊ လွၵ်ႉၸွၵ်ႇ ၊ လၢႆးၶႃႈ ၊ မိူင်းၵိုင် ၊ ၵျႂၵ်းမႄး ၊ မူႇၸႄႈ ၊ ၼမ်ႉၶမ်း ၊ မိူင်းၵူဝ်း ၊ ၵႄးသီး ၊ ၵုၼ်ႁိင်း ၊ ၵဵင်းလူမ်း ၊ ၵဵင်းတွင်း ၊ မိူင်းပူးလူင် ၊ မိူင်းပူးဢွၼ်ႇ ၊ ၵဵင်းတုင် ၊ တႃႈၶီႈလဵၵ်းလႄႈ မိူင်းတူၼ်  ၸိူဝ်းၼႆႉ ။ သင်ဝႃႈမီးလွင်ႈ ႁၼ်ၽိတ်းၵၼ် ၊ မီးပၼ်ႁႃၵိူတ်ႇၶိုၼ်ႈမႃးၼႆၸိုင် ႁႂ်ႈလႆႈၵပ်းသၢၼ်တင်း လုမ်းၵပ်းသၢၼ်သေ ဢုပ်ႇဢူဝ်းငူပ်ႉငိ ၵႄႈၶႆပၼ်ႁႃၵၼ်ၵႂႃႇ ၶႂ်ႈတုၵ်းယွၼ်းၼၵ်းၼႃထိုင်ၼင်ႇၼႆ ။


7. ၼင်ႇႁိုဝ်ပၼ်ႁႃ ဢၼ်ၵိူတ်ႇၶိုၼ်ႈ ၼႂ်းၵႄႈတပ်ႉသိုၵ်းမၢၼ်ႈလႄႈ တပ်ႉသိုၵ်းၸိုင်ႈတႆး (RCSS/SSA) ပေႃးတေၵႄႈၶႆလႆႈၵၼ်ၶိုတ်းတၼ်းၼၼ်ႉ ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA)  တုၵ်းယွၼ်းတီႈလူင်ပွင်ၸိုင်ႈ ပုၼ်ႈတႃႇတေပိုတ်ႇလုမ်းၵပ်းသၢၼ် ပွင်သၢင်ႈ လွင်ႈငမ်းယဵၼ် (RCSS/SSA) ၽိူမ်ႉတိူဝ်းလိူဝ်ၼႆႉထႅင်ႈ ။


8. ပၼ်ႁႃၵၢၼ်မိူင်းလႄႈ ၵၢၼ်ၸိူဝ်ႉၸၢတ်ႈၼၼ်ႉ ထုၵ်ႇလႆႈၽွမ်ႉၵၼ်ၵႄႈၶႆလႄႈ တႃႇတေယူႇႁူမ်ႈသဝ်း ၸွမ်းၵၼ်လႆႈ ၵတ်းၵတ်းယဵၼ်ယဵၼ်ၼႆႉ ထုၵ်ႇလႆႈသၢင်ႈလွင်ႈယုမ်ႇယမ်ၵၼ်လႄႈ ဝူၼ်ႉမႄး ပိူင်ပိုင်းၸိုင်ႈမိူင်းၼၼ်ႉယဝ်ႉ ။ ပုၼ်ႈတႃႇတေၵေႃႇတင်ႈလႆႈ မိူင်းႁူမ်ႈတုမ် ၸိုၼ်ႈၸၢင်ႇဢၼ်ႁပ်ႉႁွင်းပၼ်လႆႈၶိုၼ်း သုၼ်ႇလႆႈသုၼ်ႇပဵၼ်လွင်ႈၽဵင်ႇပဵင်း ၊ လွင်ႈတႅပ်းတတ်းတူဝ်ၵဝ်ႇ ပိူင်ၾႅတ်ႊၻရႄႊလ် ၻီႊမူဝ်ႊၶရေႊၸီႊ ၸွမ်းၼင်ႇၶေႃႈလႆႈၸႂ်ပၢင်လူင်သေ တင်ႈမိူင်းႁူမ်ႈတုမ် မႃးၸွမ်းၵၼ်ၼၼ်ႉလႄႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး ၸင်ႇလႆႈတႅပ်းတတ်း လူင်းလၢႆးမိုဝ်း ၽိုၼ်လိၵ်ႈမၼ်ႈၵႅၼ်ႇၵိုတ်းယိုဝ်းၵၼ် ၸိုင်ႈမိူင်းပတ်းပိုၼ်ႉ (Nationwide Ceasefire Agreement-NCA) ၼၼ်ႉ တေသိုပ်ႇၶဝ်ႈႁူမ်ႈပၢင်ဢုပ်ႇ ဢူဝ်းၵၢၼ်မိူင်းသေ ႁူမ်ႈၵၼ်ၵႄႈၶႆပၼ်ႁႃၵၢၼ်မိူင်း ၵႂႃႇၼႆ ၸင်ႇလႆႈပိုၼ်ၽၢဝ်ႇ လွင်ႈငဝ်းလၢႆး ၵၢၼ်ပွင်သၢင်ႈလွင်ႈငမ်းယဵၼ် ဢိၵ်ႇၶေႃႈၸုၵ်းမၼ်ႈ ၶွင်ႊသီႊဢဝ်ၶိုၼ်းၸိုင်ႈတႆး ၼင်ႇၼႆ ။