ၵူၼ်းပၢႆႈၽေးသိုၵ်း တီႈႁၢႆးပႃ ၊ ဝၢၼ်ႈသေႃႉ ၼႂ်းၸႄႈဝဵင်းမိူင်းသူႈ ဢၼ်မီးႁူဝ်ၵူၼ်းႁဵင်ပၢႆၼႆႉ မိူဝ်ႈလဵဝ် ၶႂ်ႈလႆႈလွင်ႈၸွႆႈထႅမ် ၶူဝ်းၶွင်ၸႂ်ႉတိုဝ်းၸႂ်ႉသွႆလႄႈ ၶူဝ်းၶွင်ၵိၼ်ယႅမ်ႉ ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတိတ်းတေႃႇတွင်ႈထၢမ် ၵူၼ်းၼုမ်ႇမူႇၸေႈ ၸၢႆးလဵၵ်း ဢၼ်ၵႂႃႇၸွႆႈထႅမ်ၵူၼ်းပၢႆႈၽေးဝႆႉ ၼင်ႇၼႆ ။

ထၢမ် - မိူဝ်ႈလဵဝ် ငဝ်းလၢႆးပဵၼ်ႁိုဝ်ၽွင်ႈၶႃႈ ?။


တွပ်ႇ - ငဝ်းလၢႆးၶႅမ်ႉယူႇၶႃႈ ။ ၵူၺ်းၵႃႈ ပၢင်တိုၵ်းတႄႉ ပႆႇၵိုတ်း ၊ ၵူၼ်းပၢႆႈၽေးၸိူဝ်းမႃးယူႇတီႈ ဝၢၼ်ႈသေႃႉၼႆႉ မိူဝ်ႈသိုၼ်း (17/10/2015) ႁဝ်းထၢမ်တူၺ်း ပိူဝ်ႈတႃႇတေၵႂႃႇၸွႆႈၶူဝ်းၶွင်ၼၼ်ႉ မီးမွၵ်ႈႁိမ်း 200 ၵူၺ်း ။ ၵူၺ်းၵႃႈ မိူဝ်ႈဝႃး (18/10/2015) ၼႆႉ ၶိုၼ်းမႃးထၢမ်တူၺ်း မီးၵႂႃႇ 1,015 ၵေႃႉ ၊ သင်ၶမီး 42 တူၼ် ၊ ၸိူဝ်းတိုၵ်ႉမႃးထႅင်ႈၵေႃႈမီး ။


ပီႈၼွင်ႉၵူၼ်းပၢႆႈၽေး ၸိူဝ်းမႃးယူႇသဝ်းတီႈဝၢၼ်ႈသေႃႉၼႆႉ ပဵၼ်ပီႈၼွင်ႉဝၢၼ်ႈလူၺ် ၊ ဝၢၼ်ႈၵျွင်း ၊ ဝၢၼ်ႈလီႉသေႃး ၊ ၵူၼ်း 1,015 ၵေႃႉၼႆႉ ပဵၼ်ၵူၼ်းဝၢၼ်ႈ 3 ဝၢၼ်ႈ ။ သင်ၶ 42 တူၼ်ၼၼ်ႉ ပဵၼ်တႃႇ 2 ၵျွင်း ၊ 3 ဝၢၼ်ႈၼႆႉ ပဵၼ်ၸႄႈဝဵင်းမိူင်းသူႈ ။


