ၸုမ်းတူင်ႇဝူင်းၵူၼ်းလႄႈ ပီႈၼွင်ႉႁႅင်းၵၢၼ်ယၢၼ်မိူင်း ၸတ်းပၢင်ယွၼ်းသူးပၼ် ပီႈၼွင်ႉၵူၼ်းမိူင်းတႆး ၸိူဝ်းလႆႈလူႉႁၢႆတၢႆၵႂႃႇ ၼႂ်းပၢင်တိုၵ်း ဢၼ်တပ်ႉသိုၵ်းမၢၼ်ႈ ပိုတ်ႇၼႃႈသိုၵ်း ၼႂ်းမိူင်းၸိုင်ႈတႆး တီႈၼႂ်းၵဵင်းမႆႇ။ ၽူႈတၢင်တူဝ် ၸုမ်းတူင်ႇဝူင်းတႆး သပ်းလႅင်းၼႄ လွင်ႈယၢပ်ႇၽိုတ်ႇ ပီႈၼွင်ႉၵူၼ်းမိူင်းတႆး။

ပၢင်ယွၼ်းသူးပၼ် ပီႈၼွင်ႉၵူၼ်းမိူင်းတႆး ၸိူဝ်းလႆႈလူႉႁၢႆတၢႆၵႂႃႇ တီႈဝတ်ႉၵူႇတဝ်ႈ ၵဵင်းမႆႇ

မိူဝ်ႈဝၼ်းတီႈ 15/10/2015 (မိူဝ်ႈဝႃး) ၵၢင်ၶမ်ႈယၢမ်း 7 မူင်း၊ ၸုမ်းတူင်ႇဝူင်းၵူၼ်း လႄႈ ပီႈၼွင်ႉႁႅင်းၵၢၼ်ယၢၼ်မိူင်း ၼႂ်းၵဵင်းမႆႇ၊ ၸတ်းပၢင်ယွၼ်းသူး လွင်ႈငမ်းယဵၼ်လႄႈ လူႇတၢၼ်းပၼ် ပီႈၼွင်ႉၵူၼ်းမိူင်းတႆး ၸိူဝ်းလႆႈလူႉႁၢႆတၢႆၵႂႃႇ ၼႂ်းပၢင်တိုၵ်း ဢၼ်တပ်ႉသိုၵ်းမၢၼ်ႈ ပိုတ်ႇၼႃႈသိုၵ်း ၼႂ်းမိူင်းၸိုင်ႈတႆး တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။ ၽူႈမႃးၶဝ်ႈႁူမ်ႈ မီးမွၵ်ႈ 300 ၵေႃႉ- ၼႆယဝ်ႉ။


တီႈပၢင်ယွၼ်းသူးၼႆႉ ၸဝ်ႈၶူးဝႃး ၸဝ်ႈၵွၼ်းဝတ်ႉၵူႇတဝ်ႈ လႆႈပၼ်သိလ်ႁႃႈသဵၼ်ႈသေ လႆႈယွၼ်းသူးပၼ်ပႃး ပီႈၼွင်ႉၵူၼ်းမိူင်းတႆး ၸိူဝ်းလူႉႁၢႆတၢႆၵႂႃႇၼႂ်းပၢင်တိုၵ်း ယွၼ်ႉသိုၵ်းမၢၼ်ႈမႃး ႁၢင်ႈႁႅၼ်းသိုၵ်းလေႃႇတိုၵ်း ယဝ်ႉၽႄမဵတ်ႉတႃႇပၼ်။ ၽူႈဢွၼ်ႁူဝ်ၸတ်းႁဵတ်း ပၢင်ယွၼ်းသူးလူႇတၢၼ်း ၶဝ်လႆႈဢဝ် ၶႅပ်းၽႅၼ်ႇဝီႊၻီႊဢူဝ်ႊ မႃးပိုတ်ႇၼႄ ၵဵဝ်ႇၵပ်းလွင်ႈငဝ်းလၢႆးမိူင်းတႆး၊ မီးပႃးပၢႆႉႁၢင်ႈ (Poster) တိတ်းၸွမ်းၽႃ၊ ၶႅပ်းႁၢင်ႈၸိူဝ်းၼႆႉၵေႃႈ ဢဝ်မႃးၼႄပႃးတီႈ ပၢင်ယွၼ်းသူး- ၼႆယဝ်ႉ။


