မုၵ်ႉၸုမ်းၼၢင်းယိင်းၸိုင်ႈတႆး လႆႈဢွၼ်ႁူဝ်ၼမ်းၼႃႈ ၸုမ်းမေႃယႃၵမ်ႈၽွင်ႈ ၵႂႃႇၸွႆႈထႅမ်ၵူၼ်းထူပ်းၽေးသိုၵ်း ၼႂ်းၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း ။


မိူဝ်ႈဝၼ်းတီႈ 14/10/2015 ၼၼ်ႉ ယူႇတီႈၸုမ်းၼၢင်းယိင်းၸိုင်ႈတႆး လႆႈဢွၼ်ႁူဝ်ၼမ်းၼႃႈ ၸုမ်းမေႃယႃၵမ်ႈၽွင်ႈသေ ၵႂႃႇၸွႆႈထႅမ်ၵူၼ်းထူပ်းၽေးသိုၵ်း ဢၼ်ပဵၼ်ယူႇၼႂ်းပိုၼ်ႉတီႈ ၼႂ်းၼႃႈလိၼ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၵုမ်းၵမ် ၊ တီႈဝၢၼ်ႈႁၢႆးပႃ ဢိူင်ႇႁၢႆးပႃ ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း ။


ၵဵဝ်ႇၵပ်းလွင်ႈၼႆႉ တင်ႈတႄႇဝၼ်းတီႈ 06/10/2015 မႃးၼႆႉ ယွၼ်ႉပိူဝ်ႈၼႂ်းၼႃႈလိၼ် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၵုမ်းၵမ် မိူၼ်ၼင်ႇတႃႈသၢမ်ပူးလႄႈ ႁိမ်းႁွမ်းတႃႈသၢမ်ပူးၸိူဝ်းၼႆႉ ယွၼ်ႉတပ်ႉသိုၵ်းမၢၼ်ႈ ပိုတ်ႇၼႃႈသိုၵ်းပိုတ်းယိုဝ်း တပ်ႉသိုၵ်းၸိုင်ႈတႆး (SSPP/SSA) လႄႈ ၵူၼ်းဝၢၼ်ႈၵူၼ်းမိူင်းလႆႈ ဢွၼ်ၵၼ်ပၢႆႈဢွၵ်ႇဝၢၼ်ႈသူၼ် ၵႂႃႇယူႇသွၼ်ႈၸွမ်းဝတ်ႉဝႃးမုၼ်ၸဝ်ႈ ၊ ၸွမ်းႁိူၼ်းပီႈႁိူၼ်းၼွင်ႉ ဝၢၼ်ႈႁၢႆးပႃ ၊ ဝၢၼ်ႈသေႃႉ ၊ ဝၢၼ်ႈၽၵ်းၵီးၸိူဝ်းၼႆႉ ။


ၵွပ်ႈပိူဝ်ႈဝႃႈ ငဝ်းလၢႆးပၢင်တိုၵ်း ယင်းတိုၵ်ႉၶဵင်ႈၶႅင်ၵၼ်ဝႆႉယူႇ ၵေႃႈလွင်ႈၼိုင်ႈ ၊ ထႅင်ႈလွင်ႈၼိုင်ႈ ၾူၼ်ၵေႃႈ တူၵ်းဢမ်ႇထၢတ်ႇဢမ်ႇဝၢႆးလႄႈ ၵူၼ်းပၢႆႈၽေးၵေႃႈ ပႆႇလူတ်းယွမ်းၵူၺ်းပႆႇပေႃး ၊ ဢၼ်တိုၵ်ႉမႃးထႅင်ႈၵေႃႈ တိုၵ်ႉမီးယူႇတိၵ်းတိၵ်း - ၼႆယဝ်ႉ ။


ဢိင်ၼိူဝ်လွင်ႈၼႆႉသေ ၵဵဝ်ႇၵပ်းလွင်ႈပၢႆးယူႇလီ လႄႈ လွင်ႈၵိၼ်လွင်ႈယႅမ်ႉၸိူဝ်းၼႆႉ ၶဝ်တိုၵ်ႉမီးလွင်ႈတၢင်းမႆႈၸႂ်ယူႇလႄႈ ႁဝ်းၶႃႈၵေႃႈ ၸင်ႇလႆႈၶတ်းၸႂ်ႁႃငိုၼ်းၵွင်ၵၢင်သေ ၵႂႃႇၸွႆႈထႅမ် ။  မိူၼ်ၼင်ႇၾၢႆႇမေႃယႃၶဝ် လႆႈၵႂႃႇၸွႆႈၵူတ်ႇထတ်းပၼ် ပၢႆးယူႇလီလႄႈ လႆႈၸွႆႈထႅမ်ပၼ်ယႃႈယႃၵူႈၸိူဝ်း ။ ၶူဝ်းၶွင်ဢၼ်လႆႈၵႂႃႇၸွႆႈထႅမ်ၼၼ်ႉ ၼင်ႇၵႃႈဢဵၼ်ႁႅင်းႁဝ်းၶႃႈသေ ၶူဝ်းၶွင်ၸႂ်ႉတိုဝ်း လႄႈတၢင်းၵိၼ်ယႅမ်ႉ မိူၼ်ၼင်ႇၶဝ်ႈသွႆးမႃးမႃႉ ၊ ၵွၼ်ႈသီ ၊ ၽွင်သၵ်ႉၶူဝ်း၊ ယႃႈသီၶဵဝ်ႈ ၊ မႆႉသီၶဵဝ်ႈ ၸိူဝ်းၼႆႉ ။ ၵႃႈၶၼ်ငိုၼ်းမွၵ်ႈ 3 သႅၼ်ပၢႆ ။ မၢင်ၸိူဝ်းၵႂႃႇၸွႆႈထႅမ်ငိုၼ်းလၢႆလၢႆၵေႃႈမီး - ၼၢင်းယိင်း ၼႂ်းၸုမ်းၼၢင်းယိင်း ဢၼ်ၵႂႃႇၸွႆႈထႅမ် ၵေႃႉၼိုင်ႈလၢတ်ႈ ။


