မိူဝ်ႈဝၼ်းတီႈ 15/10/2015 ၼၼ်ႉ ပဵၵ်ႉသမ်ႉဝႃႈ ၾၢႆႇလူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း လူင်းလၢႆးမိုဝ်း ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း (NCA) ၵႂႃႇယဝ်ႉၵေႃႈ ပၢင်တိုၵ်းၼႂ်းမိူင်းတႆး ယင်းပႆႇယဵၼ် ။ မိူၼ်ၼင်ႇ တၢင်းမိူင်းတႆးပွတ်းႁွင်ႇ ဢၼ်ပဵၼ်ပၢင်တိုၵ်းၵၼ်တင်း တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈတဢၢင်း (TNLA) ၵေႃႈပႆႇယဵၼ် ။

SSPP/SSA တင်း လူင်ပွင်ၸိုင်ႈတဵင်းၸဵင်ႇ ႁူပ်ႉထူပ်းဢုပ်ႇဢူဝ်းလူင်းလၢႆးမိုဝ်း လွင်ႈငမ်းယဵၼ် ၸၼ်ႉၸႄႈမိူင်း တီႈဝဵင်းတူၼ်ႈတီး မိူဝ်ႈဝၼ်းတီႈ 28/01/2012

လိူဝ်သေၼၼ်ႉ တင်ႈတႄႇဝၼ်းတီႈ 06/10/2015 မႃး တေႃႇထိုင်ယၢမ်းလဵဝ်ၵေႃႈ ၾၢႆႇတပ်ႉသိုၵ်းမၢၼ်ႈ ယင်းတိုၵ်ႉႁၢင်ႈႁႅၼ်းသိုၵ်းလေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) ၵူၺ်းပႆႇပေႃး ၊ ယင်းဢဝ်ၵွင်ႈလူင်ယိုဝ်းသႂ်ႇပႃး ငဝ်ႈငုၼ်းဝၢၼ်ႈႁႆး SSPP/SSA သွင်ပွၵ်ႈသွင်ၵမ်း ။


ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - မိူဝ်ႈဝၼ်းတီႈ 18/10/2015 ၼႆႉ ႁဝ်းၶႃႈဢွၵ်ႇၶေႃႈပိုၼ်ၽၢဝ်ႇ ။ ၵဵဝ်ႇၵပ်းလွင်ႈသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်းၼႆႉ ႁဝ်းပေႃးထွၼ်ပၼ်တီႈ တႃႈသၢမ်ပူးယဝ်ႉ ။ ႁဝ်းၶၢႆႉမႃးယူႇထႅင်ႈတီႈၼိုင်ႈသေ သိုၵ်းမၢၼ်ႈၶဝ်ၵေႃႈ ၸွမ်းလမ်းလေႃႇတိုၵ်း ၊ ၼႆႉၵေႃႈပေႃးထွၼ်ပၼ်ယဝ်ႉ ၊ ယင်းတိုၵ်ႉမႃးႁဵတ်းပၢင်တိုၵ်းတေႃႇႁဝ်း တီႈၼိုင်ႈယဝ်ႉတီႈၼိုင်ႈတိၵ်းတိၵ်း ။ ပၢင်တိုၵ်းဢၼ်ပဵၼ်ယူႇ ယၢမ်းလဵဝ်ၼႆႉ ပဵၼ်ၾၢႆႇသိုၵ်းမၢၼ်ႈပူၼ်ႉပႅၼ် ။ ၵွပ်ႈၼၼ်လႄႈ ပေႃးဝႃႈသိုၵ်းမၢၼ်ႈၶိုၼ်ႈမႃးၼႆ တိုၼ်းတေသူႈတိုၵ်းၵႂႃႇထႅင်ႈ ၊ ၵွပ်ႈဝႃႈဢမ်ႇၸႂ်ႈသိုၵ်းတႆး ၵႂႃႇတိုၵ်းယိုဝ်းသိုၵ်းမၢၼ်ႈ ၊ ပဵၼ်ၾၢႆႇသိုၵ်းမၢၼ်ႈမႃး တိုၵ်းယိုဝ်းတႆးဢွၼ်တၢင်းလႄႈ တိုၼ်းတေသူႈတိုၵ်းၵႂႃႇ ႁၢဝ်ႈႁၢဝ်ႈႁႅင်းႁႅင်း - ဝႃႈၼႆ ။