ၸၢႆးၶိူဝ်းသႅင် ၽူႈတၢင်တူဝ် ၸုမ်းတူင်ႇဝူင်းၵူၼ်းတႆး (Shan CBO) လႆႈသပ်းလႅင်းၼႄ ၵူၼ်းမႃးၶဝ်ႈႁူမ်ႈ ပၢင်ပွႆးဝႃႈ- တင်ႈတႄႇဝၼ်းတီႈ 06/10/2015 တပ်ႉသိုၵ်းမၢၼ်ႈ လႆႈႁၢင်ႈႁႅၼ်းသိုၵ်းလေႃႇတိုၵ်းမႃး တေႃႇထိုင်ဝၼ်းမိူဝ်ႈၼႆႉလႄႈ ၵူၼ်းဝၢၼ်ႈၵူၼ်းမိူင်း ၼႂ်းၸႄႈဝဵင်းၵေးသီး မိူင်းၼွင် မိူင်းသူႈ ႁဵင်ပၢႆ လႆႈပၢႆႈၽေးသိုၵ်း။ ၵမ်ႈၽွင်ႈၵေႃႈလႆႈၵႂႃႇၵိူတ်ႇလဵင်ႉလုၵ်ႈၼႂ်းထိူၼ်ႇ ၼႂ်းႁူၺ်ႈၼႂ်းလွႆ/ ၼႂ်းထမ်ႈၸိူဝ်းၼႆႉ မီးယူႇ 4 ၵေႃႉ။ ယွၼ်ႉပိူဝ်ႈၽေးသိုၵ်းသေ ၵူၼ်းမိူင်းလႆႈထူပ်းတၢင်းယၢပ်ႇၶၢၼ်ၸႂ် လိူဝ်ႁႅင်း။ ယွၼ်ႉၼၼ်လႄႈ တႄႇဢဝ်ၼႆႉၵႂႃႇ ႁႂ်ႈၵူၼ်းမိူင်းၸဵဝ်းလွတ်ႈၽေးသိုၵ်းၼႆႉသေ ႁႂ်ႈလႆႈယူႇၵတ်းၵတ်းယဵၼ်ယဵၼ်၊ ယိူင်းဢၢၼ်းၸိူင်ႉၼႆသေ ၸင်ႇလႆႈၸတ်းပၢင်ယွၼ်းသူးပၼ်- ဝႃႈၼႆ။


ၼႂ်းဝၼ်းတီႈ 15 ၼႆႉၵူၺ်းၼင်ႇၵဝ်ႇ ၸုမ်းတူင်ႇဝူင်းၵူၼ်းတႆး (Shan CBO) လႆႈဢွၵ်ႇလိၵ်ႈပိုၼ်ၽၢဝ်ႇဝႆႉ ဢၼ်မီးၸိုဝ်ႈဝႃႈ- သင်ဝႃႈလူင်ပွင်ၸိုင်ႈ ၼေႇပျီႇတေႃႇ ၶႂ်ႈလႆႈလွင်ႈငမ်းယဵၼ်ၸိုၼ်ႈၸၢင်ႇၸိုင် တၵ်းလႆႈၵိုတ်းယိုတ်း လွင်ႈၽိုတ်ႉႁႅင်းသိုၵ်း ၶဝ်ႈၸူးပိုၼ်ႉတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ၵိုတ်းယိုဝ်းဝႆႉ။ ဢိင်ၼိူဝ် လႆႈဢွၵ်ႇလိၵ်ႈပိုၼ်ၽၢဝ်ႇၼႆႉသေ ၽူႈၸတ်းပၢင်ယွၼ်းသူးၶဝ် လႆႈဢၢၼ်ႇၼႄတီႈၼႂ်းပၢင်ယွၼ်းသူး ၾၢႆႇဢိင်းၵလဵတ်ႈ၊ ၾၢႆႇမၢၼ်ႈ တင်းၾၢႆႇတႆး- ၼႆယဝ်ႉ။


ၸၢႆးႁၵ်ႉ ၵူၼ်းၶဝ်ႈႁူမ်ႈပၢင်ယွၼ်းသူး လၢတ်ႈၼႄဝႃႈ- ဝၢႆးလင်ၶဝ်ဢၢၼ်ႇၼႄ လိၵ်ႈပိုၼ်ၽၢဝ်ႇယဝ်ႉ ႁဝ်းၶႃႈၵူၼ်းမႃးၶဝ်ႈႁူမ်ႈပၢင်ပွႆး လႆႈဢွၼ်ၵၼ်တႆႈတဵၼ်းသေ လဵပ်ႈၸေႇၻီႇၵွင်းမူး ၼႂ်းဝၢင်းဝတ်ႉၵူႇတဝ်ႈ 3 ႁွပ်ႈ၊ ယဝ်ႉၵေႃႈလႆႈယွၼ်းသူးပၼ် ႁႂ်ႈၵူၼ်းမိူင်းတႆးပူၼ်ႉလွတ်ႈၽေးသိုၵ်း/ လႆႈယူႇလီ ၵတ်းယဵၼ်ဝႆးဝႆး- ဝႃႈၼႆ။


