သိုၵ်းမၢၼ်ႈယိုဝ်းၵွင်ႈလူင်သႂ်ႇ ငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တီႈဝၢၼ်ႈႁႆး ၵမ်းတီႈ 2 ၊ တင်ႈတႄႇသွင်ၾၢႆႇ တိုၵ်းယိုဝ်းၵၼ်မႃး ႁၢၼ်ႉတေႃႇမိူဝ်ႈလဵဝ် မီးၵူၼ်းမိူင်းပၢႆႈၽေး သိုၵ်းယဝ်ႉ 3 ႁဵင်ပၢႆ ။

ဝၼ်းတီႈ (19/10/2015) မိူဝ်ႈဝႃး ယၢမ်းၵၢင်ၼႂ်ႁိမ်း 1 မူင်း ၊ သိုၵ်းမၢၼ်ႈ ယူႇတီႈလွႆၵိဝ်ႇမွၵ်ႇၶၢဝ်သေ ယိုဝ်းၵွင်ႈလူင်သႂ်ႇ ငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တီႈဝၢၼ်ႈႁႆး ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ။ သိုၵ်းမၢၼ်ႈယိုဝ်းၵွင်ႈလူင်သႂ်ႇ ငဝ်ႈငုၼ်း SSPP/SSA ၼႆႉ ပေႃးပႃးပွၵ်ႈၼႆႉ ပဵၼ်ပွၵ်ႈၵမ်းတီႈ 2 - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA  ၸဝ်ႈသိုၵ်းလူင် ၸၢႆးလႃႉ လၢတ်ႈဝႃႈ - ဢၼ်သိုၵ်းမၢၼ်ႈ ယိုဝ်းမႃးၼႆႉ မႃးတူၵ်းသႂ်ႇတီႈႁိမ်းပၢမ်ႉၼမ်ႉမၼ်း ႁိမ်းႁူဝ်ဝဵင်းဝၢၼ်ႈႁႆး ။ လၢႆးဢၼ်သိုၵ်းမၢၼ်ႈႁဵတ်းၼႆႉ ဢမ်ႇမီးလွင်ႈမီးတၢင်းသေ ႁႃလွင်ႈႁႃတၢင်းယဝ်ႉမႃးယိုဝ်း ။ ၵွပ်ႈၼၼ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်း ၸိုင်ႈတႆးႁဝ်းၶႃႈတႄႉ ပေႃးသိုၵ်းမၢၼ်ႈၶိုၼ်ႈမႃးတိၵ်းတိၵ်း ၵႃႈလႆႈႁႅၼ်းသိုၵ်းလေႃႇတိုၵ်းၶိုၼ်းယဝ်ႉ ။ ႁဝ်းၶႃႈ ဢမ်ႇၸႂ်ႈႁႅၼ်းသိုၵ်းၵႂႃႇလေႃႇတိုၵ်းၶဝ် ၊ လၢႆးၼႆႉမၼ်းပဵၼ်လၢႆးၸႂ်ႉဢဵၼ်ႁႅင်းသေ ပေႉၵိၼ်ၵၼ်ၵူၺ်း ။ ဢၼ်ပူၼ်ႉပႅၼ်ၼႆႉၵေႃႈ ပဵၼ်ၾၢႆႇတပ်ႉသိုၵ်းမၢၼ်ႈယဝ်ႉ - ဝႃႈၼႆ ။


ဢိင်ၼိူဝ်တပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း SSPP/SSA သေ ၼႂ်းၸႄႈဝဵင်းမိူင်းသူႈသေ ၵူၼ်းဝၢၼ်ႈၵူၼ်းမိူင်း ထူပ်းၺႃးၽေးသိုၵ်းသိူဝ် လႆႈပၢႆႈၵႂႃႇယူႇတီႈဝတ်ႉ / ၵျွင်းမုၼ်ၸဝ်ႈ ႁၢႆးပႃ မီးႁဵင်ပၢႆ ။ တီႈမိူင်းဢၢၵ်ႇ ဝၢၼ်ႈလူၺ်ၼၼ်ႉၵေႃႈ ယွၼ်ႉပဵၼ်ပၢင်တိုၵ်းသေ ၵူၼ်းဝၢၼ်ႈမိူင်းဢၢၵ်ႇ တင်းဝၢၼ်ႈလူၺ် ပၢႆႈမႃးယူႇတီႈဝၢၼ်ႈသေႃႉ မီးၵူၼ်းႁဵင်ပၢႆ ။ ၼွၵ်ႈသေၼၼ်ႉ  ၵူၼ်းၸိူဝ်းထူပ်းၽေးသိုၵ်းသေ ပၢႆႈမူၵ်းထိူၼ်ႇမူၵ်းယုမ်းဝႆႉလႄႈ ၸိူဝ်းၵႂႃႇပိုင်ႈႁူမ်ႈယူႇသဝ်း ၸွမ်းပီႈၼွင်ႉၽႂ်ပီႈၼွင်ႉမၼ်းၼၼ်ႉ တင်းမူတ်းမီး 3 ႁဵင်ပၢႆယဝ်ႉ ။ ၵူၼ်းထူပ်းၽေးသိုၵ်းၼႆႉ တင်ႈတႄႇသိုၵ်းမၢၼ်ႈႁၢင်ႈႁႅၼ်းသိုၵ်းလေႃႇတိုၵ်း SSPP/SSA တႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ် - ၵူၼ်းဢၼ်ၸွႆႈထႅမ်ၵူၼ်းပၢႆႈၽေး ၸၢႆးၸွမ် လၢတ်ႈ ။


ၾၢႆႇၼိုင်ႈၵေႃႈ ပူၼ်ႉမႃးမိူဝ်ႈဝၼ်းတီႈ 18/10/2015 ၼၼ်ႉ SSPP/SSA ဢွၵ်ႇၶေႃႈပိုၼ်ၽၢဝ်ႇဝႃႈ သိုၵ်းမၢၼ်ႈပဵၼ်ၾၢႆႇႁၢင်ႈႁႅၼ်းသိုၵ်း မႃးလေႃႇတိုၵ်းတပ်ႉ SSPP/SSA ဢွၼ်တၢင်းလႄႈ SSPP/SSA လႆႈၵႅတ်ႇၶႄႁႄႉၵင်ႈတူဝ်ၵဝ်ႇ လူၺ်ႈလွၵ်းလၢႆးပဵၼ်ထမ်း၊ တေသိုပ်ႇတိုၵ်းယိုဝ်းၵႂႃႇ လူၺ်ႈလၢႆးပဵၼ်ထမ်း - ၼႆယဝ်ႉ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်လုၵ်ႈၸုမ်း ၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) သေ ၼႂ်း 10 ၸုမ်းၸိူဝ်း ဢမ်ႇလူင်းလၢႆးမိုဝ်းၼၼ်ႉ ပႃး SSPP/SSA ။ ၵူၺ်းၵႃႈ SSPP/SSA ပဵၼ်ၸုမ်းဢၼ် လူင်းလၢႆးမိုဝ်းၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ ၸုမ်းၼိုင်ႈ ။