ၵူၼ်းပၢႆႈၽေး ၸိူဝ်းလႆႈၸွႆႈထႅမ်ၵႂႃႇၼၼ်ႉ မီးၼပ်ႉႁူဝ်ပၢၵ်ႇ ။ လိူဝ်သေၼၼ်ႉ ၸိူဝ်းတိုၵ်ႉမီးယူႇၼႂ်းထိူၼ်ႇသေ ဢမ်ႇလႆႈတၢင်းၸွႆႈထႅမ်ၵေႃႈ တိုၵ်ႉမီးတင်းၼမ် ။ ၵူၼ်းပၢႆႈၽေးၼႆႉ ၵမ်ႈၼမ်ပဵၼ်မႄႈလုၵ်ႈဢွၼ်ႇ လႄႈမႄႈပႃးတွင်ႉ ၊ ပဵၼ်မႄႈၸိူဝ်းမီးလုၵ်ႈလၢင်း ဢႃႇယု 10 ၶူပ်ႇလူင်းတႂ်ႈၵမ်ႈၼမ်လႄႈ ၵူၼ်းထဝ်ႈ - ၼႆယဝ်ႉ ။


တၢင်းပဵၼ်ဢၼ်လႆႈယူတ်းယႃပၼ်ၼၼ်ႉ ၵမ်ႈၼမ်ပဵၼ်ၶူမ်း ၊ ႁႅင်းလိူတ်ႈဢေႇ ။ ၵမ်ႈၽွင်ႈၵေႃႈၶၢင်းဝႃႈ ၵူၼ်ႉၵူၼ်ႉၶိုၼ်ႈၶိုၼ်ႈ ၶတ်းၵႅင်ႉလႄႈ လႆႈပၼ်ယႃၵိၼ်လႄႈ မၢင်ၸိူဝ်းၵေႃႈ လႆႈသမ်းပၼ်ယႃႈယႃ ၸဵမ်ၸိူဝ်းၼႆႉ ။


ၵဵဝ်ႇၵပ်းလွင်ႈပဵၼ်ပၢင်တိုၵ်းၵၼ်ၼႆႉ ၵူၼ်းဝၢၼ်ႈၶဝ်ပွင်ႉၶၢင်းဝႃႈ - ႁဝ်းၶႃႈဢမ်ႇလႆႈသင်မႃးသေဢိတ်း ၊ သူၼ်ႁႆႈၼႃးၵေႃႈသုမ်း ၊ ထုၵ်ႇဝူဝ်းၵႂၢႆးတဝ်မူတ်းယဝ်ႉ ။ မႄႈထဝ်ႈၵေႃႉၼိုင်ႈၵေႃႈ လၢတ်ႈဝႃႈ - သူၼ်ႁႆႈႁဝ်းၶႃႈ ထုၵ်ႇသိုၵ်းမၢၼ်ႈၶဝ်ယႃႉႁူဝ်ႉသေ ၶဝ်ႈၵႂႃႇယူႇၼႂ်းမၼ်း ။ ယွၼ်ႉၼၼ် ဢမ်ႇၵိုတ်းသင်ယဝ်ႉ ။ ၵမ်ႈၽွင်ႈၵေႃႈဝႃႈ ႁဝ်းၶႃႈၵေႃႈၸႂ်တိတ်းသူၼ်ႁႆႈႁဝ်းယူႇ ၊ မိူဝ်ႈႁဵတ်းတႄႉၶတ်းၸႂ်သေႁဵတ်း ၊ ထိုင်ၶၢဝ်းဢဝ်မၼ်းမႃး သမ်ႉလႆႈပွႆႇၽႃႈပႅတ်ႈသေပၢႆႈ - ၸုမ်းၼၢင်းယိင်းၶဝ် သိုပ်ႇလၢတ်ႈၼႄၼင်ႇၼႆ ။


ၸုမ်းၼၢင်းယိင်းၸိုင်ႈတႆးၼႆႉ ပဵၼ်ၸုမ်းၵွင်ႉသၢၼ်ၵၼ်တင်း ၸုမ်းၵပ်းသၢၼ်လွင်ႈၼၢင်းယိင်းတႆး (SWAN) ယိူင်းဢၢၼ်းပိူဝ်ႈတႃႇပူၵ်းပွင်ၼၢင်းယိင်းလႄႈ လုၵ်ႈဢွၼ်ႇၶဝ် ၼင်ႇႁိုဝ်ပေႃးတေမီးၼမ်ႉၵတ်ႉ ၶိုၼ်ႈတိူဝ်းလိူဝ်မႃးထႅင်ႈ ။