ထၢမ် - လႆႈၵႂႃႇၸွႆႈၶူဝ်းၶွင် သင်ၽွင်ႈၶႃႈ ?။


တွပ်ႇ - သိူဝ်ႈၶူဝ်းၼုင်ႈ လုၵ်ႈဢွၼ်ႇၵူၼ်းလူင် ၊ ၽႃႈႁူမ်ႈၽႃဝႆ ၊ ၶႅပ်းတိၼ် ၊ ၽွင်သၵ်ႉၶူဝ်း ၊ ၶဝ်ႈသွႆး ၊ ၼမ်ႉမၼ်း ၊ ၶဝ်ႈသၢၼ် 62 ထူင် ။ ၽႃႈႁူမ်ႇၽႃႈဝႆ တင်းမူတ်း 600 ၽိုၼ် ၊ သိူဝ်ႈၶူဝ်းလုၵ်ႈဢွၼ်ႇ 300 ပၢႆ ။ ၵူၼ်းလူင် 500 ပၢႆ ၊ ၶႅပ်းတိၼ်လုၵ်ႈဢွၼ်ႇ 300 ပၢႆ ၊ ၶႅပ်းတိၼ်ၵူၼ်းလူင် ႁိမ်း 300 ။ မိူၼ်ၼင်ႇ ၼၢင်းယိင်းဢၼ်လဵင်ႉလုၵ်ႈလႆႈ 2-3 ဝၼ်းၸိူဝ်းၼၼ်ႉ လႆႈၸွႆႈပၼ်ဢူဝ်ႊဝၼ်ႊတိၼ်ႊ ၸိူဝ်းၼႆႉ ။


ငိုၼ်းဢၼ်လႆႈဢဝ်ၸႂ်ႉတိုဝ်း သိုဝ်ႉၶူဝ်းၶွင်ၸိူဝ်းၼႆႉ ပဵၼ်ငိုၼ်းဢၼ်ႁႃဝႆႉ တႃႇၸွႆႈထႅမ်ပီႈၼွင်ႉၵေးသီး ဢၼ်ပၢႆႈၽေးၼၼ်ႉ မိူဝ်ႈဢွၼ်တၢင်း ။ လိူဝ်သေၼၼ်ႉ  ငိုၼ်းဢၼ်ပီႈၼွင်ႉသိင်ႊၵပူဝ်ႊၶဝ်လူႇတၢၼ်းမႃး 4-5 သႅၼ် ၊ 5-6 သႅၼ် ၸိူဝ်းၼၼ်ႉၵေႃႈ လႆႈၸႂ်ႉတိုဝ်းၵႂႃႇတေႃႈလဵဝ် ၊ ၵဵပ်းလႆႈတင်းမူတ်းမီးႁိမ်း 30 သႅၼ် ။ တင်းငိုၼ်းၶႃႈၶဝ် ၸုမ်းၵေႃလိၵ်ႈလၢႆးမူႇၸႄႈ / ၵူၼ်းၼုမ်ႇၸေႈလၢၼ်ႉ ၊ ၸုမ်းၵူၼ်းၼုမ်ႇၵျွၵ်ႉမႄး ၊ လႃႈသဵဝ်ႈ ၸွႆႈထႅမ်ၸိူဝ်းၼႆႉ။


ဢဝ်မႃးလေႃးၵၼ်မီး 108 သႅၼ် ။ ဢဝ်သိုဝ်ႉၶူဝ်ၶွင်လူႇတၢၼ်းၵႂႃႇၸိူဝ်းၼႆႉ တင်းမူတ်း လိူဝ်ငိုၼ်းဢိတ်းဢွတ်း ၊ ၵူၺ်းၵႃႈ သၢႆမၢႆမၼ်း ပႆႇတႅတ်ႈတေႃး ။ ဢၼ်မႃးလူႇတၢၼ်းၶဝ်ႈသၢၼ် ႁၢၼ်ႉတေႃႇပေႃးလႆႈတင်းမူတ်း 62 ထူင်ၵေႃႈ ပႃးပီႈၼွင်ႉမူႇၸႄႈ ၊ ပီႈၼွင်ႉၵျွၵ်ႉမႄး ၸိူဝ်းၼႆႉၼင်ႇၵဝ်ႇ ။


ထၢမ် - ဢၼ်ၵူၼ်းပၢႆႈၽေးၶဝ် ၶႂ်ႈလႆႈ ( လူဝ်ႇ ) ႁႅင်းၼႆႉ ပဵၼ်သင်ၶႃႈ ?။


တွပ်ႇ - ပဵၼ်ၶႅပ်းတိၼ် ။ သိူဝ်ႈၶူဝ်းၼုင်ႈၸိူဝ်းၼႆႉ ၵွပ်ႈဝႃႈၶဝ်ဢမ်ႇလႆႈသင်မႃး ၊ ၽႃႈႁူမ်ႇၶူဝ်းၼွၼ်းၵေႃႈဢမ်ႇမီး ၊ မၢင်ၸိူဝ်းလႆႈၼွၼ်းၼိူဝ်ၽႃႈယၢင်ၵႂႃႇၵူၺ်း ။ လွင်ႈၵိၼ်တၢင်းယႅမ်ႉ ၶဝ်ႈသၢၼ်ၸိူဝ်းၼႆႉၵေႃႈ ဢမ်ႇမီး ။ ၼွၵ်ႈသေၼၼ်ႉ ၽႃႈယၢင်ၵေႃႈ ဢဝ်မႃးၸွႆႈပၼ် 3 ၵဵၼ် (မွၵ်ႈ 300 ၽိုၼ်) ။