ပၢင်တႆႈတဵၼ်း ယွၼ်းသူးၼႆႉ ၸုမ်းတူင်ႇဝူင်းၵူၼ်းတႆး (Shan CBO) ဢၼ်ႁွတ်ႈတီႈဝဵင်းၵဵင်းမႆႇ ၸိုင်ႈထႆး တင်းမူတ်း 18 ၸုမ်း လႆႈဢွၼ်ၵၼ်ၸတ်းႁဵတ်း။ ၸုမ်းတူင်ႉၼိုင် တူင်ႇဝူင်းၵူၼ်း 18 ၸုမ်းၼၼ်ႉ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ။ ၸုမ်းပူၵ်းပွင်ၸိုင်ႈတႆး (SSDF) ၊ ၸုမ်းသိင်ႇဝႅတ်ႉလွမ်ႉၸိုင်ႈတႆး (SSEO) ၊ သိုဝ်ႇႁႅင်းၼုမ်ႇ (SYP) ၊ ၸုမ်းၵပ်းသၢၼ်လွင်ႈၼၢင်းယိင်းတႆး (SWAN) ၊ ၸုမ်းႁႅင်းၵၢၼ်ၽွမ်ႉႁူမ်ႈ (WSA) ၊ ႁူမ်ႈတုမ်ႁႅင်းၵၢၼ်ယၢၼ်မိူင်း (MWF) ၊ ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ။ ၵေႃလိၵ်ႈလၢႆးလႄႈၾိင်ႈငႄႈတႆး မိူင်းသူႈ။ ၸုမ်းၵပ်းသၢၼ်ၵူၼ်းၼုမ်ႇတႆး (SYNG) ၊ ၸုမ်းႁႅင်းတႆးၼုမ်ႇ (SYPG) ၊ တုမ်းတူၼ်ႈတႆး၊ ၶွမ်ႊမတီႊၵူၼ်းပၢႆႈၽေးတႆး၊  ၸုမ်းၵူၼ်းပၢႆႈၽေး ၵုင်းၵျေႃႇ၊ ၸုမ်းၵူၼ်းၼုမ်ႇတႆး၊ မုၵ်ႉၸုမ်းၸၢဝ်းၶိူဝ်းတႆး၊ ႁူမ်ႈတုမ်လုၵ်ႈႁဵၼ်းတႆး ၵဵင်းမႆႇ၊ ၸုမ်းၵပ်းသၢၼ် ၸဝ်ႈႁႆႈၸဝ်ႈၼႃးတႆး ၸိူဝ်းၼႆႉ။


ပၢင်ယွၼ်းသူးၼႆႉ လႆႈၸတ်းႁဵတ်းၼႂ်းဝၼ်းတီႈ 15/10/2015 ဝၼ်းလဵဝ်ၵၼ် ဢၼ်ၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ 8 ၸုမ်းလႄႈ လူင်ပွင်ၸိုင်ႈမၢၼ်ႈ လႆႈလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ဢၼ်ၸတ်းႁဵတ်းတီႈ ၼေႇပျီႇတေႃႇ။


ၸိူင်ႉၼင်ႇပၢင်ယွၼ်းသူးပွၵ်ႈၵမ်းၼႆႉ မိူဝ်ႈပီၵၢႆ ၽွင်းလိူၼ် 11 မူၼ်း ၶၢဝ်းဢွၵ်ႇဝႃႇၼၼ်ႉၵေႃႈ လႆႈၸတ်းႁဵတ်းတီႈ ဝတ်ႉၵူႇတဝ်ႈ မိူင်းၵဵင်းမႆႇၼင်ႇၵဝ်ႇ။ ၽွင်းမိူဝ်ႈၼၼ်ႉ မႅၼ်ႈၽွင်းႁူဝ်ပဝ်ႈ ပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး ဢိၵ်ႇတင်း ၽူႈၼမ်းၼႃႈ ပႃႊတီႊမႂ်ႇသုင်ၸိုင်ႈတႆး (SSPP) ၸွမ်ႁၢၼ်သိူဝ်ထႅၼ်ႈ ၵေႃႈလႆႈႁွတ်ႈဝႆႉ တီႈဝဵင်းၵဵင်းမႆႇသေ ၶဝ်ၸဝ်ႈၵေႃႈလႆႈၶဝ်ႈႁူမ်ႈ ယွၼ်းသူးပၼ်ပႃးယူႇ။