	SSPP/SSA တင်း လူင်ပွင်ၸိုင်ႈတဵင်းၸဵင်ႇ ႁူပ်ႉထူပ်းဢုပ်ႇဢူဝ်းလူင်းလၢႆးမိုဝ်း လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် တီႈဝဵင်းတူၼ်ႈတီး မိူဝ်ႈဝၼ်းတီႈ 28/01/2012

ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပႆႇတူဝ်ႈတၼ်း ၊ ပႆႇၽွမ်ႉ တႃႇတေလူင်းလၢႆးမိုဝ်း NCA သေ တပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း ။ ၵူၺ်းၵႃႈ SSPP/SSA ၼႆႉ ပဵၼ်ၸုမ်းဢၼ် လူင်းလၢႆးမိုဝ်းဝႆႉၸွမ်းၵၼ်တင်း လူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ။ ၵွပ်ႈၼၼ် ၽႂ်ပဵၼ်ၵေႃႉမႃးယိုဝ်းဢွၼ်တၢင်းၵေႃႈ ၵေႃႉၼၼ်ႉပဵၼ်ၵေႃႉဢၼ် ႁၵ်းၶေႃႈၵိၼ်ၵႅၼ်ႇ ဢၼ်လႆႈလူင်းလၢႆးမိုဝ်းၵၼ်ဝႆႉ - ၽူႈၵွၼ်းႁွင်ႈၵၢၼ် လုမ်းၸိုင်ႈမိူင်းႁူမ်ႈတုမ် (PI) ၸဝ်ႈၶိုၼ်းသႂ် လၢတ်ႈ ။


မၼ်းၸဝ်ႈလၢတ်ႈဝႃႈ - ၵၢၼ်ၵိုတ်းတိုၵ်းဢၼ်ဝႃႈၼႆႉ မၼ်းပွင်ႇသင် ?။ ၵိုတ်းတိုၵ်းဢၼ်ဝႃႈၼႆႉ မၼ်းပွင်ႇဝႃႈ ပေႃးပိူၼ်ႈဢမ်ႇမႃးတိုၵ်းယိုဝ်းႁဝ်း ႁဝ်းဢမ်ႇၵႂႃႇယိုဝ်းပိူၼ်ႈ။ ၵွပ်ႈၼၼ်လႄႈ ဢၼ်ပဵၼ်ပၢင်တိုၵ်းယူႇ ယၢမ်းလဵဝ်ၼႆႉ ၽႂ်တႄႇယိုဝ်းၽႂ်ဢွၼ်တၢင်း ၊ တေလႆႈဢဝ်ၼႆႉသေ လၢတ်ႈ။ ပေႃးဝႃႈ SSPP/SSA ၵႂႃႇယိုဝ်းသိုၵ်းမၢၼ်ႈ ဢွၼ်တၢင်းၵေႃႈ SSPP/SSA ၼႆႉ ပဵၼ်ၸုမ်းယႃႉၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်း ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ယဝ်ႉ ။ သင်ၸိူဝ်ႉဝႃႈ ၾၢႆႇသိုၵ်းမၢၼ်ႈ ပဵၼ်ၾၢႆႇၵႂႃႇယိုဝ်း ဢွၼ်တၢင်းၼႆၵေႃႈ ၾၢႆႇသိုၵ်းမၢၼ်ႈ ပဵၼ်ၸုမ်းယႃႉၶေႃႈၵိၼ်ၵႅၼ်ႇ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ယဝ်ႉ - ဝႃႈၼႆ ။