ထၢမ် - လွင်ႈပၢႆးယူႇလီၶႃႈလူး မီးၵူၼ်းၸွႆႈထႅမ်ပၼ် ယူႇၶႃႈႁႃႉ ?။


တွပ်ႇ - လွင်ႈယႃႈယႃတႄႉ မီးၼၢင်းလုမ်းလႃးၵူၼ်းပဵၼ် (Nurse) ဝႆႉ4-5 ၵေႃႉ ။ ႁဝ်းဢၢင်ႈၵႂႃႇသိုဝ်ႉမႃးပၼ်ယႃႈယႃၵေႃႈ ၶဝ်လၢတ်ႈဝႃႈ ဢမ်ႇတၢပ်ႈသိုဝ်ႉယဝ်ႉ ။ လုၵ်ႈဢွၼ်ႇမၢင်ၸိူဝ်းၵေႃႈၼၢဝ် ၊ မၢင်ၸိူဝ်းၵေႃႈပဵၼ်တွင်ႉၵႃႇ ။


ထၢမ် - ၵူၼ်းပၢႆႈၽေးၼႆႉ ၵမ်ႈၼမ်မီးဢႃယုၵႃႈႁိုဝ် တေႃႇထိုင်ၵႃႈႁိုဝ်ၶႃႈ ?။


တွပ်ႇ - တင်ႈတႄႇလုၵ်ႈဢွၼ်ႇ ၸင်ႇႁႃလဵင်ႉလႆႈ 2-3 ဝၼ်း တေႃႇထိုင် ဢႃယု 85 ။ မီးလူင်ၸဝ်ႈၵေႃႉၼိုင်ႈ မီးဢႃယုမွၵ်ႈ 106-7 ပီ ။ ဢၼ်ပၢႆႈမႃးၵမ်ႈၼမ်ၼႆႉ ပဵၼ်ၼၢင်းယိင်း ၊ မၢင်ၸိူဝ်းလဵင်ႉလုၵ်ႈဝႆႉသေ မီးတီႈၼႂ်းဝၢၼ်ႈၵေႃႈမီး ၊ ၵွပ်ႈဝႃႈ တႃႇၶဝ်တေမႃးမီးတၢင်းယၢပ်ႇၽိုတ်ႇ ၊ မၢင်ၸိူဝ်းၵေႃႈမီးဝႆႉၼႂ်းထိူၼ်ႇ ။


ဢၼ်လုၵ်ႉတီႈ ႁိမ်းႁွမ်းဢိူင်ႇႁၢႆးပႃ ၵူႈဝၢၼ်ႈဝၢၼ်ႈ မႃးယူႇသဝ်းတီႈဝတ်ႉ / ၵျွင်းႁၢႆးပႃၼႆႉ မီး 700 ပၢႆႁိမ်း 800 ။ ၵူၼ်းပၢႆႈၽေး တီႈဝၢၼ်ႈသေႃႉတႄႉ ဢမ်ႇမႃးယူႇတီႈဝတ်ႉမုၼ်ၸဝ်ႈ ၊ မႃးယွၼ်းယူႇၸွမ်းပီႈၼွင်ႉႁိမ်းႁွမ်း ။ ၽူႈယႂ်ႇၵူၼ်းလူင်ဝၢၼ်ႈၵေႃႈ တုၵ်းယွၼ်းႁႂ်ႈၵူၼ်းဝၢၼ်ႈၶဝ် ႁႂ်ႈၸွႆႈႁပ်ႉဝႆႉၵႃႈၼင်ႇႁပ်ႉဝႆႉလႆႈ ။