ဢိင်ၼိူဝ် ဢၼ်လႆႈပဵၼ်ပၢင်တိုၵ်းၸိူဝ်းၼႆႉသေ ၽူႈၶၢၼ်ပၢၵ်ႇ ပႃႊတီႊႁူဝ်သိူဝ် ၸၢႆးလဵၵ်ႉ လၢတ်ႈဝႃႈ - ပေႃးၶႂ်ႈလႆႈလွင်ႈငမ်းယဵၼ်တႄႉၸိုင် ဢၼ်တေလႆႈမူၼ်ႉမႄးၵႂႃႇၼႆႉ တိုၼ်းပဵၼ်တပ်ႉသိုၵ်း လူင်ပွင်ၸိုင်ႈမၢၼ်ႈ ၵမ်းလဵဝ်ယဝ်ႉ ။ ပၼ်ႁႃၵၢၼ်မိူင်း ဢၼ်ပဵၼ်ယူႇယၢမ်းလဵဝ်ၼႆႉ ၾၢႆႇတပ်ႉသိုၵ်းမၢၼ်ႈ သမ်ႉဢဝ်လၢႆးၵၢၼ်သိုၵ်းသေ မႃးၵႄႈလိတ်ႈ ၊ ဢၼ်ၼႆႉ မၼ်းဢမ်ႇၸႂ်ႈသဵၼ်ႈတၢင်း ဢၼ်ၸိုဝ်ႈၸႂ်ႈထုၵ်ႇမႅၼ်ႈ ။ ၵွပ်ႈၼၼ်လႄႈ လွင်ႈဢၼ်သိုၵ်းမၢၼ်ႈႁဵတ်းသၢင်ႈယူႇတင်းသဵင်ႈၼႆႉ ႁဝ်းၶႃႈဢမ်ႇႁၼ်လီ ၊ ပဵၼ်ၵေႃႈ ဢမ်ႇၵိုင်ႇလီပဵၼ်သေဢိတ်း ။ ၵၢၼ်ငမ်းယဵၼ်ဢၼ်ဝႃႈၼႆႉ ၶိၼ်တဵၵ်းၸႂ်ႉၵၼ်ႁဵတ်း ဢမ်ႇလႆႈ ၊ မၼ်းဢိင်ၼိူဝ်လွင်ႈ ၸႂ်ၽိူၵ်ႇၸိုၼ်ႈၶၢဝ်သႂ်သေလႄႈ လွင်ႈဝႆႉၸႂ်ယႂ်ႇၸႂ်ၵႂၢင်ႈတေႃႇၵၼ်ၼၼ်ႉယဝ်ႉ ။ ၵွပ်ႈၼၼ်လႄႈ ၵိုင်ႇလီပိုတ်ႇဢူၵ်းပိုတ်ႇၸႂ်ၵႂၢင်ႈၵႂၢင်ႈသေ ၵေႃႇသၢင်ႈလွင်ႈငမ်းယဵၼ်ၵွၼ်ႇ ၸင်ႇတေလႆႈလွင်ႈငမ်းယဵၼ်ဢၼ်တႄႉမၼ်း ။ ပိူဝ်ႈတႃႇတေလႆႈလွင်ႈငမ်းယဵၼ်ဢၼ်တႄႉ (ထႃဝရလွင်ႈငမ်းယဵၼ်) ဢၼ်ၵူၼ်းမိူင်းတင်းလၢႆမုင်ႈမွင်းၼၼ်ႉ ယူႇတီႈတပ်ႉသိုၵ်းမၢၼ်ႈသေ ၵိုင်ႇလီလႅၵ်ႈလၢႆႈလၢႆးႁဵတ်းလၢႆးသၢင်ႈလႄႈ ၵိုင်ႇလီလႅၵ်ႈလၢႆႈပၢႆးဝူၼ်ႉ ဢၼ်ဝႆႉၼိူဝ်ၸၢဝ်းၶိူဝ်းယဝ်ႉ ၊ ႁဝ်းၶႃႈၶႂ်ႈထတ်းသၢင်ၸိူင်ႉၼႆ - ၸၢႆးလဵၵ်ႉလၢတ်ႈ ။


လွင်ႈပၢင်တိုၵ်းၼႆႉ ၵႅမ်ႁူဝ်ပဝ်ႈ ၸုမ်းၶပ်းၶိုင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ၾၢႆႇဢူးဢွင်ႇမိၼ်း ၵေႃႈလၢတ်ႈၽွင်းၵႂႃႇႁၢင်ႈႁႅၼ်း ပိူဝ်ႈတႃႇလူင်းလၢႆးမိုဝ်း NCA ဝႃႈ - ပႆႇလူင်းလၢႆးမိုဝ်းၵိုတ်းတိုၵ်းသေတႃႉ ၾၢႆႇသိုၵ်းမၢၼ်ႈ တေဢမ်ႇႁၢင်ႈႁႅၼ်းသိုၵ်းလေႃႇတိုၵ်း ။ ၵူၺ်းၵႃႈ ၽိူဝ်ႇၸုမ်းၸၢဝ်းၶိူဝ်း 8 ၸုမ်း လူင်းလၢႆးမိုဝ်း NCA ယဝ်ႉ သမ်ႉလၢတ်ႈတီႈ ၽူႈမီးပုၼ်ႈၽွၼ်း SSPP/SSA ဝႃႈ - ယွၼ်ႉပိူဝ်ႈသူ ဢမ်ႇလူင်းလၢႆးမိုဝ်း NCA လႄႈ ၸင်ႇလႆႈပဵၼ်ပၢင်တိုၵ်း ။ ပေႃးလူင်းလၢႆးမိုဝ်း NCA ၸိူင်ႉၼင်ႇ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တႄႉ တေဢမ်ႇလႆႈပဵၼ်ပၢင်တိုၵ်းယဝ်ႉ ။ လႆႈႁၼ်ဝႃႈ ၶေႃႈၵႂၢမ်းဢၼ် ဢူးဢွင်ႇမိၼ်း လၢတ်ႈၼႆႉၵေႃႈ ဢမ်ႇၶူပ်းငၢမ်ႇမႅၼ်ႈၵၼ် ။


ပူၼ်ႉမႃးမိူဝ်ႈဝၼ်းတီႈ 13/10/2015 ၵေႃႉပဵၼ်ၸွမ်ၸိုင်ႈ ဢူးတဵင်းၸဵင်ႇ ၵေႃႈလၢတ်ႈဝႃႈ - ပေႃးဝႃႈ လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ယဝ်ႉ တိုၼ်းတေဢမ်ႇလႆႈမီးပၢင်တိုၵ်း သေတီႈ ။ ၵူၺ်းၵႃႈ ဝႃႈၼႆသေတႃႉၵေႃႈ တေႃႇထိုင်မိူဝ်ႈလဵဝ် သိုၵ်းမၢၼ်ႈယင်းတိုၵ်ႉထႅမ်ႁႅင်းသိုၵ်းယူႇ တိၵ်းတိၵ်း ။ ၾၢႆႇၼိုင်ႈၵေႃႈ ႁႅၼ်းသိုၵ်းလေႃႇတိုၵ်း ၽိုတ်ႉၶဝ်ႈဢိူမ်ႈၸမ်ငဝ်ႈငုၼ်းဝၢၼ်ႈႁႆး မႃးတိၵ်းတိၵ်း ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉပႃးၼႂ်းၸုမ်းၸၢဝ်းၶိူဝ်း 10 ၸုမ်း ဢၼ်တႅပ်းတတ်း ပႆႇလူင်းလၢႆးမိုဝ်း NCA ၸုမ်းၼိုင်ႈ ၊ ၵွပ်ႈဝႃႈ ပေႃးလူင်းလၢႆးမိုဝ်း NCA ၵေႃႈ ႁႂ်ႈလႆႈၶဝ်ႈပႃးၵူႈမူႇၵူႈၸုမ်း ။ ပဵၵ်ႉသမ်ႉဝႃႈ SSPP/SSA ပႆႇတူဝ်ႈတၼ်း ပိူဝ်ႈတႃႇလူင်းလၢႆးမိုဝ်းၵိုတ်းတိုၵ်း NCA သေတႃႉ ပဵၼ်ၸုမ်းဢၼ်လူင်းလၢႆးမိုဝ်းဝႆႉ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် မိူဝ်ႈႁူဝ်ပီ 2012 ၼၼ်ႉယူႇ ။